སློབ་ཕྲུག་ ༧༠༠ ངོ་རྒོལ་སྐད་འབོད།

དེ་རིང་ཕྱི་ཚེས་ ༨ ཉིན་གྱི་ཞོགས་པ་མདོ་བ་གྲོང་བརྡལ་གྱི་སློབ་ཕྲུག་ ༧༠༠ ཙམ་གྱིས་རྒྱ་དམར་དར་ཆ་མར་ཕབ་སྟེ་རྒྱ་གཞུང་ལ་ངོ་རྒོལ་བྱས་འདུག

ཁ་སང་ཕྱི་ཚེས་ ༧ ཉིན་རྒྱལ་གཅེས་དཔའ་མོ་རྟ་མགྲིན་འཚོ་ལགས་ཀྱིས་རང་ལུས་མེར་སྲེག་གི་ལས་འགུལ་སྤེལ་ཡོད་པ་ལྟར། དེ་རིང་ཞོགས་པ་མདོ་བ་གྲོང་བརྡལ་གྱི་སློབ་མ་ ༧༠༠ ཙམ་གྱིས་རྒྱ་གཞུང་ལ་ངོ་རྒོལ་སྐད་འབོད་བྱས་ཏེ། སློབ་རྭའི་ནང་ཡོད་པའི་རྒྱ་དམར་དར་ཆ་མར་ཕབ་སྟེ་གཙབས་རལ་བཏང་རྗེས།  སློབ་ཕྲུག་རྣམས་ཐད་ཀར་གྲོང་བརྡལ་གྱི་ལས་ཁུངས་སུ་བསྐྱོད་དེ། ལས་ཁུངས་མདུན་གྱི་རྒྱ་དམར་དར་ཆ་མར་ཕབ་ནས་གཙབས་རལ་བཏང་སྟེ་ངོ་རྒོ་སྐད་འབོད་བྱས་ཡོད་འདུག

གནས་ཚུལ་མཁོ་གཏོང་པ་བསོད་ནམས་ལགས་ཀྱིས་བརྗོད་པ་ལྟར་ན། སློབ་ཕྲུག་ཚོའི་ངོ་རྒོལ་ལས་འགུལ་དེ་བྱུང་རྗེས། དགེ་རྒན་རྣམས་ཀྱིས་གནས་ཚུལ་ཛ་དྲག་མི་ཡོང་ཆེད་གང་མགྱོགས་སློབ་མ་རྣམས་ཀྱི་ཕ་མར་སོ་སོའི་བུ་ཕྲུག་རྣམས་ལེན་ཏུ་ཡོང་དགོས་པའི་བརྡ་ལན་བཏང་ཡོད་པ་དང་། དེ་རིང་ཉིན་ཧྲིལ་བོར་སློབ་གྲྭ་འཚོམས་ཐུབ་མེད་འདུག  ཉིན་རྒྱབ་ཙམ་ལ་རེབ་གོང་ཁུལ་ནས་མདོ་བར་དམག་མིའི་རླངས་འཁོར་བདུན་ཕྱིན་འདུག་ཀྱང་། མདོ་བ་སྡེ་བའི་འདབས་སུ་སློབ་ཕྲུག་རྣམས་དང་བུད་མེད་ཚོས་ངུ་འབོད་བྱེད་ཞོར་ལམ་ཁ་བཀག་ཡོད་པར་བརྟེན།  དམག་མིའི་རླངས་དེ་དག་ཕྱིར་རེབ་གོང་དུ་ལོག་ཡོད་འདུག 

དེ་བཞིན།  དེ་རིང་ཕྱི་ཚེས་  ༨ ཉིན་རྒྱལ་གཅེས་དཔའ་བོ་སྐལ་བཟང་སྦྱིན་པ་ལགས་ཀྱིས་རང་ལུས་མེར་བསྲེགས་ཀྱིས་སྐུ་གྲོངས་ཡོད་པ་ལྟར།   ཁོང་གི་ཁ་ཆེམས་ཡི་གེའི་ནང་ “མི་རིགས་འདྲ་མཉམ་ཡོང་དགོས། བོད་ལ་རང་དབང་དགོས། བོད་ཡིག་དར་སྤེལ་བྱེད་དགོས། ༸རྒྱལ་བ་བསྟན་འཛིན་རྒྱ་མཚོ་བོད་ལ་ཕེབས་དགོས། བོད་རང་དབང་གི་ཆེད་དུ་ངས་རང་ལུས་མེར་སྲེག་གཏོང་རྒྱུ་ཡིན།” ཞེས་འཁོད་ཡོད་འདུག  རྒྱལ་གཅེས་དཔའ་བོ་ཁོང་གི་གདུང་ཞུགས་འབུལ་སྐབས།  རོང་པོ་དགོན་པའི་གདོང་རྒྱལ་ཀླད་དུ་སེར་སྐྱ་མི་མང་ཁྲི་གཅིག་ཙམ་འཛོམས་ཡོད་པའི་ཚོད་དཔག་བྱེད་ཀྱི་འདུག

དེ་རིང་རྒྱ་དམག་གིས་བོད་མི་འཇུ་བཟུང་བཙན་ཁྲིད་དང་དྲག་གནོན་གྱི་གནས་ཚུལ་རིགས་བྱུང་མེད་ཀྱང་།  རྒྱ་གཞུང་འབྲེལ་ཡོད་མི་སྣས་སང་ཉིན་དེ་སྔོན་ལྟར་གདུང་ཐལ་ཉིན་དཀར་མི་མང་མཉམ་འཛོམས་ཐོག་ཁྱེར་མི་ཆོག་པ་དང་། སང་ཞོགས་བོད་ནང་ཆུ་ཚོད་ ༥ སྔོན་ལ་གདུང་ཐལ་རང་ཁྱིམ་དུ་གདན་འདྲེན་ཞུས་ཚར་བ་མ་བྱས་ཚེ་ཁྲིམས་ལ་སྦྱོར་རྒྱུ་ཡིན་པའི་བཙན་བཀའ་བཏང་ཡོད་འདུག  དོ་དགོང་བོད་ནང་གི་ཆུ་ཚོད་ ༡༠ ཙམ་ལ་མི་མང་ཚང་མ་རང་ཁྱིམ་དུ་ལོག་འདུག