བོད་ནང་གི་ཛ་དྲག་གི་གནས་སྟངས་ལ་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་སྤྱི་མོས་གཏན་འབེབས་གནང་། 

བོད་ནང་གི་ཛ་དྲག་གི་གནས་སྟངས་ལ་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་དོན་ཚན་བདུན་ལ་སྤྱི་མོས་གཏན་འབེབས་བྱུང་། 

དེ་རིང་བོད་མི་མང་སྤྱི་འཐུས་ལྷན་ཚོགས་སྐབས་ ༡༧ པའི་གྲོས་ཚོགས་ཚོགས་དུས་དྲུག་པའི་ལས་ཉིན་གཉིས་པའི་ཚོགས་དུས་གཉིས་པའི་སྟེང་། བོད་ནང་གི་ཛ་དྲག་གི་གནས་སྟངས་ལ་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་དོན་ཚན་བདུན་ལ་སྤྱི་མོས་གཏན་འབེབས་བྱུང་བ་དང་བསྟུན། ཆོས་རིག་ལས་ཁུངས་ཀྱི་ལས་བསྡོམས་ཐོག་གཞུང་འབྲེལ་བགྲོ་གླེང་དབུ་འཛུགས་ཞུས་སོང་། 

བོད་ནང་གི་ཛ་དྲག་གནས་སྟངས་དང་འབྲེལ་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། བདེ་སྲུང་ལས་ཁུངས་བརྒྱུད་ནས་བཀའ་ཤག་གིས་བོད་ནང་ཛ་དྲག་གི་གནས་སྟངས་ལ་གང་ཤེས་ཤེས་དང་གང་ཐུབ་ཐུབ་ཀྱིས་རྟོགས་ཞིབ་བྱེད་ཀྱི་ཡོད། དེ་དག་སྲིད་ཇུས་ཉམས་ཞིབ་ཁང་གིས་དཔྱད་ཞིབ་དང་། ཕྱི་དྲིལ་ལས་ཁུངས་བརྒྱུད་ནས་འཛམ་གླིང་ལ་ཁྱབ་བསྒྲགས་བྱ་རྒྱུ་དེ་རེད། ལས་འགན་འདི་དག་བཀའ་ཤག་གི་ནུས་པ་གཞིར་བཟུང་གནས་ཚུལ་འཚོལ་སྒྲུབ་དང་། དཔྱད་ཞིབ་བྱ་དགོས་པ་བྱས་ཏེ། སྐབས་ག་དུས་ག་རེ་བྱ་དགོས་མིན་བལྟས་དང་ལྟ་བཞིན་པ་ཡིན། བཀའ་ཤག་གིས་བོད་ནང་གི་གནས་ཚུལ་དེ་དག་འཛམ་གླིང་གི་ལས་ཁུངས་སོ་སོ་དང་། མི་སྣ་སོ་སོར་མཁོ་སྤྲོད་བྱེད་བསྡད་ཡོད། སྤྱི་འཐུས་རྒྱུན་ལས་ཀྱིས་བསྣམས་ཕེབས་པའི་ཡིག་ཆའི་མགོ་ནས་མཇུག་བར་རྒྱ་ནག་གཞུང་གིས་བོད་ནང་དུ་སྲིད་ཇུས་དང་སྲིད་ཇུས་དེ་དག་གི་འོག་ནས། བོད་ཀྱི་སྣོད་བཅུད་གཉིས་ཀ་གཏོར་བཤིག་དང་མེད་པ་བཟོ་ཡི་ཡོད་པ་ཞིག་གསལ་པོ་ཞིག་བཀོད་འདུག་པས། དེ་དག་རེ་རེ་བྱས་ནས་ཞུ་མི་དགོས་པར་བྱོས། ཕྱོགས་ཡོངས་ནས་བཤད་ན། རྒྱ་ནག་གཞུང་གིས་བོད་ནང་གི་བོད་མིར་དམ་དྲག་དང་གཅིག་གིས་གཅིག་ལ་སོ་ལྟ་བྱ་རུ་བཅུག་ནས། བོད་ནང་གི་བོད་མི་ཚོས་ཆབ་སྲིད་ཀྱི་ལས་འགུལ་གང་ཡང་སྤེལ་ཡ་མེད་པའི་གནས་བབ་ཅིག་གྱུར་ཡོད་པ་འདི། འཛམ་གླིང་གིས་ཤེས་དགོས་པ་འདི་ང་ཚོས་(བཀག་ཤག)འགྲེལ་བཤད་ཞུས་དང་ཞུ་མུས་ཡིན། ཉེ་བའི་ཆར་བོད་ནང་གི་གནས་ཚུལ་གོ་ཡ་མི་འདུག་ཟེར་བའི་དྲི་བ་མང་པོ་ཞིག་བསླེབས་བསྡད་ཡོད་རེད། དེར་བརྟེན་ང་ཚོ་ག་བར་ཕྱིན་ནའང་བོད་ནང་དུ་ཆབ་སྲིད་ཀྱི་ཁོར་ཡུག་མེད་པ། ཆབ་སྲིད་ཀྱི་ལས་འགུལ་སྤེལ་བ་ཡིན་ན། སོ་སོ་ཙམ་དུ་མ་ཡིན་པར་མིང་སྲིང་ཉེ་འབྲེལ་ཚང་མར་དཀའ་ངལ་འཕྲད་ཀྱིན་ཡོད་པ་དེ་དག་ཀྱང་། དེང་གི་བཅོས་པའི་འཕྲུལ་རིག་བེད་སྤྱད་བྱས་ནས་རིགས་རྫས་བརྟག་ཞིབ་དང་། མིག་ལྕིབས་ཀྱི་གཤེར་པར་བླངས་ཏེ་བེད་སྤྱོད་གང་འདྲ་གཏོང་གིན་ཡོད་མེད་དང་། དེ་བཞིན་རིགས་རྫས་ཀྱི་ཐད་ནས་མི་ཞིག་གི་རིགས་རྫས་བླངས་ཚར་བའི་རྗེས་ལ་མི་གཅིག་གིས་ཆབ་སྲིད་ཀྱི་ལས་འགུལ་ཞིག་སྤེལ་བ་ཡིན་ན། དེའི་ཉེ་འབྲེལ་དག་རིགས་རྫས་བརྒྱུད་ནས་ཤེས་ཀྱི་ཡོད་ཙང་། ཁོང་ཅག་གི་ཉེ་ས་རྣམས་ལ་དོགས་གཞི་རིམ་པ་དང་པོར་རྩིས་པའི་ཐོག་ནས། འཛིན་བཟུང་བཙན་ཁྲིད་དང་། གནད་དོན་དེ་དག་ཆེད་རྒྱ་ནག་གཞུང་གིས་བོད་མིའི་རིགས་རྫས་བེད་སྤྱོད་གཏོང་གི་ཡོད་པ་དག་གཅིག་གཅིག་གཉིས་གཉིས་འགྲེལ་བཤད་ཞུ་ཡི་ཡོད། ཅེས་གསུངས་སོང་། 

སྲིད་སྐྱོང་མཆོག་གིས། རྒྱ་ནག་གཞུང་གིས་ཆོས་ཕྱོགས་ཀྱི་ཐོག་ནས་བོད་ནང་གི་དགོན་སྡེ་ཁག་གི་གྲྭ་བཙུན་སྔགས་གསུམ་གྱི་གྲངས་ཚད་ཉུང་དུ་འགྲོ་མུས་ཡིན་པ་བཤད་མི་དགོས་པའི་ཁར། དགོན་པའི་ལས་དོན་སྟངས་འཛིན། དགོན་སྡེ་ཁག་གི་བསླབ་གཞི་བསྐྱར་བཅོས། དགོན་པ་ནང་སོ་ལྟ་བྱ་ཆེད་འཕྲུལ་རིག་གསར་འཛུགས་དང་། གྲྭ་བཙུན་གྱི་འགྲོ་འོང་ལ་དཀའ་ངལ། དེ་བཞིན་སྤྲུལ་སྐུ་ངོས་འཛིན་སོགས་ཀྱི་སྐོར་རྒྱལ་སྤྱིའི་ནང་ཞུས་མུས་ཡིན། དེ་བཞིན་རྒྱ་ནག་གཞུང་གིས་དེང་གི་ཆར་བོད་ནང་གི་དགོན་སྡེ་ཁག་ལ་ཆེད་དམིགས་བྱས་ནས། བོད་ནང་གི་དགོན་སྡེ་ཁག་ལ་ཆོས་དོན་དང་འབྲེལ་བའི་ཐོག་ནས་སྲོལ་ཡིག་དང་བཅའ་ཡིག་མང་པོ་ཞིག་ལ་འགྱུར་བ་གཏོང་མུས་ཡིན་པ་རེད། ཕྱོོགས་ཡོངས་ནས་རྒྱ་ནག་གཞུང་གིས་བོད་ནང་དུ་ཆོས་དང་འབྲེལ་བ་ཡོད་པ་དང་། སྐད་ཡིག་དང་འབྲེལ་བ། མི་རིགས་ཀྱི་ངོ་བོ་གང་དང་འབྲེལ་བའི་ཁྲིམས་ཡིག་བསྐྱར་བཅོས་དང་། གསར་གསོ་བྱེད་ཀྱི་ཡོད་ནའང་འདྲ། ད་ལྟའི་རྒྱ་ནག་གཞུང་གི་འོག་ལ་གུ་ཡངས་བའི་བསམ་བློ་མེད་པ་དང་། རྒྱ་ནག་ཁྱོན་ཡོངས་དང་ལྷག་པར་བོད་ནང་གི་ས་ཁུལ་ནང་དམ་དྲག་ཆེ་རུ་འགྲོ་ཡི་ཡོད་པ་དང་། ཤེས་ཡོན་གྱི་ཐོག་ནས་བོད་པའི་ཕྲུ་གུ་རྣམས་ཤེས་ཡོན་དགོས་པ་དང་། ཤེས་ཡོན་སློབ་གསོ་ལ་ང་ཚོས་དགག་པ་རྒྱག་གི་མེད་ཅེས་རྒྱལ་སྤྱིར་ཞུ་ཡི་ཡོད་ཀྱང་། ཤེས་ཡོན་སློབ་གསོའི་ནང་དོན་ཆ་ཚང་ཞིག་བོད་མི་རིགས་ཆ་ཚང་རྒྱ་མི་རིགས་ལ་བསྒྱུར་རྒྱུར་དགག་པ་མཐའ་གཅིག་ཏུ་ཡོད་ཅེས་ཞུ་ཡི་ཡོད། དེ་བརྟེན་བོད་ནང་གི་ཆབ་སྲིད་ཀྱི་གནས་སྟངས་དང་། ཆོས་ཕྱོགས་ཀྱི་གནས་སྟངས། སྤྱི་ཚོགས་ཀྱི་གནས་སྟངས། ཁོར་ཡུག་གི་གནས་བབ་ཐོག་འཛིན་སྐྱོང་གིས་རྒྱལ་སྤྱིར་ཞུ་བསྡད་ཀྱི་ཡོད། ཅེས་གསུངས་སོང་། 

བོད་ནང་གི་ཛ་དྲག་གི་གནས་སྟངས་ལ་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་ཁྲོད། བོད་ས་ཤོར་ནས་ད་བར་རྒྱ་ནག་དམར་གཞུང་གི་བཙན་གནོན་དང་སྡུག་སྦྱོང་མནར་གཅོད་འོག་བོད་བསྟན་སྲིད་མི་རིགས་ཆེད་ལུས་སྲོག་ལོངས་སྤྱོད་དང་བཅས་པ་བློས་གཏོང་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ཀྱི་ལྷག་བསམ་དང་སྙིང་སྟོབས་ལ་ཡི་རངས་བསྔགས་བརྗོད་དང་བཅས། ཚེ་རབས་ཀུན་ཏུ་འཕགས་མཆོག་འཇིག་རྟེན་མགོན་པོས་རྗེས་སུ་བཟུང་བའི་སྨོན་འདུན་དང་། ཤུལ་ལུས་ཉེ་འབྲེལ་ལྟོས་བཅས་ཡོངས་ལ་ཐུགས་གསོ་ཞུ་རྒྱུ། ༧པཎ་ཆེན་སྐུ་ཕྲེང་བཅུ་གཅིག་པ་རྗེ་བཙུན་བསྟན་འཛིན་དགེ་འདུན་ཡེ་ཤེས་འཕྲིན་ལས་དཔལ་བཟང་པོ་(དགེ་འདུན་ཆོས་ཀྱི་ཉི་མ་)མཆོག་དང་ཁོང་གི་ཡབ་ཡུམ། བྱ་བྲལ་བྱམས་པ་འཕྲིན་ལས་རིན་པོ་ཆེ་བཅས་གར་ཡོད་ཆ་མེད་དུ་གྱུར་པའི་འདས་སོན་གྱི་གནས་སྟངས་རྒྱ་གཞུང་གིས་གསལ་པོ་བཟོ་དགོས་པ་དང་། དེ་བཞིན་རྒྱ་གཞུང་གི་བཙན་འོག་ཏུ་ཆབ་སྲིད་ཀྱི་ཉེས་མིང་ཐོག་བཙོན་ཁང་ནང་སྡུག་སྦྱོང་མྱོང་བཞིན་པའི་བོད་མི་ཆབ་སྲིད་བཙོན་པ་རྣམས་གློད་བཀྲོལ་གཏོང་དགོས་པ་མ་ཟད། ཁོང་རྣམས་ཀྱི་ཚེ་སྲོག་ལ་འགན་ཁུར་ཐོག་ནས་འགྲོ་བ་མིའི་གཞི་རྩའི་ཐོབ་ཐང་ལོངས་སུ་སྤྱོད་དུ་འཇུག་དགོས་པ་དང་། རྒྱ་གཞུང་གིས་བར་ལམ་ནས་སྤེལ་བའི་(ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་ཁྱབ་སྤེལ་དང་སྲ་བརྟན་གཏོང་རྒྱུ་)ཟེར་བའི་འཆར་གཞིའི་ལག་བསྟར་འོག་བོད་དང་། ཤར་ཏུར་ཀི་སི་ཐན། ལྷོ་སོག་སོགས་རྒྱ་ནག་གིས་གྲངས་ཉུང་མི་རིགས་ཟེར་བ་རྣམས་རྒྱ་རིགས་ཀྱི་ངོ་བོར་འཐིམ་འཇུག་རྒྱུའི་མི་སེར་སྤེལ་བའི་སྲིད་བྱུས་རིགས་མཚམས་འཇོག་དགོས་རྒྱུ། དེ་བཞིན་རྒྱ་གཞུང་གིས་བོད་མི་རིགས་ཀྱི་ངོ་བོ་དང་། སྐད་ཡིག་རྩ་མེད་བཟོ་རྒྱུའི་ངན་ཇུས་འོག་བོད་ཕྲུག་རྣམས་བོད་ཀྱི་སྐད་ཡིག་སློབ་སྦྱོང་བྱ་རྒྱུར་བཀག་བསྡོམས་ཀྱིས་བོད་སའི་སྒེར་བཙུགས་སློབ་གྲྭ་ཁག་སྒོ་རྒྱག་བཞིན་པ་མ་ཟད། བོད་ཕྲུག་རྣམས་བཅའ་སྡོད་སློབ་གྲྭ་ཟེར་བར་བཙན་བཅུགས་ཀྱིས་རྒྱ་སྒྱུར་སྲིད་ཇུས་རྣམས་ངེས་པར་དུ་མཚམས་འཇོག་དགོས་རྒྱུ་བཅས་ཡིན། 

དེ་བཞིན་བོད་ནང་འགྲོ་བ་མིའི་གཞི་རྩའི་ཐོབ་ཐང་དང་འགལ་བའི་རྒྱ་སྒྱུར་གྱི་སྲིད་ཇུས་(བོད་བརྒྱུད་ནང་བསྟན་ཀྲུང་གོ་ཅན་དུ་འགྱུར་བའི་ཁ་ཕྱོགས་མཐའ་འཁྱོངས།) ཟེར་བ་དང་། རིགས་རྫས་བསྡུ་ལེན་གཙོ་བོར་གྱུར་པའི་སྡུག་རྩུབ་ཅན་གྱི་སྲིད་བྱུས་ཁག་དངོས་སུ་ལག་བསྟར་བྱེད་བཞིན་ཡོད་པ་འཕྲལ་དུ་མཚམས་འཇོག་དགོས་པ་དང་། བོད་ནང་གི་བོད་མི་ཚོར་འགྲོ་བ་མིའི་ཐོབ་ཐང་ངེས་པར་དུ་སྤྲད་དགོས་པ་དང་། བོད་རྒྱ་གཉིས་ནི་ལོ་རྒྱུས་ཐོག་ནས་རང་བཙན་གྱི་རྒྱལ་ཁབ་སོ་སོར་གྲུབ་ཅིང་། བོད་དེ་རྒྱ་ནག་གི་ཆ་ཤས་ནམ་ཡང་མིན་པ་དང་། ད་ཆའི་གནས་སྟངས་ལ་གཞིགས་ཏེ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ནས་གཉིས་སྨན་དབུ་མའི་ལམ་གྱི་སྲིད་བྱུས་བརྒྱུད་བོད་རྒྱ་ཞི་བའི་གྲོས་མོལ་ཐོག་དཀའ་རྙོག་སེལ་ཐབས་མཛད་པ་བཞིན། བོད་མིའི་སྒྲིག་འཛུགས་ངོས་ནས་ཀྱང་དེ་བཞིན་འབད་བརྩོན་ཞུས་དང་ཞུ་མུས་ལྟར། རྒྱ་གཞུང་ནས་གུ་དོག་པོའི་བྱ་སྤྱོད་ཀྱིས་གཡས་ཁག་གཡོན་དཀྲིས་མེད་པར་བོད་རྒྱ་གྲོས་མོལ་དགོས་པར་ནན་བརྗོད་བྱ་རྒྱུ། རྒྱ་གཞུང་གིས་བོད་ཀྱི་སྣོད་བཅུད་ཡོངས་རྫོགས་བཙན་གནོན་ཧམ་བཟུང་བྱས་པ་ནས་བཟུང་བོད་ནང་ཛ་དྲག་གི་གནས་སྟངས་མཚམས་ཆད་མྱོང་མེད་ལ། རྒྱ་གཞུང་གི་བཙན་གནོན་འོག་གཞིས་ལུས་བོད་མི་རྣམས་ཉིན་མཚན་འཁྱོལ་དཀའ་བའི་མནར་གཅོད་སྡུག་སྦྱོང་མྱངས་དང་མྱོང་བཞིན་པ་རྣམས་ལ་གདུང་སེམས་མཉམ་སྐྱེད་དང་བཅས། རང་དབང་ལུང་པར་ཡོད་པའི་བོད་མི་རྣམས་ཀྱི་ངོས་ནས་ནུས་པ་མཉམ་སྤུངས་ཐོག་བོད་དོན་དྲིལ་བསྒྲགས་ཞུ་བསྐུལ་གྱི་ལས་འགུལ་སོགས་བོད་ཀྱི་བདེན་པའི་འཐབ་རྩོད་དང་། བོད་ཀྱི་ཆོས་དང་རིག་གཞུང་། སྐད་ཡིག་མི་ཉམས་རྒྱུན་འཛིན་ཐོག་ཆིག་བསྒྲིལ་གྱི་ནུས་པ་གོང་མཐོར་གཏོང་རྒྱུར་ཕྱོགས་ཡོངས་ནས་ཕྱར་གྲུ་མཉམ་འདེགས་བྱ་དགོས་པ་བཅས་ཡིན་འདུག 

གསར་འགོད་པ། བསྟན་འཛིན་ཕུར་བུ། དཔལ་ལྡན། 

རྩོམ་སྒྲིག་པ། སྐལ་བཟང་སྦྱིན་པ།