དྲན་རྒྱུ་རྒོད་ཀྱང་ལས་རྒྱུ་མེད་པའི་ཉིན་མ་འདི་དག

ངས་ཉིན་མ་འདི་དག་ལ་བསམ་བློ་གཏོང་བ་ལས། གཞན་གང་ཡང་བྱེད་འདོད་མེད་པའི་མི་ཞིག་དུ་གྱུར་ནས་ཡོད། དོན་དངོས་ཐོག དོན་གནད་ཡོད་པའི་སྐད་ཆ་ཞིག་བཤད་འདོད་པའི་ཡིན་པ་འདྲ། རེད་དེ། དོན་གནད་ཡོད་པའི་སྐད་ཆ་གང་ཞིག་ངས་བཤད་ཤེས་ཀྱི་ཡོད་མེད་ཀྱི་རྒྱུན་རིམ་ལ་ཡང་འདང་བརྒྱབས་དུས། ངས་རང་ཉིད་ཀྱི་གདོང་མེ་ལོང་དུ་སྐོར་ནས། ཡ་རང་གིས་རང་ལ་ཞིབ་དུ་ལྟོས་དང་། ད་ལྟའི་བར་དུ་རང་ཉིད་ཀྱིས་གང་ཞིག་བྱས་ཡོད་དམ། གང་ཞིག་འཇོན་ཡོད་དམ། དངོས་ནས་བཤད་ན་བྱས་རྗེས་མེད་པ་དང་། ལས་ཀ་གང་ཡང་བྱེད་མ་མྱོང་བའི་མི་ཞིག་ལ་མཚོན་ན། གཞན་ཞིག་གིས་གང་ཞིག་བྱེད་བཞིན་པ་དང་བྱེད་མྱོང་བ། བྱེད་པར་ཕྱོགས་པ་དག་ལ་འདི་བྱེད་དགོས་པ་རེད། གན་བྱས་ན་ཡག་གི་རེད་ཅེས་བཤད་པའི་གླེན་སྙིང་དེ་ང་ལ་གང་ནས་བྱུང་བ་ཡིན་ནམ་སྙམ་ཞོར་དུ། ཕྱི་རོལ་ལ་བུད་ནས་ག་ལེར་བསམ་བློ་བསྟུད་མར་གཏོང་ཁུལ་བྱས། བསམ་བློའི་གྲུབ་འབྲས་ཟེར་བ་ཞིག་ཀྱང་ང་ལ་གསལ་བོ་ཞིག་མི་འདུག དོན་དངོས་སུ་ངས་དུས་ཚོད་ཆེས་མི་ཉུང་བ་ཞིག་དྲ་ཚིགས་སོ་སོར་ཉུལ་ནས་གཏོང་གི་ཡོད་པ་འདི་ལ་གྲུབ་འབྲས་ཤིག་ཐོབ་ཀྱི་ཡོད་དམ། རང་ལས་གཞན་ཞིག་གི་ཆེད་དུ། ཡང་ན་རིགས་རུས་གཅིག་པའི་སྤུན་གྲོགས་དག་གི་དཀའ་ཚེགས་ཆེ་བའི་ལོ་ཟླ་འདི་དག་ལ་འགྱུར་བ་ཞིག་ཐེབས་པའི་ཆེད་དུ། གང་ཡང་ཐུབ་མི་འདུག ཁ་འགུལ་བ་དང་སྟོང་བཤད་ཀྱིས་ཉིན་མ་འཕུད་ཤེས་པ་དེ་ཙམ་གྱིས་དོན་དག་གང་ཡང་འགྲུབ་ཀྱི་མེད་པ་ཏན་ཏན་རེད་འདུག མུ་མཐུད་དུ་བསམ་བློ་བཏང་།

བསམ་བློའི་ཁྲོད་ནས་རང་ཉིད་ས་གནས་ནས་ས་གནས། ཁོར་ཡུག་ནས་ཁོར་ཡུག གླིང་ཕྲན་ནས་གླིང་ཕྲན། མི་ཚོགས་ཀྱི་གཏམ་རྒྱུད། རིགས་གཞུང་གི་བར་ཁྱད། ཐོབ་ཐང་དང་རང་དབང་ཟེར་བའི་མཇུག་འབྲས། མི་ཚེའི་འདུན་མ་ཟེར་བའི་མི་ཞིག་གི་དགོས་འཁོ། སྐྱིད་སྡུག་ཟེར་བའི་འགྲོ་བ་མིའི་ཚོར་རྟོགས་ཀྱི་མྱོང་བྱང་། ཆོས་ལུགས་ཟེར་བའི་སྐྱེ་ཡུལ་རེ་རེ་ན་དར་བའི་གནའ་བོའི་མི་རིགས་དག་གིས་ཤུལ་བཞག་གི་དྲན་བརྟེན། མི་རིགས་ཟེར་བའི་གླེང་ན་ཚར་བ་མེད་པའི་རྙོག་གླེང་གི་ཟློས་གར། རང་གཞན་ཟེར་ནས་འཐབ་ཡུལ་ལྕི་མོ་ཞིག་གི་ཕྱོགས་ཞེན་དང་འགྲན་རྩོད། དབུལ་ཕྱུག་མཉམ་གནས་ཟེར་བའི་ཁ་གཡང་སྙན་མོའི་ཁྲོད་ཀྱི་རླུང་རྟ། བསམ་བློ་ཅི་ཙམ་བཏང་ན་དྲན་རྒྱུ་འགུལ་རྒྱུ་མེད་པར་གྱུར་ནས་འགྲོ་བའི་ང་། ཉིན་མ་འདི་དག་གི་རིང་དུ་བསམ་བློ་བཏང་བཏང་བའི་མཐར། དྲན་རྒྱུ་མེད་པར་གྱུར་ནས། རེ་ཞིག་རིང་། འདི་ལྟར་ངལ་གསོ་ཞིག་བྱས་ནས་བསྡོད་རྒྱུ་དེ་ནི་ཡག་ཤོས་ཤིག་ཡིན་པ་ཤེས་སོང་།