ལོ་ ༦༢༠ ལོན་པའི་ཆོས་སྟོན།

བོད་མདོ་སྨད་རྔ་བ་ཁུལ་ཨ་འདུས་ཡག་འགོ་དགོན་དུ་དགོན་མ་ལག་བརྒྱ་དང་བརྒྱད་ཀྱི་སྐུ་ཚབ་འདུ་འཛོམས་ཀྱིས་དགོན་པ་གསར་འཛུགས་གནང་སྟེ་མི་ལོ་ ༦༢༠ འཁོར་བའི་ཆོས་སྟོན་མཛད་སྒོ་ཚོགས་འདུག

ཟླ་འདིའི་ཕྱི་ཚེས་ ༡༥ ནས་ ༢༡ བར་བོད་མདོ་སྨད་རྔ་བ་ཁུལ་ཨ་འདུས་ཡུལ་ཚོ་རུ་ཨ་འདུས་ཡག་འགོ་དགོན་ཚུགས་ནས་ལོ་ངོ་ཧྲིལ་པོ་ ༦༢༠ འཁོར་བའི་རྟེན་འབྲེལ་ཆོས་སྟོན་ཆེན་མོ་ཞིག་འཚོགས་ཡོད་འདུག ཆོས་སྟོན་མཛད་སྒོའི་ཐོག་༧ གོང་ས་མཆོག་དབུས་པའི་ཆོས་ལུགས་རིས་མེད་ཀྱི་བླ་ཆེན་ཁག་གིས་ཤིས་ཚིག་བསྩལ་ཡོད་པ་དང་། རྗེ་དམུ་དགེ་བསམ་གཏན་མཆོག་གི་དངོས་སློབ་དགེ་བའི་བཤེས་གཉེན་ཆེན་མོ་སྐྱབས་རྗེ་རས་ཆུང་བ་མཆོག་དང་། ཁམས་སེལ་ཤུལ་གྱི་དགེ་བའི་བཤེས་གཉེན་འཇམ་དཔལ་བློ་ཤེས་བཅས་བླ་སྦྲུལ་དགེ་བཤེས།  དེ་བཞིན། རྔ་པ་ཁུལ་གྱི་དགོན་སྡེ་ཁག་དང་དགོན་མ་ལག་བརྒྱ་དང་བརྒྱད་ཀྱི་སྐུ་ཚབ་དང་གྲྭ་བ་བཅས་མི་ ༡༠༠༠ ལྷག་འཛོམས་ཡོད་པ་དང་། ཆོས་སྟོན་མཛད་སྒོ་དང་སྟབས་བསྟུན་ཏེ་གདན་ཞུ་དགེ་བཤེས་རྣམ་པས་མང་ཚོགས་ལ་ནང་ཆོས་ངོ་སྤྲོད་དང་། དབང་ལུང་མན་ངག ཤེས་ཡོན་སློབ་གསོ་བཅས་སྤྲད་ཡོད་པ་དང་། ཕྱོགས་མཐའ་ནས་ཕེབས་པའི་དགེ་འདུན་པ་ཚོས་མཚན་ཐུན་ལ་གཞུང་བཀའ་པོད་ལྔའི་དམ་བཅའ་བཞག་པ་དང་། རྩོད་གྲྭ་སོགས་ཚོགས་ཡོད་འདུག  

ཐེངས་འདིའི་ཆོས་སྟོན་མཛད་སྒོ་དེ་ནི། དགོན་མ་ལག་ ༡༠༨ གྱི་མཁན་པོ་ལས་སྣེ་དང་ཨ་འདུས་དགོན་གྱི་ལྷ་སྡེ་ཨ་འདུས་དཔོན་ཁག་བརྒྱད།  ཕྱི་འབྲོག་འཚེ་རུ་མ་བཅས་མཉམ་འབྲེལ་ཐོག་གོ་སྒྲིག་གནང་བ་ཞིག་ཡིན་ཞིང་། དམིགས་ཡུལ་གཙོ་བོ་ཨ་འདུས་ཡག་མགོ་དགོན་ཐོག་མར་འདེབས་མཁན་ཚ་ཁོ་དབོན་པོ་ངག་དབང་གྲགས་པའི་མཛད་པར་རྗེས་དྲན་དང་། དགོན་པར་བོད་ཀྱི་ཆོས་དང་རིག་གཞུང་གི་བྱ་བཞག་རྒྱུན་འཛིན་དང་དར་སྤེལ་ཡོང་ཕྱིར་ཡིན་འདུག

ཨ་འདུས་ཡག་འགོ་དགོན་དགའ་ལྡན་ཐུབ་བསྟན་རབ་རྒྱས་གླིང་ནི། ཤར་ རྒྱལ་བ་ཙོང་ཁ་པའི་བསྟན་པ་ཕྱོགས་མཐར་སྤེལ་བར་ཁུར་དུ་བཞེས་པའི་ཚ་ཆེན་དབོན་ སློབ་ངག་དབང་གྲགས་པས་མདོ་ཁམས་སྨད་དུ་དགོན་མ་ལག་བརྒྱ་དང་བརྒྱད་ཕྱག་བཏབ་མཛད་པའི་ཐོག་མ་ཡིན་ལ། འདི་ཐོག་མར་འཛུགས་པའི་སྐབས་སུ་བཀྲ་ཤིས་པ་བྱུང་བའི་ཆ་ནས་ཡག་འགོ་དགོན་པ་ཞེས་ཐོགས་པ་ཡིན་འདུག དགོན་པ་འདི་ནི་མདོ་སྨད་རྔ་ཡུལ་སྟོད་ཀྱི་ཆར་ཆགས་ཡོད་ལ། གྲུབ་མཐའ་དགེ་ལུགས་དང་སྔོན་སྲོལ་བྱས་ན་དགོན་པ་འདིའི་ཁྲི་པ་དགའ་ལྡན་ཤར་རྩེ་གྲྭ་ཚང་གིས་གཏོང་སྲོལ་ཡོད་འདུག དགོན་པ་འདི་ནི་༧་རྒྱལ་མཆོག་སྐུ་ཕྲེང་བརྒྱད་པའི་མཚན་ཞབས་མཚེ་ཤར་རྩེ་མཁན་པོ་བློ་བཟང་ཆོས་གྲགས་མཆོག་གིས་བདག་སྐྱོང་བྱས་ཏེ། དུས་ད་ལ་ཐུག་གི་བར་བླ་མ་འདིའི་ཡང་སྲིད་དག་གིས་བདག་སྐྱོང་བྱེད་བཞིན་ཡོད་འདུག དགོན་པ་འདི་ནི་མི་ལོ་དྲུག་བརྒྱ་ལྷག་གི་ལོ་རྒྱུས་ཡོད་པའི་དགེ་ ལུགས་ ཀྱི་ཆོས་སྡེ་རྙིང་ཤོས་ཤིག་ཡིན་འདུག་ལ། འདི་ལྷ་སྡེ་ཨ་འདུས་དཔོན་ཁག་བརྒྱད་དང་འབྲོག་སྡེ་འཚེ་རུ་མ་བཅས་ཡོད་ལ། དགེ་འདུན་པ་གྲངས་སུམ་བརྒྱ་ལྷག་ཅིག་ཡོད་འདུག

གསར་འགོད་པ། དོན་གོ