བོད་མིར་འགྲོ་བ་མིའི་ཐོབ་ཐང་སྤྲོད་རོཊ།

མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐོག ནུབ་ཕྱོགས་རྒྱལ་ཁབ་ཁག་གིས་རྒྱ་ནག་གི་འགྲོ་བ་མིའི་ཐོབ་ཐང་གནས་སྟངས་ཐོག་སྐྱོན་བརྗོད་བྱས་ཡོད་འདུག

འཛམ་གླིང་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱིས་ལོ་ ༤ རེའི་མཚམས་སུ་རྒྱལ་ཁབ་སོ་སོའི་ནང་གི་འགྲོ་བ་མིའི་ཐོབ་ཐང་གནས་སྟངས་སྐོར་ལ་བསྐྱར་ཞིབ་ཚོགས་འདུ་རེ་ཚོགས་སྲོལ་ཡོད་པ་ལྟར། ཟླ་འདིའི་ཚེས་ ༢1 ཉིན་སུད་སིའི་གྲོང་ཁྱེར་ཇི་ནི་ཝ་(Geneva)ནང་དུ་ཚོགས་ཆེན་དབུ་འཛུགས་བྱས་ཡོད་པ་དང་། ཚེས་ ༢༢ ཉིན་རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་ལ་བསྐྱར་ཞིབ་གནང་སྟེ། བོད་དང་ཡུ་གུར་གཙོས་པའི་གྲངས་ཉུང་མི་རིགས་ས་ཁུལ་གྱི་འགྲོ་བ་མིའི་ཐོབ་ཐང་གནས་སྟངས་ཡར་རྒྱས་གཏོང་དགོས་ཚུལ་བརྗོད་འདུག་ལ། ཨ་རིའི་སྐུ་ཚབ་ཀྱིས་བོད་རྒྱའི་གནད་དོན་ཐོག་༧གོང་ས་ཏཱ་ལའི་བླ་མ་མཆོག་གི་སྐུ་ཚབ་དང་རྒྱ་ནག་གཞུང་བར་གྲོས་མོལ་གནང་དགོས་པའི་འབོད་སྐུལ་ཡང་ཞུས་ཡོད་འདུག

ཐེངས་འདིར་རྒྱ་ནག་གི་སྐུ་ཚབ་ཝུའུ་ཧེད་ལོང་ (Wu Hailong)གིས་རྒྱབ་ཤ་དཀར་པོ་ཟེར་བའི་ཡིག་ཆ་ཞིག་བཀྲམས་ཏེ། དེང་སྐབས་རྒྱ་ནག་གི་དཔལ་འབྱོར་འཕེལ་རྒྱས་དང་དམངས་གཙོའི་རང་དབང་།  ཁྲིམས་ལུགས་དབང་སྒྱུར་ཚད་ལྡན་ཡོད་པའི་འོག་མི་མང་གིས་བདེ་སྐྱིད་ལྡན་པའི་འཚོ་བ་རོལ་བཞིན་སྟབས། འདས་པའི་ལོ་བཞི་དང་བསྡུར་ན་འགྱུར་ལྡོག་ཆེན་པོ་བྱུང་ཡོད་ཚུལ་བརྗོད་འདུག ཨ་རི་དང་འཇར་མན། ཨོ་སི་ཊོ་ལི་ཡཱ་གཙོས་ནུབ་ཕྱོགས་རྒྱལ་ཁབ་ཁག་གིས། རྒྱ་ནག་གཞུང་གིས་བོད་དང་ཤིན་ཅང་ས་ཁུལ་དུ་འགྲོ་བ་མིའི་གཞི་རྩའི་ཐོབ་ཐང་དང་ཆོས་དད་རང་དབང་ལ་རྡོག་རོལ་བཏང་དང་གཏོང་བཞིན་ཡོད་པ་མ་ཟད། དམག་མིས་དྲག་གནོན་དང་དོན་མེད་འཛིན་བཟུང་གཅར་རྡུང་། བཀག་གཉེར། སྲོག་ཁྲིམས་གཅོད་པ་དང་དྲ་རྒྱར་བཀག་སྡོམ་སོགས་བྱེད་ཀྱི་ཡོད་སྟབས། རྒྱ་ནག་གཞུང་གིས་ངེས་པར་དུ་འགྲོ་བ་མིའི་ཐོབ་ཐང་གི་གནས་སྟངས་ལ་འགྱུར་བ་གཏོང་དགོས་པའི་འབོད་སྐུལ་ཞུས་ཡོད་འདུག

ཨ་རིའི་འགྲོ་བ་མིའི་ཐོབ་ཐང་དང་ངལ་རྩོལ་དྲུང་ཆེ་གཞོན་པ་ལྕམ་ཨོ་ཛི་རཱ་ (Uzra Zeya) ལགས་ཀྱིས། རྒྱ་གཞུང་གིས་ངེས་པར་དུ་གྲངས་ཉུང་མི་རིགས་གཙོས་རྒྱ་ནག་ནང་གི་འགྲོ་བ་མིའི་ཐོབ་ཐང་ལས་འགུལ་པ་དང་། ཆབ་སྲིད་འཐབ་རྩོད་པ་ཚོའི་ནང་མི་ཚོར་བརྙས་བཅོས་དང་བཀག་གཉར། དོན་མེད་འཛིན་བཟུང་སོགས་བྱེད་ཀྱི་ཡོད་པ་མཚམས་འཇོག་བྱེད་དགོས་ཞེས་དང་། ཨ་རིར་རྟེན་གཞི་བྱས་པའི་འགྲོ་བ་མི་ཐོབ་ཐང་ལྟ་ཞིབ་ཚོགས་པས། རྒྱ་ནག་གཞུང་གིས་རྒྱལ་སྤྱིའི་འགྲོ་བ་མིའི་ཐོབ་ཐང་གི་རྩ་འཛིན་ཡིག་ཆར་མིང་རྟགས་བཀོད་མཁན་ཞིག་ཡིན་ཡང་། བོད་དང་ཤིན་ཅང་མི་རིགས་ཀྱི་འགྲོ་བ་མིའི་ཐོབ་ཐང་གནས་སྟངས་ལ་རྡོག་རོལ་ཚབས་ཆེན་བཏང་ཡོད་པ་དང་། ལྷག་པར་དུ་ ༢༠༠༩ ལོ་ནས་བཟུང་བོད་མི་ ༡༢1 ཡིས་རྒྱ་ནག་གི་དབང་བསྒྱུར་ལ་ངོ་རྒོལ་བྱས་ཏེ་རང་ལུས་མེར་བསྲེགས་བཏང་ཡོད་སྟབས། རྒྱལ་སྤྱིའི་རང་དབང་ལྡན་པའི་ཚོགས་པ་ཞིག་བོད་དང་ཤིན་ཅང་ས་ཁུལ་བསྐྱོད་དེ་དོན་དངོས་གནས་ཚུལ་ལ་རྟོག་ཞིབ་བྱེད་དགོས་པའི་འབོད་སྐུལ་ཞུས་འདུག

ཐེངས་འདིའི་ཚོགས་ཆེན་སྐབས། ཡུ་རོབ་ཁུལ་གྱི་བོད་རང་དབང་སློབ་ཕྲུག་ཚོགས་པ་དང་གཞོན་ནུ། དེ་བཞིན་སུད་སིར་གནས་བཞུགས་བོད་མི་མང་པོས་ཚོགས་ཁང་གི་ཕྱི་ལོགས་རྣམ་པ་འདྲ་མིན་ཐོག་ངོ་རྒོལ་ཤུགས་ཆེན་བྱས་ཡོད་པ་དང་། རྒྱ་གཞུང་གིས་བོད་ནང་གི་འགྲོ་བ་མིའི་ཐོབ་ཐང་སྐོར་ལ་འཁྱོག་བརྗོད་བྱེད་ཀྱི་ཡོད་པ་དང་། མཉམ་འབྲེལ་རྒྱལ་ཚོགས་ཀྱིས་བོད་དོན་ལ་རྒྱབ་སྐྱོར་བྱེད་དགོས་ཅེས་པའི་འཕྲད་དར་ཆེན་པོ་ཞིག་མཉམ་འབྲེལ་རྒྱལ་ཚོགས་ཁང་བརྩེགས་མདུན་སྒོའི་ངོས་སུ་དཔྱངས་ཏེ་ངོ་རྒོལ་ཤུགས་ཆེན་བྱས་ཏེ་མི་ ༤ འཛིན་བཟུང་བྱས་ཡོད་འདུག  ཁོང་ཚོས་ཐེངས་འདིའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་རྒྱུན་ལས་རྒྱལ་ཁབ་ ༤༧ ཡོད་པའི་ཁྲོད་རྒྱ་ནག་འོས་འདེམས་བྱེད་མི་ཆོག་ཚུལ་བརྗོད་ཡོད་འདུག

རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་དཔའ་ཆོན་ཡུན་(Hua Chunying ) གྱིས། བོད་དོན་རྒྱབ་སྐྱོར་པ་དེ་དག་གིས་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཐོག་ཚོགས་ཞུགས་རྒྱ་མིའི་སྐུ་ཚབ་ལ་ངོ་རྒོལ་བྱས་པར་སྐྱོན་བརྗོད་དང་། རྒྱ་ནག་གིས་མཉམ་འབྲེལ་རྒྱལ་ཚོགས་ཀྱི་རྒྱལ་ཁབ་ཚོས་མཉམ་དུ་འགྲོ་བ་མིའི་ཐོབ་ཐང་སྲུང་སྐྱོབ་བྱེད་པར་འདོད་པ་ཡོད་ཚུལ་བརྗོད་ཡོད་འདུག ༢༠༡༣ ལོ་གཅིག་པུར་རྒྱ་གཞུང་གིས་ངོ་རྒོལ་བྱེད་མཁན་ལ་ཆབ་སྲིད་ཀྱི་ཉེས་མིང་བཏགས་ཏེ་མི་གྲངས་ ༡༦༠༠༠༠ ལྷག་ཁྲིམས་ཁང་བརྒྱུད་མེད་པར་བཙོན་ཁང་ ༣༦༠ ནང་དུ་ངལ་རྩོལ་བསྒྱུར་བཀོད་ཀྱི་བཙོན་འཇུག་བྱས་ཡོད་འདུག

མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་འདུ་དེ་ཟླ་འདིའི་ཚེས་ ༢༡ ནས་ཟླ་ ༡༡ ཚེས་ ༡ བར་ཚོགས་རྒྱུ་ཡིན་པ་དང་། ཞོར་དུ་ལྷན་ཚོགས་དེའི་རྒྱུན་ལས་རྒྱལ་ཁབ་ ༤༧ གྱི་སྐུ་ཚབ་རྣམས་འོས་འདེམས་བྱེད་རྒྱུ་ཡིན་འདུག

གསར་འགོད་པ། ལྷ་སྐྱབས་རྒྱལ།