ཨེའོ་ཝ་ས་གནས་སུ་ངོ་རྒོལ།

གཟའ་ལྷག་པའི་ཉིན་ཞིས་ཅིན་ཕིན་སྔོན་ཆད་ཕག་གསོ་སློབ་སྦྱོང་བྱེད་ཡུལ་མ་སི་ཁེ་ཊི྇་གྲོང་གསེབ་ཏུ་འབྱོར་མ་ཐག བོད་མི་ཚོས་ངོ་རྒོལ་ཤུགས་ཆེན་བྱས་འདུག

གཅན་ཡེ་རྒྱམ་ལགས་ཀྱིས་གནས་ཚུལ་བཏང་འབྱོར་ལ། ཟླ་འདིའི་ཚེས་ ༡༥ ཉིན་རྒྱ་ནག་གི་སྲིད་འཛིན་གཞོན་པ་ཞི་ཅིན་ཕིན་ཨ་རིའི་ཨེའོ་ཝ་ས་གནས་གྲོས་ཚོགས་ནང་དགོང་དྲོའི་གསོལ་སྟོན་དུ་ཕེབས་ཀྱི་ཡོད་པ་དང་བསྟུན་ཏེ། མི་ནི་སོ་ཊ་ནས་ས་གནས་སྤྱི་མཐུན་ཚོགས་པ་དང་གཞོན་ནུ་ཚོགས་པ། བུད་མེད་ཚོགས་པ། བོད་རང་བཙན་སློབ་ཕྲུག་ཚོགས་པ་བཅས་ཀྱིས་སྣེ་ཁྲིད་པའི་རླངས་འཁོར་ལྔའི་ནང་མི་ ༣༠༠ ལྷག་དང་། ཝི་སི་ཀོན་སིན་ནས་ས་གནས་སྤྱི་མཐུན་ཚོགས་པ་དང་གཞོན་ནུ་ཚོགས་པ། བོད་རང་བཙན་སློབ་ཕྲུག་ཚོགས་པ་གསུམ་གྱིས་སྣེ་ཁྲིད་པའི་རླངས་འཁོར་གཉིས་ནང་མི་ ༡༠༠ ལྷག ཆི་ཀ་གོའོ་ནས་མི་ ༤༠ ཙམ། སྒེར་གྱི་རླངས་འཁོར་བཏང་ཡོང་མཁན་དང་བོད་དོན་རྒྱབ་སྐྱོར་བ་བཅས་ཁྱོན་མི་ ༥༠༠ ལྷག་གིས་འབོད་ཚིག་འདྲ་མིན་འཁོད་པའི་འཕྲད་དར་དང་། རང་ལུས་མེར་བསྲེགས་གཏོང་མཁན་དཔའ་བོ་རྣམས་ཀྱི་སྐུ་པར་དང་དུར་སྒམ། ཨ་རིའི་རྒྱལ་དར་དང་བོད་ཀྱི་རྒྱལ་དར་མང་པོ་འཕྱར་བཞིན་ངོ་རྒོལ་སྐད་འབོད་བྱས་ཡོད་འདུག

གནས་ཚུལ་མཁོ་སྤྲོད་པས་བརྗོད་དོན་ལ། སྐབས་དེར་ང་ཚོས་བོད་ལ་རང་དབང་དགོས། རྒྱ་མི་བོད་ནས་ཕར་རྒྱུགས་ཤིག  བོད་མི་དམར་གསོད་མཚམས་འཇོག་དགོས་སོགས་ཀྱི་འབོད་ཚིག་སྒྲོག་བཞིན་རྒྱལ་ས་ཌེ་མོན་གྲོང་ཁྱེར་གྱི་དཀྱིལ་ནས་མཐའ་དང་མཐའ་ནས་དཀྱིལ་བར་ཆུ་ཚོད་ ༥ རིང་སྐོར་སྐྱོད་བྱས་ཏེ། ས་གནས་མི་མང་དང་ཞིས་ཅིན་ཕིན་མཉམ་དུ་སླེབས་པའི་རྒྱ་རིགས་བརྒྱ་སྐོར་ཞིག་ཡོད་པ་དེ་དག་ལ་གསལ་བོར་མཐོང་ཐུབ་པ་བྱས་ཡོད། གཞན་ཡང་མི་ནི་སོ་ཊ་ས་གནས་གཞོན་ནུ་ཚོགས་གཙོ་དང་རྔ་བའི་གཞན་ཕན་བཟང་པོ་སོགས་ཀྱིས་སྣེ་ཁྲིད་འོག ཞིས་ཅིན་ཕིན་དམའ་རིམ་ལས་བྱེད་ཡིན་པའི་སྐབས་ཕག་གསོ་སློབ་སྦྱོང་བྱེད་པར་ཡོང་སའི་མ་སི་ཁེི་ཊི྇་གྲོང་གསེབ་ཏུ་འབྱོར་མ་ཐག ངོ་རྒོལ་བ་ཚོས་སྐད་འབོད་ཤུགས་ཆེན་བྱས་ཏེ་མ་འོངས་པའི་རྒྱ་ནག་རྒྱལ་ཁབ་ཀྱི་མི་རབས་ལྔ་པའི་ཤུལ་འཛིན་མགོ་ཁྲིད་དུ་འགྱུར་བཞིན་པའི་ཞིས་ཅིན་ཕིན་ལ་གསལ་འདེབས་དང་གནོན་ཤུགས་ཡག་པོ་ཞིག་བྱེད་རྒྱུ་བྱུང་། ཞེས་དང་། ང་ཚོས་ཁྲོམ་སྐོར་བྱེད་པའི་སྐབས་གསར་འགོད་པ་དང་པར་རྒྱག་མཁན་མང་པོ་ཡོད་པ་མ་ཟད། ཁྲོམ་གཞུང་གི་ལམ་ཁའི་གཡས་གཡོན་དང་ཁང་བརྩེགས་ཀྱི་སྒོ་དང་སྒེའུ་ཁུང་སོགས་སུ་མི་མང་ཧ་ཅང་མང་པོས་དོ་སྣང་ཆེན་པོ་བྱུང་སོང་ཞེས་བཀོད་འདུག