སྐོམ་པ་ཆུ་འདོད་བཞིན་སློབ་སྦྱོང་དུ་ཡོང་མཁན།

ཕྱི་ཚེས་ ༡༥ ཉིན་གྱི་ངྷ་སའི་ཞོགས་པ་ནི་ཇི་འདྲའི་མཛེས་སྡུག་ལྡན་པ་ཞིག་རེད་ཨང་། ནམ་མཁའ་གཡའ་དག་ཅིང་ས་གཞི་རྡུལ་དག་པ། སྟོན་མཇུག་གི་བསིལ་རླུང་དང་བསྡོངས་ནས་ཁ་སང་གི་ངལ་དུབ་ཡོངས་སུ་སངས་ཏེ། དེ་རིང་གི་ལས་དོན་ལ་སྤྲོ་སྣང་གིས་ཀུན་ནས་བརྟས་བྱུང་། ཉིན་དེར་ལས་ཁུངས་ཀྱིས་བཀོལ་མངགས་བཞིན་ང་རང་དབུས་སྣེ་ལེན་ཁང་ལ་བོད་ནས་གསར་དུ་ཕེབས་པ་ཚོར་བཅར་འདྲིར་སྐྱོད་པ་ཡིན། ནམ་རྒྱུན་དབུས་སྣེ་ལེན་ཁང་དུ་བསྐྱོད་སྐབས་རླངས་འཁོར་དང་མི་ཚོགས་ཀྱི་འདུ་འཛི་ཆེ་བའི་མཱེག་ལོར་ཁྲོམ་ལ་འགྲོ་དགོས་ཀྱང་། དེ་རིང་ངྷ་ཤོད་བརྒྱུད་ཁ་ཁུ་སིམ་པོར་ཤེས་རབ་དགའ་ཚལ་སློབ་གླིང་གི་ཕྱོགས་སུ་བསྐྱོད་དགོས་པ་དེ་རེད། འདི་ནི་གསར་འགོད་པ་ཞིག་ལ་མཚོན་ན། གསར་འགྱུར་སྔོག་འདོན་བྱེད་སྟངས་ལ་བསམ་བློའི་སྟ་གོན་དང་། གསར་འགྱུར་གྱི་གོ་རིམ་སྒྲིག་ཕྱོགས་ལ་གྲ་སྒྲིག་གི་དུས་ཚོད་རྩ་ཆེན་ཞིག་ཆགས་ཡོད་པ་ལྟར། ངྷ་ཤོད་ནས་གླ་འཁོར་ཞིག་ལ་བསྡད་དེ་སྣེ་ལེན་ཁང་བར་བསྐྱོད་པའི་ལམ་བར་ནས་ངས་ཕལ་ཆེར་ཉིན་གཅིག་གི་ལས་ཀའི་སྒྲོམ་གཞི་བཟོས་ཟིན་བྱུང་།

སྣེ་ལེན་ཁང་གསར་པའི་སྒོ་ཆེན་ནང་འཛུལ་མ་ཐག གདོང་པ་དམར་ལ་ཤ་རྩ་དཀར་བ། མར་དྲི་དང་རྩམ་དྲི་མ་ཡལ་བའི་བུ་མོ་འགའ་མཐོང་བྱུང་། ང་ཁོང་ཅག་གི་སར་བཅར་ཏེ་སྐད་ཆ་འདྲི་རྩིས་བྱས་སྐབས། དེའི་ཁྲོད་ཀྱི་བུ་མོ་ཞིག་གིས། “ང་ཚོ་སློབ་གྲྭར་འགྲོ་མྱོང་མེད་པས་སྐད་ཆ་བཤད་ཤེས་ཀྱི་མེད” ཟེར། མོའི་སྐད་ཆ་དེ་ནི་ཏག་ཏག་ངས་ལམ་བར་ནས་གྲ་སྒྲིག་བྱས་པའི་དེ་རིང་གི་ཞིབ་འཇུག་བྱ་ཡུལ་གཅིག་རེད། སྐབས་དེར་ངས་ཡང་བསྐྱར་བུ་མོ་དེར་སློབ་གྲྭར་མ་སོང་བའི་རྒྱུ་མཚན་གང་ཡིན་དང་། མོ་རང་མ་གཏོགས་སློབ་གྲྭར་མ་ཕྱིན་པའི་བུ་མོ་གཞན་ཡོད་མེད་དྲིས་སྐབས། སློབ་གྲྭར་འགྲོ་མ་མྱོང་བའི་བུ་མོ་མང་པོ་འདུག ཅེས་ལན་བཏབ་བྱུང་། སྤྱིར་བུད་མེད་ཚོར་སློབ་སྦྱོང་གི་གོ་སྐབས་རག་གི་མེད་པ་འདི་ལ་སྲོལ་རྒྱུན་གྱི་གོམས་སྲོལ་ངན་པའི་ཤན་ཞུགས་ཡོད་ལ། ལྷག་པར་དུ་བོད་ནང་གི་གྲོང་གསེབ་ཁུལ་གྱི་གནད་དོན་ཆེ་ཤོས་ཤིག་ཀྱང་ཆགས་ཡོད།  

ཐོག་མར་ཕ་ཡུལ་ཁམས་ཆ་ཕྲེང་ནས་ཡིན་པའི་རང་ལོ་ ༡༦ ཅན་གྱི་བུ་མོ་བློ་བཟང་སྒྲོལ་མས་བརྗོད་དོན། ང་རང་སློབ་གྲྭར་འགྲོ་རྒྱུར་དགའ་བོ་ཡོད་ཀྱང་ཆུང་དུས་ནས་ཕ་ལགས་ནད་མནར་གྱིས་གྲོངས་སྟབས། ཁྱིམ་ཚང་གི་འཚོ་བ་སྐྱོ་བོ་ཆགས་ཏེ་སློབ་གྲྭ་འགྲོ་རྒྱུའི་གོ་སྐབས་མ་བྱུང་ལ། དཀའ་ངལ་དེའི་རྐྱེན་གྱིས་ངའི་གཅུང་མོ་ཡང་སློབ་གྲྭར་འགྲོ་མ་ཐུབ། གྲོང་གསེབ་ཏུ་སློབ་གྲྭ་མེད་པ་དང་རྫོང་ཐོག་གི་སློབ་གྲྭར་ཞུགས་ན། སློབ་ཡོན་ཆེན་པོ་སྤྲོད་དགོས་སྟབས་ངེད་གཅེན་གཅུང་གཉིས་ཁྱིམ་ནས་ལྷག་སོང་། གྲོང་གསེབ་ཀྱི་བྱིས་པ་ཚོ་སློབ་གྲྭར་འགྲོ་བ་མཐོང་སྐབས་ང་ཡང་སློབ་གྲྭར་འགྲོ་འདོད་ཆེན་པོ་སྐྱེས་བྱུང་། འོན་ཀྱང་། ཁྱིམ་དུ་ལས་ཀ་ཧ་ཅང་མང་བའི་རྐྱེན་གྱིས་སློབ་གྲྭར་འགྲོ་རྒྱུ་ཕར་ཟད། ཐ་ན་ད་བར་ས་གནས་གཞན་ལའང་འགྲོ་མྱོང་མེད།  ད་བར་ངེད་གཅེན་གཅུང་གཉིས་ཀྱིས་ཁྱིམ་དུ་ཨ་མར་རོགས་པ་བྱས་ནས་བསྡད་པ་ཡིན། ཞེས་དང་། རྒྱ་གར་ནང་སློབ་ཡོན་མི་དགོས་པ་གོ་སྟེ། ཨ་མ་དང་གྲོས་བསྡུར་བྱས་ཏེ་ངེད་གཅེན་གཅུང་གཉིས་རྒྱ་གར་ལ་ཡོང་བ་ཡིན། འགྲམ་ནས་བལ་ཡུལ་གྱི་ལམ་ཁྲིད་པ་ཞིག་ལ་རྒྱ་སྒོར་ཆིག་ཁྲི་བཞི་སྟོང་ ༡༤༠༠༠ ཙམ་སྤྲད་པ་ཡིན། ང་རང་རྒྱ་གར་དུ་ཡོང་བ་སློབ་སྦྱོང་གི་ཆེད་ཡིན་སྟབས། སློབ་གྲྭར་སོང་སྟེ་བོད་ཡིག་དང་དབྱིན་ཡིག་གཉིས་ཡག་པོ་ཞིག་སྦྱང་གི་ཡིན། ངའི་ཨ་མས་ཀྱང་རེ་ལྟོས་བྱས་ཡོད་པ་རེད། ཅེས་བརྗོད་བྱུང་།

རང་ལོ་ ༡༤ ཡིན་པའི་བུ་མོ་བློ་བཟང་སྒྲོལ་མའི་གཅུང་མོ་ཚེ་རིང་སྒྲོལ་དཀར་གྱིས་བརྗོད་དོན། ང་རང་ལོ་གཅིག་ཙམ་རིང་ས་གནས་སློབ་གྲྭར་ཕྱིན་པ་ཡིན། ཡིན་ནའང་། སློབ་གྲྭའི་ནང་རྒྱ་ཡིག་མ་གཏོགས་གང་ཡང་སློབ་ཀྱི་མེད། དགེ་རྒན་ཚང་མ་རྒྱ་མི་རེད། སློབ་ཁྲིད་ལའང་མཚམས་རེར་མ་གཏོགས་ཡོང་གི་མི་འདུག གནས་སྟངས་དེ་འདྲ་ཞིག་གི་འོག་ནས་དུས་ཚོད་འཕྲོ་བརླག་ཏུ་གཏོང་རྒྱུ་ལས་རྒྱ་གར་དུ་སོང་ན་བཟང་གི་རེད་ཟེར་ནས་ཨ་ཅག་དང་ངེད་གཉིས་ཡོང་བ་ཡིན། ཁྱིམ་ནས་ཁ་བྲལ་ཁར་ཨ་མས་རྒྱ་གར་ལ་སོང་ན། ༧གོང་ས་མཆོག་ལ་མཇལ་ཐུབ་པར་མ་ཟད། སློབ་སྦྱོང་གི་གོ་སྐབས་ཀྱང་ཡག་པོ་རག་གི་རེད་ཟེར། གཅེན་མོ་ངེད་གཉིས་དུས་གཅིག་ལ་ཁྱིམ་ནས་ཐོན་ཡོང་ན། ཨ་མར་དཀའ་ངལ་འཕྲད་ཀྱི་རེད་ཅེས་བཤད་ཀྱང་། ཨ་མས་ཁྱིམ་ཚང་ལ་སེམས་ཁྲལ་མི་དགོས། རྒྱ་གར་དུ་ཕྱིན་རྗེས་སློབ་སྦྱོང་ལ་འབད་བརྩོན་བྱ་དགོས་པ་རེད་ཟེར། ངེད་གཉིས་བལ་ཡུལ་དུ་སླེབས་སྐབས་ས་ཆ་གང་སར་༧གོང་ས་མཆོག་གི་སྐུ་པར་མཐོང་རྒྱུ་འདུག སེམས་ལ་བྲེལ་བ་ཆེན་པོ་ལང་གི་འདུག གང་མགྱོགས་༧གོང་ས་མཆོག་ལ་མཇལ་ཁ་རག་ན་བསམ་སོང་། ཞེས་བརྗོད་སོང་།

ཕ་ཡུལ་ཁམས་དཀར་མཛེས་ནས་ཡིན་པའི་རང་ལོ་ ༣༠ ཅན་གྱི་བུ་མོ་ཟླ་བཟང་གིས་བརྗོད་དོན། ངའི་ཕ་མ་གཉིས་ཀ་ཞིང་པ་ཡིན། ང་ཚོའི་རྫོང་ཐོག་ཏུ་སློབ་གྲྭ་ཡོད་ཀྱང་ང་སྡོད་སའི་གྲོང་གསེབ་ཏུ་སློབ་གྲྭ་ཡོད་པ་མ་རེད། རྫོང་གི་སློབ་གྲྭར་དངུལ་མེད་ན་ཚུད་ཐབས་མེད་སྟབས། ད་བར་ཞིང་ལས་བྱས་ཏེ་ཁྱིམ་ནས་བསྡད་པ་ཡིན་ལ། ངའི་གཅེན་མོ་དང་གཅུང་པོ་གཉིས་ལ་ཡང་སློབ་སྦྱོང་གི་གོ་སྐབས་རེག་མེད། ང་རང་རྒྱ་གར་དུ་ཡོང་དོན་ནི་༧གོང་ས་མཆོག་ལ་མཇལ་རྒྱུ་དང་སློབ་སྦྱོང་ཕྲན་བུ་ཞིག་བྱ་ཨེ་ཐུབ་བསམ་ནས་ཡོང་བ་ཡིན། ཞེས་བརྗོད་བྱུང་། བུ་མོ་ཟླ་བཟང་ལགས་ཀྱིས་ལྷ་ས་ནས་ལམ་འཁྲིད་པ་ཞིག་ལ་རྒྱ་སྒོར་ཆིག་ཁྲི་སུམ་སྟོང་༡༣༠༠༠ ཙམ་སྤྲད་དེ། བལ་བོད་ས་མཚམས་འགྲམ་བརྒྱུད་རྒྱ་གར་དུ་ཡོང་ཞིང་། སྔོན་ཆད་སློབ་གྲྭར་འགྲོ་མ་ཐུབ་པའི་བསླབ་བྱ་དེ་སེམས་ལ་ཉར་ཏེ་སློབ་སྦྱོང་ལ་ཧུར་བརྩོན་དང་། མ་མཐར་ཡང་བོད་ཡིག་འབྲི་ཀློག་ཡག་པོ་ཤེས་ཐུབ་བྱ་རྒྱུའི་དམ་བཅའ་ཡོད་སྐོར་བརྗོད་བྱུང་ལ། ཁོང་མོ་ཕ་ཡུལ་ནས་ཆང་ས་བརྒྱབ་ཟིན་པ་མ་ཟད། ད་ཆར་རང་ལོ་ ༡༡ ལ་སོན་པའི་བྱིས་པ་ཞིག་ཀྱང་ཡོད་པ་དང་། རྗེས་ཕྱོགས་བྱིས་པ་དེ་རྒྱ་གར་དུ་ལེན་འདོད་ཡོད་ཚུལ་ཡང་བརྗོད་བྱུང་།

ཕ་ཡུལ་ཁམས་ལི་ཐང་ནས་ཡིན་པའི་རང་ལོ་ ༢༥ ཅན་གྱི་བུ་མོ་སྒྲོལ་མ་ཚེ་རིང་གིས་བརྗོད་དོན། ང་རང་སློབ་གྲྭར་འགྲོ་མ་ཐུབ་པའི་རྒྱུ་མཚན་གཙོ་བོ་གཅིག་ནི། ངའི་པ་ལགས་ཀྱིས་གསུངས་ན། སྤྱི་ཚོགས་རྙིང་པའི་སྐབས་ངེད་ཚང་ས་བདག་གྲལ་རིམ་རེད་ཟེར། རིག་གནས་གསར་བརྗེ་ཆེན་མོའི་སྐབས་རྒྱ་གཞུང་གིས་ངའི་པ་ལགས་ཀྱི་ཨ་མར་མནར་གཅོད་ཚད་མེད་བཏང་ཡོད་ས་རེད། ས་བདག་གི་བུ་ཕྲུག་ཡིན་སྟབས་སློབ་གྲྭ་ནས་དཀའ་ངལ་འཕྲད་སྲིད་པའི་དོགས་གཞིའི་འོག ང་སློབ་གྲྭར་མ་བཏང་བ་རེད། ལོ་ན་ཆེན་པོ་ཆགས་ཡོང་དུས་སློབ་གྲྭར་འགྲོ་བསམ་ཡང་གོ་སྐབས་ཡོད་པ་མ་རེད། དེའི་སྟབས་ཀྱིས་ད་བར་ཞིང་ལས་དང་མཚམས་རེར་ཕྱུགས་རྫི་བྱས་ཏེ་བསྡད་པ་ཡིན། ངའི་ཕ་ཡུལ་ལ་མཚོན་ན། བྱིས་པ་ཚོ་རང་ལོ་༩ ལས་བརྒལ་ན་སློབ་གྲྭར་འགྲོ་རྒྱུའི་གོ་སྐབས་ཡོད་པ་མ་རེད། ཅེས་བརྗོད་བྱུང་། ལྷ་ས་ནས་ངའི་གཅེན་པོའི་ངོ་ཤེས་ཚོང་པ་ཞིག་གིས་ལམ་འཁྲིད་པ་བཙལ་ཏེ། རྒྱ་སྒོར་བརྒྱད་སྟོང་ལྔ་བརྒྱ་ ༨༥༠༠ ཙམ་སྤྲད་པ་ཡིན། ང་ཡང་ཁར་གཅེན་པོས་སློབ་སྦྱོང་ལ་ཤུགས་རྒྱོབས། དེང་སྐབས་སློབ་སྦྱོང་མེད་ན་མི་གྲལ་དུ་ཚུད་ཀྱི་མ་རེད་ཟེར། ཞེས་བརྗོད་བྱུང་། །

བུ་མོ་དེ་དག་གི་གླེང་མོལ་བརྒྱུད་དེ་ང་ལ་རེ་དོགས་དང་སེམས་ཁྲལ་མང་པོ་ཞིག་བསླངས་སོང་ལ། ཁོང་ཅག་གི་རེ་འདུན་ལྟར། རྒྱ་གར་ནས་སློབ་སྦྱོང་ལ་གྲུབ་འབྲས་དང་ཀུན་སྤྱོད་ལ་འཕོ་འགྱུར་གང་འདྲ་ཞིག་ཆགས་ཡོང་ངམ། འདས་ཟིན་པའི་ཐོབ་ཤོར་གྱི་ལོ་ཟླ་ལ་ཕངས་སེམས་དང་། མ་འོངས་པའི་ཀྱག་ཀྱོག་གི་མདུན་ལམ་ལ་ཚོད་དཔག་སྣ་ཚོགས་བྱེད་བཞིན་ཕྱིར་ལམ་ལ་ཆས་སྐབས། ངས་གོང་དུ་བཅར་འདྲི་ཞུ་ཡུལ་གྱི་བུ་མོ་ཟླ་བཟང་ལགས་སླར་ཡང་ངའི་གམ་དུ་ཡོང་སྟེ། ང་ལ་ཐུགས་རྗེ་ཆེ་ཟེར་བཞིན་ཤིང་ཏོག་ཅིག་སྤྲད་བྱུང་ལ། བོད་པའི་བུ་མོའི་ལྷད་མེད་དྭངས་གཙང་གི་གཤིས་རྒྱུད་དེས་ངའི་བསམ་གི་འཁྲུལ་སོ་རྨིང་ནས་སངས་སོང་།

གསར་འགོད་པ། དཔལ་ལྡན།