བལ་ཡུལ་མའོ་ཚོགས་པས་རྒྱ་སྒོར་གྱི་རྒྱབ་གཉེར་འཚོལ་སྒྲུབ་ལ་བརྟེན་ནས་སྲིད་བློན་གསར་པའི་འོས་ཤོག་ཉོ་རྩིས་འདུག་ཟེར།
གསར་འགྱུར་རྒྱུ་ལམ་ཁག་གིས་གནས་ཚུལ་སྤེལ་གསལ་ལྟར་ན། བལ་ཡུལ་མའོ་ཚོགས་པའི་འཇབ་དམག་ཟུར་བ་ཞིག་གིས་རྒྱ་རིགས་ཤིག་བརྒྱུད་ནས་བལ་སྒོར་ས་ཡ་ ༥༠༠ རྒྱབ་གཉེར་འཚོལ་སྒྲུབ་བྱས་ཡོད་པའི་སྐོར་གྱི་སྒྲ་ཐག་ཅིག་གི་གསང་རྒྱ་ཤོར་བའི་གནས་ཚུལ་བྱུང་འདུག བལ་སྒོར་ས་ཡ་ ༥༠༠ དེ་བསླེབ་ལ་ཉེ་བའི་བལ་ཡུལ་སྲིད་བློན་གསར་པའི་འོས་བསྡུའི་སྐབས་སུ་གྲོས་ཚོགས་ཚོགས་མིའི་འོས་ཤོག་འཐོབ་ཆེད། དངུལ་གྱིས་བསླུ་བྲིད་གཏོང་འཆར་ཡོད་ལུགས་བརྗོད་འདུག
གནས་ཚུལ་འདི་གཟའ་པ་སང་ཉིན་བལ་ཡུལ་དུ་ཡོད་པའི་རྒྱ་གར་གྱི་བརྙན་འཕྲིན་ཞིག་ཏུ་སྒྲ་ཐག་ནང་གི་གླེང་སློང་རྣམས་ཕྱིར་བསྒྲགས་བྱས་འདུག དུས་ཡུན་སྐར་མ་ ༢༠ ཙམ་ཡོད་པའི་སྒྲ་ཐག་དེའི་ནང་ཕན་ཚུན་གླེང་སློང་བྱེད་མཁན་གྱི་མི་སྣ་ནི།བལ་ཡུལ་མའོ་ཚོགས་པའི་ཕྱི་འབྲེལ་དང་དྲིལ་བསྒྲགས་བློན་ཆེན་ཟུར་པ་ཁུརེ་ཤི་ན་བྷ་ཧ་ཌོར་མ་ཧ་རཱ་ Krishna Bahadur Mahara དང་ཁ་པར་གཏོང་མཁན་ནི་གསལ་བོ་མི་ཤེས་རུང་། གཏམ་གླེང་ལས་ཕལ་ཆེར་རྒྱ་མི་དཀྱུས་མ་ཞིག་རེད་ཟེར།
སྒྲ་ཐག་ནང་དུ། རྒྱ་མི་དེས་སྐུ་ཞབས་མ་ཧ་རཱ་ལ་བལ་ཡུལ་ནང་གི་འོས་བསྡུ་གང་འདྲ་འགྲོ་གི་ཡོད་མེད་དང་། མའོ་ཚོགས་པར་གྲོས་ཚོགས་ནང་རྒྱབ་སྐྱོར་དང་རྐུབ་སྟེགས་ཇེ་མང་ཡོང་བར་རོགས་པ་གང་འདྲ་དགོས་མིན་སྐོར་ལ་སྐད་ཆ་དྲིས་པར། མ་ཧ་རཱས་ཁོ་ཚོས་གཟའ་ཉི་མའི་འོས་བསྡུའི་སྐབས་འོས་ཤོག་བཅུ་ནས་བཅོ་ལྔ་རེག་ཐབས་བྱས་ཡོད་རུང་། ད་དུང་འོས་གཞི་འཐོབ་པར་འོས་ཤོག་ ༥༠ ལྷག་དགོས་ཀྱི་ཡོད་སྐོར་དང་། ལྷོ་དབུས་ཁུལ་གྱི་གྲོས་ཚོགས་ཚོགས་མི་རྣམས་གཞན་གྱི་སྟངས་འཛིན་འོག་ཡོད་སྟབས་བར་བརྒལ་བྱེད་འཇུག་རྒྱུ་ལས་སླ་བོ་མིན་ཚུལ་བརྗོད་འདུག
རྒྱ་མི་དེས་མུ་མཐུད་བརྗོད་རྒྱུར། ཁོའི་གྲོགས་པོ་ཞིག་མ་ཧ་རཱ་ལར་ཐུག་སྟེ་རོགས་པ་བྱ་འདོད་ཡོད་ལུགས་དང་། བལ་ཡུལ་མ་ཡིན་པའི་ས་གནས་གཞན་ཞིག་ནས་ཐུག་འཕྲད་བྱ་རྒྱུའི་བསམ་ཚུལ་བཏོན་པར། རྒྱ་ཁབ་གཞན་ཞིག་ནས་ཐུག་འཕྲད་བྱས་ཚེ་ཁོའི་གྲོགས་པོ་ལ་དམིགས་གསལ་མཐོང་མཆན་ཞུ་དགོས་སྟབས། མི་གཞན་གྱིས་ཤེས་རྟོགས་འབྱུང་སྲིད་པས།ཧོང་ཀོང་ལ་མཐོང་མཆན་ཞུ་མི་དགོས་སྟབས་དེར་འཛོམས་རྒྱུ་བྱས་ན་ལེགས་ཚུལ་བརྗོད་ཡོད།
འོན་ཀྱང་། མ་ཧ་རཱ་ཡིས། ཁོ་རང་གཅིག་ནས་མའོ་ཚོགས་པའི་འགན་འཛིན་དང་། གཉིས་ནས་ད་ལྟའི་སྲིད་བློན་གྱི་འོས་གཞིར་ལངས་ཡོད་པས། ཧོང་ཀོང་དུ་སོང་ཚེ་དེར་བལ་ཡུལ་གྱི་མི་མང་པོ་ཡོད་སྟབས། གནས་ཚུལ་འདི་གསང་བ་བྱ་རྒྱུ་ཁག་པོ་ཡིན་པའི་བསམ་ཚུལ་བཏོན་འདུག
མ་ཧ་རཱ་ཡིས། རྒྱ་མི་གཞན་ཞིག་ལ་ཁ་པར་ལས་གླེང་སློང་མ་བྱས་གོང་མདོར་བསྡུས་ནས་བརྗོད་དོན། ཚོགས་མི་ ༥༠ ཁོའི་ཕྱོགས་སུ་ལངས་སླད་ཚོགས་མི་རེ་ལ་ཉུང་མཐར་བལ་སྒོར་ས་ཡ་ ༡༠ རེ་སྤྲོད་དགོས་ཚུལ་བཤད་ཡོད་འདུག
སྒྲ་ཐག་གི་གནས་ཚུལ་འདི་བལ་ཡུལ་མའོ་ཚོགས་པ་དང་རྒྱ་ནག་གཞུང་ཚབ་གཉིས་ཀྱི་ངོས་ནས་རྫུན་མ་དང་གཞི་འཛིན་ས་མེད་པའི་དཀྲོག་གཏམ་ཡིན་ཚུལ་བརྗོད་ཡོད་འདུག
གསར་འགོད་པ། བནྡེ་སྐྱབས།
