བྱིས་དུས་ཀྱི་མཛད་སྤྱོད།

སྐྱོ་ངལ་གྱིས་སེམས་པ་གསོད་སྐབས་ཁྱེད་ཀྱི་བརྩེ་འཛུམ་ནི་བདག་གི་དབུགས་དབྱུང་ཡིན།
རེ་ཆད་ཀྱིས་མིག་མདངས་ཉམས་སྐབས་ཁྱེད་ཀྱི་གསུང་སྐད་ནི་བདག་གི་ཟུངས་བཅུད་ཡིན།
དཀའ་སྡུག་གི་ལོ་ཟླ་བགྲོད་སྐབས་ཁྱེད་ཀྱི་གཟི་མདངས་ནི་བདག་གི་སྟོབས་ཤུགས་ཡིན།
འཇིག་རྟེན་གྱི་ཁ་དོག་བརླག་སྐབས་ཁྱེད་ཀྱི་བཞད་གད་ནི་བདག་གི་ཡོད་ཚད་ཡིན།

འཚོ་བཞིན་པའི་སྟོན་པ།
ས་ཡི་སྟེང་། གནམ་གྱི་འོག འགྲོ་བ་ཀུན་གྱི་སྐྱབས་དང་དཔུང་གཉེན་མཆོག་ལ་གུས་ཤིང་འདུད།

སྟོང་པའི་མཁའ་ལ་ཆས་པའི་དུང་ཟླ་དང་། །
མཚམས་སྤྲིན་གསེབ་ན་ཟུགས་པའི་དབང་གཞུ་བཞིན།།
མ་འདྲེས་འགྲོ་ལ་བརྩེ་བའི་སྤྱན་རས་ཅན།།
ལྷ་མོ་དོན་གྲུབ་ས་ཆེན་འདི་ན་བལྟམས།།

མཚན་དང་དཔེ་བྱད་ཤོབ་དེ་མི་དགོས་ཤིང་།།
སྟོབས་དང་རྫུ་འཕྲུལ་འུར་དེ་མི་དགོས་སོ།།
བཙན་པོས་ཐུབ་ཚོད་བྱེད་པའི་ཉམས་ཆུང་ལ།།
བྱམས་པའི་ལག་རིང་བརྐྱོང་བ་འདི་ཀོ་རྨད།།

ཞི་བའི་དབྱིངས་ན་གཟིམ་པའི་ལྷ་ཚོགས་དང་།།
མུན་པའི་ཀློང་ན་ཁྲོས་པའི་དམ་ཅན་ལ།།
རེ་བའི་འཁྲེང་ཐག་སྔ་ནས་བཅད་ན་ཡང་།།
ཁྱེད་ཀྱི་ཕྱོགས་སུ་དད་གསུམ་ཟླ་བ་འཛུམ།།

ལྷ་ཀླུ་ལྷ་མིན་དྲི་ཟ་མ་མཐོང་ཡང་།།
མི་ཚོགས་ཉ་མའི་དཔུང་ཁ་མཐུག་པོ་འདིས།།
ཟས་གཙང་སྲས་ཀྱང་དེ་དང་དེ་ལྟ་ཙམ།།
བྱས་པ་མིན་ཞེས་ཤེས་ལྡན་སུ་ཡིས་སྨྲ།།

མདོངས་མཐའི་ཟས་ཀྱིས་ཚོས་པའི་མི་ཡུལ་ནས།།
གཤེ་ཤིང་སྡང་བའི་སྐུར་འདེབས་དམོད་མོ་ལ།།
ཞི་ཞིང་འཛུམ་པའི་བདུད་རྩི་མངར་མོ་ཞིག།།
སྦྱིན་འདོད་བྱམས་བརྩེའི་སྙིང་ཁམས་གང་ནས་བརྐུས།།

ཆོས་ལུགས་ཆོལ་ཁ་མཐུན་པའི་ཐེག་པ་ལ།།
རྟག་ཆད་མཐའ་བཞི་ཆོད་པའི་རལ་གྲི་ཞིག།།
ཟུར་ཕུད་ལྔ་པས་གནང་ངམ་གསར་དུ་བརྡུང།།
ས་གཏེར་རྡོ་གཏེར་མིན་པ་ཐག་གིས་ཆོད།།

ས་སྐྱ་པན་ཆེན་ས་ལ་ཐིམ་པའི་རྗེས།།
ཀློང་ཆེན་རབ་འབྱམས་ཀློང་དུ་ཆུབ་པའི་རྟིང།།
པད་འབྱུང་བླ་མས་པད་དཀར་ཁྲིད་པའི་མཐར།།

ཁྱེད་མིན་ཐམས་ཅད་མཁྱེན་པ་སུ་ཞིག་ཡོད།།

བསྒྲེས་པའི་ལོ་ལ་གཞོན་ཤའི་མེ་ཏོག་བཞད།།
ཞི་བདེའི་རྟགས་མ་གོ་ལའི་ཏོག་ལ་བཀོད།།
ས་སྟེང་འདི་ན་འཚོ་བའི་སྟོན་པ་ཞིག།།
ད་ལྟ་མ་གྷ་དྷ་ན་མཆིས་སོ་སྐད།།

སྲིད་ཀྱི་ལྷ་མོ་བསྐྱུར་བས་མི་ངོམས་ཤིང་།།
འཚོ་བ་ཕྱི་ཐག་སྲིང་བས་མི་འཚེང་ངོ།།
གངས་ཕྲུག་གཞོན་ནུ་ལང་ཚོ་མ་སྨིན་བར།།
ལོ་ངོ་སུམ་བརྒྱར་བཞུགས་པའི་ཐུགས་ཐག་ཆོད།།

ཏིང་འཛིན་ཟབ་མོའི་དམིགས་པ་མ་འཆོར་དང་།།
དམ་ཚིག་རྡོག་རྩ་གོང་བུ་མི་འཐོར་རོ།།
མེས་པོ་གོང་མའི་ཕ་མཁར་སྣུམ་པོ་ན།།
གཞིས་བྱེས་འཛོམ་རྒྱུའི་ཁ་ཆད་ཁྱེད་ཀྱིས་གནོང་།།

བཤད་ཚོད་ན་ཡུལ་དབུས་ཞེས་གྲགས་པའི་ཐིག་ལེ། སྟོན་པ་མངོན་པར་སངས་རྒྱས་པའི་གནས་མཆོག རྡོ་རྗེ་གདན་གྱི་སྤོ། བྱང་ཆུབ་སྙིང་པོའི་ཤིང་དྲུང་དུ་དཔལ་དུས་ཀྱི་འཁོར་ལོའི་བཀའ་དབང་ཐེངས་སོ་གཉིས་པ་གནང་ཞིང་།གཞིས་བྱེས་བོད་རིགས་འབུམ་ཚོ་གཉིས་འཛོམ་གྱི་སྐབས་སུ། ཞལ་མཇལ་གྱིན་གསུང་ཐོས་ཀྱིན་དེ་ཉིད་དུ་བྲིས་སོ།༢༠༡༢།༡།༨།

སྨྲ་བསམ་བརྗོད་འདས་གང་དེ་གཏན་གྱི་སྐྱབས།།

ས་ཆེན་ལེབ་མོ་བྱམས་བརྩེའི་འཕྲིན་གྱིས་དབྱངས། །སྙན་པའི་གྲགས་དཀར་སྲིད་པའི་ཁྱོན་འདིར་ལྡིར། །མཚུངས་མེད་གངས་ཅན་སྐྱེ་འགྲོའི་སྙིང་ནོར་མཆོག །བཀའ་དྲིན་དྲན་ཀྱིན་དད་བརྒྱའི་སྙིམ་པ་བསྐྱིལ། །བོད་གངས་ཅན་པའི་སྐྱེ་འགྲོ་ཡོངས་ཀྱི་སྙིང་གི་ནོར་བུ། འཛམ་གླིང་ཞི་བདེའི་དེད་དཔོན། འཕགས་མཆོགས་ཕྱག་ན་པདྨོ་བསྟན་པ་དང་འགྲོ་བའི་མགོན་དཔུང་དམ་པར་བསམ་བཞིན་སྲིད་པར་ངུར་སྨྲིག་དགེ་བའི་བཤེས་ཀྱི་གཟུགས་སུ་རོལ་པ་༧རྒྱལ་བའི་དབང་པོ་བསྟན་འཛིན་རྒྱ་མཚོ་སྲིད་གསུམ་དབང་བསྒྱུར་མཚུངས་པ་མེད་པའི་སྡེ་ཆེན་པོ་གང་ཉིད། ཚུལ་མཐོང་མཆོག་སྐུ་དམ་པ་བསྒྲང་བྱ་དོན་བདུན་ལ་ཕེབས་པའི་སྐུ་ཡི་འཁྲུངས་སྐར་དང་། འཛམ་གླིང་མི་རིགས་ཆོས་ལུགས་ཡོད་ཚད་ཚུལ་མཐུན་དྲང་བདེན་གྱི་ལམ་ལ་ཕྱོགས་མེད་ཡང་དག་པར་སྦྱོར་བར་བསྐུལ་བའི་མི་དབང་ཆེན་པོའི་གཟེང་རྟགས་(ཊེམ་པལ་ཊེན)བཞེས་པའི་དུས་ཚིག་ཁྱད་པར་ཅན་གྱི་ལོ་འདིར་དགའ་དད་སྤྲོ་གསུམ་གྱིས་སྒོ་ནས། མཚམས་འདྲི་ཞུ་བ་དང་ཆབ་གཅིག མགོན་པོ་གང་ཉིད་གཞིས་བྱེས་བོད་མི་ཡོངས་དང་གོ་ལ་འདིར་ཞི་བདེ་དང་དྲང་བདེན་ལ་དགའ་བའི་སྐྱེ་བོ་ཀུན་ཀྱི་དོན་དུ་སྐུ་ཚེ་མི་ཞིག་རྡོ་རྗེའི་ཆོས་བདུན་གྱི་ངོ་བོར་འཚོ་ཞིང་བཞེས་པའི་སྨོན་འདུན་ཡང་ཡང་ཞུ།

འདི་ཕྱི་གཉིས་ཀྱི་སྐྱབས་གནས་དམ་པ། ས་སྟེང་རྒྱལ་བསྟན་ཡོངས་རྫོགས་ཀྱི་མངའ་བདག་སྐྱབས་མགོན་༸རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གི་སྐུའི་འཁྲུངས་སྐར་ལ་འཚམས་འདྲི་གྲངས་མེད་ཞུ་བ་དང་ཆབས་ཅིག མཛད་འཕྲིན་ཕྱོགས་བཅུར་རྒྱས་པའི་བཀྲ་ཤིས་སྨོན་འདུན་ཞུ།།

ཁྱོད་ནི་བླ་མ། ཁྱོད་ནི་ཡི་དམ། ཁྱོད་ནི་སངས་རྒྱས་ཐམས་ཅད་ཀྱི་ངོ་བོ་འདུས་པའི་ཀུན་གྱི་བདག་ཉིད། བསྟན་འཛིན་ཀུན་གྱི་གཙུག་རྒྱན། ལུང་རྟོགས་སྟོན་པའི་སྒྲོན་མེ། རིས་མེད་ཆོས་ལུགས་ཡོངས་རྫོགས་གཅིག་སྒྲིལ་པ། ཁྱོད་ནིབཀའ་དྲིན་གསུམ་ལྡན་གྱི་མཁན་རིན་པོ་ཆེ། མན་ངག་གསུམ་ལྡན་གྱི་བླ་མ། དབང་བསྐུར་བརྒྱུད་གསུམ་གྱི་མངའ་བདག། འདི་ཕྱི་གཉིས་ཀྱི་སྐྱབས་གནས་མཐའ་ཐུག། ཁྱོད་ནི་འཛམ་གླིང་ཞི་བདེའི་དེད་དཔོན་ཆེན་པོ་། ཁྱོད་ནི་འཛམ་གླིང་མི་མང་གི་ཡ་རབས་བཟང་སྤྱོད་གི་བླང་དོར་ལམ་སྟོན་པ་། བོད་རྒྱལ་ཁབ་ཀྱི་རྒྱལ་པོ་ ཆོས་སྲིད་གཉིས་ཀྱི་མངའ་བདག་། བོད་རྒྱལ་ཁབ་ཀྱི་དམངས་གཙོ་སྣ་འདྲེན་པ་། ་ཁྱོད་ནིབོད་གངས་ཅན་པའི་མགོན་སྐྱབས་དཔུང་གཉེན། ་ཁྱོད་ནི་བོད་གངས་ཅན་པའི་ཁྱད་ནོར། ཁྱོད་ནི་བོད་གངས་ཅན་པའི་མགྲིན་ཚབ་པ། ཁྱོད་ནི་བོད་གངས་ཅན་པའི་མཚན་རྟགས། ཁྱོད་ནི་བོད་གངས་ཅན་པའི་ཁྲིམས་མཐུན་པ ཁྱོད་ནི་བོད་གངས་ཅན་པའི་བཀའ་ལུང་ཡོངས་རྫོགས་རང་ཆས་ཐོབ་མཁན། ཁྱོད་ནི་བོད་གངས་ཅན་པའི་གཅིག་སྒྲིལ་པ། ཁྱོད་ནི་བོད་གངས་ཅན་པའི་དགྲ་ལ་ངོམས་་ཡ། གཉེན་ལ་སྟོན་ཡ། ནང་གི་ནོར་བུ། ཕྱིའི་ལྕགས་རིལ། མདུན་གྱི་མེ་ལོང། ཁྱོད་ནི་ཉམ་ཐག་པའི་བོད་གངས་ཅན་པའི་བློ་སྙིང་གྲོང་གསུམ་གཏོད་ས། ཁྱོད་ནི་བོད་གངས་ཅན་པའི་དགའ་ན་སྙིང་གཏམ་ཤོད་ས། སྡུག་ན་སྐྱོ་གླུ་ལེན་ས། ཁྱོད་མེད་ན་་བོད་གངས་ཅན་པ་མེད། ཁྱོད་མེད་ན་་བོད་གངས་ཅན་པ་འཛམ་གླིང་འདིའི་སྟེང་དུ་གསོན་པོ་གནས་ཐུབ་ཐབས་མེད། ཁྱོད་ནི་དྲང་བདེན་དགའ་བའི་ཛམ་གླིང་རྒྱལ་ཁབ་ཀྱི་སེམས་པ་ཤོར་ས་། དགྲ་བོ་རྒྱ་ནག་རྒྱལ་ཁབ་སྙིང་རླུང་ལངས་ས་། རང་ཅག་་བོད་གངས་ཅན་པའི་སྲོག་རྩ་དམར་པོ་ཁྱོད་ལ་བཅོལ་ཡོད།
འཛམ་གླིང་ཞི་བདེའི་དེད་དཔོན་ཆེན་མོ། ནང་པའི་རྒྱལ་བསྟན་ཡོངས་ཀྱི་མངའ་བདག རྩམ་ཟན་ཁ་བ་གངས་ཅན་པའི་ལྷ་སྐལ། འགྲོ་བ་ཀུན་གྱི་མགོན་སྐྱབས་གཅིག་ཏུ་འདུས་པའི་༸རྒྱལ་མཆོག་བཅུ་བཞི་པ་བསྟན་འཛིན་རྒྱ་མཚོ་མཆོག་སྐུ་འཁྲུངས་ནས་དགུང་གྲངས་ 77 ལ་ཕེབས་པའི་སྐུའི་འཁྲུངས་ཉིན་མོར། ཤ་རུས་གདུང་རྒྱུད་གཅིག་པའི་སྤུ་ཟླ་རྣམ་པ་གཙོས་པའི་ས་སྟེང་མི་མང་ཡོངས་ནས་སྐུ་ཚེ་ཡུན་དུ་བརྟན་པའི་དགའ་དད་སྤྲོ་གསུམ་གྱིས་འཚམས་འདྲི་བཀྲ་ཤིས་བདེ་ལེགས་གྲངས་མེད་ཞུ།།

རིས་མེད་རྒྱལ་བསྟན་ཡོངས་རྫོགས་ཀྱི་བསྟན་པའི་མངའ་བདག་རང་རེ་བོད་མི་ཡོངས་ཀྱི་མེ་ཏོག་གང་ལ་ཕོག་པའི་ལྷ་སྐལ་འཕགས་མཆོག་སྤྱན་རས་གཟིགས་ཀྱི་སྐུའི་ཕྲེང་བ་འཛིན་པ་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གི་སྐུའི་འཁྲུངས་སྐར་ལ་འཚམས་འདྲིའི་བཀྲིས་བདེ་ལེགས་གྲངས་མེད་ཞུ་རྒྱུ་དང་ཆབས་ཅིག་བསྟན་འགྲོའི་མགོན་དུ་སྐུ་ཚེ་བསྐལ་བརྒྱར་བརྟན་པའི་གསོལ་འདེབས་སྙིང་ནས་ཞུ།།

༧གོང་ས་ཡིད་བཞིན་ནོར་བུའི་འཁྲུངས་སྐར་ལ་བཀྲ་ཤིས་བདེ་ལེགས་གྲངས་མེད་ཞུ།།
དུས་བབ་ཚང་གི་གསར་འགྱུར་འགོད་སྟངས་འདི་ནུབ་ཕྱོགས་ཀྱི་གསར་ཁང་ཚད་གཞི་མཐོ་བོའི་རིགས་ཀྱི་འགྲོ་སྟངས་རེད། ང་ཚོ་བོད་མིའི་སྤྱི་ཚོགས་ཀྱི་བརྒྱུད་ལམ་དག་ཀྱང་ཚད་གཞི་ངེས་ཅན་ལ་སླེབས་ཡོང་གི་འདུག་པས་དགའ་སྤོབས་ཀྱིས་བརྟས་ཡོད།