རྒྱ་ནག་གིས་ཕྱི་གསལ་ནང་གསལ་ཆེ་ཙམ་བྱེད་དགོས་པ་ཆགས་ཡོད།

༧གོང་ས་མཆོག་གིས་འཇར་མན་ནང་གི་གསར་འགོད་ལྷན་ཚོགས་ཤིག་གི་ཐོག་གསར་འགོད་པའི་དྲི་བར་ལན་འདེབས་གནང་སྐབས། ངོས་ལ་རྒྱ་རིགས་མང་པོ་ཞིག་གིས་དེང་སྐབས་རྒྱ་ནག་འཛམ་གླིང་ནང་སྟོབས་ཤུགས་ཆེ་ཡང་བཟང་སྤྱོད་ཀྱི་སྟོབས་ཤུགས་འདང་གི་མེད་ཚུལ་བརྗོད་མཁན་བྱུང་སྟབས། རྒྱ་གཞུང་གིས་མི་མང་ལ་དམ་དྲག་བྱ་རྒྱུའི་ཚབ་ཏུ་ཕྱི་གསལ་ནང་གསལ་ཆེ་ཙམ་བྱེད་དགོས་པ་ཆགས་ཡོད། ཅེས་གསུངས་འདུག

ཉིན་འདི་གར་༧གོང་ས་མཆོག་གིས་འཇར་མན་དུ་ཆོས་ཕྱོགས་ཀྱི་མཛད་འཕྲིན་སྐྱོང་བཞིན་པ་ལྟར། དེ་རིང་སྔ་དྲོ་གྲོང་ཁྱེར་ཧན་བྷེག་ཏུ་མི་མང་ལ་འཇིག་རྟེན་དབང་ཕྱུག་གི་བཀའ་དབང་གནང་གི་ཡོད་པ་དང་། ཉིན་རྒྱབ་འཇར་མན་བོད་རིགས་མཐུན་ཚོགས་གསར་འཛུགས་གནང་སྟེ་ལོ་ ༣༥ དང་། འཇར་མན་བོད་དོན་རྒྱབ་སྐྱོར་ཚོགས་པ་བཙུགས་ནས་ལོ་ ༢༥ འཁོར་བའི་དུས་དྲན་ཐོག་ཆིབས་བསྒྱུར་གྱིས་ལམ་སྟོན་བཀའ་སློབ་གནང་རྒྱུ་ཡིན་འདུག ཁ་སང་ཚེས་ ༢༥ ཉིན་གྱི་སྔ་དྲོ་དད་ལྡན་ཆོས་ཞུ་བ་ ༧༠༠༠ བརྒལ་བར་རྒྱལ་སྲས་ཐོགས་མེད་བཟང་པོས་མཛད་པའི་༼ལག་ལེན་སོ་བདུན་མ༽བཀའ་ཆོས་གནང་ཡོད་པ་མ་ཟད། ཉིན་རྒྱབ་ཧམ་བྷག་མི་རིགས་རྩད་ཞིབ་རིག་པའི་འགྲེམས་སྟོན་ཁང་དང་འཇིག་ཉེན་མི་རིགས་སྲུང་སྐྱོབ་ཚོགས་པ། འཇར་མན་བོད་དོན་རྒྱབ་སྐྱོར་ཚོགས་པ་བཅས་ཀྱིས་གསོལ་འདེབས་ཞུས་དོན་ལྟར། ༼གནའ་བོའི་བོད་མི་རིགས་ཀྱི་སྤྱི་ཚོགས་དཔལ་ཡོན་གཏོར་བཤིག་བཏང་བ༽ཞེས་པའི་བརྗོད་གཞིའི་འོག་བོད་མིའི་འབྲོག་པའི་འཚོ་བ་བསྐྱལ་སྟངས་སྐོར་གྱི་འགྲེམས་སྟོན་ལ་གཟིགས་ཞིབ་དང་། ཧམ་བྷག་གཙུག་ལག་སློབ་ཁང་གི་འཛམ་གླིང་ཆོས་ལུགས་རིག་པའི་བསྟི་གནས་ཁང་གི་ཚོགས་མིར་མཇལ་འཕྲད་དང་ལམ་སྟོན་བཀའ་སློབ་གནང་ཡོད་འདུག

ཚེས་ ༢༤ ཉིན་༧གོང་ས་མཆོག་གིས་མི་མང་ལ་རྒྱལ་སྲས་ཞི་བ་ལྷས་མཛད་པའི་༼སྤྱོད་འཇུག༽གི་གསུང་ཆོས་གནང་ཡོད་པ་དང་། ཉིན་རྒྱབ་འཇར་མན་གནས་སྡོད་བོད་མི་ ༦༠༠ ལ་མཇལ་ཁ་དང་འབྲེལ་བཀའ་སློབ་གནང་སྟེ། བོད་མི་ཚོ་བཙན་བྱོལ་དུ་འབྱོར་ནས་དུས་ཡུན་རིང་པོ་ཞིག་ཕྱིན་ཡོད་ཀྱང་། ད་ལྟའི་ཆར་ཡང་མི་རབས་གསར་བ་ཚོས་ལྷག་བསམ་དང་སྙིང་སྟོབས། མི་རིགས་ལ་བཅངས་བའི་བརྩེ་སེམས་འགྱུར་བ་མེད་པར་གནས་ཡོད་སྟབས། མ་འོངས་པའི་མི་རབས་གསར་བ་ཚོ་ལོ་རྒྱུས་ཡུན་རིང་ལྡན་པའི་བོད་ཀྱི་སྐད་དང་ཡི་གེར་སློབ་སྦྱོང་གནང་རྒྱུ་ཧ་ཅང་གལ་ཆེན་ཡིན་པ་དང་། བོད་མི་རིགས་ཀྱི་ཆོས་དང་འབྲེལ་བའི་ཡ་རབས་བཟང་སྤྱོད་དང་མི་རིགས་ཀྱི་གོམས་གཤིས་བཟང་པོ་རྒྱུན་གནས་ཐུབ་ཐབས་ལ་འབད་བརྩོན་གནང་དགོས་སྐོར་དང་། ད་ལྟའི་ཆར་རྒྱ་ནག་ནང་ལྐོག་ཟ་རུལ་སུངས་མཚོན་པའི་གནད་དོན་མང་པོ་ཞིག་ཡོང་གི་ཡོད་པ་དང་། གནད་དོན་འདི་དག་གིས་རྒྱ་ནག་གི་ཕུགས་རྒྱང་རིང་པོར་ཁེ་ཕན་གནོད་གཞི་ཞིག་ཆགས་ཡོད་སྟབས། རྒྱ་ནག་གི་མགོ་ཁྲིད་གསར་བ་ཚོས་གནད་དོན་འདི་དག་གི་ཐོག་ཡང་བསྐྱར་བསམ་བློ་གཏོང་གཞི་ཞིག་ཆགས་ཡོད་སྐོར་དང་། གནད་དོན་འདི་དག་གི་ཐོག་ནས་གནས་ཚུལ་མང་དག་ཅིག་ལ་འགྱུར་བ་ཐེངས་ངེས་སྐོར་སོགས་གསུངས་འདུག ཐེངས་འདིའི་༧གོང་ས་མཆོག་གི་གསུང་ཆོས་སྐབས་དོལ་རྒྱལ་རྗེས་འབྲང་བ་ཚོས་གསུང་ཆོས་ར་བའི་ཕྱི་རོལ་དུ་འཕྲེད་དར་འདྲ་མིན་འཕྱར་ཏེ་ངོ་རྒོལ་སྐད་འབོད་གནང་ཡོད་འདུག

ཚེས་ ༢༣ ཉིན་༧གོང་ས་མཆོག་གིས་ཧན་བྷེག་གྲོང་ཁྱེར་གྱི་བརྙན་འཕྲིན་བརྒྱུད་ལམ་ (ZDF) གྱི་བུད་མེད་ལས་རིམ་གཙོ་སྐྱོང་པ་ལྕམ་བྷེ་ཊི་ན་ཧན་སེན་ (Bettina Hansen) ལགས་ཀྱི་ཆེད་དོན་དྲི་བར་བཀའ་ལན་སྩལ་རྗེས། ས་གནས་ཀྱི་ཀོང་རེ་སི་ཚོགས་ཁང་དུ་མང་ཚོགས་ ༧༠༠༠ བརྒལ་བར་༼འགྲོ་བ་མིའི་རིན་ཐང་དང་འབྲེལ་བའི་ཡ་རབས་བཟང་སྤྱོད༽ཅེས་པའི་བརྗོད་གཞིའི་ཐོག་བཀའ་སློབ་གནང་ཡོད་པ་དང་། དེའི་རྗེས་གསར་འགོད་ལྷན་ཚོགས་ཀྱི་ཚོགས་མགོན་དུ་ཆིབས་བསྒྱུར་གྱིས་གསར་འགོད་པའི་དྲི་བར་ལན་འདེབས་གནང་ཡོད་འདུག སྐབས་དེར་འཇར་མན་གསར་འགྱུར་བརྙན་འཕྲིན་ཚན་པའི་དེང་སྐབས་རྒྱ་ནག་དཔལ་འབྱོར་དང་ཆབ་སྲིད་སོགས་གང་ཅིའི་ཐོག་ནུས་སྟོབས་ཆེ་རུ་འགྲོ་བཞིན་ཡོད་སྟབས། བོད་མི་ཚོར་རང་སྐྱོང་གི་གནས་བབ་ཐོབ་རྒྱུའི་རེ་བ་ཇི་ཙམ་ཡོད་སྐོར་དྲིས་པའི་ལན་དུ་༧གོང་ས་མཆོག་གིས། དེང་སྐབས་རྒྱ་རིགས་ཤེས་ཡོན་པ་མང་པོས་བོད་མིའི་གཞི་རྩའི་ཐོབ་ཐང་ལ་རྒྱབ་སྐྱོར་གནང་བཞིན་ཡོད་པ་མ་ཟད། ལྷག་པར་དུ་རྒྱ་རིགས་ནང་པ་ས་ཡ་ ༣༠༠ ལྷག་ཡོད་ཚོད་འདུག ཁོང་ཚོ་མང་པོ་ཞིག་གིས་བོད་བརྒྱུད་ནང་བསྟན་ལ་དོ་སྣང་གནང་ཡོད་འདུག དཔལ་ནཱ་ལེཎྡྲ་ནས་ནས་དར་བའི་ནང་པ་སངས་རྒྱས་པའི་ཆོས་འདི་བོད་ཙམ་དུ་མ་ཟད། དེ་སྔ་རྒྱ་ནག་ནང་དར་ཁྱབ་ཆེན་པོ་བྱུང་ཡོད། ངོས་ལ་རྒྱ་རིགས་མང་པོ་ཞིག་གིས་དེང་སྐབས་རྒྱ་ནག་འཛམ་གླིང་ནང་སྟོབས་ཤུགས་ཆེ་ཡང་བཟང་སྤྱོད་ཀྱི་སྟོབས་ཤུགས་འདང་གི་མེད་ཅེས་བརྗོད་མཁན་བྱུང་། དེར་བརྟེན། རྒྱ་ནག་ནང་གཞུང་གིས་དམ་དྲག་བྱ་རྒྱུའི་ཚབ་ཏུ་ཕྱི་གསལ་ནང་གསལ་ཆེ་ཙམ་བྱེད་དགོས་པ་ཆགས་ཡོད། རྒྱ་མི་རིགས་ལ་དངོས་ཡོད་གནས་ཚུལ་ཤེས་རྒྱུའི་ཐོབ་ཐང་ཡོད། ཅེས་གསུངས་ཡོད་འདུག

ཡང་གསར་འགོད་པ་ཅིག་གིས་༸གོང་ས་མཆོག་གིས་འཚེ་མེད་ཞི་བ་གོང་འཕེལ་གཏོང་ཐབས་གནང་གི་ཡོད་ཀྱང་། འཛམ་གླིང་ནང་འཚེ་མེད་ཞི་བའི་ལམ་ལ་དོ་སྣང་དང་བདག་སྤྲོད་བྱེད་མཁན་མེད་སྟབས། འཚེ་མེད་ཞི་བ་གོང་འཕེལ་གཏོང་ཐབས་ཀྱི་ལས་འགུལ་མཚམས་འཇོག་མི་གནང་བའི་རྒྱུ་མཚན་དྲིས་པའི་ལན་དུ། མིའི་གཞི་རིམ་གྱི་བསམ་བློའི་རང་བཞིན་དེ་ཞི་དུལ་ཅན་ཞིག་ཡིན། ངོས་ཀྱི་གྲོགས་པོ་ཚན་རིག་པ་སྐུ་ཞབས་རི་ཆ་ཌི་ཌེ་ཝི་ཌི་སན་ལགས་ཀྱིས་བརྟག་དཔྱད་གནང་ནས་བྱིས་པ་ཚོས་གཞན་ལ་གནོད་བྱ་རྒྱུ་ལས་ཕན་པ་བསྒྲུབ་རྒྱུའི་ལས་ལ་དགའ་བ་བྱེད་བཞིན་ཡོད་པའི་དཔང་རྟགས་ར་སྤྲོད་ཐུབ་ཡོད། ཅེས་གསུངས་འདུག

གསར་འགོད་པ་ཅིག་གིས་ཚོགས་ཁང་གི་ཕྱི་རོལ་དུ་དོལ་ཚོགས་ཀྱིས་༸གོང་ས་མཆོག་ལ་ངོ་རྒོལ་སྐད་འབོད་བྱེད་བཞིན་པ་དེར་དགོངས་ཚུལ་གང་ཡོད་ཀྱི་དྲིས་པའི་ལན་དུ། གལ་སྲིད། ཁྱེད་ཚོས་ལོ་ངོ་བཞི་བརྒྱ་ཙམ་གྱི་ལོ་རྒྱུས་ལ་དཔྱད་པ་བྱས་ན་ད་གཟོད་དོལ་རྒྱལ་གྱི་རྙོག་གྲ་དེའི་སྐོར་ཤེས་རྒྱུ་རེད། ཐོག་མར་ཕྱི་ལོ་ ༡༩༥༡།༡༩༧༠ བར་ངོས་ཀྱིས་མ་ཤེས་པར་བསྟེན་པ་རེད། དེ་ནས་དོལ་རྒྱལ་བསྟེན་ན་སྐྱོན་ཞིག་ཡོད་པ་ཤེས་རྗེས་རིམ་བཞིན་ངོས་ནས་༸གོང་ ས་ལྔ་པ་ཆེན་པོའི་གསུང་འབུམ་རྣམས་ལ་དཔྱད་པ་མཐིལ་ཕྱིན་བྱས་ཏེ་མཚམས་འཇོག་བྱས་པ་ཡིན། དེ་རྗེས་དགའ་ལྡན་བྱང་རྩེ་གྲྭ་ཚང་ལ་དཀའ་ངལ་བསྟུད་མར་འཕྲད་རྗེས་དཀའ་ངལ་དེ་དག་དོལ་རྒྱལ་བསྟེན་པ་ལས་བྱུང་བ་ར་སྤྲོད་བྱུང་ཡོད། དོལ་རྒྱལ་སྐོར་དངོས་ཡོད་གནས་ཚུལ་གསལ་བཤད་བྱ་རྒྱུ་ངོས་ཀྱིས་ལས་འགན་རེད། དེར་བརྟེན། ངོས་ཐོག་མ་ནས་གནད་དོན་དེའི་སྐོར་ཕྱི་གསལ་ནང་གསལ་བྱས་ཏེ་གསལ་བཤད་བྱས་ཡོད། ཉན་དང་མ་ཉན་དོ་དག་སོ་སོར་རག་ལུས་ཡོད། ཚོགས་ཁང་ཕྱི་ལ་སྐད་འབོད་བྱེད་མཁན་ཁོ་པ་ཚོར་དོལ་རྒྱལ་སྐོར་ལ་གནས་ཚུལ་ཆ་ཚང་བ་ཞིག་འགྲེལ་བཤད་རྒྱག་མཁན་བྱུང་མེད་ཚོད་འདུག ཁོ་པ་ཚོས་དངོས་ཡོད་གནས་ཚུལ་ཤེས་ཀྱི་མེད། ངོས་ཀྱིས་དོལ་རྒྱལ་བསྟེན་གསོལ་བྱས་ན་དགེ་སྐྱོན་གང་ཡོད་དངོས་ཡོད་གནས་ཚུལ་གསལ་བཤད་བྱས་པ་མ་གཏོགས་དོལ་རྒྱལ་བསྟེན་གསོལ་བྱེད་མི་ཆོག ཅེས་རྩ་བ་ཉིད་ནས་བརྗོད་མྱོང་མེད། ཅེས་བཀའ་ལན་སྩལ་ཡོད་འདུག

ཕྱི་ཚེས་ ༢༧ ཉིན་༸གོང་ས་མཆོག་གྲོང་ཁྱེར་ཧན་བྷེག་ནང་བོད་རྒྱའི་མཁས་དབང་དང་ལས་བྱེད་མི་སྣ། ལས་འགུལ་བ། རྩོམ་པ་པོ། ཨ་རི་དང་ཨེ་ཤ་ཡ། ཡུ་རོབ། ཨོ་སི་ཊོ་ལི་ཡ་བཅས་ནས་ཕེབས་པའི་རྒྱ་རིགས་ཤེས་ཡོན་མི་སྣ་བཅས་ལྷན་འཛོམས་ཀྱི་ཚོགས་འདུར་ཆིབས་སྒྱུར་གྱིས་༼བོད་རྒྱ་མི་རིགས་གཉིས་ཀྱི་ཐུན་མོང་གི་གཞི་རྟེན་འཚོལ་ཐབས༽ཞེས་པའི་བརྗོད་གཞིའི་ཐོག་བཀའ་སློབ་སྩལ་རྒྱུ་ཡིན་འདུག

ཐེངས་འདི་ནི་༸གོང་ས་མཆོག་འཇར་མན་གྱི་གྲོང་ཁྱེར་ཧན་བྷེག་ནང་ཆིབས་སྒྱུར་གནང་ཐེངས་ ༥ པ་དང་། འཇར་མན་རྒྱལ་ཁབ་ནང་ཆིབས་སྒྱུར་གནང་ཐེངས་ ༣༨ པ་དེ་ཆགས་ཡོད་འདུག

གསར་འགོད་པ། དོན་གོ