ཨུ་རུ་སུའི་སྲིད་འཛིན་པུ་ཌིན་གྱི་སྡོད་སྒར་དུ་དྲག་རྒོལ་བྱས་ཡོད་ལུགས་བསྒྲགས།

ཨུ་རུ་སུའི་སྲིད་འཛིན་པུ་ཌིན་གྱི་སྡོད་སྒར་དུ་མཁའ་དབྱིངས་ལྟ་ཞིབ་བརྙན་ཆས་ (Drone)བརྒྱུད་འབར་གད་ཀྱི་དོན་རྐྱེན་ཆུང་ཆུང་ཞིག་བྱུང་ཡོད་པ་དེ་ཡུ་ཁེ་རིན་གྱི་ལྐོག་ཇུས་ཡིན་པར་བསྙད་ཡོད་ཀྱང་ཡུ་ཁེ་རིན་གྱི་སྲིད་འཛིན་ཛེ་ལེན་སི་ཀིས་རང་ས་སྲུང་སྐྱོབ་བྱེད་ཀྱི་ཡོད་པ་ལས་དྲག་རྒོལ་རིགས་བྱས་མེད་སྐོར་བརྗོད་ཡོད་པ་རེད།

Russian social media videos appearing to show Kremlin drone attack

ཟླ་འདིའི་ཕྱི་ཚེས་ ༢ ཉིན་གྱི་མཚན་མོར་ཨུ་རུ་སུའི་སྲིད་འཛིན་པུ་ཌིན་གྱི་མོ་སི་ཁོའི་ཀི་མི་ལིན་(Kremlin) གྱི་སྡོད་སྒར་རྩེ་ཐོག་ཏུ་འབར་གད་ཀྱི་དོན་རྐྱེན་ཆུང་ཆུང་ཞིག་བྱུང་ཡོད་ཅིང་། ཨུ་རུ་སུའི་སྲིད་འཛིན་ལས་ཁུངས་ནས་དོན་རྐྱེན་དེ་ནི་ཡུ་ཁེ་རིན་གྱིས་པུ་ཌིན་ལྐོག་གསོད་བྱ་རྒྱུའི་ཇུས་ངན་འདིང་བ་ཞིག་ཡིན་སྐོར་བསྒྲགས་འདུག ཡིན་ནའང་། ཁ་སང་ཡུ་ཁེ་རིན་གྱི་སྲིད་འཛིན་ཝོ་ལོ་ཌི་མིར་ཛེ་ལེན་སི་ཀི་ (Volodymyr Zelensky) ལགས་ཀྱིས། ང་ཚོས་པུ་ཌིན་ནམ་ཨུ་རུ་སུ་ལ་དྲག་རྒོལ་གཏན་ནས་བྱས་མེད། ང་ཚོའི་རང་སྐྱོང་ས་ཁུལ་གྱི་ཆེད་དུ་འཐབ་འཛིང་བྱེད་མུས་ཡིན་ལ། ང་ཚོའི་གྲོང་ཁྱེར་དང་གྲོང་གསེབ་དེ་དག་ལ་འགེབ་སྲུང་བྱེད་མུས་ཡིན། ཞེས་བརྗོད་འདུག་ལ། ད་ལྟའི་ཆར་དོན་རྐྱེན་དེར་ཞིབ་འཇུག་བྱེད་མུས་ཡིན་པས་འབྱུང་རྐྱེན་ཅི་ཡིན་གསལ་ཁ་མེད་པ་རེད།

པུ་ཌིན་གྱི་སྡོད་སྒར་རྩེ་ཐོག་ཏུ་དོན་རྐྱེན་བྱུང་སྐབས། པུ་ཌིན་མོ་སི་ཁོ་ཡི་ཉེ་འགྲམ་དུ་ཡོད་པའི་ནོ་ཝོ་ཨོ་གྷར་ཡོ་ཝོ་ (Novo-Ogaryovo)ཞེས་པའི་སྡོད་སྒར་དུ་ཡོད་པས་མི་རྒྱུ་གཉིས་ལ་གནོད་སྐྱོན་གང་ཡང་ཐེབས་མི་འདུག་ལ། ཡུལ་དངོས་ཀྱི་བརྙན་ཐུང་ཁག་གི་ནང་དུ་མཁའ་དབྱིངས་ལྟ་ཞིབ་བརྙན་ཆས་ཤིག་པུ་ཊིན་གྱི་སྡོད་སྒར་སྒང་དུ་འཕུར་ནས་མེ་སྟག་ཅུང་ཟད་མཆེད་ནས་མེ་འབར་བ་ལས་དྲག་རྒོལ་རིགས་ཀྱི་དོན་རྐྱེན་ཚབས་ཆེན་ཞིག་ཡིན་པའི་མཐོང་སྣང་ཞིག་མི་མང་པོར་འབྱུང་གི་མེད་པ་རེད།

གནད་དོན་དབྱེ་ཞིབ་པ་མང་པོ་ཞིག་གིས། ད་ལྟ་ཡུ་ཁེ་རིན་གྱི་རྒྱལ་མཚམས་སུ་ཨུ་རུ་སུས་བཙན་འཛུལ་བྱེད་མུས་ཡིན་པའི་ཁར། སྲིད་འཛིན་ཝོ་ལོ་ཌི་མིར་ཛེ་ལེན་སི་ཀི་ལགས་ཀྱང་རྒྱལ་ཁབ་གཞན་དུ་གཞུང་འབྲེལ་གྱི་འཚམས་གཟིགས་སུ་སྐྱོད་མུས་ཡིན་པ་མ་ཟད། ཡུ་ཁེ་རིན་ནས་རྒྱལ་ས་མོ་སི་ཁོ་བར་སྤྱི་ལེ་ ༤༥༠ ལྷག་ཡོད་པས། ཡུ་ཁེ་རིན་གྱིས་དྲག་རྒོལ་གྱི་ལས་དོན་ཞིག་སྤེལ་མི་སྲིད་ཀྱང་། ཨུ་རུ་སུས་མཁའ་དབྱིངས་ལྟ་ཞིབ་བརྙན་ཆས་བརྒྱུད་དྲག་རྒོལ་བྱས་ལུགས་བསྒྲགས་པ་དེའི་རྒྱབ་ལྗོངས་སུ་ལྐོག་གྱུར་གྱི་ཐབས་ཇུས་ངན་པ་ཞིག་ཡོད་སྲིད་པའི་ཚོད་དཔག་ཀྱང་བྱེད་ཀྱི་ཡོད་འདུག

ཁ་སང་ཕྱི་ཚེས་ ༣ ཉིན་སྲིད་འཛིན་ཝོ་ལོ་ཌི་མིར་ཛེ་ལེན་སི་ཀི་ལགས་ཀྱིས་ཧྥིན་ལེན་ཌི་རྒྱལ་ས་ཧེལ་སིན་ཀི་ (Helsinki) རུ་ཧྥིན་ལེན་ཌིའི་སྲིད་འཛིན་སའོ་ལི་(Sauli Niinistö) དང་མཇལ་ཕྲད་བྱས་ཏེ། ཨུ་རུ་སུས་ཡུ་ཁེ་རིན་ལ་བཙན་འཛུལ་བྱེད་མུས་ཡིན་པའི་དུས་སྐབས་འདིར་ཡུ་རོབ་བྱང་ཕྱོགས་མི་རིགས་ཀྱི་རྒྱལ་ཁབ་ (The Four Nordic countries ) བཞི་པོས་མུ་མཐུད་དམག་དོན་མཚོན་ཆ་སོགས་ཀྱི་ཐད་ནས་རོགས་སྐྱོར་བྱ་དགོས་པའི་རེ་སྐུལ་ཞུས་འདུག་ལ། དེ་བཞིན་ཁོང་གིས་ན་ཐར་ལེན་ཌིའི་སྲིད་འཛིན་སོགས་ལ་མཇལ་འཕྲད་བྱས་ནས། ཨུ་རུ་སུའི་ཁྲིམས་མཐུན་མིན་པའི་བཙན་འཛུལ་ལ་རྒྱབ་སྐྱོར་བྱ་དགོས་པའི་རེ་སྐུལ་ཞུ་རྒྱུ་ཡིན་འདུག

རའོ་ཊིར་སི་གསར་ཁང་གིས་གནས་ཚུལ་སྤེལ་བ་ལྟར་ན། འདས་པའི་ལོ་གཅིག་དང་ཟླ་ཤས་རིང་ཨུ་རུ་སུས་ཡུ་ཁེ་རིན་ལ་བཙན་འཛུལ་བྱས་པའི་དམག་འཐབ་ཁྲོད་ཉུང་མཐར་མི་གྲངས་ཁྲི་ ༦ ལྷག་གི་ཚེ་སྲོག་ཤོར་ཡོད་པ་དང་། མི་ཁྲི་ ༤ མ་ཟིན་ཙམ་ལ་རྨས་སྐྱོན་ཕོག མི་ ༡༥༠༠༠ ལྷག་གར་སོང་ཆ་མེད་དུ་གྱུར་ཡོད་པ་དང་། མི་གྲངས་ས་ཡ་དུ་མར་གནས་ཡུལ་མེད་པ་བཟོས་ཡོད་འདུག་ལ། ཁ་སང་ཕྱི་ཚེས་ ༣ ཉིན་གཅིག་པུར་ཨུ་རུ་སུས་ཡུ་ཁེ་རིན་གྱི་ཤར་ཕྱོགས་གྱི་གྲོང་ཁྱེར་ཀར་སོན་ (Kherson) གྱི་མེ་འཁོར་འབབ་ཚུགས་དང་། མི་མང་གི་སྡོད་སྒར། སྣུམ་ཚིགས་སོགས་སུ་གཏོར་རྒོལ་བྱས་ཏེ། ཉུང་མཐར་ཡུ་ཁེ་རིན་གྱི་མི་མང་དཀྱུས་མ་གྲངས་ ༢༡ དམར་གསོད་དང་། མི་གྲངས་ ༤༨ ལ་གནོད་འཚེ་ཚབས་ཆེན་ཐེབས་ཡོད་འདུག