ཟླ་འདིའི་ཕྱི་ཚེས་ ༢༧ ཉིན་རྒྱ་གར་ཨེ་བྷི་ཕི་(ABP) གསར་ཁང་གིས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ལ་བཙན་བྱོལ་བོད་མིའི་སྒྲིག་འཛུགས་ཀྱི་ལས་དོན་བྱེད་ཕྱོགས་ཐད་བཅར་འདྲི་ཞིག་བྱས་ཡོད་པའི་ནང་དུ། གསར་འགོད་པས་ཁྱེད་ཀྱིས་རང་དབང་གཙང་མ་འདོད་ཀྱི་ཡོད་དམ། བོད་དེ་རྒྱ་ནག་ནང་གི་རང་སྐྱོང་ས་ཁུལ་ཞིག་འདོད་ཀྱི་ཡོད། དེ་གཉིས་བར་ཁྱད་པར་ག་རེ་ཡོད་མེད་དྲིས་པར་སྲིད་སྐྱོང་མཆོག་གིས། རང་དབང་ནི་བདག་དབང་ཆ་ཚང་ཡོད་པའི་ཐོག་ནས་ཆེས་སྤྱིར་བཏང་དང་སྒེར་ཚུགས་ཅན་གྱི་དམིགས་བསལ་གྱི་ཐ་སྙད་ཅིག་རེད། ༧གོང་ས་རྒྱལ་བ་རིན་པ་ཆེ་མཆོག་གིས་བོད་པ་དང་ཕྱོགས་མང་པོའི་ཐོག་ནས་ཁེ་ཕན་ཡོད་མིན་ཐད་དགོངས་པ་ཆེན་པོ་བཞེས་ཏེ། དབུ་མའི་ལམ་གྱི་སྲིད་ཇུས་བརྒྱུད་ནས་རང་སྐྱོང་ཐོབ་འདོད་ཡོད་པ་ལས་རང་བཙན་རྩོད་འདོད་མེད་ཅེས་གསུངས་འདུག
དེང་སྐབས་རྒྱ་གར་གྱིས་བོད་དོན་ལ་འཛིན་པའི་ལྟ་སྟངས་ག་འདྲ་ཡོད་མེད་དྲིས་པར་ཁོང་གིས། ཚོར་བ་རྣོ་བོའི་ཐོག་ནས་ལྟ་ཞིབ་བྱས་ཚེ་འགྱུར་བ་ཕྲན་བུ་མཐོང་ཐུབ་པ་ཞིག་རེད། སྤྱིར་བཏང་གི་ཐོག་ནས་བལྟས་པ་ཡིན་ན་དེ་འདྲའི་གསལ་བོ་ཞིག་མ་རེད། རྒྱ་གར་གྱི་གཞུང་ཁོངས་མིན་པའི་ཤེས་ཡོན་ཅན་མང་པོས་བོད་དོན་ཐོག་རྩོམ་ཡིག་མང་པོ་བྲིས་ཡོད། མང་ཆེ་ཤོས་ནི་ཕྱོགས་འགལ་ཚོགས་པའི་ཕྱོགས་ནས་ཡོང་གི་ཡོད་པས། སྤྱི་ཡོངས་ནས་བོད་རྒྱའི་དཀའ་རྙོག་ལ་ཁེ་ཕན་ཡོད་ཀྱང་། རྒྱ་གར་རྒྱང་དུ་བཀྱེད་ཡོད་པ་ནི་དྲི་བ་ཞིག་ཡིན་ལ། རྒྱ་དཀར་ནག་གཉིས་ཀྱི་ས་མཚམས་ཀྱི་གནད་དོན་གྱིས་བོད་རྒྱའི་དཀའ་རྙོག་ལ་ཤུགས་རྐྱེན་ཐེབས་ཡོད་མེད་ཐད་ཁོང་གིས། རྒྱ་དཀར་ནག་གཉིིས་ཀྱི་ས་མཚམས་རྩོད་རྙོག་སྐབས་སུ་བོད་ཀྱང་རང་བཞིན་གྱིས་རྩོད་རྙོག་དེའི་ཆ་ཤས་སུ་གྱུར་བ་རེད། ས་མཚམས་ཀྱི་རྩོད་རྙོག་ནི་རྒྱ་གར་དང་བོད་གཉིས་ཀྱི་ས་མཚམས་སུ་ཁེལ་ཡོད་པ་དང་། རྒྱ་ནག་གིས་བོད་ཀྱི་ས་ཁུལ་ཡིན་ཚུལ་བཤད་ཀྱི་ཡོད་པ་རེད། ཡིན་ནའང་ང་ཚོའི་མཐའ་མཚམས་སྐོར་ལ་གསལ་བོ་ཡོད། ༧རྒྱལ་དབང་སྐུ་ཕྲེང་ལྔ་བའི་སྐབས་སུ་ལ་དྭགས་ཀྱི་ས་མཚམས་གཏན་འབེབ་བྱས་ཡོད་ཅིང་། བོད་རང་བཙན་རྒྱལ་ཁབ་ཀྱི་མིང་ཐོག་ནས་རྒྱ་གར་དབྱིན་གཞུང་དང་མཉམ་དུ་མེ་ཁི་མཱ་ཧོན་ས་ཐིག་བརྒྱབ་པ་རེད། རྒྱ་གར་མུ་མཐུད་ནས་མེ་ཁི་མཱ་ཧོན་ས་ཐིག་ལྟར་འགྲོ་བཞིན་ཡོད་པ་རེད། དེ་ནི་སྐབས་དེའི་བོད་ཀྱི་གནས་བབ་ངོས་འཛིན་བྱས་ཡོད་པ་མཚོན་ཡོད། དེ་ཡང་གང་མགྱོགས་འགྲུབ་ཐུབ་པ་ཞིག་ཀྱང་མ་རེད། རྒྱ་གར་ལ་མཚོན་ན་གལ་ཆེ་ཤོས་ནི་དམངས་གཙོའི་རྒྱལ་ཁབ་ཅིག་གི་ངོས་ནས་དེའི་སྐབས་ཀྱི་མཐའ་མཚམས་ཀྱི་གནས་སྟངས་ཐོག་ནས་བསྡད་ཐུབ་རྒྱུ་དེ་རེད། རྒྱ་ནག་གཞུང་གི་དབང་འོག་བསླུ་བྲིད་འོག་མ་འགྲོ་བ་བྱེད་དགོས། ང་ཚོར་མཚོན་ན་དེ་ནི་ཧ་ཅང་རིན་ཐང་ལྡན་པ་ཞིག་རེད། ཅེས་གསུངས་སོང་།
ཞི་ཅིན་ཕིན་གྱི་སྲིད་འཛིན་འོག་ཏུ་རྒྱ་ནག་ནང་དུ་དཀའ་རྙོག་འབྱུང་གི་ཡོད་མེད་ཐད་ཁོང་གིས། དབང་ཆ་ཚང་མ་མི་གཅིག་གི་ལག་ཏུ་ཡོད་དུས་སྡུག་པོ་འབྱུང་སྲིད་ལ་ཡག་པོའང་འབྱུང་སྲིད་པ་རེད། གལ་སྲིད་ཡག་པོ་བྱུང་བ་ཡིན་ན་ཁོས་རང་ཉིད་རྒྱལ་ཁབ་དང་། རྒྱལ་སྤྱིའི་སྤྱི་ཚོགས་ཁ་ཕྱོགས་ཡག་པོ་ཞིག་ཏུ་འཁྲིད་ཐུབ་ཀྱང་། ཁ་ཕྱོགས་ལོག་པར་འགྲོ་བའི་ཐག་གཅོད་བྱུང་བ་ཡིན་ན་ཚང་མ་རྐྱེན་ངན་གོད་ཆག་ཅིག་ཏུ་འགྲོ་རྒྱུ་རེད། ཞི་ཅིན་ཕིན་གྱིས་མའོ་ཡི་རྒྱ་ནག་དམར་ཤོག་ཚོགས་པའི་གལ་ཆེན་རང་བཞིན་དང་རྒྱ་བསྐྱེད་བྱེད་པའི་བསམ་བློ་འཁོར་བཞིན་ཡོད། ད་ལྟའི་རྒྱ་ནག་གི་མགོ་ཁྲིད་རྣམས་ཀྱིས་སྐད་ཆ་ཚང་མ་རྒྱལ་སྲུང་དང་སྲ་བརྟན་སྐོར་ལས་གཞན་ཅི་ཡང་མེད། སུ་ཞིག་ཡིན་རུང་དེའི་སྐོར་ལ་སྐུལ་འདེད་བྱེད་བཞིན་ཡོད་ཅིང་། རྒྱ་ནག་གིས་རྒྱལ་ཁབ་གཞན་པར་བཙན་འཛུལ་བྱེད་པ་དང་མི་སེར་སྤེལ་བའི་བསམ་བློ་ཡོད་པ་མ་ཟད། རྒྱ་ནག་ནི་དམག་དཔུང་གི་ཚོགས་པ་ཞིག་ཡིན་ཡང་། ཉི་ཧོང་དང་། ཐའེ་ཝན། ཨོ་གླིང་། ལྷོ་ཤར་ཨེ་ཤ་ཡའི་ཧྤི་ལི་ཕིན་དང་། མཱ་ལེ་ཞི་ཡ། ཝི་ཌི་ནམ། རྒྱ་གར་བཅས་ནི་དེ་ལྟར་མ་རེད། ངས་ནམ་རྒྱུན་རྒྱ་གར་ནི་རྒྱལ་ཁབ་རང་ཉིད་ཀྱི་ཆེད་དུ་ཁེ་ཕན་སྲུང་སྐྱོབ་བྱེད་མཁན་ཞིག་ཏུ་ངོས་འཛིན་བྱེད་ཀྱི་ཡོད། རང་ཉིད་ཀྱི་མངའ་ཁོངས་དང་བདག་དབང་སྲུང་སྐྱོབ་བྱ་རྒྱུ་གལ་ཆེན་པོ་རེད། མཐའ་མཚམས་ཀྱི་ཐོག་ནས་ང་ཚོར་རྒྱ་གར་གཞུང་དང་དཀའ་རྙོག་གང་ཡང་མེད་པས། རྒྱ་ནག་གཞུང་ལ་རྒྱ་གར་གྱི་མཐའ་མཚམས་གནད་དོན་ཐོག་ག་རེ་བྱས་ནས་དཀའ་ངལ་ཡོད་པ་རེད། ཅེས་གསུངས་སོང་།
༧གོང་ས་མཆོག་སྐུ་འཚོ་བཞུགས་མ་ཐུབ་ཚེ་རྒྱ་གར་གྱིས་མུ་མཐུད་དུ་བོད་དོན་དང་བོད་མི་སྐྱབས་བཅོལ་བར་རྩ་དོན་གཅིག་པ་འཛིན་མིན་ཐད་ཁོང་གིས། ང་ཚོས་༧གོང་ས་མཆོག་གི་ཡང་སྲིད་རྗེས་མ་ཕེབས་རག་བར་དུ་རྒྱ་གར་གྱིས་སྔར་བཞིན་རྒྱབ་སྐྱོར་བྱེད་པའི་ཡིད་ཆེས་ཡོད། ༧གོང་ས་མཆོག་ནས་དགུང་ལོ་ ༡༡༣ བར་དུ་འཚོ་བཞུགས་གནང་བའི་ཞལ་བཞེས་གནང་ཡོད་ཅིང་། ད་ལྟ་ཁོང་ཉིད་དགུང་ལོ་ ༨༨ ནས་ ༨༩ ཕེབས་བཞིན་ཡོད་ཀྱང་། ཞལ་གྱི་ཚེམས་གཅིག་ཀྱང་ལྷུང་མེད། ངས་རྒྱུན་དུ་རྒྱ་ནག་གི་གྲོགས་པོ་རྣམས་ལ་༧གོང་ས་མཆོག་དང་རྒྱ་ནག་དམར་ཤོག་ཚོགས་པ་གཉིས་ལས་གང་ཞིག་རྒྱུན་རིང་མིན་བལྟ་དགོས་ཟེར་གྱི་ཡོད། ༧སྐུའི་ཡང་སྲིད་ཕེབས་པ་ཡིན་ཡང་༧གོང་ས་མཆོག་གི་བཀའ་དགོངས་བཞིན་བྱོན་རྒྱུ་ཡིན་པ་དང་། ལས་དོན་གཞན་རྣམས་བོད་མིའི་སྒྲིག་འཛུགས་ཀྱིས་བསྒྲུབ་དགོས་ངེས་རེད། ཕྱི་ལོ་ ༡༩༦༠ ནས་བཟུང་༧གོང་ས་མཆོག་ནས་བོད་ཀྱི་དམངས་གཙོ་དབུ་བཙུགས་པ་རེད། ད་ལྟ་བར་དགུང་ལོ་ ༦༤ རིང་ཕྱག་ལས་མཛད་ཡོད། བོད་མི་མང་ལ་དམངས་གཙོ་གསོལ་རས་བསྩལ་ཏེ་མ་འོངས་པའི་བོད་ཀྱི་འགན་འཁུར་ཐུབ་པ་གནང་ཡོད། ༧གོང་ས་མཆོག་ནས་འཐུས་ཤོར་ཆེན་པོ་ཞིག་འབྱུང་དུ་འཇུག་མི་སྲིད། ཡིན་ནའང་ལས་ཀ་ཁ་ཤས་ང་ཚོས་བསྐྱར་ཟློས་བྱས་ཏེ་འགྲོ་དགོས་པ་རེད་ཅེས་གསུངས་འདུག
རྒྱ་གཞུང་གིས་༧སྐུའི་ཡང་སྲིད་ངོས་འཛིན་དང་སྟངས་འཛིན་སྐོར་ལ་ཁོང་གིས། རྒྱ་གཞུང་གིས་ནམ་རྒྱུན་དུ་༧གོང་ས་མཆོག་སྐུ་གྲོངས་བར་སྒུག་བཞིན་ཡོད་པ་རེད། ཁོང་ཚོས་ལོ་ ༢༠ རིང་སྐུ་གྲོངས་བར་གྲ་སྒྲིག་བྱེད་བཞིན་ཡོད་པ་ལས། ༧གོང་ས་མཆོག་གི་སྐོར་ལ་སེམས་ཁྲལ་གང་ཡང་བྱེད་ཀྱི་མེད། ༧སྐུའི་ཡང་སྲིད་སྐོར་ལ་སེམས་ཁྲལ་བྱས་པ་བརྒྱུད་བོད་ལ་སྟངས་འཛིན་བྱེད་ཐུབ་པ་ཤེས་ཀྱི་ཡོད། ངས་རྒྱ་ནག་དམར་ཤོག་ཚོགས་པར་བརྡ་ལན་སྤྲད་འདོད་པ་ནི། རྒྱ་གཞུང་གིས་བསྐོ་བཞག་བྱས་པའི་པཎ་ཆེན་ཡང་སྲིད་ལ་བོད་མི་གཅིག་གིས་ཀྱང་ངོས་འཛིན་བྱེད་ཀྱི་མེད་པའི་གནས་སྟངས་དེས་འདོད་པ་ཁེངས་ཀྱི་མི་འདུག་གམ། རྒྱ་གཞུང་གིས་མི་མང་ལ་དངུལ་སྤྲད་དེ་བསུ་མ་བྱེད་དུ་འཇུག་གི་ཡོད་པ་རེད། བོད་ནང་གི་བོད་མི་ཚོས་རྒྱ་གཞུང་གི་པཎ་ཆེན་ཡང་སྲིད་ངོས་ལེན་བྱེད་ཀྱི་མེད་པས། རྒྱ་གཞུང་གིས་བསྐོ་བཞག་བྱས་པའི་༧གོང་ས་མཆོག་གི་ཡང་སྲིད་ངོས་འཛིན་ག་འདྲ་བྱེད་ཀྱི་རེད། བོད་མི་ཚོའི་ཐོག་དྲག་གནོན་བྱས་ཀྱང་ངོས་ལེན་བྱེད་མི་སྲིད་པ་ཞིག་རེད། དེའི་ཐོག་ནས་སེམས་འཚབ་བྱེད་དགོས་པ་ཞིག་མ་རེད་ཅེས་གསུངས།
རྒྱ་གར་དང་ཕྱི་རྒྱལ་དུ་བོད་ཀྱི་འཐབ་རྩོད་ལ་སྔར་བཞིན་དོ་སྣང་ཡོང་གི་ཡོད་མེད་ཐད་ཁོང་གིས། དེང་སྐབས་མི་མང་ཤོས་ཀྱིས་དམག་འཁྲུག་ལ་དོ་སྣང་བྱེད་བཞིན་འདུག ང་ཚོས་འཚེ་བ་མེད་པའི་ལས་འགུལ་སྤེལ་བཞིན་ཡོད། ནམ་ཡང་འཐེན་འཁྱེར་དེ་འདྲ་བྱེད་ཀྱི་མ་རེད། དམག་འཁྲུག་དང་འཚེ་བ་བྱས་ན་མི་མང་གིས་ཉིན་རྒྱུན་བཞིན་དོ་སྣང་བྱེད་ཀྱི་རེད། ལས་འགུལ་འདི་ནི་མི་མང་རང་བཞིན་གྱི་འཚེ་བ་མེད་པའི་ལས་འགུལ་ཞིག་ཡིན་དུས། མི་མང་གིས་ཀྱང་ཡིད་ཆེས་བྱེད་ཀྱི་ཡོད་པ་རེད། བོད་ནང་ནས་གནད་དོན་ཞིག་བྱུང་ན་མི་མང་གིས་བྱ་བ་ཐམས་ཅད་ཡག་པོ་ཡོད་པར་ཡིད་ཆེས་བྱེད་ཐུབ་ཀྱི་མ་རེད། དྲ་ལམ་ནས་ཀྱང་འབྲེལ་གཏུགས་བྱེད་ཐུབ་ཀྱི་མེད། གལ་སྲིད་ཁྱེད་རང་བོད་དུ་འབྱོར་བ་ཡིན་ན། ཁྱེད་ལྟ་སྐོར་དུ་འགྲོ་བར་ལམ་སྟོན་བྱེད་ཀྱང་། རང་དབང་གི་ཐོག་ནས་མི་མང་ལ་ཁ་བརྡ་བྱེད་མི་ཆོག རྒྱ་ནག་གཞུང་གིས་བོད་དང་ཤིན་ཅང་དུ་དམ་དྲག་ཤུགས་ཆེན་བྱེད་པ་དང་། ལྷོད་ཡངས་འགྲོ་བཞིན་པའི་གནས་སྟངས་སོགས་འཛམ་གླིང་གི་ཤེས་རྟོགས་འབྱུང་མི་སྲིད་པ་ཞིག་རེད། ཉེ་ཆར་རྒྱ་གཞུང་གིས་བོད་ཚུད་པའི་གྲངས་ཉུང་མི་རིགས་ཀྱི་རིགས་རྒྱུད་ངོ་བོ་དང་བཅས་རྩ་བརླག་ཏུ་གཏོང་བའི་སྲིད་ཇུས་ལག་བསྟར་བྱེད་བཞིན་ཡོད་པ་རེད།
སྲིད་སྐྱོང་མཆོག་གིས་རྒྱ་ནག་གཞུང་དང་འབྲེལ་བ་བྱེད་ཀྱི་ཡོད་མེད་ཐད་ཁོང་གིས། ང་ཚོས་ཐབས་ལམ་འཚོལ་བཞིན་ཡོད་ཀྱང་དེའི་སྐོར་ལ་གསལ་སྟོན་བྱ་རྒྱུ་མིན། ད་ལྟ་ང་ཚོས་འབྲེལ་བ་བསྐྱར་གསོ་བྱེད་བཞིན་པའི་གནས་སྐབས་ལ་ཡོད། ཕྱི་རྒྱལ་ལ་འབྲེལ་བ་བྱེད་པར་སྔར་ལས་ཀྱང་ཤུགས་རྒྱག་པའི་འཆར་གཞི་ཡོད་མེད་ཐད་ཁོང་གིས། རྒྱལ་སྤྱིའི་སྤྱི་ཚོགས་ལ་འབྲེལ་བ་བྱེད་པ་དེ་ང་ཚོས་ལས་ཀ་ཡིན། ཡིན་ནའང་རྒྱ་ནག་གི་མཐུན་ཕྱོགས་རྒྱལ་ཁབ་དང་དེའི་མགོ་ཁྲིད་རྣམས་ལ་འབྲེལ་བ་བྱེད་ཐུབ་ཀྱི་མི་འདུག ང་ཚོས་འཛམ་གླིང་གི་དམངས་གཙོ་དང་རང་དབང་ཅན་གྱི་རྒྱལ་ཁབ་ཁག་ལ་འབྲེལ་བ་བྱེད་ཀྱི་ཡོད་ཅེས་གསུངས་འདུག
བོད་མིའི་སྒྲིག་འཛུགས་ལ་འཆར་གཞི་གཞན་ཡོད་མེད་ཐད་ཁོང་གིས། བོད་ཀྱི་གཏམ་དཔེ་ཞིག་ལ་གྲ་སྒྲིག་སྡུག་ས་དང་རེ་བ་བཟང་ས་ནས་རྒྱག་དགོས་ཟེར་བ་བཞིན། ང་ཚོས་རྒྱ་ནག་གཞུང་དང་མཉམ་དུ་དཀའ་རྙོག་སེལ་བ་དང་། ཞི་བདེ་སྲ་བརྟན་ཅན་གྱི་བོད་དུ་ལོག་པའི་རེ་བ་བཟང་པོ་བརྒྱབ་བསྡད་ཡོད། ལོ་རྒྱུས་ཀྱི་ཐོག་ནས་བོད་ནི་འཛམ་གླིང་ཐོག་གི་མི་འབོར་ཆེས་མང་པོའི་རྒྱལ་ཁབ་གཉིས་ཀྱི་བར་དུ་གནས་ཆགས་ཡོད་ཅིང་། གལ་སྲིད་དགོས་མཁོ་འགྲུབ་པ་ཡིན་ན་ང་ཚོས་རྒྱལ་ཁབ་གཉིས་ཀྱི་བར་ཟམ་པ་བྱེད་ཐུབ་ཀྱི་ཡོད། དམིགས་ཡུལ་འདི་འདྲ་ཞིག་གི་ཆེད་དུ་ང་ཚོས་གདོང་ལེན་རེ་རེ་གོ་སྐབས་སུ་བསྒྱུར་ཏེ། རྒྱལ་ཁབ་མི་འདྲ་བ་ ༢༥ ནང་དུ་འཚོ་སྡོད་བྱེད་བཞིན་ཡོད་པའི་བོད་རིགས་གཞོན་སྐྱེས་རྣམས་ཡར་རྒྱས་གོང་འཕེལ་དུ་གཏོང་བཞིན་ཡོད། དུས་མཚུངས་སུ་སློབ་གསོའི་འཛིན་སྐྱོང་དང་། འཕྲུལ་རིག་གྲངས་མཛོད། འཛུགས་སྐྲུན་གྱི་མ་ལག་གསར་སྐྲུན། ཞབས་ཞུ་མཁོ་སྤྲོད་བཅས་བྱ་རྒྱུ་ཡིན། འདི་དག་གལ་ཆེ་བའི་རྒྱུ་ཆ་ཞིག་རེད་ཅེས་གསུངས་སོང་།
བཙན་བྱོལ་གྱི་གཞོན་སྐྱེས་རྣམས་ཀྱིས་བོད་ཀྱི་གནས་སྟངས་མཐོང་མྱོང་མེད་པས་བོད་དོན་ཐོག་ཉམས་མྱོང་ཡོད་མེད་ཐད་ཁོང་གིས། ཁོང་ཚོ་བོད་དོན་ཐོག་སེམས་ཤུགས་ཆེན་པོ་ཡོད་པ་རེད། ད་ལོ་འཛམ་གླིང་རྒྱལ་ཁབ་ཁག་གི་བོད་རིིགས་གཞོན་སྐྱེས་རྣམས་འདུ་འཛོམས་བྱུང་བ་རེད། ཁོང་ཚོར་སེམས་ཤུགས་ཆེན་པོ་འདུག ང་ཡང་རྒྱ་གར་ནས་སྐྱེས་ཀྱང་ཕ་མའི་མདུན་ནས་བོད་ནང་གི་དྲག་སྤྱོད་དང་འཐབ་རྩོད་ཀྱི་གཏམ་རྒྱུད་མང་པོ་གོ་མྱོང་ཡོད། གཞོན་སྐྱེས་རྣམས་ཀྱིས་དེའི་ཐོག་ཏུ་དོ་སྣང་བྱེད་ཀྱི་འདུག་ལ། ང་ཚོས་ལོ་རེ་བཞིན་ཚོགས་འདུ་འདྲ་མིན་ཐོག་གཞོན་སྐྱེས་གྲངས་ ༡༠༠ ལ་མགོ་ཁྲིད་ཟབ་སྦྱོང་སྤྲོད་པའི་གཏན་ཁེལ་བྱས་ཡོད། གཞོན་སྐྱེས་རྣམས་ཀྱིས་སོ་སོའི་རྒྱལ་ཁབ་ཏུ་བོད་དོན་ཐོག་ལས་འགུལ་སྤེལ་གྱི་རེད། ཐབས་ལམ་འདི་བརྒྱུད་ནས་ཁོང་ཚོས་ཕྱོགས་མང་པོར་སློབ་སྦྱོང་བྱེད་ཐུབ་པ་དང་། ཉུང་མཐར་ལོ་ངོ་ ༣༠ དང་ ༤༠ རིང་བོད་དོན་ལས་འགུལ་སྤེལ་ཐུབ་རྒྱུ་རེད། ཅེས་གསུངས་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
