ཟས་བཅད་ངོ་རྒོལ་གྱི་ཉིན་ ༢༧ པ།

ཨ་རིའི་ནེའུ་ཡོག་རྒྱལ་ཚོགས་མདུན་ཐང་དུ་ཟས་བཅད་ངོ་རྒོལ་གནང་སྟེ་ཉིན་ཉེར་བདུན་ཕྱིན་ཡོད་ཀྱང་། ད་བར་རྒྱལ་ཚོགས་ཀྱིས་ཁ་གསལ་བརྡ་ལན་གང་ཡང་སྤྲད་མི་འདུག

ཟླ་སྔོན་མའི་ཕྱི་ཚེས་ ༢༢ ཉིན་ནས་ཨ་རིའི་ནེའུ་ཡོག་མཉམ་འབྲེལ་རྒྱལ་ཚོགས་ལས་ཁུངས་ཀྱི་མདུན་ཐང་དུ། བོད་ཀྱི་གཞོན་ནུ་ལྷན་ཚོགས་ཀྱི་སྣེ་ཁྲིད་འོག བླ་མ་ཤིང་བཟའ་རིན་པོ་ཆེ་མཆོག་དང་། སྐུ་ཞབས་ཡེ་ཤེས་བསྟན་འཛིན་ལགས། རྡོ་རྗེ་རྒྱལ་པོ་བཅས་གྱིས་དུས་ཡུན་ངེས་མེད་ཀྱི་ཟས་བཅད་ངོ་རྒོལ་གནང་བཞིན་པ་ལྟར། ཟླ་འདིའི་ཕྱི་ཚེས་ ༡༩ ཉིན་བར་ཟས་བཅད་ངོ་རྒོལ་གནང་སྟེ་ཉིན་ ༢༧ འགྲོ་བཞིན་ཡོད་འདུག

དེ་རིང་ཕྱི་ཚེས་ ༡༩ ཉིན་གསར་འགོད་པས་ཁ་པར་བརྒྱུུད་གཞོན་ནུའི་ཚོགས་གཙོ་ཚེ་དབང་རིག་འཛིན་ལགས་སུ། ཟས་བཅད་ངོ་རྒོལ་གནང་མཁན་ཚོའི་གཟུགས་པོའི་གནས་སྟངས་སྐོར་བཀའ་འདྲི་ཞུས་པ་ལྟར་ན། ད་ཆར་བླ་མ་ཤིང་བཟའ་རིན་པོ་ཆེ་མཆོག་གི་གཟུགས་པོ་སྤྱི་རྒྱ་ ༡༣ མར་ཆགས་ཡོད་པ་དང་། ཡེ་ཤེས་བསྟན་འཛིན་ལགས་སྤྱི་རྒྱ་ ༡༢ མར་ཆགས་འདུག་ལ། རྡོ་རྗེ་རྒྱལ་པོ་ལགས་སྤྱི་རྒྱ་ ༡༠ མར་ཆགས་ཡོད་འདུག ད་ལྟ་ཁོང་རྣམ་པའི་གཟུགས་པོའི་གནས་སྟངས་ཉིན་རེ་བཞིན་ཇེ་ཞན་དུ་འགྲོ་བཞིན་ཡོད་པ་དང་། ཉིན་འགའི་གོང་ནས་ཡར་ལངས་ཏེ་འགྲོ་ཐུབ་ཀྱི་མེད་པ་དང་། དབུགས་བསཊ་པ་དང་མགོ་ཡུ་འཁོར་བ། མིད་པ་འགག་སྟེ་སྐད་ཆ་བཤད་མ་ཐུབ་པའི་གནས་སྟངས་འོག་ལྷུང་ཡོད་འདུག

ཉེ་ལམ་ནས་རྡོ་རྗེ་རྒྱལ་པོ་ལགས་ཀྱི་གཟུགས་པོ་ཇེ་ཞན་དུ་སོང་སྟེ། གྲོད་ཁོག་ནང་ན་ཟུག་ཆེན་པོ་རྒྱག་མགོ་བཙུགས་ཏེ་དཀའ་ངལ་མི་ཉུང་བ་ཞིག་འཕྲད་བཞིན་ཡོད་འདུག་ལ། གནས་སྟངས་དེའི་ཐོག་ས་གནས་སྨན་པས་ཁོང་ལ་ལས་འགུལ་མཚམས་འཇོག་དགོས་པའི་འབོད་སྐུལ་རིམ་པར་ཞུས་འདུག་ཀྱང་། རྡོ་རྗེ་རྒྱལ་པོ་ལགས་ཀྱིས་ཁོང་ལས་འགུལ་ནང་མཉམ་ཞུགས་བྱེད་དོན་སྨན་བཅོས་ཀྱི་ཆེད་མིན་པར། རྒྱལ་ཚོགས་ཀྱིས་བརྡ་ལན་མ་འབྱོར་བར་ཟས་བཅད་ལས་འགུལ་དེ་མཚམས་འཇོག་གནང་རྒྱུ་མིན་ལུགས་བརྗོད་འདུག

གསར་འགོད་པས་ཚོགས་གཙོ་ཚེ་དབང་རིག་འཛིན་ལགས་སུ་ད་སྔ་མཉམ་འབྲེལ་རྒྱལ་ཚོགས་ཀྱི་འབྲེལ་ཡོད་ཚན་པའི་ངོས་ནས་བརྡ་ལན་འབྱོར་ཡོད་མེད་སྐོར་དྲིས་སྐབས། “ ད་བར་མཉམ་འབྲེལ་རྒྱལ་ཚོགས་ཀྱི་ངོས་ནས་ཐེངས་གསུམ་བརྡ་ལན་སྤྲད་ཡོད་པ་རེད། ང་ཚོས་དེ་དག་བཟང་སྤྱོད་ཀྱི་རྣམ་འགྱུར་ཞིག་ལ་ངོས་འཛིན་བྱེད་ཀྱི་ཡོད། ཡིན་ནའང་། ཟས་བཅད་ངོ་རྒོལ་བའི་དགོས་འདུན་བཏོན་ཚན་ལྔ་བཏོན་ཡོད་པ་དེར་ཁ་གསལ་གྱི་བརྡ་ལན་ཞིག་འབྱོར་ཡོད་པ་མ་རེད། ཟས་བཅད་ངོ་རྒོལ་བ་ཚོའི་གཟུགས་པོའི་གནས་སྟངས་ཉིན་རེ་བཞིན་ཛ་དྲག་ཏུ་འགྱུར་བཞིན་ཡོད་ནའང་། རྒྱལ་ཚོགས་ཀྱི་བརྡ་ལན་གསལ་པོ་ཞིག་མ་འབྱོར་བར་ལས་འགུལ་གྱི་ཆོད་སེམས་འགྱུར་བ་གང་ཡང་མི་འདུག་ ” ཅེས་བརྗོད་སོང་།

མཐའ་མར་ཁོང་ལ་ཐེངས་འདིའི་ཟས་བཅད་ལས་འགུལ་འདི་ལ་བརྒྱུད་ལམ་ཁག་གིས་དོ་སྣང་ཅི་ཙམ་ཡོང་གི་ཡོད་མེད་དྲིས་པར།  “ ཕྱི་ཚེས་ ༡༤ ཉིན་རྒྱལ་ཚོགས་སྤྱི་ཁྱབ་དྲུང་ཆེ་མཆོག་གི་མགྲིན་ཚབ་པ་མཱར་ཊིན་ནེ་སིར་ཀི (Martin Nesirky) མཆོག་གིས། གསར་འགོད་ལྷན་ཚོགས་ཤིག་གི་སྟེང་ནེའུ་ཡོག་རྒྱལ་ཚོགས་ལས་ཁུངས་མདུན་དུ་ཟས་བཅད་ངོ་རྒོལ་གནང་བཞིན་པའི་བོད་མི་གསུམ་གྱི་གཟུགས་པོའི་གནས་སྟངས་ལ་སེམས་འཚབ་ཡོད་སྐོར་དང་། ཕྱི་ཚེས་ ༡༢ ཉིན་སྤྱི་ཁྱབ་དྲུང་ཆེ་གཞོན་པ་སྐུ་ཞབས་ཨེ་ཝན་སེ་མོ་མོ་ཝེ་ཆི་ (Ivan Simon vic) མཆོག་གིས་ཟས་བཅད་ངོ་རྒོལ་བ་གསུམ་ལ་ཐུགས་གསོའི་འཚམས་འདྲི་གནང་ཡོད་པ་དང་། བོད་ཀྱི་གཞོན་ནུ་ཚོགས་པའི་སྐུ་ཚབ་དང་ཐུག་འཕྲད་བྱས་ཡོད་པ། བོད་ནང་གི་གནས་སྟངས་ཐོག་རྒྱ་ནག་གཞུང་ཚབ་ལ་ཐུག་འཕྲད་བྱས་ཡོད་སྐོར་གསུངས་བ་དེས། བྷེ་བྷེ་སི་དང་ཨེ་པཱེ་སོགས་གསར་འགྱུར་བརྒྱུད་ལམ་ཁག་ཏུའང་སྔར་ལས་དོ་སྣང་བྱེད་མཁན་མང་པོ་བྱུང་སོང་།  ” ཞེས་བརྗོད་བྱུང་།