གྲུབ་མཐའ་ཕྱོགས་འཐེན་བྱེད་པའི་དུས་ཚོད་མ་རེད།

དགེ་ཚུལ་སློང་གི་རྟེན་དེ་བཅོམ་ལྡན་འདས་ཀྱིས་ང་ཚོར་ལམ་སྟོན་གནང་བ་འདི་ཐར་བ་དང་ཐམས་ཅད་མཁྱེན་པའི་གོ་འཕང་སྒྲུབ་བྱེད་ཀྱི་རྨང་གཞི་ཡིན་སྙམ་པའི་ཐོག་ནས་ཚུལ་ཁྲིམས་ཀྱི་བསླབ་པ་ལ་བདག་པོ་ཡག་པོ་རྒྱག་རྒྱུ་གལ་ཆེན་པོ་རེད། རྨི་ལམ་ཚུན་ཆད་དུ་ང་རབ་བྱུང་ཡིན་སྙམ་པ་དང་། ང་དགེ་སློང་ཡིན་སྙམ་པའི་འདུ་ཤེས་དང་མ་བྲལ་བའི་ཐོག་ནས་བསྟན་པའི་ཞབས་འདེགས་བསྒྲུབ་རྒྱུ་ཁྱེད་ཚོའི་དགོངས་པར་འཆང་དགོས་ཞེས་༧གོང་ས་མཆོག་གིས་གསུངས་ཡོད།

དེ་རིང་ཞོགས་པའི་ཆུ་ཚོད་ ༨ དང་ཕྱེད་ཀའི་སྟེང་༧གོང་ས་མཆོག་རྒྱ་གར་ལྷོ་ཕྱོགས་བཀྲ་ཤིས་ལྷུན་པོ་དགོན་པར་ཆིབས་སྒྱུར་བསྐྱངས་ཤིང་། ཁོང་དང་མཉམ་དུ་བཀའ་བློན་ཁྲི་པའི་གཙོས་པའི་བཀའ་བློན་རྣམ་པ་ཡང་ཕེབས་ཡོད། དགོན་པའི་གཙུག་ལག་ཁང་གི་བཞུགས་ཁྲིར་ཞབས་སོར་བཀོད་ཅིང་། མཎྜལ་རྟེན་གསུམ་འདེགས་འབུལ་ཞུས་རྗེས་༧གོང་ས་མཆོག་གིས་བཀྲ་ཤིས་ལྷུན་པོ་དགོན་གྱི་འདུ་ཁང་གསར་བཞེངས་ཐད་དངུལ་སོགས་ཀྱི་དཀའ་ངལ་ཡོད་ན་སྐུ་སྒེར་ཡིག་ཚང་ལ་ཤོད་དང་རོགས་རམ་བྱ་རྒྱུ་ཡིན་སྐོར་གསུངས་སོང་ལ། དེ་དང་མཉམ་དུ་རྒྱལ་བ་དགེ་འདུན་གྲུབ་ཀྱི་སྐོར་གསུང་སྐབས་སྦྱན་ཆབ་བསིལ་ཞིང་། སྐབས་དེར་དགོན་པའི་གྲྭ་དམངས་དང་༧གོང་ས་མཆོག་དང་མཉམ་བཅར་བཀའ་བློན་རྣམ་པ་ཡང་བཤུམས་ཡོད། དེའི་རྗེས་སྦེལ་ཀོབ་བོད་ཁྱིམ་སློབ་གྲྭར་ཕེབས་ཏེ། བོད་ཁྱིམ་ཉིན་སློབ་གྲྭ དེ་བཞིན་བྷིང་ལོར་སོགས་ཉེ་འཁོར་གྱི་མཐོ་སློབ་ཁག་གི་སློབ་མ་རྣམས་བཅས་ལ་བཀའ་སློབ་གནང་ཡོད།

སྐབས་དེར་༧གོང་ས་མཆོག་གིས་སློབ་ཕྲུག་ཆུང་ངུ་ཚོར་སློབ་སྦྱོང་ལ་ཧུར་བརྩོན་བྱ་དགོས་པའི་རྒྱུ་མཚན་དང་། མཐོ་རིམ་སློབ་མ་ཚོར་སྤྱོད་ལམ་ལ་གཟབ་ནན་བྱ་དགོས་སྐོར། དགེ་རྒན་རྣམ་པས་ལྷག་བསམ་རྣམ་དག་གིས་སློབ་ཕྲུག་ཚོ་སྐྱེད་སྲིང་ཡག་པོ་ཞིག་བྱ་དགོས་པའི་སྐོར་བཅས་དོན་ཚན་གསུམ་དུ་བགོས་ཏེ་གསུངས་དོན། ང་ཚོས་ཤེས་ཡོན་ལ་ཤུགས་བརྒྱབ་པའི་འབྲས་བུར་མི་རབས་གསར་པ་ཞིག་འཚར་ལོངས་བྱེད་ཀྱི་ཡོད་པ་ཁྱེད་རང་ཚོ་རེད། བཟང་ངན་ལ་མ་ལྟོས་པར་གཞི་རྩའི་སློབ་སྦྱོང་ཡོད་པ་རེད། མི་རབས་རྒན་པའི་གཞུག་མཐུད་མཁན་ཁྱེད་རང་ཚོ་རེད། ཁྱེད་རང་ཚོ་བོད་པའི་མཚན་ཉིད་ཆ་ཚང་ལྡན་པའི་བོད་པ་ཞིག་བྱ་དགོས་པ་རེད། སྡོད་ས་རྒྱ་གར་ཡིན་ཡང་འཕགས་བོད་གཉིས་ཀྱི་འབྲེལ་བ་ཐུན་མོང་མ་ཡིན་པ་རེད་ལ། བོད་ཀྱི་ཆོས་དང་འབྲེལ་བའི་རིག་གཞུང་དང་ལྟ་གྲུབ་དེ་དག་རྒྱ་གར་ནས་ཡོང་བ་ཤ་སྟག་རེད། འོན་ཀྱང་ཁྱེད་རང་ཚོའི་ཤ་ཁྲག་རུས་གསུམ་གྱི་རྒྱུད་པ་དེ་གངས་ཅན་པ་ཆགས་ཡོད། དེ་བཞིན་གཞིས་ལུས་རྒྱ་ཆེའི་མི་དམངས་ཚོས་ང་ཚོར་རེ་བ་བརྒྱབ་ཡོད། བོད་ནང་དུ་རྒྱ་གཞུང་གིས་བོད་པའི་སྐད་ཡིག་རིག་གནས་ཅི་ཙམ་དར་རྒྱས་སོང་ན་དེ་ཙམ་ཉེན་ཁར་རྩི་བཞིན་ཡོད། བོད་ཡིག་ལས་རྒྱ་ཡིག་གཙོ་བོར་འཛིན་པ་དང་དགོན་སྡེ་ཁག་ཏུ་སློབ་གཉེར་བཀག་འགོག་བྱེད་ཀྱི་ཡོད། སྔོན་མ་སེ་འབྲས་དགའ་གསུམ་སོགས་སུ་གྲྭ་བ་སྟོང་ཕྲག་བཅུ་གྲངས་ཀྱིས་གཞུང་ཆེན་སློབ་གཉེར་གནང་གི་ཡོད་ཀྱང་། དེང་སྐབས་འགྲེམས་སྟོན་ཁང་ལྟ་བུ་ཆགས་ཡོད། དེ་བཞིན་སོ་སོའི་རིག་གཞུང་ལ་དགའ་ཞེན་གྱི་དབང་གིས་མི་རིགས་ལ་ཞེན་ཁོག་ཡོད་མཁན་ཚོར་ཁ་བྲལ་བའི་ཉེས་མིང་བཏགས་ཏེ་བཙོན་འཇུག་བྱེད་པ་དང་། ཐ་ན་ལྐོག་གསོད་བྱེད་པ་སོགས་ཡོང་གི་འདུག གཞིས་ལུས་རྒྱ་ཆེའི་མིང་ཚོགས་ཚོས་རེ་བ་རྒྱག་ས་ང་ཚོ་ཆགས་ཡོད། དེ་ཁྱེད་རང་ཚོའི་སེམས་ལ་ངེས་པ་བྱ་དགོས།  ཞེས་གསུངས་སོང་།

ཁོང་གིས་མཐོ་རིམ་སློབ་མ་ཚོར་དམིགས་ཏེ་གསུངས་དོན། དེ་རིང་འདིར་མཐོ་སློབ་དུ་འགྲོ་མཁན་སྐོར་ཞིག་ཡོད་ས་རེད། ཁྱེད་རང་ཚོ་ཞེ་དྲག་གལ་ཆེན་པོ་རེད། མི་ཚེ་དོན་སྙིང་དེ་མགོ་འཛུགས་བཞིན་ཡོད། གཟབ་གཟབ་བྱ་དགོས་པ་རེད། རྣམ་གཡེང་དང་ཁོར་ཡིག་གི་རྐྱེན་བྱས་ཏེ་མི་ཚེ་སྟོང་ཟད་དུ་འགྲོ་རྒྱུའི་ཉེན་ཁ་ཡོད། ངས་གོང་དུ་བཤད་པའི་སྐད་ཆ་དག་ཡང་ཡང་སེམས་ལ་དྲན་གསོ་བྱས་ཏེ། ངས་བོད་མི་རིགས་ཀྱི་རྩ་དོན་བསྒྲུབ་དགོས། གཞིས་ལུས་རྒྱ་ཆེ་མི་དམངས་ཀྱི་རེ་བ་བསྒྲུབ་དགོས་སྙམ་པའི་ཐོག་ནས་སློབ་སྦྱོང་ལ་ཤུགས་རྒྱག་དགོས། ཁ་གཡེང་མིག་གཡེང་བྱེད་པ་དང་། ཕར་ཚུར་འཁྱམས་བསྡད་པ། ཆང་འཐུང་བ་སོགས་མ་བྱེད། གོ་ཐོས་སུ་བོད་རིགས་གཞོན་སྐྱེས་ཁ་ཤས་ཀྱིས་ཐ་མག་ནག་པོ་འཐེན་གྱི་འདུག་ཟེར། དེ་འདྲ་ཁྱོན་ནས་བྱ་རྒྱུ་ཡོད་པ་མ་རེད། རྒྱ་གར་ཡུལ་མིར་དཔེ་ལྟ་རྒྱུ་ཡོད་པ་མ་རེད། ཁོང་ཚོར་སོ་སོའི་ལུང་པ་ཡོད་པ་རེད། ད་སྐབས་ང་ཚོར་ལུང་པ་ཡོད་པ་མ་རེད། ཕྲག་ཏུ་ལས་འགན་ལྕི་མོ་ཞིག་ཡོད་པ་མ་བརྗེད། སྣང་བ་སྐྱིད་པོ་བྱས་ཏེ་དུས་ཚོད་འཕྲོ་བརླག་ཏུ་མ་གཏོང་རོགས། ཞེས་གསུངས་སོང་།

༧གོང་ས་མཆོག་གིས་མུ་མཐུད་དུ་དགེ་རྒན་ཚོར་བཀའ་གནང་དོན། སློབ་ཕྲུག་ཚོར་ལམ་སྟོན་བྱེད་མཁན་དགེ་རྒན་ཚོ་རེད། དགེ་རྒན་ཚོའི་ངོས་ནས་ཀྱང་ངས་བཤད་པ་དག་སེམས་ལ་བཟུང་སྟེ། སློབ་ཕྲུག་ཚོར་སློབ་སྦྱོང་སྤྲོད་རྒྱུ་ཙམ་མ་ཡིན་པར་མི་རེ་ངོ་རེ་སེམས་པ་བཟང་པོ་ཡོང་བ་བྱ་དགོས། སློབ་སྦྱོང་སྤྲོད་སྟངས་ཐད། སློབ་ཚན་ཕལ་ཆེ་བ་རིགས་ལམ་རྟགས་གསལ་གྱི་ཐོག་ནས་འཁྲིད་ཐུབ་པ་ཡིན་ན། ནང་དོན་ཞིབ་ཚགས་པོ་ཤེས་རྒྱུར་ཏན་ཏན་ཕན་གི་རེད། སྐད་ཆ་འདི་ངས་ཤེས་རིག་ཚོགས་ཆེན་ཐོག་ཏུའང་བཤད་ཡོད། འདི་ལ་དགེ་རྒན་ཚོས་དམིགས་བསལ་དོ་སྣང་བྱ་དགོས། ཕོགས་ཟོས་ཏེ་ལོ་ཟླ་བསྐྱལ་ཐབས་བྱས་ནས་མ་སྡོད་པར་ཧུར་ཐག་བྱོས། བོད་པའི་གནས་སྟངས་ཛ་དྲག་དང་གཉན་འཕྲང་འདི་འདྲ་ཞིག་གི་འོག་ཏུ་ཁྱེད་རང་ཚོ་མ་འོངས་མི་རབས་གསོ་སྐྱོང་བྱ་མཁན་ཡིན་སྟབས། ཧ་ཅང་གི་ལས་འགན་ལྕི་མོ་ཡོད་ལ། བོད་པའི་ཕུགས་རྒྱང་རིང་པོའི་ལས་དོན་ལ་འབྲེལ་བ་ཡོད། ཅེས་བཀའ་གནང་སོང་།

དེའི་རྗེས་ཀྱི་ཆུ་ཚོད་ཚོད་ ༡༡ ཐོག་རྣམ་གྲོལ་གླིང་དགོན་པར་ཞབས་སོར་བཀོད་དེ། རྣམ་གྲོལ་གླིང་སྔ་འགྱུར་མཐོ་སློབ་ཐོན་མཁན་རྣམས་ལ་ལག་འཁྱེར་བསྩལ་ཅིང་། བཙན་བྱོལ་བོད་གཞུང་གི་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་གིས་གྲུབ་དབང་པད་ནོར་རིན་པོ་ཆེ་མཆོག་གིས་གཙུག་ལག་ཁང་འཛུགས་སྐྲུན་དང་བཤད་སྒྲུབ་གཉིས་ལྡན་གྱི་བསྟན་འཛིན་སྐྱེས་བུ་མང་པོ་སྐྱེད་སྲིང་བྱས་པར་བསྔགས་བརྗོད་དང་། ཕྱག་འཁྱེར་བཞེས་མཁན་སློབ་མ་རྣམས་ཀྱིས་མུ་མཐུད་བཤད་སྒྲུབ་མཐར་སོན་བྱ་དགོས་པའི་འབོད་སྐུལ་ཞུས་སོང་།

མཇུག་ཏུ་༧གོང་ས་མཆོག་གིས་གྲྭ་དམངས་ལ་སྡོམ་པར་བདག་པོ་རྒྱག་དགོས་པའི་སྐོར་དང་། ཆོས་ལུགས་གྲུབ་མཐའི་ཕྱོགས་འཐེན་བྱ་མི་རུང་བའི་སྐོར་ལ་བཀའ་ནན་གནང་དོན། དེ་རིང་འདིར་དགེ་འདུན་པ་སེར་ཆི་ལེར་བཞུགས་འདུག་པ་མཐོང་སྐབས་ཧ་ཅང་དགའ་བོ་བྱུང་སོང་། ཁམས་ཁུལ་གྱི་སྔ་འགྱུར་རྙིང་མའི་གདན་ས་མང་པོ་ཞིག་ཏུ་རབ་བྱུང་ངུར་སྨིག་གི་སྡེ་སྤུས་དག་པོ་མང་པོ་ཡོད་ཀྱང་། སྤྱི་ཡོངས་ཀྱི་མཐོང་ཚུལ་དུ་རྙིང་མའི་ཆོས་རྒྱུད་འཛིན་མཁན་ཡིན་ན་སྔགས་འཆང་ལྟ་བུར་བརྩིས་ཏེ། རབ་བྱུང་ཞེ་དྲག་མེད་པ་ཞིག་ཏུ་མཐོང་གི་ཡོད། གཙོ་བོ་རབ་བྱུང་ངུར་སྨིག་གི་སྡེ་དང་། དེ་ལ་ཡང་འདོན་པ་འདོན་རྒྱུ་དང་འཆམ་རྒྱག་རྒྱུ་གཅིག་པུ་མིན་པར་བསླབ་པ་སློབ་གཉེར་གནང་དགོས་པ་རེད། ཁྱེད་རང་ཚོས་བཤད་གྲྭ་བཙུགས་ཏེ་རྟགས་གསལ་གཏོང་བའི་ཐོག་ནས་འགྲོ་བསྡད་པ་འདི་ཞེ་དྲག་ཡག་པོ་རེད། དེ་བཞིན། རབ་བྱུང་མ་ཚོར་ཡང་སློབ་སྦྱོང་གི་གོ་སྐབས་གཅིག་པ་སྤྲད་པ་ཞེ་དྲག་ཡག་པོ་རེད། འོན་ཀྱང་དགེ་སློང་མའི་སྡོམ་རྒྱུན་ཟེར་བ་དེ་འདུལ་བའི་གཞུང་དང་མཐུན་པར་འགྲོ་བ་ལས་ཐབས་གཞན་ཡོད་པ་མ་རེད། ཅེས་དང་།

ངས་དེ་རིང་བརྩད་གཅོད་ཅིག་བྱས་པ་ཡིན། འདི་ནས་སློབ་སྦྱོང་ཐོན་ཏེ་གཞན་དུ་ཕྱིན་སྐབས་གྲྭ་བ་ལོག་མཁན་མང་པོ་འདུག་ཟེར། འགའ་རེ་ཡོང་གི་རེད་དེ། སྤྱིར་དགེ་ཚུལ་སློང་གི་བསླབ་སྡོམ་ལེན་པའི་སྐབས་སུ་ཇི་སྲིད་འཚོ་བའི་བར་དུ་ཞེས་ཁས་བླངས་ཡོད་ལ། དེ་རིང་ཡང་ཁྱེད་རང་ཚོས་དམ་བཅའ་བཞག་པ་རེད། སློབ་སྦྱོང་ཐོན་ཏེ་བོད་ནང་དུ་འགྲོ་བ་དང་ཧི་མ་ལ་ཡའི་རི་རྒྱུད་དུ་འགྲོ་བ། མུ་མཐུད་དགོན་པར་འདུག་པ་གང་ཞིག་ཡིན་རུང་། དགེ་ཚུལ་སློང་གི་རྟེན་དེ་བཅོམ་ལྡན་འདས་ཀྱིས་ང་ཚོར་ལམ་སྟོན་གནང་བ་འདི་ཐར་བ་དང་ཐམས་ཅད་མཁྱེན་པའི་གོ་འཕང་སྒྲུབ་བྱེད་ཀྱི་རྨང་གཞི་ཡིན་སྙམ་པའི་ཐོག་ནས་ཚུལ་ཁྲིམས་ཀྱི་བསླབ་པ་ལ་བདག་པོ་ཡག་པོ་རྒྱག་རྒྱུ་གལ་ཆེན་པོ་རེད། རྨི་ལམ་ཚུན་ཆད་དུ་ང་རབ་བྱུང་ཡིན་སྙམ་པ་དང་། ང་དགེ་སློང་ཡིན་སྙམ་པའི་འདུ་ཤེས་དང་མ་བྲལ་བའི་ཐོག་ནས་བསྟན་པའི་ཞབས་འདེགས་བསྒྲུབ་རྒྱུ་ཁྱེད་ཚོའི་དགོངས་པར་འཆང་དགོས། ཞེས་གསུངས་སོང་།

ཁོང་གིས་མུ་མཐུད་དུ་གྲུབ་མཐའི་ཕྱོགས་རིས་སྤོང་དགོས་སྐོར་གསུངས་དོན། གཞན་པ་ཞིག་ལ་སྔར་བོད་དུ་གྲུབ་མཐའི་ཕྱོགས་རིས་དང་འཐེན་འཁྱེར་བྱས་ཏེ་བློ་རྒྱ་ཆུང་དྲགས་པ་དང་། མཐོང་རྒྱ་ཐོས་རྒྱ་ཆུང་དྲགས་པའི་གནས་ཚུལ་ཞིག་ཡོད། དེ་དག་སྐྱོན་ཆ་རེད་མ་གཏོགས་ཡོན་ཏན་མ་རེད། སོ་སོའི་ཁ་འདོན་དགེ་སྦྱོར་དེ་སོ་སོའི་ཆོས་རྒྱུད་ནས་མན་ངག་ཐོབ་བསྡད་པ་དེ་ཉམས་ལེན་བྱ་རྒྱུ་གཙོ་བོ་རེད། འོན་ཀྱང་ཐོས་བསམ་སློབ་གཉེར་བྱེད་སྐབས། ས་དགེ་བཀའ་རྙིང་བོན་དང་བཅས་པས་བསྟན་འགྱུར་ནང་གི་རྒྱ་གར་འཕགས་པའི་གཞུང་དག་ལ་གཟིགས་ཀྱི་ཡོད། དེ་དག་དགེ་ལུགས་རེད་དང་ས་སྐྱ་རེད་ཟེར་རྒྱུ་ཡོད་པ་མ་རེད། རྩ་བའི་འབྱུང་ཁུངས་ལ་བསམ་བློ་གཏོང་དགོས། ཡར་ཁུངས་གཏུགས་ན་ང་ཚོ་ཚང་མ་གཅིག་གྱུར་རེད། རྒྱ་ཆེ་ས་ནས་ཆུང་སར་བབ་ཡོང་ན། བཀའ་རྒྱུད་ལ་ཡང་ནང་གསེས་མང་པོ་ཡོད་ལ། དགེ་ལུགས་པར་ཡང་ཡིག་ཆ་སྣ་ཚོགས་ཡོད། དེ་བཞིན་གཞན་དག་ཀྱང་གཅིག་མཚུངས་རེད། འདི་རིགས་དགོས་མཁོ་ཡོད་པ་ཞིག་མ་རེད། ད་ལྟའི་དུས་ཚོད་འདིར་བོད་གངས་ཅན་ལྗོངས་སུ་བསྟན་པ་འཇིག་ལ་ཉེ་བར་ཐུག་ཡོད། གྲུབ་མཐའ་ཕྱོགས་འཐེན་བྱེད་པའི་དུས་ཚོད་མ་རེད། ཆོས་རྒྱུད་ཚང་མའི་གཞུང་ལུགས་རབ་འབྱམས་ལ་གཟིགས་ཐུབ་པ་བྱུང་ན་དེའི་ཚོད་ཀྱིས་བློ་སྐྱེད་སྟེར་གི་རེད། ངས་དགེ་ལུགས་པ་ཚོར་ཡང་ཀུན་མཁྱེན་ཀློང་ཆེན་པའི་གཞུང་དག་ལ་གཟིགས་དགོས་པ་རེད་ཟེར་ནས་བཤད་ཀྱི་ཡོད། ང་རང་ལ་མཚོན་ན་ཡང་སྔ་འགྱུར་རྙིང་མའི་དབང་ལུང་མན་ངག་དང་ས་སྐྱ་སོགས་ཆ་ཚང་བ་ཞིག་ཐོབ་ཡོད། ཅེས་གསུངས་སོང་།

༼ གསར་འགོད་པ་དོན་འགྲུབ་བཀྲ་ཤིས་ཀྱིས་ལྷོ་ཕྱོགས་སེ་ར་དགོན་ནས་སྤེལ ༽