ལོ་གསར་བ་བསླེབས་སོང་། བོད་མི་ཚོས་ལོ་གསར་སོང་། བོད་དུ་ལོ་གསར་གཏོང་ཕྱོགས་ཐད་ནས་རྣམ་འགྱུར་བསྟན་སོང་། དེར་ཕྱོགས་གསུམ་ནས་སྐད་ཆ་འདུག ཟླ་སྔོན་མར་རྒྱ་ནག་གི་ལོ་གསར་དང་མཉམ་དུ་ལོ་གསར་གྱི་མིན་ཟེར་ནས་རྣམ་འགྱུར་བསྟན་སོང་། ཡང་ལོ་སྔོན་མར་སྐྱེ་དགུ་མདོའི་ས་ཡོམ་ཁྲོད་བོད་མི་མང་པོ་འཆི་སྐྱོན་བྱུང་བས་ལོ་གསར་གྱི་མིན་ཟེར། ད་དུང་མདོ་ཁམས་ཕྱོགས་ནས་བོད་དབུས་ཕྱོགས་དང་བསྟུན་ནས་ལོ་གསར་གྱི་ཡིན་ཟེར་ནས་རྣམ་འགྱུར་བསྟན་སོང་། འདི་དག་ཚང་མ་བོད་མི་རིགས་ཀྱི་བསམ་བློའི་འགྱུར་འགྲོས་ཤིག་ལ། རྒྱ་གཞུང་གིས་ཀྱང་དེ་དག་ལ་ཚོར་བ་རྣོན་པོས་བལྟས་ཡོད།
ད་ནི་བོད་པའི་ལོ་གསར་འདི་ཡང་རྒྱ་ནག་གཞུང་གི་མིག་ལམ་དུ་འགྲོ་ཡི་མི་འདུག ངའི་ཕ་ཡུལ་ཨ་མདོ་རྔ་བ་རྫོང་ཡིན། ང་ཕ་ཡུལ་དང་ཁ་བྲལ་ནས་ལོ་༡༣འགྲོ་སོང་། ལོ་གསར་སྐབས་ངེས་པར་དུ་རང་ཁྱིམ་དུ་ཁ་པར་གཏོང་གི་ཡོད། ད་ལོ་ཡང་ལོ་གསར་གྱི་ཚེས་གཅིག་ཉིན་ནང་ལ་ཁ་པར་བཏང་། ཨ་བོ་དང་མཉམ་དུ་སྐད་ཆ་བཤད། ཨ་བོས་བཤད་ན། རྔ་བ་རྫོང་དུ་ལོ་གསར་གཏོང་མཁན་ཕྱོགས་གཉིས་ཆགས་སོང་། རྔ་སྟོད་ཀྱི་ཕྱོགས་མང་ཆེ་བས་རྒྱའི་ལོ་གསར་དང་བསྟུན་ནས་ལོ་གསར་སོང་། དེའི་རྒྱུ་མཚན་ནི་རྒྱ་གཞུང་གིས་དགོན་སྡེ་ཆེ་ཁག་གི་བླ་སྤྲུལ་ཚོ་བཙན་གྱིས་མི་མང་གི་མདུན་དུ་བརྫིངས་ཏེ་རྒྱའི་ལོ་གསར་བ་དང་བསྟུན་ནས་ལོ་གསར་དགོས་པའི་སྐད་ཆ་བཤད་བཅུག་སོང་། བླ་སྤྲུལ་ཁ་ཤས་སྙི་མོ་འདུག རྒྱའི་ལོ་གསར་དང་མཉམ་དུ་ལོ་གསར་མཁན་ཚོར། རྒྱ་གཞུང་གིས་དངུལ་དང་ཕྱེ་འབྲས་སྤྲད་དེ། ཞབས་བྲོ་འཁྲབ་པ་དང་རྟ་རྒྱུགས་བྱེད་བཅུག་སོང་། འདི་དག་པར་བརྒྱབ་སྟེ་གསར་ལམ་ཁག་ཏུ་བསྟན་སོང་། རྔ་བ་བར་མ་དང་རྔ་བ་སྨད་ཀྱི་ཕྱོགས་ཀྱི་གྲོང་སྡེ་མང་ཆེ་བས་ལོ་གསར་དབུས་ཕྱོགས་དང་བསྟུན་ནས་ལོ་གསར་གཏོང་བར། འབད་པ་དང་རྣམ་འགྱུར་བསྟན་སོང་། དེ་ལ་བརྟེན་ནས་རྒྱ་གཞུང་གིས་གྲོང་སྡེ་དང་། དགོན་པ་དག་ལ་སྡང་གཟིགས་དང་བཙུར་གནོན་ཡང་ཡང་བྱས་སོང་།
བོད་མི་ཚོའི་ནང་ཁུལ་དུ་སྔོན་ནས་སྐད་ཆ་ཞིག་འགྲོ་ཡི་འདུག དེ་ནི་བོད་དབུས་ཕྱོགས་ཀྱི་ལོ་གསར་སྐབས་ཤོག་སྦག་བསྒྲོན་ཏེ་རྣམ་འགྱུར་སྟོན་གྱིན་ཡིན་ཟེར། དེ་དེ་བཞིན་དུ་དེ་རིང་ཞོགས་པར་རྔ་རྫོང་གི་སྟོད་སྨད་བར་གསུམ་དུ་ཤོག་སྦག་བསྒྲོན་ཏེ་ལོ་གསར་གྱི་རྣམ་འགྱུར་བསྟན་སོང་། བསང་བཏང་སོང་། དཔུང་རྒྱན་བཏགས་སོང་། རླུང་རྟ་གཏོར་སོང་། བོད་མི་ཚོས་སེམས་ཁུང་རུས་པའི་གཏིང་ནས་༧གོང་ས་མཆོག་སྐུ་ཚེ་བརྟན་དང་གཞིས་བྱེས་མཉམ་འཛོམས་ཡོང་བར་ལྷ་སྲུང་དང་གཞི་བདག་ཚོ་ལ་འཕྲིན་ལས་བཅོལ་སོང་། དེ་བཞིན་དམ་བཅའ་བཞག་སོང་། བོད་མི་མང་པོས་ལོ་གསར་བའི་ནང་བོད་སྐད་གཙང་མ་བཤད་རྒྱུ་ཡིན་པའི་དམ་བཅའ་བཞག་སོང་། དེ་སྔོན་ནས་རྔ་བ་རྫོང་དུ་བོད་སྐད་གཙང་མ་བཤད་པར་བོད་མི་ཚོས་རང་འགུལ་གྱིས་ལས་འགུལ་སྤེལ་བཞིན་ཡོད་ལ།དེ་ཤུགས་སྣོན་རྒྱག་རྒྱུ་དང་། སུ་ཞིག་གིས་བོད་མི་ནང་ཁུལ་དུ་རྒྱ་སྐད་བཤད་པ་དང་བོད་སྐད་དུ་རྒྱ་སྐད་བསྲེས་པ་ཡིན་ན། དེ་ལ་ཆད་པ་གཅོད་རྒྱུ། ཆད་པའི་དངུལ་རྣམས་བསགས་ཏེ་བོད་སྐད་གཙང་ཉར་དང་བོད་ཡིག་གོང་སྤེལ་གྱི་ཆེད་དུ་གཏོང་རྒྱུ་རེད་ཅེས་བཤད་དེ། ཨ་བོས་ད་དེ་འདྲ་རེད་བཤད་བསྡད་ན་ད་དུང་མང་ཟེར།
ངས་གཞན་ག་རེ་འདུག་ཅེས་དྲིས་ལན་དུ། ཨ་བོས། རྒྱ་གཞུང་ལ་དོན་ཏག་ཅི་ཡང་མི་དགོས། དོན་མེད་ལ་སུན་པོ་ཡང་ཡང་བཟོ་བཞིན་འདུག གསུམ་བཅུའི་དུས་དྲན་བསླེབ་ལ་ཡོད་པ་རེད། དེ་རྒྱ་གཞུང་གིས་ཤེས་ཡོད་པ་རེད། བོད་མིའི་ཚོའི་སྡོད་ཁང་རེ་རེའི་ཐོག་ཏུ་རྒྱ་མིའི་རྒྱལ་དར་འཕྱར་དགོས་ཟེར། རྒྱལ་དར་མ་འཕྱར་ན་ཆད་པ་གཅོད་རྒྱུ་དང་། རྒྱལ་ཁབ་ལ་རྒྱབ་ཕྱོགས་མཁན་གྲས་སུ་བརྩིས་ནས་ཕྱོགས་གང་ཐད་ནས་ཁེ་རྐྱང་དུ་འཕུད་རྒྱུ་ཡིན་ཟེར། ད་དུང་དེས་ག་ལ་ཚད། གསུམ་བཅུའི་དུས་དྲན་ཉིན་རྔ་བ་རྫོང་གི་གྲོང་ཁྱེར་དུ་གླུ་དང་ཞབས་བྲོ་ཡི་མཛད་སྒོ་ཞིག་འཚོག་རྒྱུ་ཡིན་ཟེར་། གླུ་ལེན་མཁན་དང་ཞབས་བྲོ་འཁྲབ་མཁན་ཚོར་དངུལ་མང་པོ་སྤྲོད་རྒྱུ་ཡིན་ཟེར། ཁོ་ཚོ་ལ་རྒྱལ་ཁབ་ཀྱིས་ཕྱོགས་ཀུན་ནས་མཐོང་ཆེན་དང་རྒྱབ་སྐྱོར་གནང་གི་ཡིན་ཟེར། འོན་ཀྱང་བོད་མི་ཚོས་སུ་ཞིག་གིས་ཁང་ཐོག་ཏུ་རྒྱ་ནག་གི་རྒྱལ་དར་འཕྱར་བ་དང་གླུ་བྲོའི་མཛད་སྒོར་ཞུགས་པ་ཡིན་ན་གྲོང་སྡེའི་སྐྱིད་སྡུག་ནས་འཕུད་རྒྱུ་ཡིན་ཟེར་གྱིན་འདུག
རྒྱ་ནག་གཞུང་འདི་བོད་མིའི་ཐོག་ཇེ་མཁྲེགས་ནས་ཇེ་མཁྲེགས་རེད་ལ། གདུག་རྩུབ་ཀྱང་ཇེ་ཆེ་ནས་ཇེ་ཆེ་རེད། འཛིན་བཟུང་བཀག་ཉར་གྱི་གྲངས་ཀའང་ཇེ་མང་ནས་ཇེ་མང་རེད། བོད་མི་རིགས་ཀྱི་སྐད་ཡིག་དང་རིག་གཞུང་། དུས་ཆེན་དང་འདུ་འཛོམས་སོགས་ཡོད་ཚད་ལ། ཚོར་བ་རྣོན་པོ་ཞིག་གིས་བལྟས་ཏེ་དོན་མེད་ལ་དམ་དྲག་དང་དབང་ཡོད་བྱེད་རྐྱང་རེད། བོད་མི་ཚོ་ཡང་༢༠༠༨ལོའི་ཞི་རྒོལ་རྗེས་ནས་ཇེ་མཁྲེགས་ནས་ཇེ་མཁྲེགས་རེད། རྒྱའི་ཉེན་རྟོག་པ་ཚོ་ལ་དོན་མེད་དུ་མགོ་སྒུར་གྱིན་མི་འདུག་ལ་འཛིང་རྐྱང་རེད། དེ་བཞིན་དུ་རང་མི་རིགས་ཀྱི་ཞེན་ཁོག་དང་། རང་གི་སྐད་ཡིག་གིས་མཚོན་པའི་རིག་གཞུང་ལ་དུངས་བ་ཇེ་ཟབ་རེད། མཚམས་འདིར་བསླེབས་དུས་ངའི་ཨ་བོས་ད་དེ་འདྲ་རེད། ལག་པའང་ན་སོང་། ཆུ་ཚོད་གཅིག་ལྷག་ལ་ངེད་གཉིས་ཀྱི་སྐད་ཆ་བཤད་འདུག ད་ངས་ཁྱོད་ལ་སྐད་ཆ་ཞིག་འདྲི། རྒྱ་གར་དུ་ག་འདྲ་འདུག ངས་བཙན་བྱོལ་བོད་མི་ཚོ་བོད་དོན་འཐབ་རྩོད་ཡིན་ན་རེད། རང་གི་རིག་གཞུང་དང་སྐད་ཡིག་ལ་འཆང་བའི་དུང་བ་ཡིན་ནའང་རེད། ཇེ་ཆུང་ནས་ཇེ་ཆུང་རེད་ལ། ཁོང་ཚོས་གཙོ་བོ་རང་ལ་ཁེ་ཕན་ཡོད་མེད་ལ་ལྟ་བཞིན་ཡོད་པ་རེད་ཅེས་ལན་བཏབ། ཡ་ཡ་ད་ང་ལ་ཁ་པར་ཞིག་ཡོང་གི་འདུག བདེ་མོ་རྗེས་ནས་སྐད་ཆ་ལྷོད་ལྷོད་བཤད་ཆོག ངེས་སྤུན་གཉིས་ཀྱི་སྐད་ཆ་ཚར་སོང་།
ཁྱེད་ཚོས་མང་པོ་ཞིག་བཤད་འདུག་པ་དེ་དག་ལ་ངར་ལེགས་ཉེས་ཅི་ཡང་བཤད་རྒྱུ་མེད། གང་ལྟར་ངའི་ཕ་ཡུལ་རྔ་གཡང་ཕྱུག་མོ་ནས་ད་ལོའི་ལོ་གསར་འདི་དབུས་གཙང་ཕྱོགས་དང་བསྟུན་ཏེ། ལོ་སྔ་མ་རྒྱ་ནག་གི་ཁྲིམས་འོག་ནས་སར་ཁུལ་ཙམ་བྱས་པ་ལས། དོན་གྱི་ལོ་གསར་དེ་ལོ་ཕྱི་མའི་སྐབས་སུ་སར་ཡོད་པའི་རྣམ་འགྱུར་ཤུགས་ཆེར་བསྟན་ཡོད་པ་ནི། དེའི་མཚན་མོར་ཤོག་སྦག་བཀད་དེ་གནམ་ས་ཁེངས་པ་ལྟ་བུ་ཞིག་བྱས་པ་ཡོངས་གྲགས་ཡིན་པས། དོན་དངོས་ཤིག་སྤེལ་རྒྱུ་དེ་ཧ་ཅང་གལ་ཆེ་བ་ཀུན་གྱིས་ཡིད་འཇོག་འཚལ།
ཨ་རོགས་ཡོན་བྷེ། གནས་ཚུལ་ཁུངས་བཙུན་རེད་ཟེར་གྱི་ཡོད་དམ། རྒྱ་གཞུང་གིས་དངུལ་དང་ཕྱེ་འབྲས་སྤྲད་དེ། ཞབས་བྲོ་འཁྲབ་པ་དང་རྟ་རྒྱུགས་བྱེད་བཅུག་སོང་། ཟེར་བ་འདི་བློ་གྲོས་བརྟན་གྱི་ཚིག་རེད། ཚིག་འདི་བློ་གྲོས་རབ་བརྟན་གྱིས་རྔ་སྟོད་མི་དམངས་ལ་མཐོང་ཆུང་དང་ལྕགས་རྫུན་བཤད་པ་རེད། རྔ་སྟོད་ལ་ལོ་སར་སྐབས་སུ་ཞབས་བྲོ་འཁྲབ་པའི་གནས་ཚུལ་རྩ་བ་ནས་མི་འདུག། རྒྱ་གཞུང་གིས་དངུལ་དང་ཕྱེ་འབྲས་ལ་བལྟས་ནས་རྟ་རྒྱུག་བྱས་པ་རེད་ཟེར་རྒྱ་ཡིན་ན་བདེན་པ་མ་རེད། ལོ་ནམ་སྐབས་སུ་རྟ་རྒ྄ུག་རྒྱ་ནི་རྔ་སྟོད་ཀྱི་ཡུལ་སྲོལ་གོམས་གཤིས་རེད། དེ་རྒྱ་གཞུང་དང་འབྲེལ་ཡོད་པ་ཞིག་མ་རེད། འོན་གྱང་རྒྱ་གཞུང་གིས་དྲིལ་བསྒྲགས་ཀྱི་བེད་སྤྱོད་བྱས་ཡོད་པ་ཡང་བདེན་པ་རེད། སྤྱིར་རྔ་སྟོད་ནང་ལོག་ཏུ་ཡང་ལོ་སར་རིམ་པ་གཉིས་བྱུང་འདུག།
རྔ་བ་བློ་གྲོས་རབ་བརྟན་ལགས་ཀྱིས་གནས་ཚུལ་ཁུངས་བཙུན་ཞིག་སྤེལ་འདུག རྔ་སྟོད་ཕྱོགས་ཀྱིས་ལོ་གསར་སྔོན་ལ་བྱས་ཡོད་པ་བདེན་པ་རེད་ལ་རྟ་རྒྱུགས་བྱས་ཡོད་པ་ཡང་བདེན་པ་རེད། ངས་ཀྱང་གནས་ཚུལ་འདི་ཕ་ཡུལ་ཕྱོགས་ནས་གསལ་བོ་གོ་བྱུང་། འོན་ཀྱང་གཡག་རྒོད་ལགས་ཀྱིས་བཤད་ན་ལོ་སྔོན་ལ་སར་བ་བདེན་ཡང་དེ་རྩིས་ཀྱི་འགྲོ་སྟངས་མ་འདྲ་བ་ཞིག་ལས་གང་ཡང་མ་རེད་ལབ་འདུག རེད་ངས་ཀྱང་བློ་གྲོས་རབ་བརྟན་ལགས་ཀྱི་རྩོམ་ཡིག་འདི་བཀླགས་པ་ཡིན། ལོ་སྔོན་ལ་སར་ཡོད་པ་དང་བོད་ས་ཡོངས་ཀྱི་ལོ་གསར་གཅིག་གྱུར་ལ་རོལ་མེད་ཚུལ་ལས་གཞན་རྩིས་ཀྱི་འགྲོ་སྟངས་གཅིག་མ་གཅིག་གི་སྐད་ཆ་གང་ཡང་མི་འདུག འདི་གཅིག་རེད། དེ་ནས་རྔ་སྟོད་ཕྱོགས་ནས་རྟ་རྒྱུགས་བྱས་ཡོད་རབས་ཀྱི་གནས་ཚུལ་དེ་ཡང་ལོ་རྟག་པར་བྱེད་ཀྱི་ཡོད་མེད་དང་དེ་ལྟར་བྱེད་སྲོལ་ཡོད་མེད་སོགས་བློ་གྲོས་རབ་བརྟན་ལགས་ཀྱི་རྩོམ་ཡིག་ནང་ལ་གང་ཡང་གླེང་མི་འདུག རྟ་རྒྱུགས་བྱས་འདུག་ཅེས་པ་གཅིག་པོ་རེད། འདི་ཡང་གནས་ཚུལ་གཅིག་རེད། རྩོམ་ཡིག་ཅིག་ལ་དཔྱད་པ་བྱེད་སྐབས་མིག་ཤད་ཐེངས་ཤིག་བྱས་ཏེ་ཚོར་བ་ཙམ་སྤེལ་རྒྱུར་མ་འབད་རོགས། རྩོམ་ཡིག་དེའི་ཡང་སྙིང་གནས་ཚུལ་གང་དང་ཅི་ཞིག་གསལ་བཤད་བྱེད་ཀྱི་འདུག དེའི་ནང་གི་ཆེད་ཚིགས་ཅི་ཞིག་རེད། བེད་སྤྱོད་ག་འདྲ་བཏངས་འདུག དགོས་པ་ཅིའི་ཕྱིར་བཏང་འདུག ཞིབ་མོ་བྱས་ཏེ་གཟིགས་རོགས་ཞེས་རེ་སྐུལ་བྱེད་ཀྱི་ཡོད།
བློ་གྲོས་རབ་བརྟན་ལགས་ཀྱིས་རང་གི་ཕུ་བོ་དང་སྐད་ཆ་བཤད་པ་དག་འདིར་དྲ་ཐོག་ཏུ་བཞག་པ་ལ་ཐུགས་རྗེ་ཆེ་ཞུ་འདོད་བྱུང་། འོན་གྱང་གནས་ཚུལ་ལ་ལ་ཞིག་དངོས་དོན་དང་མི་མཐུན་པ་ཞིག་རེད་བསམ་སོང་བ་དཔེར་ན།
(རྔ་སྟོད་ཀྱི་ཕྱོགས་མང་ཆེ་བས་རྒྱའི་ལོ་གསར་དང་བསྟུན་ནས་ལོ་གསར་སོང་། དེའི་རྒྱུ་མཚན་ནི་རྒྱ་གཞུང་གིས་དགོན་སྡེ་ཆེ་ཁག་གི་བླ་སྤྲུལ་ཚོ་བཙན་གྱིས་མི་མང་གི་མདུན་དུ་བརྫིངས་ཏེ་རྒྱའི་ལོ་གསར་བ་དང་བསྟུན་ནས་ལོ་གསར་དགོས་པའི་སྐད་ཆ་བཤད་བཅུག་སོང་། བླ་སྤྲུལ་ཁ་ཤས་སྙི་མོ་འདུག རྒྱའི་ལོ་གསར་དང་མཉམ་དུ་ལོ་གསར་མཁན་ཚོར། རྒྱ་གཞུང་གིས་དངུལ་དང་ཕྱེ་འབྲས་སྤྲད་དེ། ཞབས་བྲོ་འཁྲབ་པ་དང་རྟ་རྒྱུགས་བྱེད་བཅུག་སོང་།)
རྔ་སྟོད་ཕྱོགས་ཀྱི་སྡེ་བ་ལ་ལ་ཞིག་གི་ལོ་སར་སྔོན་མ་བོ་གཏང་བ་བདེན་པ་རེད། ཡིན་ན་ཡང་རྒྱ་མི་ལ་ཤེད་ནས་ལོ་སར་སྔོན་ལ་བཏང་བའི་ལོ་རྒྱུས་ཤིག་རྔ་ཡུལ་ལ་བཤད་རྒྱུ་མི་འདུག། རྩེས་ཀྱི་འགྲོ་སྟངས་མ་འདྲ་བ་ཤིག་ཡོད་པའི་རྒྱུ་མཚན་རེད་གསུང་གི་འདུག། རྒྱ་གཞུང་གི་དངུལ་དང་ཕྱེ་འབྲས་སྤྲད་དེ་རྟ་རྒྱུག་བྱེད་དུ་བཅུག་པའི་ལོ་རྒྱུས་ཤིག་དེ་ལས་མི་འདུག། ཅིག་བྱས་ན་ངས་མ་གོ་བ་ཡིན་འགྲོ། གང་ལྟར་ལོ་སར་སྐབས་རྟ་རྒྱུག་རྒྱ་དེ་རྔ་སྟོད་ཀྱི་སྲོལ་རེད། ལོ་སར་ནམ་བྱུང་ལ་རྟ་རྒྱག་རྒྱ་ཡོད་ཡོད་པ་རེད།
རྔ་སྟོད་ཀྱི་རྟ་རྒྱུག་ཐོག་ཏུ་གཏང་བཤད་མཁན་རྒྱ་སྟོད་བྷོ་དྲི་ཟེར་པ་དེས། གཏམ་བཤད་པའི་རྗེས་སུ་ལྷ་རྒྱལ་འཐེན་ཏེ། རྒྱལ་བ་ཡིད་བཞིན་ནོར་བུ་བོད་ལ་མྱུར་དུ་ཕེབས་ཐུབ་པའི་ལྷ་རྒྱལ་ལོ་ཞེས་དང་། པན་ཆེན་ཆུང་སྲིད་རིན་པོ་བཙོན་ལས་མྱུར་དུ་ཐར་ཐུབ་པའི་ལྷ་རྒྱལ་ལོ་ཞེས་པའི་མི་དམངས་ཀྱི་འབོད་སྒྲ་དེ་དག་ཉིད་ཀྱི་ཕུ་བོས་ཉིད་བཤད་མི་འདུག། ཡིད་མ་ཆེས་ནས་ཨ་རིའི་རླུང་འཕྲིན་ཁང་གི་དྲ་བསྙན་ནང་ལ་ལྟོས་དང་དེའི་ནང་ནས་བསྟན་སོང་ཟེར།
ང་ཡང་རྔ་བ་ཞིག་ཡིན་ལ་ཕལ་ཆེར་ཉིན་རྟག་པར་རྔ་ཡུལ་ལ་ཁ་པར་གྱི་ལམ་ནས་འབྲེལ་བ་ཡོད། ཉིད་ལ་འབོད་སྐུལ་བྱེད་ཡག་ཅིག་ལ། རྗེས་མར་རྔ་བའི་གནས་ཚུལ་རེ་འབྲི་འདོད་ན་སྔོན་ལ་དཔྱད་པ་ཡང་དག་པ་ཞིག་བྱས་རྗེས་འབྲི་རོགས། རྔ་བའི་ལ་རྒྱ་དང་ཆིག་སྒྲིལ་ལ་གནོད་པ་བྱེད་པའི་ཐོབ་ཐང་མི་སུ་ལའང་ཡོད་པ་མ་རེད། རྔ་བ་མི་མང་ནི་གནའ་ནས་ད་བར་དུ་རྡོག་རྩ་གཅིག་ཏུ་བསྒྲིལ་ཏེ། བཙན་རྒྱལ་རྒྱ་དམར་གྱི་གདོང་ལ་སྟག་བཞིན་དུ་དཔའ་ངར་ཆེན་པོའི་ངང་ལངས་སྟེ་སྡད་ཡོད།
ད་འོ་ན་ཁང་ཐོག་ཏུ་རྒྱ་ནག་གི་རྒྱལ་དར་དང་བོད་པའི་དར་ཆ་གཉིས་ཀ་འཕྱར་བ་ཡིན་ན། རྒྱ་ཕྱོགས་བོད་ཕྱོགས་གཉིས་ཀ་ནས་འདུག་ཐུབ་ཀི་རེད། དེ་མིན་འགྲོ་ལམ་གཞན་ཅི་ཡང་མི་འདུག