བདེ་འཚོ།
རྒྱ་ནག་གཞུང་གིས་བོད་ས་ཡོངས་རྫོགས་བཙན་བཟུང་བྱས་ནས་ད་བར་མི་ལོ་ང་གཉིས་ལྷག་འགྲོ་བཞིན་ཡོད། ལོ་ངོ་འདི་འདྲའི་མང་པོ་ཞིག་གི་རིང་རྒྱ་གཞུང་གིས་མངོན་ལྐོག་གཉིས་ལས་བྱེད་ཐབས་སྣ་ཚོགས་བཀོད་དེ། བོད་མི་རིགས་འདི་རྩ་བརླག་གཏོང་བར་འབད་འབུངས་ཅི་ཙམ་བྱས་ཡོད་པ་ཚང་མས་ཤེས་གསལ་ལྟར་རེད། དཔེར་ན། ༡༩༥༨ ལོའི་མུ་གེ་ཆེན་པོ་དང༌། ལོ་བཅུའི་རིག་གནས་གསར་བརྗེ་སོགས་ཀྱིས་མཚོན་པའི་ནོར་འཁྲུལ་གཡོན་ལྷུང་ཅན་གྱི་བྱེད་ཐབས་རབ་དང་རིམ་པ་མང་པོ་ཞིག་བོད་ཁམས་ཡོངས་སུ་ལག་བསྟར་བྱེད་མྱོང་བ་མ་ཟད། དེང་གི་དུས་སུ་ཡང་ནུབ་བརྒྱུད་གསར་སྤེལ་ཟེར་བའི་ཁ་གཡང་ཞིག་ཁྱེར་ནས་དོན་དངོས་སུ་བོད་མིའི་ཐུན་མོང་གི་རང་སྐྱ་ཐུབ་པའི་འཚོ་སྡོད་ཀྱི་ཁོར་ཡུག་དང༌། རིག་གཞུང༌། ཆིག་སྒྲིལ་ནུས་པ་སོགས་ལ་བསམ་གཟས་ནས་གཏོར་བཤིག་དང་འགལ་རྐྱེན་མང་དུ་བཟོ་བཞིན་ཡོད། ཡིན་ནའང་མིག་སྔའི་བོད་ནང་གི་ཛ་དྲག་གནས་སྟངས་ལ་གཞིགས་ནས་བཤད་ན་བོད་ཀྱི་མི་རབས་གསར་བའི་མི་རིགས་འདུ་ཤེས་དང༌། འཐབ་རྩོད་ཀྱི་སྙིང་སྟོབས། ཆིག་སྒྲིལ་གྱི་སྒུལ་ཤུགས་བཅས་ནི་སུས་ཀྱང་བློ་ངོར་མི་ཤོང་ཞིང་སྤྱི་སེམས་དང་སྤོབས་པ་ཚད་བརྒལ་གྱི་མཐོ་སར་བསླེབས་ཡོད།
རྒྱུ་མཚན་གཅིག་དགུ་ལྔ་བརྒྱད་ལོའི་ཟིང་འཁྲུག་ཆེན་མོའི་རྗེས་སུ་བསྟུད་མར་བྱུང་བཞིན་པའི་ཞི་རྒོལ་དག་ལ་ཕྱིར་བལྟས་ཙམ་བྱས་པ་ཡིན་ན། ཞི་རྒོལ་གྱི་རྣམ་པ་ལས་གཅིག་ལས་གཅིག་ངར་གྱི་ཕྱོགས་སུ་བསྐྱོད་ཀྱིན་པས་ཤེས་ཐུབ་ལ། ༢༠༠༨ ལོར་བོད་ཁམས་ཡོངས་ནས་བྱུང་བའི་གཟི་བརྗིད་ལྡན་པའི་ཞི་བའི་འོས་ལངས་དེས་དགྱ་གཞུང་ལ་ཆོལ་གསུམ་བོད་མི་དག་གིས་འགྱུར་བ་མེད་པའི་རིགས་ཞེན་གྱི་འདུ་ཤེས་ལས་མི་རིགས་ཀྱི་ངོ་བོ་སྲུབ་སྐྱོབས་བྱེད་པའི་སྙིང་སྟོབས་མངོན་གསལ་དོད་པོའི་ལམ་ནས་གསར་བོར་བསྟོན་སོང་བ་རེད། ལྷག་པར་ཉེ་བའི་ཆེར་བྱུང་དང་འབྱུང་བཞིན་པའི་མདོ་སྨད་རྔ་པ་དང་ཁམས་ཕྱོགས་སོགས་ནས་རང་ལུས་མེར་སྲེག་གཏོང་བཞིན་པའི་ཛ་དྲག་ཞི་བའི་འོས་ལངས་འདིས་བོད་མི་དག་གིས་ཇི་ལྟར་རང་ཉིད་ལ་བརྩི་སྲུང་བྱེད་པའི་བླ་མེད་སྙིང་སྟོབས་གསར་པ་འཛམ་གླིང་ཡོངས་ཀྱི་མི་མང་ལ་གསལ་སྟོན་བྱས་པ་མ་ཟད། བོད་མི་རིགས་ཀྱི་འཐབ་རྩོད་ཡུན་གནས་དང་རྒྱུན་མཐུད་ཀྱི་ཕྱོགས་ལ་ནུས་པ་བླ་ལྷག་ཏུ་ཐོན་བཞིན་ཡོད།
འདི་ལྟར་ཁོང་རྣམ་པས་བོད་མི་རིགས་ཀྱི་ཉག་ཕྲ་བའི་ད་ལྟའི་ཆབ་སྲིད་ཀྱི་ལོ་རྒྱུས་ལ་གཟིམ་པ་མེད་པའི་འོད་ཀྱི་ལམ་བུ་ཞིག་བཏོད་ཡོད། འདི་ལས་ང་ཚོར་ཅི་ཞིག་བསྟན་བྱུང་ངམ་ཟེར་ན། དེང་གི་རྒྱ་གཞུང་གི་འདྲ་མཉམ་མ་ཡིན་པའི་གཉའ་གནོན་གྱི་དབང་འོག་ནས་རང་གི་མངོན་འདོད་ཆེད་རྩ་ཆེ་བའི་ཚེ་སྲོག་ཕངས་མེད་དུ་གཏོང་བའི་འཐབ་རྩོད་གསར་བ་ཞིག་མགོ་བརྩམས་པ་རེད། དེ་བཞིན་དུ་ཡ་ང་བའི་དམར་གསོད་བཙོན་འཇུག་དང་མུན་ནག་གི་གཅར་རྡུང་ཚད་ལས་བརྒལ་བ་བྱེད་མྱོང་ཡོད་ལ། རྒྱུ་དངོས་ཀྱི་བསླུ་བྲིད་དང་མི་སེར་སྤེལ་བའི་བྱེད་ཐབས་འདྲ་མིན་དང་གཡོ་ཇུས་བརྒྱ་སྟོང་གིས་སྒྲིབ་བཞིན་ཡོད་པའི་བོད་མི་དག་གིས་རང་ཉིད་ཀྱི་ཁེ་དབང་དང་རིན་ཐང་ངོས་ཟིན་པའི་རྟགས་མཚན་གསར་པ་རེད་ལ། རང་ཉིད་རང་གིས་སྐྱོབ་པའི་སྤོབས་པ་དང༌། ཁྲེལ་མེད་ལུགས་མེད་ཀྱི་རྒྱ་གཞུང་གི་སྲིད་བྱུས་ལ་མགོ་བོ་སྒུར་མ་འདོད་པའི་མདུན་མཆོངས་རེད། འདི་ལས་ང་ཚོས་ཅི་ཞིག་ཤེས་ཐུབ་བམ། བོད་མི་རིགས་ནི་དུས་དབང་གི་བཙན་གནོན་དང་རྒྱུ་དངོས་ཀྱི་བསླུ་བྲིད་གང་གིས་ཀྱང་མི་ཁུགས་པར་རང་གི་ཐུན་མོང་མི་རིགས་ཀྱི་ངོ་བོ་དང༌། རིག་གཞུང༌། རྒྱལ་ཁབ་སླར་གསོ་སོགས་བརྩོན་ལེན་བྱེད་འདོད་ཀྱི་གོམ་པ་མུ་མཐུད་སྤོ་བཞིན་པ་མཚོན་ཐུབ། དཔེ་མཚོན། མི་ཞིག་གིས་སྤྱི་དོན་ཆེད་ལུས་སྲོག་སྦྱིན་པར་གཏོང་ཕོད་པའི་ཚད་ཐིག་འདིར་སླེབས་ཚེ། དེ་ནི་ཁོའི་མངོན་འདོད་ལྟར་བྱེད་པ་ལས་ཐབས་ལམ་གང་གིས་ཀྱང་སྔོན་འགོག་དང་ཚོད་འཛིན་བྱས་པ་ནི་ནོར་འཁྲུལ་ཁོ་ན་ལས་མ་འདས།
ལྷག་པར་རང་ལུས་མེ་ལ་སྒྲོན་པའི་ཞི་རྒོལ་གྱི་རྣམ་པ་གཅིག་རྗེས་གཉིས་མཐུད་དུ་འབྱུང་བཞིན་པ་འདི། ཕྱོགས་གཅིག་ནས་བཤད་ན་བོད་ཁུལ་ལ་ལག་བསྟར་བྱས་པའི་རྒྱ་གཞུང་གི་སྲིད་བྱུས་དེ་ནོར་འཁྲུལ་ཅན་དུ་ཁ་ཕྱོགས་ཏེ་བོད་ཀྱི་གཏེར་ཁ་སྣ་ཚོགས་གང་བྱུང་སྔོག་འདོན་བྱས་པ་དང༌། བོད་ཀྱི་སྐད་ཡིག་གི་བེད་སྤྱོད་ནུས་པ་ཆུང་དུ་བཏང་བ། མི་རིགས་རང་སྐྱོང་གི་སྲིད་བྱུས་དངོས་སུ་ལག་བསྟར་མ་བྱས་པ། མི་མང་གི་རྩྭ་སའི་བདག་དབང་བཙན་གྱིས་འཕྲོགས་ཏེ་བོད་མིའི་རང་སྐྱ་ཐུབ་པའི་འཚོ་བའི་ཁ་ཕྱོགས་ནུས་མེད་གཞན་བརྟེན་ཅན་དུ་བསྒྱུར་བ་སོགས་ལས་བྱུང་བ་ཞིག་རེད་ལ། གཉིས་ནས་ལོ་ང་གཉིས་རིང་ལ་༧གོང་ས་སྐྱབས་མགོན་རིན་པོ་ཆེ་མཆོག་ཆོལ་གསུམ་ལྷ་སྡེ་ཡོངས་དང་ཁ་བྲལ་དུ་བཏང་བའི་ཉེས་དམིགས་ལས་བྱུང་བའི་དྲན་གདུང་དང་མངོན་འདོད་ངོ་མ་ཡིན་པ་བོད་ས་ཡོངས་ནས་བསྒྲགས་བཞིན་པའི་ཞི་རྒོལ་གྱི་འབོད་ཚིག་དག་ལ་གཞིགས་ན་གསལ་བོར་རྟོགས་ཐུབ། གསུམ་ནས་རྒྱ་གཞུང་གི་མི་རབས་བཞིའི་ཆབ་སྲིད་ཀྱི་ཁ་གཡང་ཁོ་ནས་ཉི་མ་འཁྱོལ་ཐབས་བྱས་ཏེ་དོན་ངོ་མར་བོད་ཐོག་དམག་ཤུགས་ཀྱི་བཙན་གནོན་ལ་བརྟེན་ནས་དབང་བསྒྱུར་བྱས་པའི་སྲིད་བྱུས་ནག་པོ་དེས་མཐའ་འཁྱོངས་བཞིན་མེད་པ་གསལ་བོར་བསྟན་ཡོད།
རྒྱུ་མཚན་དེའི་དབང་གིས་རང་ལུས་མེ་ལ་སྒྲོན་མཁན་དཔའ་རྒོད་དག་གིས་འཛམ་གླིང་མི་མང་ལ་བོད་མི་ཚོས་སེམས་ཀྱི་སྡུག་བསྔལ་དང་ངོ་གདོང་ངོ་མ་དེ་གསལ་སྟོན་བྱས་སོང་བ་རེད་ལ། རྒྱ་གཞུང་ལ་དེ་ལས་ལྷག་པའི་ཁ་སྐྱེངས་དང་ངོ་ཚ། ཡང་ན་བློ་འཚབ་སོགས་ཤུགས་ཆེན་བཟོ་བཞིན་ཡོད་པས། ཁོང་རྣམ་པར་མི་རིགས་ཤིག་གི་དཔའ་བོའི་ལོ་རྒྱུས་གསར་བ་དང་ཡང་ན་རླབས་ཆེ་བའི་མི་རབས་གསར་བའི་ལས་འགུལ་གྱི་དབུ་ཁྲིད་དུ་བཀུར་ནས་བསྟོད་པར་འོས་པ་ལས། ད་ལྟ་ང་ཚོའི་ཕྱི་ནང་གཉིས་ཀའི་སྤྱི་ཚོགས་ཁྲོད་འགན་ཁུར་མེད་པའི་སྐད་ཆ་རེ་ཟུང་སྟེ། རང་སྲོག་རང་གིས་བཅད་པ་དང་ཡང་ན་ཚེ་སྲོག་ཞིག་ཚར་བའི་ཕངས་སེམས་སྐྱེས་པ་སོགས་ནི་ཞིབ་ཏུ་བསམ་ན་ཁྱབ་རྒྱ་ཆུང་བའི་བསམ་བློ་གཏོང་ཕྱོགས་ཤིག་ལས་མ་འདས། རྒྱུ་མཚན་རང་ཉིད་ཀྱི་ཚེ་སྲོག་ལ་གཅེས་འཛིན་བྱེད་འོས་པའི་གནས་ལུགས་དེ་ཙམ་པོར་ང་ཚོ་ལས་ཁོང་ཚོས་ཕུགས་རྒྱང་རིང་བོའི་བསམ་བློ་བཏང་ཡོད་ལ། འདི་ལྟར་བྱེད་པ་ནི་ཁོང་རྣམ་པའི་མཐར་ཐུག་གི་ཐག་གཅོད་ཀྱང་ཡིན་ངེས། འདི་ལྟར་ཁོང་ཚོའི་རང་ཉིད་ཀྱི་རྩ་ཆེ་ཚེ་སྲོག་ལས་གངས་ཅན་པའི་སྤྱི་དོན་གཙོ་བོར་འདེམས་ཟིན་པའི་ལངས་ཕྱོགས་ནི་ཇི་འདྲའི་རླབས་ཆེ་ཞིང་ལོ་རྒྱུས་ཀྱི་རིན་ཐང་ལྡན་པའི་འདམ་ཀ་ཞིག་རེད་ཨང༌།
དེ་ལ་ཇི་སྲིད་བར་དུ་བོད་མི་རིགས་ཀྱིས་སྙིང་གི་དཀྱིལ་དང་གློ་བའི་གསེང་ནས་གོང་བཀུར་བླ་ལྷག་གིས་བྱེད་ཀྱིན་ཡོད་ལ། རྒྱལ་གཅེས་དཔའ་རྒོད་རྣམ་པའི་དཔའ་ངར་གྱི་སྙིང་སྟོབས། འཐབ་རྩོད་ཀྱི་ལམ་ཁ་སོགས་ལ་ཕྱི་ནང་བོད་མི་ཡོངས་ནས་རྗེས་སུ་ཡི་རངས་དང་གདུང་སེམས་མཉམ་སྐྱེད་ཀྱི་ལམ་ནས་ཕན་ཚུན་ལ་བརྒྱུད་སྒྲོག་དང་སྐྱིད་སྡུག་ཉམས་མྱོང་བྱེད་བཞིན་པ་ནི་དོན་ལ་བབས་པའི་ལས་དོན་རླབས་ཆེན་ཞིག་རེད། རྒྱུ་མཚན་ཁོང་རྣམ་པས་རང་ལུས་མེར་བསྲེགས་དོན་ནི་བོད་མིའི་སྤྱི་དོན་འཐབ་རྩོད་ལ་ངར་ཤུགས་སློང་བའི་ཆེད་རེད་ལ། བོད་མི་རིགས་ཟེར་བ་འདི་ད་དུང་ས་སྒང་ཟླུམ་པོ་འདིའི་སྟེང་དུ་ཡུན་གནས་འཚོ་ཐུབ་པའི་མ་འོངས་པའི་ཕུགས་འདུན་གྱི་ཆེད་དུ་རེད། འདི་ལྟར་བསམས་ཚེ། དཔའ་རྒོད་འདི་དག་གིས་བློས་གཏོང་རྟུལ་ཕོད་ནི་སུས་ཀྱང་བློ་ངོར་ཤོང་དཀའ་བའི་སྐྱེས་པ་རླབས་ཆེ་ཞིང་ཤི་བ་གཟི་བརྗིད་ཆེ་བའི་ལོ་རྒྱུས་རིན་ཐང་གི་མཐོ་སར་བསྙེགས་ཡོད་པས་ང་ཚོས་མི་རབས་ནས་མི་རབས་བར་དུ་ལོ་རྒྱུས་གསོན་པོ་འདི་ལ་རྗེས་དྲན་དང་གོང་བཀུར་ཞུ་འོས། སྙིང་སྟོབས་འདི་ལས་རྒྱ་ནག་དམར་པོའི་གཞུང་ལ་ཅི་བྱེད་གང་བྱེད་དཀའ་བའི་དཀའ་ངལ་འཕར་མ་རེ་སྤྲོེད་ཀྱིན་འདུག་ལ། ཕྱི་ནང་བོད་མི་ཡོངས་ཀྱི་སེམས་ཁོང་ལ་ཇི་སྲིད་བར་དུ་བརྗེད་པར་མི་ནུས་པའི་ཁྲག་གི་རྨ་ཁ་རེ་གསར་དུ་བཏོད་ཀྱིན་ཡོད། ད་དུང་རྒྱལ་སྤྱིའི་མི་མང་ལ་ཚེ་སྲོག་གི་བདེན་པ་འཚོལ་བའི་བླ་མེད་ཀྱི་ལམ་ཁ་ཞིག་སྟོན་གྱིན་ཡོད་པ་མ་ཟད། དུས་ངན་དབང་གིས་སིལ་བར་འཐོར་བའི་བོད་ཆེན་པོར་སླར་ཡང་གཅིག་གྱུར་གྱི་ཁ་ཕྱོགས་ལ་བསྐྱོད་པར་ཡར་སྐུལ་ནུས་པ་བླ་ལྷག་གིས་ཐོན་བཞིན་ཡོད།
གཞན་ད་དུང་གཏོང་ཕོད་འདི་ལས་བོད་ཀྱི་མ་འོངས་པའི་མི་རབས་གསར་བ་དག་ལ་རང་གི་ཕ་མེས་བསྐྱར་དྲན་བྱེད་པའི་དཔའ་བོའི་ལོ་རྒྱུས་ཀྱང་གསར་དུ་འབྲི་བཞིན་ཡོད།མདོར་ན་ལོ་ངོ་ང་གཉིས་རིང་ལ་རྒྱའི་དབང་འོག་ནས་ཐབས་སྲིད་འུ་ཐུག་གིས་འཚོ་བའི་མི་རིགས་ཤིག་གིས་ཇི་ལྟར་རང་གི་རྒྱལ་ཁབ་སླར་གསོ་དང་ཁེ་དབང་བརྩོན་ལེན་བྱེད་པའི་འཐབ་རྩོད་གསར་བ་དངོས་སུ་འགོ་བརྩམས་སོང་བ་མ་ཟད། ལག་ལེན་དངོས་ཀྱི་སྟེང་ནས་དབང་བསྒྱུར་ལ་ཁ་གཏད་གཅོག་པའི་ལམ་ཁ་གསར་དུ་རྙེད་སོང་བ་རེད། མཐའ་དོན་དེ་རིང་གི་མེ་ལྕེ་འོག་གི་བོད་མི་དག་གིས་དཔའ་ངར་ཆེན་པོས་རང་གི་ལུས་སྲོག་བློས་བཏང་ནས་རྒྱལ་ཁབ་སླར་གསོ་བྱེད་པའི་དཀའ་ཚེགས་ཀྱི་ཟིན་ཐོ་དངོས་སུ་འབྲི་བཞིན་པ་འདིས་ཕྱི་ནང་བོད་མི་ཡོངས་ལ་རྒྱལ་ཞེན་གྱི་ངར་ཤུགས་དང་སྐྱིད་སྡུག་མཉམ་མྱོང་གི་བསླབ་བྱ། དྲག་གནོན་དང་དམར་གསོད་ལ་མགོ་མི་སྒུར་བ་བཅས་ཕྱོགས་གང་ཐད་ནས་ནུས་པ་གསར་དུ་ཐོན་བཞིན་གདའ་འོ།
བཀུར་འོས་རྩོམ་པ་པོ་ལགས། འདི་འདྲ་བའི་རྩོམ་ཡིག་གང་མང་ཡོད་པ་ཞུ།
བཤད་པ་ཞིག་མི་འདུག་་་་་་འདི་འདྲའི་རྩོམ་ཡིག་གང་མང་ཞིག་སྤེལ་ཐུབ་ན་ཡག་པོ་འདུག་་་་ཐུགས་རྗེ་ཆེ་་་རྗེས་སུ་ཡི་རང་ཡོད་་་་
མེ་ལྕེའི་འོག་གི་བོད་་་་ཅེས་པ་ལྟར་འབྲེལ་སྒྲ་ཞིག་ཡོད་ན་དེ་ལས་ཀྱང་་་
རྩོམ་ཡིག་ཡག་པོ་འདི་རིགས་མང་ཙམ་བྱུང་ན་མང་པོ་ཞིག་ལ་ཕན་ཐོགས་ཀྱིན་ཡོད་པ་གསལ་བོ་རེད། དགའ་བསུ་ཞུ།
ཨ་མ་བདེ་འཚོ་ཚང་གིས་རྩོམ་ཡིག་རིན་ཐང་ཅན་ཞིག་བྲིས་ཡོད་ཀི ཐུགས་རྗེ་ཆེ། བཀླགས་ནས་བུད་སོང་ང་།
དྲག་གནོན་གྱི་འོག་ནས་བྱུང་བའི་སྤུན་ཟླ་འདི་ཚོས་ནི་བོད་མི་རིགས་ཀྱི་བདེན་དོན་དང་ཆོས་རིག་གཞུང་གི་ཆེད་ཡིན་པ་བརྗོད་མེད་རེད། རང་གི་ལུས་སྲོག་བློས་བཏང་ནས་མི་རིགས་ཤིག་གི་བདེ་སྡུག་གི་ཆེད་དུ་འདི་ལྟར་རླབས་ཆེན་གྱི་བྱ་བ་ཞིག་སྒྲུབ་བཞིན་ཡོད་པ་འུ་ཚོས་མཐོང་བཞིན་འདི་ལྟར་འདུག་བཟོད་མ་པ་ཞིག་རེད། འོན་ཀྱང་ཐབས་ལམ་གང་ཡང་མི་འདུག་དེ་རྒྱལ་སྤྱིའི་གསར་ལམ་ཁག་ཏུ་གང་ནུས་ཀྱི་བསྒྲགས་ཀྱི་རང་ཉིད་ཀྱི་དུས་རྟག་ཏུ་བོད་མི་རིགས་ལ་བཅང་བའི་བརྩི་བ་དང་ཡིད་ཆས་མ་བླག་པ་བྱས་ནས་སྐད་དང་ཡི་གེ་བདག་པོ་རྒྱབ་ནས་བུ་ཕྲུག་སོགས་ལ་བོད་མི་རིགས་ཟེར་པ་འདི་འདྲ་ཞིག་ཡིན་པ་དང་བོད་ཀྱི་གནས་སྟངས་སོགས་ངོ་སྤྲོད་གནང་དགོས་པ་གལ་ཆེན་མ་ཡིན་ནམ། རྩོམ་ཡིག་ཡག་པོ་བྲིས་འདུག་ཐུགས་རྗེ་ཆེ།
དྲག་པོའི་མེ་ཡིས་ཟ་བཞིན་པའི་བོད་མི་རིགས་འདི། ཉིས་སྟོང་བརྒྱད་ནས་ཡང་བསྐྱར་ས་སྒང་འདི་རུ་གསོན་པོར་གནས་ཐུབ་པའི་ཡིད་ཆེས་ཤིག་ང་ལ་སླེབས་བྱུང་། བཙན་པོའི་གཉའ་གནོན་ལ་རྒོལ་བའི་དཔའ་བོའི་དཔུང་ཁག་ཅིག་འདི་ལྟར་གཅིག་རྗེས་གཉིས་མཐུད་ཀྱིས་འབྱུང་བ་ནི། བོད་མི་རིགས་ནི་འཛམ་གླིང་སྟེང་གི་ཆེས་སྙིང་ལྡན་པའི་མི་རིགས་ཤིག་ཡིན་པ་གསལ་བཤད་གནང་གི་ཡོད།
འོ། ཞར་བྱུང་དུ་མཛངས་མ་བདེ་འཚོ་ལགས་ཀྱིས་བྲིས་པའི་རྩོམ་ཡིག་འདི་ཀུན་ནས་བསྔགས་པར་འོས། ཡིན་ནའང་མེ་ལྕེ་ལ་འབྲེལ་སྒྲ་ཞིག་བཞག་ནས་ལྕེའི་ཞེས་རྟེན་དང་བརྟེན་པའི་འབྲེལ་བ་བྱ་དགོས་པར་སྙམ།