དེ་རིང་ཉིན་རྒྱབ་ཆུ་ཚོད་ ༤ དང་ཕྱེད་ཀའི་ཐོག་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་གཅིག་པ་ཡོངས་སུ་མཇུག་བསྒྲིལ་སོང་།
ཚོགས་འདུའི་མཇུག་བསྡོམས་དང་བསྟུན་ཏེ། ༧གོང་ས་མཆོག་གི་གསུང་འཕྲིན་དང་འབྲེལ་བའི་ལས་འཆར་ཐོག་བཀའ་བསྡུར་ཞིབ་ལྷུག་གནང་མཐར། བཙན་བྱོལ་བོད་མིའི་བཅའ་ཁྲིམས་ནང་གི་༧གོང་ས་མཆོག་གི་སྐུ་དབང་དང་འབྲེལ་བའི་ཐོག བཀའ་སྤྱི་གཉིས་ལས་གྲུབ་པའི་བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་ཞིག་བཙུགས་ཏེ། མི་འགྱང་བའི་དུས་ཡུན་ནང་། ༼ བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་པ ༽ བསྐང་རྒྱུར་སྤྱི་མོས་གྲོས་ཆོད་བཞག་སོང་།
གྲོས་ཆོད་དེའི་ནང་བཀོད་དོན། “དང་པོ། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་གསུང་འཕྲིན་དང་། བཀའ་སློབ་ཀྱི་དགོངས་དོན་ཉམས་ལེན་ཞུ་སླད། ཚོགས་གཙོ་སྦྲེལ་པོས་བཀའ་སྤྱི་གཉིས་ལས་གྲུབ་པའི་བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་ཞིག་བསྐོ་འཛུགས་གནང་རྒྱུ།
གཉིས་པ། བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་དེས་ལས་འཆར་ཚོགས་ཆུང་གི་རྒྱབ་གཉེར་སྙན་ཐོ་དང་། གྲོས་ཚོགས་སུ་བགྲོ་གླེང་བྱུང་བའི་སྤྱི་འཐུས་རྣམ་པའི་དགོངས་ཚུལ་གཞིར་བཞག་གིས། ཁྲིམས་དོན་མཁས་པར་གོ་བསྡུར་བགྲོ་གླེང་དང་། གཞན་ཡང་ལས་རིམ་ཇི་འགབ་བབ་གཟིགས་ཀྱིས་ཟིན་བྲིས་འགོད་རྒྱུ། ཚོགས་ཆུང་དེའི་སྙན་ཐོ་ ༢༠༡༡ ཟླ་ ༤ ཚེས་ ༡༡ ནང་ཚུན་དུ་ཚོགས་དྲུང་ལས་ཁུངས་སུ་འབུལ་ཐུབ་པ་དགོས།
གསུམ་པ། བཅའ་ཁྲིམས་བསྐྱར་བཅོས་ཟིན་བྲིས་ཀྱི་ནང་དོན་ལས་འཆར་ཚོགས་ཆུང་གི་རྒྱབ་གཉེར་སྙན་ཐོའི་ཟུར་འཛར་གཉིས་པའི་སྔོན་གླེང་དང་། དོན་ཚན་དང་པོའི་ཚིག་དོན་ལ་བསྐྱར་བཅོས་ནང་འོས་གནང་སྟེ། སྤྱི་ནོར་༧གོང་ས་མཆོག་ལ་བཅའ་ཁྲིམས་སུ་འགོད་ཆོག་པའི་གསོལ་འདེབས་ཞུ་ཕྱོགས་སྐོར་ ༢༠༡༡ ཟླ་ ༥ པའི་བདུན་ཕྲག་གསུམ་པའི་ནང་ཚུན་བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་པ་འཚོགས་རྒྱུ་དང་། ཚོགས་ཆེན་དེའི་དུས་ཚེས་དང་འཚོགས་ཡུལ་བཅས་སྤྱི་འཐུས་རྒྱུན་ལས་ཀྱིས་ཐག་གཅོད་གནང་རྒྱུ།
བཞི་བ། གོང་གསལ་ལས་དོན་ཁག་གྲུབ་མཚམས་བོད་མི་མང་སྤྱི་འཐུས་ལྷན་ཚོགས་སྐབས་བཅུ་བཞི་པའི་ཚོགས་འདུ་འཕར་མ་བསྡུ་སྐོང་གིས་སྙན་ཐོ་ལག་བསྟར་ཞུ་ཕྱོགས་བཀའ་བསྡུར་ཐག་གཅོད་གནང་རྒྱུ།” བཅས་བཀོད་འདུག་ལ། གྲོས་ཆོད་ཀྱི་དོན་ཚན་རེ་རེ་བཞིན་སྤྱི་མོས་བྱུང་ཡོད།
༈ མགོ་ན་དཔོན་པོ་མེད་པ་དང་། །འོག་ན་འབངས་མི་མེད་པ་དང་། །སྡོད་ན་ལུང་པ་མེད་པ་རྣམས། །འདུས་ན་དོན་དག་མེད་ངེས་རེད།
པེ་མི་ཟད་པ་ཡག་པོ་རེད། ཚོགས་འདུ་དོན་སྙིང་ལྡན་པ་ཞིག་ཡོངས་རྒྱུའི་རེ་བ་ཡོད། ༧ གོང་ས་༧སྐྱབས་མགོན་རིན་པོ་ཆེའི་རྒྱ་ཆེ་བའི་དགོངས་ཡག་སྡུག་གང་འདྲ་བྱེད་ན་ད་ལྟ་ཚོགས་འདུ་འདིར་ཕེབས་མཁན་རྣམས་ལ་རགས་ལས་ཡོད་པ་རེད། ད་ལྟ་སྐུབས་སྟེགས་དང་དབང་ཤུགས་ལ་བྱེད་པའི་དུས་ཚོད་ཞིག་མ་རེད། རླབས་ཆེན་གྱི་དགོངས་བཞེད་དེ་མི་མང་གི་མངོན་འདོད་དེ་སྣང་ཆུང་མ་བྱེད་རོགས། ཁོང་གི་དགོངས་པ་བཞེས་ཕྱོགས་དེ་འགོ་ཚོས་རྒྱུ་གལ་ཆེ། ད་ལྟ་བཙན་བྱོལ་ཁྲོད་ཐོས་ཤོར་ཕྱོགས་མང་པོ་ཡོད་པ་དང་། བོད་པ་ཡིན་ན་ཡང་ཁེས་དམན་དབང་ཆུང་སུ་ལུས་ཡོད་དེ་པ་ཚོ་དགོངས་པ་བཞེས་དགོས་ས་རེད། དེ་ཚོ་སུ་ཡིན་ས་རེད་ཆུ་ཁེད།
མགོ་ན་མེ་མདའ་མེད་ལ་རྭ་ལང་ཆ་ལང་།།
ཆོས་སྲིད་བསམ་བློ་མེད་ལ་མི་དྲན་རྒུ་དྲན།།
དམངས་གཙོའི་གོ་རྟོགས་མེད་ལ་མི་བཤད་རྒུ་བཤད།།
སྐུ་མཁྱེན་མིང་དོན་ཡོད་པའི་ཚོགས་ཤིག་འཚོག་རོགས།།
སླར་ཡང་བོད་གཞུང་མང་རྒྱལ་ཡོངས་ཚོགས་ཆེན་བཙུགས་པ་ལ་དགའ་བསུ་ཡོད། མི་མང་གི་བསམ་འཆར་གང་མང་གྲོས་ཚོགས་ལ་སླེབས་ཐབས་བྱེད་པ་དེ་གོམ་པ་མདུན་སྤོས་ཀྱི་ལས་གཞི་གཅིག་ཡིན། ཡིན་ན་ཡང་། ཁོ་བོའི་བསམ་པར། ཚོགས་འདུའི་ནང་བཀའ་ཤག་གི་འདོད་མོས་ཤུགས་རྐྱེན་སླེབས་ཐབས་བྱེད་པ་དེ་ཡག་པོ་ཞིག་མ་རེད། དཔེར་ན། ད་ལོ་སྦེལ་ཀོབ་ནང་དུ་ཚོགས་ཆེན་ཞིག་ཚོགས་པ་རེད། ཡིན་ན་ཡང་། དེའི་ཐོག་མའི་གཏམ་བཤད་ནང་ལ། བཀའ་ཁྲི་ཟམ་གདོང་རིན་པོ་ཆེས་གཏམ་བཤད་རིང་པོ་ཞིག་གནང་སོང་། དེ་ནི་ཚོགས་འདུའི་སྐབས་སུ་བགྲོ་གླེང་བརྗོད་གཞི་གང་གི་ཐོག་བྱེད་དགོས་མིན་གྱི་ལམ་སྟོན་ལྟ་བུ་རེད་འདུག གཏམ་བཤད་འདིས་ཚོགས་མིའི་བསམ་འཆར་རམ་བགྲོ་གླེང་བརྗོད་གཞི་དེ་ཡོངས་སུ་སྒྱུར་སོང་། བགྲོ་གླེང་བྱེད་ས་གཙོ་བོ་དེ་ཟམ་གདོང་བླ་མའི་གཏམ་བཤད་དེའི་ཐོག་རང་གནང་བ་ལས། དོན་དངོས་ཀྱི་བོད་མི་མང་གི་དཀའ་ངལ་ཐོག་བགྲོ་གླེང་མ་གནང་བ་དེ་ལ་བློ་ཕམ་པོ་བྱུང་སོང་། བྱས་ཙང་། སྐབས་འདིར་ཡང་དེ་ལྟ་བུའི་མི་ཡོང་བའི་རེ་བ་ཡོད།
ཁོ་བོའི་བསམ་པར། ད་ལོ་ཚོགས་ཆེན་འདིའི་བརྗོད་གཞི་གཙོ་བོ་དེ་ང་ཚོ་བོད་རྒྱལ་ཁབ་དེ་དམངས་གཙོ་རྒྱལ་ཁབ་གང་འདྲ་ཞིག་ལ་བསྐྱོད་མིན་དེའི་ཐོག་བགྲོ་གླེང་གནང་དགོས་པ་གལ་ཆེན་པོ་མཐོང་། ཨ་རི་རྒྱལ་ཁབ་ལྟ་བུའམ། ཡང་རྒྱ་གར་རྒྱལ་ཁབ་ལྟ་བུ་གང་གི་ཕྱོགས་སུ་བསྐྱོད་དགོས་མིན་དེའི་ཐད་བགྲོ་གླེང་གནང་དགོས་པ་རེད། གང་ཡིན་ཟེར་ན། ༸གོང་ས་མཆོག་ནི་དབུ་ཁྲིད་ལ་མེད་པ་རེད། སྤྱི་འཐུས་གྲོས་ཚོགས་ཀྱི་གྲུབ་གཞི་དེ་ལ་བསམ་བློ་གཏོང་དགོས་པ་གལ་ཆེན་པོ་རེད་སྙམ། ༸གོང་ས་མཆོག་གི་སྐུ་དབང་ཐད་ང་ཚོས་བགྲོ་གླེང་བྱེད་ནས་ཕན་ཐོགས་གང་ཡང་མེད། གང་ཡིན་ཟེར་ན། ཁོང་གིས་བློ་ཐག་ཆོད་པོའི་ཐོག་ནས་གསུངས་ཚར་པ་རེད།
GYAMTSO ཟེར་མཁན་འདིས་ག་རེ་ལབ་བསམ་གྱི་ཡོད་པ་རེད། འདི་བོད་ཀྱི་མ་འོངས་པ་གླེང་ས་རེད་མ་གཏོགས་ཁྱོད་རང་ཚོ་ཨམ་མདོ་ནང་འཁྲུག་རྒྱག་ས་མ་རེད་ལ། ཚོགས་གཙོ་ཡར་ལ་བཀུར་སའང་མ་རེད། ཚང་མ་ལོས་ལྟ་ཡ་ཞིག་རེད། ཚོགས་གཙོས་ཡེ་ཤེས་དབྱིངས་དཔྱད་ལ་ག་འདྲ་ཞིག་གནང་གི་འདུག རྒྱ་མིའི་བཤད་སྟངས་ལྟར་མཇུག་བསྡུ་ས་རེད་དམ། གོང་ས་མཆོག་གི་དགོངས་གཞི་ལྟར་མཇུག་བསྡུ་ས་རེད།
ཚོགས་གཙོ་མཆོག་ནས་དོན་སྙིང་ཡོད་པ་མང་པོ་གསུངས་པ་ལས་གཙོ་ཤོས་གཅིགག་་་་་་གོང་ས་སྐྱབས་མགོན་མཆོག་ལ་འཛམ་གླིང་མི་མང་གི་གུས་བཀུར་དང་ཞི་བདེའི་དབུས་ཁྲིད་ལ་དངོས་འཛིན་གནང་གི་ཡོད་ནའང་་་བོད་རང་ཉིད་རེ་ཟུང་གིས་གོ་སྐབས་ནམ་ཡོད་ལ་སྐྱོན་བརྗོད་བྱེད་ཀྱིན་འདུག་པས་གཟབ་གཟབ་བྱེད་དགོས་ཞེས་གསུངས། དེ་དངོས་ནས་རེད་་་་་དཔེར་ན་ཉེ་ཆར་རང་ཨ་མདོ་པ་ཧོར་ཙང་ལེགས་བཤད་དང་ཀླུ་མཁར་བྱམས་གཉིས་ཀྱིས་གོང་ས་མཆོག་ལ་ག་རེ་བཤད་ཡོད་མེད་སྤྱི་ཚོགས་ནང་གསལ་བོ་ཡིན། དེ་ཚོས་རིགས་ལས་རིགས་སྣ་ཚོགས་ཀྱི་ནང་ལ་དངོས་ཤུགས་རྒྱུད་གསུམ་ནས་ཞུགས་ནས་ང་ཚོས་སྤྱི་ཚོགས་ལ་གཏོར་ཤུགས་བྱེད་རྒྱུ་ཡོད་པས་མང་ཚོགས་ནས་གཟབ་གཟའ་བྱེད་དགོས།
ཅོ་རི་ཉི་མ་ལགས་ཀྱིས་བསམ་བློ་མི་སྲིད་པའི་ཡག་པོ་བཏང་བཞག་འདུག རྒྱབ་བསྐྱོར་ཡོད། བསམ་ངན་ཅན་ཚོའི་འདོད་ཐོག་ལ་མི་ཡོང་བར་བརྩོན་ལེན་བྱེད་གལ་ཆེ་སྙམ།
ཁྱོད་ཚོས་ཚོགས་འདུ་ཉིན་བརྒྱ་ལ་འཚོགས་ཀྱང་༧གོང་ས་མཆོག་གི་དགོངས་པ་ལས་བརྒལ་བའི་རླབས་ཆེན་གྱི་བྱེད་ཐབས་ཤིག་མི་རྙེད་ཐག་ཆོད་ཡིན་པས་ད་རེས་ཀྱང་ཡེ་ཤེས་དབྱིངས་དཔྱད་ཅེས་མིག་བཙུམས་ནས་རྗེས་སུ་འབྲངས་རྐྱང་བྱས་ན་མི་ལེགས་སམ། མིང་ཆེ་ལ་དོན་སྟོང་བའི་ཚོགས་འདུ་ཞིག་འཚོགས་དང་མ་འཚོགས་ཅི་ཁྱད།
༢༠༠༨ལོར་ཛ་དྲག་གི་བོད་རྒྱལ་ཡོངས་དམངས་ཚོགས་ཆེན་འཚོགས་པ་རེད། དེ་ཡང་ཁ་ཤུགས་སུ་ཆེ་བལྟ་ས་འདྲ་པོ་གཅིག་མ་གཏོགས་ཚོགས་མི་ཡོངས་ཀྱི་བསམ་ཚུལ་བསྡུ་ལེན་བྱས་ཐུབ་ཀྱི་མེད་པ་རེད། བཙན་བྱོལ་རྒྱ་ཆེན་མི་དམངས་ཀྱི་བསམ་ཚུལ་ལ་བསྡུ་ལེན་ཟེར་བ་མེད་པ་རེད། གཅིག་རེད།
གཉིས་ནས་ཚོགས་འདུས་འཚོགས་དུས་འགྲོ་མགྲོན་ཆེན་པོ་རེད། འགྲོ་སོང་མང་ཤོས་བོད་གཞུང་གི་ངོས་ནས་བཏང་གི་ཡོད་ཀྱི་རེད། ཁ་ཤུགས་སུ་ཆེ་བསྡུར་ས་ཞིག་ལ་འགྲོ་སོང་ཆེན་པོ་གཏོང་ན་དོན་མེད་རེད།
ཁ་མ་ཡིན་དོན་གྱི་བཙན་བྱོལ་བོད་མིའི་བསམ་ཚུལ་བསྡུ་ལེན་བྱེད་འདོད་ཡོད་ན་འགྲོ་སོང་དེ་ལས་ཆུང་བའི་ཐོག་ནས་རྒྱ་ཆེན་བཙན་བྱོལ་བོད་མིའི་བསམ་ཚུལ་བསྡུ་ལེན་བྱེད་ཐུབ་ཀྱི་ཡོད།
དེང་རབས་དང་མཐུན་པའི་དྲ་རྒྱ་ལ་བརྟེན་ནས་རྒྱལ་ཁབ་སུམ་ཅུ་བཞི་ཅུའི་ནང་གི་བཙན་བྱོལ་བོད་མིའི་བསམ་ཚུལ་བསྡུ་ལེན་བྱེད་ཐུབ་དགོས་དང་དགོས། ༧གོང་ས་མཆོག་ལ་དགོས་པ་ཡང་བཙན་བྱོལ་རྒྱ་ཆེན་མི་དམངས་ཀྱི་བསམ་ཚུལ་རེད། དེ་བརྟེན་བཀའ་སྤྱི་གཉིས་ཀྱིས་བཙན་བྱོལ་རྒྱ་ཆེན་མི་དམངས་ཀྱི་བསམ་ཚུལ་བསྡུ་ལེན་དང་བསམ་ཚུལ་གུས་བཀུར་བྱེད་དགོས་པ་ལས་ཁ་ཤུགས་ཆེན་པོ་རེ་གཉིས་ཀྱི་བསམ་ཚུལ་གཅིག་ཐག་གཅོད་གནང་ན་ཡག་པོ་མ་རེད།
ང་ལྟ་བུ་བོད་མི་དཀྱུས་མ་ཞིག་ངོས་ནས་ཀྱང་བསམ་ཚུལ་ཞུ་འདོད་ཡོད་ལ་ང་དང་ང་ལྟ་བུ་བཙན་བྱོལ་བོད་མི་དམངས་ཀྱིས་ཀྱང་བསམ་ཚུལ་ཕུལ་འདོད་པ་དངོས་ཡོད་རེད། དེ་ཚོ་ལ་མང་ཤོས་ག་ཚོད་སླེབས་མིན་དང་ཉུང་ཤོས་སུ་ག་ཚོད་སླེབས་མིན་བལྟ་ཐུབ་པ་ཡིན་ན་ཕན་འབྲས་དངོས་གནས་ཡོང་གི་རེད།
བོད་མི་ཚང་མའི་བསམ་ཚུལ་བསྡུ་ལེན་བྱེད་དགོས་པ་གལ་ཆེན་པོ་རེད། ཁ་ཤུགས་ཆེ་བ་དང་དབང་ཤུགས་ཆེ་བ་སུ་ཡིས་སྒེར་གཅོད་བྱེད་ནའང་མཐར་ཐུག་ཅི་ཡོང་གསལ་པོ་རེད།
༢༠༠༧་ལོར་རྒྱལ་ཡོངས་ཚོགས་ཆེན་ཐོག་ཏུ་བཙན་བྱོལ་བོད་གཞུང་འདི་སྐྱབས་བཅོལ་གྱི་གཞུང་ཞིག་ལ་བསྒྱུར་རྒྱུ་ཡིན་ཞེས་གྲོས་ཆོད་བཞག་ཡོད་རབས་གོ་ཐོས་བྱུང་། ཡིན་ནའང་མི་ལོ་གསུམ་ཕྱིན་ཚར་བ་རེད། གྲོས་ཆོད་ལག་ལེན་བསྟར་མཁན་ཅང་བྱུང་མེད་པ་འདྲ་གཅིག་འདུག གླེང་མཁན་ཙམ་ཡང་མ་མཐོང་།
ཚོགས་འདུས་འཚོགས། གྲོས་ཆོད་བཞག ལག་ལེན་ག་པ།
རྒྱལ་སྤྱིའི་ངོས་ལེན་ཡོད་པའི་སྐྱབས་བཅོལ་གཞུང་ཞིག་ལ་ག་དུས་བསྒྱུར་གྱི་ཡིན་ནམ།
ཕྱི་ལོ་ ༢༠༠༨ ལོ་གཞུང་མང་ཚོགས་ཆེན་ཐེང་དང་པོ་ཚོགས་པའི་སྐབས་སུ་མི་མང་ནས་ཐུགས་གནང་ཆེན་པོ་གནང་ནས་རང་རང་གི་བསམ་ཚུལ་མང་པོ་གསུངས་ཡོད་པ་མ་ཟད་མི་མང་མང་ཆེ་བས་བོད་མི་རིགས་དང་བོད་ཀྱི་རིགས་གཞུང་༸རྒྱལ་བ་དོན་གྱི་བདག་པོ་ཐུགས་བཞེད། སྐབས་དེ་དུས་ཀྱི་བོད་ནང་གི་རྫ་དྲག་གི་གནས་སྟངས་བཅས་ལ་ཐུགས་ཕན་སེལ་རེའི་བསམ་ཚུལ་མི་མཐུན་པ་མང་པོ་ཞིག་བྱུང་ཡོད། དེ་ཡང་མི་བཅུ་ལ་བསམ་པ་བཅུ་དང་། མཛོ་བཅུ་ལ་རྭ་ཁ་ཉེར་ཤུ་ཟེར་བ་བདེན་པ་ཡིན། བསམ་ཚུལ་དེ་དག་གི་ནང་འགའ་རེ་ནི་དངོས་ནས་ཕན་དོགས་འདུག་ཨང་པ་མང་པོ་བཤད་ཡོད། འོན་ཀྱང་མཐའ་མ་དེ་ལ་མ་གྲོས་བསམ་གཅིག་མཐུན་བརྒངས་ལ་བསྐྱགས་བཞག་དུས་ཚོགས་འདུ་ཉིན་གྲངས་དྲུག་བདུན་ཚོགས་པ་དེ་ཕན་དོགས་མེད་པ་ཞིག་བཟོས་སོང་། ཡང་བརྐྱར་གཞུང་མང་ཚོགས་ཆེན་ཆེན་མོ་ཞིག་སྐོང་བས་སྤྱི་དོན་ལ་ཕན་པའི་བྱ་བ་ཞིག་གཉེར་མི་ཐུབ་བསམ།