རྒྱ་ནག་གི་ས་ཁྲ་གསར་པར་རྒྱལ་ཁབ་དྲུག་གིས་ངོ་རྒོལ་བསྒྲགས་གཏམ་སྤེལ།

རྒྱ་ནག་གཞུང་གིས་རྒྱ་སྐྱེད་རང་བཞིན་གྱི་དགོས་མཁོར་དམིགས་ནས་བཟོས་པའི་ས་ཁྲ་གསར་པ་དེར་རྒྱ་གར་དང་ལྷོ་རྒྱ་ནག་རྒྱ་མཚོའི་འདབས་འབྲེལ་གྱི་རྒྱལ་ཁབ་དྲུག་གིས་ངོ་རྒོལ་ཤུགས་ཆེན་བྱེད་བཞིན་ཡོད་འདུག

ཟླ་འདིའི་ཕྱི་ཚེས་ ༢༨ ཉིན་རྒྱ་ནག་གཞུང་གིས་རྒྱ་གར་གྱི་ཨ་རུ་ན་ཅལ་མངའ་ཁུལ་དང་བྱང་ཤར་མཐའ་མཚམས་ཨག་སའི་ཆིན་ས་ཁུལ་ཙམ་མ་ཟད། ལྷོ་རྒྱ་ནག་རྒྱ་མཚོའི་ཁུལ་གྱི་རྩོད་རྙོག་ཆེ་བའི་ས་འབྲེལ་དགུའི་ས་ཐིག་(nine-dash line) ཟེར་བའི་མཚོ་ཡུལ་བཅས། ཐའེ་ཝན་ཚུད་པའི་ལྷོ་རྒྱ་ནག་རྒྱ་མཚོའི་བརྒྱ་ཆ་ ༩༠ ཙམ་གྱི་བདག་དབང་རྒྱ་ནག་ལ་ཡོད་པའི་བརྡ་ལན་བསྟན་ཏེ་ས་ཁྲ་གསར་པའི་བཅུག་ཡོད་པར་བརྟེན། རྒྱ་གར་དང་། མཚོ་ཁུལ་གྱི་འདབས་འབྲེལ་རྒྱལ་ཁབ་ཐའེ་ཝན་གཙོ་བྱས་པའི་ཝེ་ཏི་ནམ་དང་། ཧྥི་ལི་ཕིན། མ་ལི་ཞི་ཡ། བྷིར་ནེའུ་ (Brunei) བཅས་ཀྱིས་རྒྱ་ནག་གཞུང་གི་བྱེད་སྟངས་དེར་མཐའ་གཅིག་ཏུ་ངོ་རྒོལ་ཡོད་པའི་བསྒྲགས་གཏམ་སྤེལ་འདུག

ཁ་སང་ཧྥི་ལི་ཕིན་གཞུང་གིས་རྒྱ་ནག་གཞུང་ནས་རྒྱལ་སྤྱིའི་ཁྲིམས་དང་ཕྱི་ལོ་ ༢༠༡༦ ལོར་(arbitral rulling)ལྷོ་རྒྱ་ནག་རྒྱ་མཚོའི་ཁུལ་ཡོངས་རྫོགས་ཀྱི་བདག་དབང་རྒྱ་ནག་ལ་ཡོད་པར་བཤད་པ་དེར་ཁྲིམས་ལུགས་ཀྱི་རྒྱབ་རྟེན་ཅི་ཡང་མི་འདུག་ཅེས་ཡོངས་ཁྱབ་ཐག་གཅོད་གནང་ཡོད་པ་ལྟར། རྒྱ་ནག་གཞུང་གིས་འགན་འཁུར་ཡོད་པའི་ཐོག་ནས་ཐག་གཅོད་དེར་བརྩི་འཇོག་བྱེད་དགོས་པའི་འབོད་སྐུལ་ནན་པོ་གནང་འདུག ཧྥི་ལིན་ཕིན་གྱི་ཕྱི་སྲིད་བློན་ཆེན་ཨན་རི་ཁེ་མཱ་ནཱ་ལོ་(Enrique Manalo) མཆོག་གིས་རྒྱ་གཞུང་གིས་ཧྥི་ལི་ཕིན་གྱི་འདབས་འབྲེལ་བདག་འཛིན་བྱེད་པའི་ཁུངས་སྐྱེལ་བྱེད་པར་རྒྱལ་སྤྱིའི་ཁྲིམས་ལུགས་ཀྱི་གཞི་འཛིན་ས་མི་འདུག་ཅེས་བརྗོད་འདུག

ཕྱི་ཟླ་ ༨ ཚེས་ ༣༠ ཉིན་མཱ་ལེ་ཞི་ཡའི་ཕྱི་སྲིད་བློན་ཆེན་ཛམ་བྷི་རི་ཨབ་དུལ་( Zambry Abdul Kadir)མཆོག་གིས་རྒྱ་གཞུང་གི་ས་ཁྲ་གསར་པ་དེའི་ཐད་གསར་འགོད་གསལ་བསྒྲགས་ཤིག་གནང་ཡོད་པའི་ནང་དུ། མཱ་ལེ་ཞི་ཡས་རྒྱ་ནག་གི་ས་ཁྲ་གསར་པ་དེ་ཁྲིམས་མཐུན་གྱི་དབང་འཛིན་ཐོབ་པ་ཞིག་ཏུ་ངོས་ལེན་བྱེད་ཀྱི་མེད། ལྷོ་རྒྱ་ནག་རྒྱ་མཚོ་ནི་ཧ་ཅང་རྙོག་འཛིང་ཆེ་བའི་གནད་དོན་ཞིག་ལ་ངོས་འཛིན་བྱེད་ཀྱི་ཡོད་ཅེས་བརྗོད་འདུག་ལ། གཟའ་ཕུར་བུའི་ཉིན་ཝེ་ཐི་ནམ་གྱི་ཕྱི་སྲིད་མགྲིན་ཚབ་པ་ཕཱམ་ཐུ་ཧང་(Pham Thu Hang)་ལགས་ཀྱིས་བསྒྲགས་གཏམ་ཞིག་སྤེལ་བའི་ནང་དུ། རྒྱ་ནག་གཞུང་གིས་ཝི་ཐི་ནམ་གཞུང་དང་རྒྱལ་སྤྱིའི་ཁྲིམས་ལུགས་བརྩིས་མེད་བཏང་སྟེ་བཟོས་པའི་ས་ཁྲ་གསར་པ་དེར་གཞི་འཛིན་སའི་རིན་ཐང་གང་ཡང་མི་འདུག རྒྱ་ནག་གཞུང་གིས་ཤར་རྒྱ་ནག་རྒྱ་མཚོའི་འབྲེལ་ཐིག་ཏུ་བརྩིས་ནས་བཅད་དེ་བདག་དབང་ཡོད་པར་བཤད་པ་ངོས་ལེན་གཏན་ནས་མེད། མཚོ་ཁ་རུ་ཝི་ཐི་ནམ་གྱི་ཉ་བའི་གྲུ་གཏོར་བཤིག་བཏང་བར་ངོ་རྒོལ་བྱེད་ཀྱི་ཡོད་ཅེས་རྒོལ་གཏམ་བསྒྲགས་འདུག དེ་བཞིན་ཐའེ་ཝན་ཕྱི་སྲིད་མགྲིན་ཚབ་པ་ཇེ་ཧྥི་ལུའུ་(Jeff Liu ) ལགས་ཀྱིས། ཐའེ་ཝན་ནི་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་ཆ་ཤས་གཏན་ནས་མིན། རྒྱ་གཞུང་གིས་ཐའེ་ཝན་རང་བཙན་རྒྱལ་ཁབ་ལ་དམིགས་ཡུལ་གང་འདྲ་བཟུང་ཡང་། ང་ཚོའི་རྒྱལ་ཁབ་ཀྱི་དངོས་ཡོད་གནས་སྟངས་ཐད་འགྱུར་བ་གང་ཡང་ཐེབས་ཀྱི་མ་རེད་ཅེས་བརྗོད་འདུག

ས་ཁྲ་གསར་པ་དེའི་ཐད་རྒྱ་གར་གྱི་བརྒྱུད་ལམ་ཁག་ཏུ་བགྲོ་གླེང་ཤུགས་ཆེན་བྱེད་བཞིན་ཡོད་པའི་ཁྲོད། གཟའ་མིག་དམར་ཉིན་རྒྱ་གར་གྱི་ཕྱི་སྲིད་བློན་ཆེན་ཇའེ་ཤན་ཁར (Subrahmanyam Jaishankar) མཆོག་གིས། རྒྱ་ནག་གིས་ཨ་རུ་ན་ཅལ་མངའ་ཁུལ་དང་རྒྱ་གར་གྱི་བྱང་ཤར་མཐའ་མཚམས་ཨག་སའི་ཆིན་(Aksai Chin) ཁུལ་རྒྱ་ནག་གི་ས་ཁོངས་ཡིན་ཟེར་བར་རྒྱ་གར་གྱིས་ངོས་ལེན་རྩ་བ་ནས་མེད་པ་མ་ཟད། མཐའ་གཅིག་ཏུ་ངོ་རྒོལ་བྱེད་ཀྱི་ཡོད་ཅེས་ལན་འདེབས་གནང་འདུག་ལ། རྒྱ་གར་གཞུང་ཚབ་ཟུར་པ་ལྕམ་མཱན་ཇུ་སེ་ཐི་(Manju Seth )ལགས་ཀྱིས་རྒྱ་གར་གཞུང་གི་ངོས་ནས་བོད་དང་ཐེ་ཝན་གཉིས་རང་བཙན་གཙང་མའི་རྒྱལ་ཁབ་ཏུ་ངོས་འཛིན་བྱ་རྒྱུ་ནི་རྒྱ་ནག་ལ་ཁ་གཏོད་གཅོག་པའི་ཐབས་ལམ་ཡག་ཤོས་དེ་ཡིན་སྐོར་བརྗོད་འདུག

 རྒྱ་ནག་གི་ས་ཁྲ་གསར་པའི་གནད་དོན་འདི་ནི་རྒྱ་གར་སྲིད་བློན་མུ་དྷི་དང་ཞི་ཅིན་ཕིན་གཉིས་(BRICS) ཚོགས་ཆེན་གྱི་ཟུར་དུ་ཐུག་སྟེ་ས་མཚམས་རྩོད་རྙོག་སྐོར་གླེང་སློང་བྱས་རྗེས་བྱུང་བ་ཞིག་ཡིན་པ་དང་། བདུན་ཕྲག་རྗེས་མར་རྒྱ་གར་ནང་འཛམ་གླིང་སྟོབས་ཆེན་རྒྱལ་ཁབ་ ༢༠ ཡི་ཚོགས་ཆེན་འཚོག་འཆར་ཡོད་ཀྱང་། རྒྱ་ནག་གི་སྲིད་འཛིན་ཞི་ཅིན་ཕིན་ཚོགས་ཆེན་ཐོག་བཅར་རྒྱུ་ཡིན་མིན་དང་། ཁོང་གི་ཚབ་ཏུ་རྒྱ་ནག་གི་སྲིད་བློན་ལི་ཆང་ཡོང་རྒྱུ་ཡིན་མིན་ཐད་གསལ་ཁ་བྱུང་མི་འདུག

གསར་འགོད་པ། བྱམས་པ་ཚེ་རིང་།