ཉེ་ཆར་རྒྱ་ནག་གི་སྲིད་འཛིན་གཞོན་པ་ཝེ་ཐི་ནམ་ནང་ལྟ་སྐོར་དུ་བསྐྱོད་སྐབས། རྒྱའི་རྒྱལ་དར་སྐར་མ་དྲུག་ཅན་ཞིག་བསྐྱར་དུ་མངོན་པ་ཡོད་དེས། ཝེ་ཐི་ནམ་དང་རྒྱ་ནག་མི་མང་ལ་དོགས་གཞི་སྣ་ཚོགས་བཟོས་འདུག
ཕྱི་ཚེས་ ༢༢ ཉིན་རྒྱ་ནག་གི་སྲིད་འཛིན་གཞོན་པ་ཞི་ཅིན་ཕེན་ཝེ་ཐི་ནམ་ནང་ལྟ་སྐོར་གྲུབ་རྗེས་འབར་མའི་ནང་བསྐྱོད་ཡོད་པ་དང་། ཁོ་རང་འབར་མའི་རྒྱལ་ས་བྷན་ཀོག་ (Bangkok) ལ་མ་ཕྱིན་པའི་སྔོན་ཏག་ཏག་ལ་ཝེ་ཐི་ནམ་གྱི་སྲིད་བློན་ཋན་ཌོན་ (Nguyen Tan Dung) དང་ཐུག་འཕྲད་བྱས་ཡོད་པ་རེད། ཡིན་ནའང་། གནས་འཕྲིན་དྲ་རྒྱའི་ཐོག་ཝེ་ཐི་ནམ་མི་མང་གིས་ཤུགས་ཆེན་པོས་སློང་བྱེད་བཞིན་པ་ནི། ཞི་ཅིན་ཕེན་གྱི་ལྟ་སྐོར་དང་གཏམ་བཤད། རྒྱ་ཁབ་གཉིས་ཀྱི་མགོ་ཁྲིད་ཚོའི་གྲོས་མོལ་དང་ཚོང་དོན་ཆིངས་ཡིག་སོགས་མ་ཡིན་པར། ཁོའི་ལྟ་སྐོར་མཉམ་དུ་ཝེ་ཐི་ནམ་ནང་རྒྱའི་རྒྱལ་དར་སྐར་མ་དྲུག་ཅན་ཞིག་བསྐྱར་དུ་མངོན་པ་དེ་ཆགས་ཡོད་ལ། གནད་དོན་དེའི་ཐད་ཝེ་ཐི་ནམ་མི་མང་གིས་ཧ་ཅང་བློ་འཚབ་དང་སྐྱོན་བརྗོད་ཤུགས་ཆེན་པོ་བྱེད་བཞིན་འདུག
ཕྱི་ཚེས་ ༢༡ ཉིན་ཝེ་ཐི་ནམ་གྱི་སྲིད་འཛིན་ཐོག་ཁང་གི་མདུན་ཐང་དུ། ཝེ་ཐི་ནམ་གྱི་ལོ་ཆུང་བྱིས་པ་སྐོར་ཞིག་གིས་གཞུང་གི་བཀོད་སྒྲིག་ལྟར་རུ་སྒྲིག་སྟེ་རྒྱ་ནག་གི་སྲིད་འཛིན་གཞོན་པ་ཞི་ཅིན་ཕེན་ལ་བསུ་བ་བྱེད་སྐབས། བྱིས་པ་དག་གི་ལག་ཏུ་སྐར་མ་ཆེན་པོ་ ༡ གི་མཐའ་ལ་སྐར་མ་ཆུང་ཆུང་ ༥ ཡིས་སྐོར་ཡོད་པའི་སྐར་མ་དྲུག་ཅན་གྱི་རྒྱའི་རྒྱལ་དར་ཞིག་བཟུང་ཡོད་པ་རེད། རྒྱའི་རྒྱལ་དར་སྐར་མ་དྲུག་ཅན་དེ་ཝེ་ཐི་ནམ་དུ་ཐོག་དང་པོ་མངོན་པ་ཞིག་མ་ཡིན་པར། ད་ལོའི་ཕྱི་ཟླ་ ༡༠ ཟླ་དཀྱིལ་ཙམ་ལ་ཝེ་ཐི་ནམ་གཞུང་འབྲེལ་བརྙན་འཕྲིན་ (VTV) ཐོག་རྒྱ་ནག་དང་ཝེ་ཐི་ནམ་གྱི་འབྲེལ་བའི་སྐོར་གྱི་གསར་འགྱུར་ལེ་ཚན་སྟོན་སྐབས། བརྙན་འཕྲིན་ནང་ཝེ་ཐི་ནམ་གྱི་རྒྱལ་དར་གྱི་ཟུར་དུ་རྒྱའི་རྒྱལ་དར་སྐར་མ་དྲུག་ཅན་དེ་མངོན་ཡོད་པ་རེད།
སྐར་མ་དྲུག་ཅན་གྱི་རྒྱའི་རྒྱལ་དར་ནོར་འཁྲུལ་ཅན་དེའི་ཐད། ཝེ་ཐི་ནམ་མི་མང་གིས་གཞུང་ལ་བློ་ཕམ་གྱི་རྣམ་འགྱུར་དང་སྐྱོན་བརྗོད་བྱས་ཡོད་པ་མ་ཟད། ནོར་འཁྲུལ་ཅན་གྱི་རྒྱལ་དར་དེ་སྔ་ཕྱིར་ཐེངས་གཉིས་ལ་བྱུང་ཞིང་། མགྲོན་བསུའི་རྒྱལ་དར་ཆུང་ངུའི་རྣམ་པའི་ཐོག་ནས་མངོན་པ་དེ་ནི། ཝེ་ཐི་ནམ་གཞུང་གིས་དམིགས་ཡུལ་དང་རྒྱབ་ལྗོངས་ཡོད་པའི་ཐོག་ནས། ཝེ་ཐི་ནམ་དེ་རྒྱ་ནག་གི་ཆ་ཤས་ཤིག་ཏུ་བསྒྱུར་འདོད་ཀྱི་བསམ་པ་བསྟན་པ་ཞིག་ལ་ངོས་འཛིན་གནང་གི་ཡོད་འདུག
ཝེ་ཐི་ནམ་གྱི་གནས་འཕྲིན་དྲ་རྒྱའི་ཐོག་ནོར་འཁྲུལ་ཅན་གྱི་རྒྱལ་དར་དེ་བཟོ་མཁན་ནི། དོན་དངོས་ཐོག་རྒྱ་ནག་དང་ཝེ་ཐི་ནམ་གཉིས་ཀྱི་སུ་ཞིག་ཡིན་མིན་ཐད་མི་མང་པོས་དོགས་འདྲི་སྣ་ཚོགས་བྱས་ཡོད་པ་རེད། དྲ་མིང་ལ་ཆཱོན་ལཱིབ་ (Nguyen Quang Lap) ཟེར་བའི་དྲ་ཐོག་ཟིན་བྲིས་པ་ཞིག་གིས། “ ནོར་འཁྲུལ་ཅན་གྱི་རྒྱལ་དར་དེས་ང་ཚོའི་སེམས་ནང་གི་ཝེ་ཐི་ནམ་གྱི་དགའ་མོས་ལ་ཕོག་ཐུག་ཆེན་པོ་བཟོས་སོང་། གལ་སྲིད་ནོར་འཁྲུལ་དེ་ནི་ལག་རྩལ་ཐད་ནས་བྱུང་བའི་ནོར་འཁྲུལ་ཞིག་ཡིན་ཚེ། ངེས་པར་དུ་ཕ་རོལ་བོར་དགོངས་དག་ཞུ་དགོས་པ་རེད། གལ་སྲིད། བསམ་བཞིན་དམིགས་ཡུལ་ཡོད་པའི་སྒོ་ནས་ནོར་འཁྲུལ་བཟོས་པ་ཞིག་ཡིན་ཚེ། དེའི་དགོས་པ་རྒྱུ་མཚན་མཐའ་དག་ང་ཚོ་ཝེ་ཐི་ནམ་མི་དམངས་ལ་གསལ་བརྗོད་བྱེད་དགོས། ” ཅེས་བརྗོད་ཡོད་པ་རེད།
འཛམ་གླིང་སྒང་རྒྱལ་ཁབ་སུ་འདྲ་ཞིན་ཡང་སོ་སོའི་རྒྱལ་དར་ལ་རྒྱལ་ཁབ་གཞན་གྱིས་བསྟུད་མར་ནོར་འཁྲུལ་བཟོས་ཚེ། དེ་ལ་སྐྱོན་བརྗོད་དང་རྣམ་འགྱུར་མི་སྟོན་མཁན་གཅིག་ཀྱང་ཡོད་མི་སྲིད་སྟབས། ཝེ་ཐི་ནམ་གྱིས་རྒྱ་ནག་གི་རྒྱལ་དར་ཐད་སྔ་ཕྱིར་ནོར་འཁྲུལ་བཟོས་ནའང་། རྒྱ་གཞུང་གིས་སྐྱོན་བརྗོད་ཀྱི་རྣམ་འགྱུར་གང་ཡང་མ་བསྟད་པར་སྣང་མེད་དུ་བཞག་པ་དེ་ནི། ཝེ་ཐི་ནམ་གྱི་མི་མང་ལ་མཚར་སྣང་དང་བློ་དོགས་སྐྱེས་གཞི་ཞིག་ཆགས་ཡོད་པ་རེད། དྲ་མིང་ལ་ཨེན་གྷོག་ཁཱིན་ (Huynh Ngoc Cenh) ཟེར་བའི་ཟིན་བྲིས་པ་ཞིག་གིས། “ དེ་ནི་རྒྱ་གཞུང་གིས་ཝེ་ཐི་ནམ་ལ་གུ་ཡངས་བྱས་པ་ཡིན་ནམ། དེ་ལྟར་རྩ་བ་ཉིད་ནས་ཡིན་མི་སྲིད། འདས་པའི་ལོ་རྒྱུས་ནང་རྒྱ་གཞུང་གིས་ཝེ་ཐི་ནམ་གྱིས་བཟོས་པའི་ནོར་འཁྲུལ་གང་རུང་ལ་གུ་ཡངས་ཀྱི་རྣམ་འགྱུར་གཅིག་ཀྱང་སྟོན་མྱོང་མེད། ཡིན་ནའང་། བསྟུད་མར་བྱུང་བའི་རྒྱལ་དར་གྱི་ནོར་འཁྲུལ་དེའི་ཐད་རྒྱ་གཞུང་གིས་ཅི་ཡང་མི་སྨྲ་བའི་འགྱུར་འཛིན་དོན་ཅི་ཡིན་ནམ། དེའི་རྒྱབ་ལྗོངས་ན་གནད་དོན་ག་རེ་ཞིག་སྦས་སྐོང་བྱས་ཡོད་དམ། ” ཅེས་དོགས་འདྲི་བྱས་ཡོད་པ་རེད།
རྒྱལ་དར་གྱི་གནད་དོན་དེའི་ཐད། རྒྱ་ནག་གི་གནས་འཕྲིན་དྲ་རྒྱ་ཁག་གི་སྟེང་དུའང་གླེང་ཕྱོགས་ཆེན་པོ་གཉིས་འབྱུང་བཞིན་ཡོད་འདུག ཁག་ཅིག་གིས་དེ་ནི་ཝེ་ཐི་ནམ་གྱི་རྒྱལ་དར་སྟེང་གི་སྐར་མ་གཅིག་པུ་དེ། རྒྱའི་རྒྱལ་དར་སྟེང་གི་སྐར་མ་ཨང་དྲུག་པ་བྱས་ཏེ་རྒྱ་ནག་གི་མངའ་ཁོངས་སུ་ཞུགས་འདོད་རེད་ཅེས་དགའ་མོས་དང་། ཁག་ཅིག་གིས་ཝེ་ཐི་ནམ་གྱིས་རྒྱ་ནག་ལ་བརྩི་བཀུར་མ་བྱས་པ་ཞིག་དང་རྒྱལ་སྤྱིའི་སྒང་གླེང་གཞི་བཟོ་འདོད་ཡིན་ལ། དེ་ནི་རྒྱལ་ཁབ་ནུས་མེད་དག་གིས་གཞན་ལ་ཁ་གཏད་གཅོག་ཐབས་ཀྱི་རྣམ་འགྱུར་ཞིག་ཡིན་པ་མ་ཟད། ནོར་འཁྲུལ་ཅན་གྱི་རྒྱལ་དར་གནད་དོན་དེ་ཉེ་སྔོན་རྒྱ་ནག་དང་ཝེ་ཐི་ནམ་བར་མཚོ་འགག་བདག་དབང་ཐད་རྙོག་དྲ་བྱུང་སྐབས་ཐོག་མར་མངོན་ཡོད་སྐོར་བརྗོད་ཡོད།
ཝེ་ཐི་ནམ་ནང་སྔ་ཕྱིར་ཐེངས་གཉིས་ལ་སྐར་མ་དྲུག་ཅན་གྱི་རྒྱའི་རྒྱལ་དར་ཞིག་ཐོན་པ་དེ་ནི། ལག་རྩལ་གྱི་གནད་དོན་དང་ཆབ་སྲིད་ཀྱི་གནད་དོན་གང་ཞིག་ཡིན་མིན་དེ་དོགས་གཞི་ཞིག་ཏུ་གྱུར་ཡོད་འདུག
