མི་བཞི་ཤོག་ཁག་གསར་པའི་ནང་གི་ལིན་ཅི་ཧྭ།

རྒྱ་ནག་གཞུང་གིས་ལིན་ཅི་ཧྭ་ལ་ཞིབ་བཤེར་བྱེད་མགོ་བཙུགས་པ་དང་བསྟུན་ཏེ་གནས་ཚུལ་གསར་པ་ཁག་ཅིག་འཐོན་བཞིན་ཡོད་པ་ནི། ལོ་གཉིས་གོང་པེ་ཅིན་དུ་རླངས་འཁོར་བརྡབ་སྐྱོན་ཁྲོད་འདས་གྲོངས་སུ་ཕྱིན་པའི་ལིན་ཅི་ཧྭ་ཡི་བུ་ལིན་ཀཱོ་དང་མཉམ་དུ་བོད་པའི་བུ་མོ་གཉིས་ཡོད་པ་ལས་གཅིག་འདས་གྲོངས་སུ་ཕྱིན་ཡོད་འདུག

ཟླ་འདིའི་ཚེས་ ༢༢ ཉིན་རྒྱ་ནག་གཞུང་འབྲེལ་གསར་ལམ་ཁག་ཏུ། དེ་སྔའི་སྲིད་འཛིན་ཧུའུ་ཅིན་ཐོ་ཡི་དྲུང་ཡིག་དང་། རྒྱ་ནག་མི་དམངས་ཆབ་སྲིད་གྲོས་ཚོགས་ཀྱི་ཚོགས་གཙོ་གཞོན་པ། འཐབ་ཕྱོགས་གཅིག་གྱུར་གྱི་འགན་འཛིན་གཞོན་པ་ལིན་ཅི་ཧྭ་(Ling Jihua)ལ་རྒྱ་ནག་གཞུང་གིས་ཞིབ་བཤེར་བྱེད་བཞིན་ཡོད་པའི་གནས་ཚུལ་ཐོན་པ་མ་ཐག ལིན་ཅི་ཧྭ་ཡི་མི་ཚེའི་བརྒྱུད་རིམ་དང་ཆབ་སྲིད་ལས་དོན། ཁོའི་མི་ཚང་གི་གནས་ཚུལ་སོགས་གསར་ལམ་ཁག་ཏུ་གླེང་སློང་ཤུགས་ཆེན་འབྱུང་བཞིན་འདུག

༢༠༡༢ ལོ་ཟླ་ ༣ ཚེས་ ༡༨ ཉིན་པེ་ཅིན་གྱི་ཞོགས་པའི་ཆུ་ཚོད་ ༤ པ་ཡོལ་ཙམ་ལ། རྒྱལ་སྤྱིའི་ཐོག་མིང་གྲགས་ཆེ་བའི་རླངས་འཁོར་ཧྥད་རད་རི་ (Ferrari)ནག་པོ་ཞིག་པེ་ཅིན་གྲོང་ཁྱེར་དུ་བྱང་ཕྱོགས་སུ་ཤར་རྒྱུག་བྱེད་བཞིན་པའི་སྐབས་ལ། གློ་བུར་དུ་སི་ཧན་པའོ་ཧྥའོ་སའུ་ (四环保福寺)ཟམ་པའི་ཤར་ལྷོའི་གྲུ་ཟུར་གྱི་རྩིག་གྱང་ལ་བརྡབ་པ་དང་། ཕྱིར་འཁོར་ནས་བྱང་ངོས་ལམ་འགྲམ་གྱི་ལྕགས་ངོས་ལ་བརྡབ་སྟེ། རླངས་འཁོར་ནང་སྐྱེས་པ་གཅིག་ཡོད་པ་དེ་ས་དེ་རང་དུ་བསད་ཡོད་པ་དང་། གཞན་བུད་མེད་གཉིས་ཡོད་པར་རྨས་སྐྱོན་ཚབས་ཆེན་ཕོག་སྟེ་སྨན་ཁང་དུ་བསྐྱལ་ཡོད་འདུག  

ཉིན་དེར་པེ་ཅིན་ཚགས་ཤོག་(Beijing wangbao)སྟེང་གནས་ཚུལ་མདོ་བསྡུས་ཤིག་བཀོད་ཡོད་ཀྱང་འདས་གྲོངས་སུ་ཕྱིན་པའི་སྐྱེས་པ་དེ་སུ་ཡིན་གསལ་བཤད་བྱས་མེད། རྗེས་སུ་རྒྱ་ནག་ཕྱི་ལོགས་ཀྱི་གསར་ལམ་ཁག་ཏུ་གནས་ཚུལ་ཐོན་པར། ཉིན་དེར་འདས་གྲོངས་སུ་ཕྱིན་པའི་སྐྱེས་པ་དེ་ནི་རྒྱ་ནག་དབུས་འཐབ་ཕྱོགས་གཅིག་གྱུར་གྱི་འགན་འཛིན་གཞོན་པ་ལིན་ཅི་ཧྭ་ཡི་བུ་ཡིན་སྐོར་བརྗོད་ཡོད།

ལོ་དེའི་ཕྱི་ཟླ་ ༡༠ བའི་ནང་ཨེ་ཤ་ཡར་ལྟ་བ་(yazhou zhoukan) ཞེས་པའི་སྟེང་གནས་ཚུལ་བཀོད་པར། ཉིན་དེར་རླངས་འཁོར་བརྡབ་སྐྱོན་ཁྲོད་རྨས་སྐྱོན་ཕོག་མཁན་བུད་མེད་གཉིས་ནི། ལང་མཚོ་དར་ལ་བབ་ཅིང་མཛེས་སྡུག་དཔལ་གྱིས་སྒེག་པའི་རང་ལོ་ ༢༥ ལ་སོན་པའི་བོད་པའི་བུ་མོ་གཉིས་ཡིན་ཞིང་། གཅིག་ནི་མཚོ་སྔོན་ཞིང་ཆེན་སྤྱི་བདེ་ལས་ཁུངས་ཀྱི་འགན་འཛིན་གཞོན་པའི་བུ་མོ་བཀྲ་ཤིས་སྒྲོལ་མ་ཡིན་པ་དང་། མོ་ཀྲུང་དབྱང་མི་རིགས་སློབ་ཆེན་ཐོན་ཡོད་འདུག བུ་མོ་གཞན་དེ་ཡང་ཕ་ཡུལ་མཚོ་སྔོན་ནས་ཡིན་ཞིང་མིང་ལ་གཡང་སྐྱིད་ཟེར་ཞིང་། མོ་རང་པེ་ཅིན་སྲིད་ཁྲིམས་སློབ་གྲྭ་ཐོན་ཡོད་འདུག ཁོ་མོ་སློབ་གྲྭ་དེར་ཡོད་སྐབས་མཛེས་མ་མེ་རྟོག་རྐང་གཅིག་ཏུ་འབོད་ཀྱིན་ཡོད་འདུག

རླངས་འཁོར་བརྡབ་སྐྱོན་བྱུང་མ་ཐག་བེམ་པོ་དང་རྨས་མ་སྨན་ཁང་དུ་བསྐྱལ་ཡོད་ཅིང་། བུ་མོ་བཀྲ་ཤིས་སྒྲོལ་མའི་ཕོ་བར་རྨས་ཕོག་སྟེ་རྒྱུ་མའང་ཕྱིར་ལུག་ཡོད་ནའང་སྨན་བཅོས་བྱས་ཏེ་ཕྲན་བུ་དྲག་སྐྱེད་བྱུང་བའི་ཉིན་ཤས་རྗེས། མུ་མཐུད་སྨན་བཅོས་དང་གཟུགས་པོ་གསོ་ཆེད་ཕྱིར་ཕ་ཡུལ་མཚོ་སྔོན་དུ་ལོག་ཡོད་པ་དང་། གཡང་སྐྱིད་ཀྱི་རྐང་པ་དུམ་བུ་གསུམ་བཅག་ཡོད་པ་མ་ཟད། དཔུང་པང་བཅག་ཡོད་པ་དང་། གཟུགས་པོའི་ཕྱེད་ཀ་དང་སྐྲ་སོགས་མེར་འཚིགས་ཡོད་འདུག ཁོ་མོར་རྨས་སྐྱོན་ཚབས་ཆེན་ཕོག་ཡོད་ཀྱང་སྨན་ཁང་གིས་སྨན་བཅོས་གང་ལེགས་བྱས་མཐར་སྲོག་ཉེན་ལས་ཐར་ཏེ་ཚེ་མཇུག་དབང་བོ་སྐྱོན་དུ་ཆགས་རྒྱུ་ཡིན་པའི་གཏན་འཁེལ་ཡོད་འདུག

གཡང་སྐྱིད་ཀྱི་ངོ་ཤེས་ཤིག་གིས་བརྗོད་པ་ལྟར་ན། ཉིན་དེར་རླངས་འཁོར་བརྡབ་སྐྱོན་བྱུང་མ་ཐག་སྐྱེས་པ་དེ་བསད་ཡོད་ཅིང་བུ་མོ་གཉིས་དྲན་ཐོར་ཡོད་པ་དང་། དེ་མ་ཐག་ཁོ་ཚོ་སྨན་ཁང་དུ་བསྐྱལ་ཏེ་ཡུན་ཙམ་འགོར་རྗེས། གཡང་སྐྱིད་དྲན་པ་སོས་སྐབས། རླངས་འཁོར་ནང་གི་སྐྱེས་པ་དེ་གྲོངས་ཟིན་སྐོར་བརྗོད་སྐབས། ཁོ་མོར་ཚོར་བ་གང་ཡང་མེད་པའི་ངང་ “ག་རེ་ཡིན་ན་ཡིན། ང་ལ་འབྲེལ་བ་མེད་”ཅེས་ལབ་ཡོད་སྟབས་མོའི་གམ་གྱི་མི་རྣམས་ཧང་སང་སྟེ། མུ་མཐུད་མི་དེའི་སྐོར་དྲིས་སྐབས་མོས་རྩ་བ་ནས་ལན་འདེབས་བྱས་མ་སོང་ཟེར།  

གཡང་སྐྱིད་ཀྱི་རྨས་སྐྱོན་ཅུང་དྲག་སྐྱད་བྱུང་ཡང་དབང་བོ་སྐྱོན་ཅན་ཆགས་ཏེ་ཉིན་རྒྱུན་ཉལ་ཁྲིའི་སྟེང་ལྷག་ཡོད་སྟབས། མོ་ཉོབ་སྣང་སྐྱེས་ཏེ་རྟག་པར་ཁ་པར་སྣོག་པ་དང་མི་ལ་འཕྲིན་ཐུང་སྐུར་ནས་ཁ་བརྡ་བྱས་ཡོད་འདུག ཕྱི་ཟླ་ ༨ པའི་ཉིན་ཞིག་གཡང་སྐྱིད་ཅུང་ཙམ་མ་བདེ་བའི་ཚོར་བ་བྱུང་སྐབས། སྨན་པས་མོ་ལ་ཁབ་ཅིག་བརྒྱབ་རྗེས་མོ་གཉིད་དུ་ཡུར་ཡོད་ཅིང་། དུས་དེ་ནས་བཟུང་མོ་རང་གཏན་དུ་སད་རྒྱུ་མེད་པ་ཆགས་ཡོད་འདུག དེའི་རྗེས་སྨན་པ་ཚོས་མོ་གྲོངས་ཟིན་ཚུལ་བརྗོད་པར། ནང་མི་ཚོ་ཧ་ལས་ཏེ་སྲོག་ཉེན་ལས་ཐར་ཟིན་པའི་མི་ཞིག་བློ་བུར་དུ་གྲོངས་པའི་སྐད་ཆ་དེར་ཡིད་མ་ཆེས་པ་བྱུང་ཡོད་འདུག

གཡང་སྐྱིད་ཀྱི་འབྲེལ་ཡོད་མི་སྣ་ཚོས་བརྗོད་ན། གཡང་སྐྱིད་སྨན་ཁང་དུ་ཡོད་སྐབས། རྒྱ་ནག་གི་དཔོན་རིགས་ཤིག་གིས་གཡང་སྐྱིད་ཀྱི་ནང་མི་དང་ནད་ཡོད་ཚོར། གནས་ཚུལ་གང་ཡང་ཕྱི་གྱར་བྱེད་མི་ཆོག་པ་མ་ཟད། འཛམ་གླིང་མི་མང་གིས་དོན་རྐྱེན་དེ་དང་དེའི་རྒྱབ་ལྗོངས་ལ་རྩད་ཞིབ་བྱེད་བཞིན་ཡོད་སྟབས། ཕྱི་ལོགས་ཀྱི་མི་སུ་གང་ལའང་འབྲེལ་འདྲིས་བྱེད་མི་ཆོག་ཚུལ་བརྗོད་ཡོད་འདུག

ཉེ་ཆར་རྒྱ་ནག་གི་ཚད་ཞིན་ (Caixin) གསར་ལམ་ཐོག་གནས་ཚུལ་སྤེལ་བར། ཉིན་དེའི་རླངས་འཁོར་བརྡབ་སྐྱོན་ཁྲོད་གྲོངས་ཟིན་པའི་སྐྱེས་པ་དེ་ནི་ལིན་ཅི་ཧྭ་ཡི་བུ་ལིན་ཀཱོ་ཡིན་པ་དང་། བུའི་ཤི་རྐྱེན་འགེབས་སྲུང་ཆེད་ལིན་ཅི་ཧྭ་ཡིས་སྲིད་ཁྲིམས་གོ་རིམ་ཁྲོད་ཀྱི་མི་སྣ་ཞིག་ལ་ལས་འགན་སྤྲད་ཡོད་ཀྱང་། སྟབས་མ་ལེགས་པར་ཉེ་ལམ་ ལིན་ཅི་ཧྭ་ཡི་འཆར་གཞི་ཡོངས་རྫོགས་ཕམ་ཉེས་སུ་སོང་ཡོད་ཅེས་འཁོད་འདུག

ཟླ་འདིའི་ཚེས་ ༢༢ ཉིན། རྒྱ་ནག་གཞུང་འབྲེལ་གསར་ལམ་ཁག་ཏུ་ལིན་ཅི་ཧྭ་ལ་ཞིབ་བཤེར་བྱེད་བཞིན་ཡོད་པ་གསལ་བསྒྲགས་བྱས་ཡོད་ཀྱང་ནག་ཉེས་གང་ཡིན་གསལ་བཤད་བྱས་མེད། ཚེས་ ༢༤ ཉིན་ཝུན་ཞའོ་ཁྲིན་ (wenxuecity)ཞེས་པའི་དྲ་ཚིགས་སྟེང་། ལིན་ཅི་ཧྭ་འཛིན་བཟུང་བྱས་རྗེས་སེམས་འཚུབ་དང་སྐྱོ་སྣང་ཆེ་ཤོས་དེ་ཧུའུ་ཅིན་ཐོ་ཡིན། དེ་ནི་ལིན་ཅི་ཧྭ་ནི་སྔོན་ཆད་ཧུའུ་ཅིན་ཐོ་ཡི་དྲུང་ཡིག་ཡིན་པ་མ་ཟད། ཁོའི་ཧ་ཅང་བློ་ཐག་ཉེ་ཤོས་ཀྱི་མི་སྣ་ཞིག་ཀྱང་ཡིན། ཧུའུ་ཅིན་ཐོ་ཡིས་རྒྱབ་སྐྱོར་འོག་ཁོའི་གོ་གནས་མགྱོགས་མྱུར་ངང་འཕར་ཡོད་པ་མ་ཟད། ཆབ་སྲིད་དང་དམག་དོན་སོགས་ཀྱི་གསང་བའི་གནས་ཚུལ་མང་པོ་ཞིག་ལ་འགན་འཁུར་བའི་གོ་སྐབས་ཀྱང་བྱུང་ཡོད་ཅེས་འཁོད་འདུག  

ཧུའུ་ཅིན་ཐོ་དང་ལིན་ཅི་ཧྭ་གཉིས་ནི་ཅང་ཙེ་མིན་དང་ཚུན་ཆིན་ཧོན་གཉིས་དང་འདྲ་ཡང་། ཁོ་གཉིས་དང་བསྡུར་ན་དབང་ཤུགས་ཆུང་བ་མ་ཟད། སྟབས་མ་ལེགས་པ་ཞིག་ལ་ཁོ་གཉིས་ཀྱི་ཁ་གཏད་མའོ་དང་ཏུན་གཉིས་ལས་དཔའ་མཛངས་རྟུལ་ཕོད་ཆེ་བའི་གུང་ཁྲན་ཏང་གི་མགོ་ཁྲིད་ལྔ་པ་ཞི་ཅིན་ཕིན་ལ་ཐུག་ཡོད་པ་དེ་རེད། ལིན་ཅི་ཧྭ་ཡིས་དབང་ཆ་རྩོད་ལན་གྱི་ཞོར་དུ་སྒེར་གྱི་ཁེ་ཕན་རྩོད་ལན་བྱས་ཡོད་སྟབས། ཁོ་ཚང་གི་ཁྱིམ་རྒྱུད་དེ་རྒྱུ་རྔམ་ཆེན་པོ་ཅན་ཞིག་ཆགས་པ་མ་ཟད། ལྐོག་ཟ་རུལ་སུངས་ “རུལ་ཏང་ཚོགས་ཁག་” ལ་ལྐོག་འབྲེལ་ཟབ་མོ་ཆགས་ཡོད་སྟབས། ཁོའི་གྱོད་དོན་དེའང་ཉེས་ཅན་པའོ་ཞི་ལེ་དང་ཞའུ་ཚད་ཧོ། ཀྲུའུ་ཡོང་ཁང་སོགས་ལ་འབྲེལ་བ་ཆགས་ཏེ། ཕྱི་ལོགས་ཀྱི་གསར་ལམ་ཁག་ཏུ་ “མི་བཞི་ཤོག་ཁག་གསར་མ་” བྱས་རྗོད་བཞིན་ཡོད་འདུག

ཟླ་འདིའི་ཚེས་ ༢༥ ཉིན། རྒྱ་ནག་ལ་ལྟ་བ་ཞེས་པའི་དྲ་ཚིགས་གསར་འགོད་པ་ཨད་ལིན་ (Ai Ling)གྱིས་ཕྱི་སྡོད་རྒྱ་རིགས་རྩོམ་པ་པོ་ཁྲིན་ཕའོ་ཁོན་ (Chen Pokong) ལ་བཅའ་འདྲི་བྱས་པ་ཞིག་སྤེལ་བའི་ནང་། ལིན་ཅི་ཧྭ་ཡིས་ཁོ་རང་གི་གཅེས་ཕྲུག་རླངས་འཁོར་ ༣༡༨ གྱི་བརྡབ་སྐྱོན་ཁྲོད་ཚེ་སྲོག་ཤོར་བའི་གནས་ཚུལ་འགེབས་སྲུང་བྱེད་དོན་ནི། ཅང་ཙེ་མིན་ཕྱོགས་ཁག་ལ་ངན་འབྲེལ་ཡོད་པས་ཡིན་པ་དང་། ཀྲུའུ་ཡོང་ཁང་གི་གོ་སྒྲིག་འོག་རླངས་འཁོར་དོན་རྐྱེན་ཁྲོད་ལིན་ཅི་ཧྭ་ཡི་བུ་མཆི་ལམ་དུ་བཅུག་སྟེ། ཀྲུའུ་ཡོང་ཁང་དང་མཉམ་འབྲེལ་མི་བྱེད་ཐབས་མེད་བྱུང་ཡོད་ཅིང་། མཉམ་འབྲེལ་འདིའི་དགོས་དམིགས་གཙོ་བོ་པའོ་ཞི་ལེ་ཡི་གྱོད་དོན་རྩད་ཞིབ་མཚམས་འཇོག་བྱ་རྒྱུ་དེ་ཡིན་འདུག

ལིན་ཅི་ཧྭ་ནི་ཧུའུ་ཅིན་ཐོ་ཡི་དྲུང་ཡིག་བྱས་མྱོང་ཡོད་ཀྱང་ད་ལྟ་ལིན་ཅི་ཧྭ་ལ་དཀའ་ངལ་སྤྲད་སྐབས། ཧུའུ་ཡིས་རོགས་སྐྱོར་མ་བྱས་པ་དང་བྱེད་ཐབས་མེད་པའི་རྒྱུ་མཚན་ནི། ཧུའུ་ཅིན་ཐོ་ཡིས་པའོ་ཞི་ལེ་ཡི་གྱོད་དོན་ལག་བསྟར་སྐབས། སྟབས་མ་ལེགས་པར་ལིན་ཅི་ཧྭ་ཡི་ཁྱིམ་ཚང་སྒེར་གྱི་གནས་ཚུལ་དེ་གསར་ལམ་ཁག་ཏུ་ཁྱབ་དེས། རང་བཞིན་གྱིས་ཏང་དང་རྒྱལ་ཁབ་ཀྱི་མགོ་ཁྲིད་ཁྲོད་ཧུའུ་ཅིན་ཐོ་ལ་གླེང་སློང་བྱུང་སྟབས་ཧུའུ་ཡི་དབང་ཤུགས་ཉམས་ཆག་ཏུ་ཕྱིན་ཏེ། ཞི་ཅིན་ཕིན་གྱི་ལས་དོན་ཐོག་ཧུའུ་ཅིན་ཐོ་ཡིས་ལག་པ་བསྲིང་མི་ཐུབ་པ་ཆགས་ཡོད།

གང་ཡིན་ཞེས་ན། ཞི་ཅིན་ཕིན་གྱིས་ལྐོག་ཟ་རུལ་སུངས་ལ་རྡུང་རྡེག་བཏང་བའི་ཁྱོད་ཤི་ང་གསོན་གྱི་དམག་འཐབ་ཁྲོད་ནས་ལེགས་འགྲུབ་བྱུང་བ་དག་ནི། ཕྱི་ཟླ་ ༩ ཚེས་ ༢༤ ཉིན་བོང་ལའི་ཅིན་གྱི་གྱོད་དོན་ཐག་གཅོད་བྱས་པ་དང་། ཟླ་ ༩ ཚེས་ ༢༨ ཉིན་པའོ་ཞི་ལེ་ཁྲིམས་ཞིབ་ཁང་དུ་རྩིས་སྤྲོད་བྱས་པ། ཟླ་ ༨ ཚེས་ ༢༩ ཉིན་དེ་སྔོན་རྒྱ་ནག་དབུས་ཆབ་སྲིད་སྡེ་ཚན་དུ་མི་དགུ་ཡོད་པ་ལས་གཉིས་ཉུང་དུ་བཏང་ནས་མི་བདུན་བཟོས་ཏེ། ཀྲུའུ་ཡོང་ཁང་གི་དབང་ཆ་དང་རྐུབ་སྟེགས་ལྷན་གཅིག་མེད་པ་བཟོས་སྟབས་ཁོས་ལིན་ཅི་ཧྭ་ལ་རོགས་རིམ་བྱེད་པའི་ནུས་ཤུགས་ཟད་ཡོད།   

ཞི་ཅིན་ཕིན་གྱི་གོམ་པ་རྗེས་མ་ག་རེ་ཡིན་པ་དང་། ད་དུང་འདི་ལས་ལྷག་པའི་སྟག་རྒན་ཚོའི་གོ་གནས་ཕབ་རྒྱུ་ཡོད་མེད་སྐོར་ལ་ཁྲིན་ཕའོ་ཁོན་གྱིས། སྐབས་ ༡༨ པའི་ཚོགས་ཆེན་རྗེས་ནས་བཟུང་ཞི་ཅིན་ཕིན་དང་ཝང་ཆི་ཧྲན་ (Wang Qishan)གཉིས་ཀྱིས་དུས་ཚོད་ཉུང་ཤས་ཤིག་གི་ནང་དུ་སྟག་རྒན་རེ་འཇུས་པའི་མགྱོགས་ཚད་དང་འཕེལ་རིམ། དབང་ཚད་ལ་བལྟས་ན། རྒྱ་ནག་ནང་ཁུལ་གྱི་ལྐོག་ཟ་རུལ་སུངས་ལ་འགྱུར་བ་ཆེན་པོ་ཞིག་འགྲོ་ངེས་ཡིན་པ་དང་། སྔོན་ཆེད་ཝོང་ཆི་ཧྲན་གྱིས་གཞུང་གི་ལས་བྱེད་མགོ་ནས་མཇུག་བར་གྱི་མི་སྣར་བཅོས་བསྒྱུར་བྱ་དགོས་པ་དང་། སུས་ཀྱང་ལྐོག་ཟ་རུལ་སུངས་བྱ་མི་ཐུབ་པ་དང་མི་ཕོད་པ། མི་དྲན་པ་ཞིག་གི་ཚད་དུ་བསྐྱལ་དགོས་ཞེས་བཤད་ཡོད་སྟབས། ལིན་ཅི་ཧྭ་ནི་ཞི་ཅིན་ཕིན་གྱིས་ཞིབ་བཤེར་བྱེད་ཡུལ་ཆེས་མཐའ་མ་དེ་མིན་པར། དེ་ལས་མང་བ་ཡོད་པའི་ཁྲོད་དུ་དམག་དཔོན་ཀོ་པའོ་ཞོན་ (Guo Boxiong) དང་། ཆབ་སྲིད་ཨུ་ཡོན་རྒྱུན་ལས་ཁང་གི་ཅ་ཆེ་ལེན་(Jia Qiling)། ཚིན་ཆིན་ཧོན་ (Ceng Qinghong)སོགས་ཚུད་ཡོད་ཟེར།

ཝང་ཆི་ཧྲན་གྱིས་རྒྱ་དཔོན་ཚོའི་ལྐོག་ཟ་རུལ་སུངས་དེ་བཅོས་བསྒྱུར་བྱས་ཏེ་ཁྲོམས་ལྟ་འགྲོ་བཞིན་པའི་དུས་འདིར། གུང་ཁྲན་ཏང་གི་ལམ་ལུགས་འོག་འདི་ལྟར་མུ་མཐུད་དུ་འགྲོ་ཐུབ་མིན་ཐད་ཁྲིན་ཕའོ་ཁོན་གྱིས་འདི་ལྟར་བརྗོད་འདུག རྒྱ་ནག་གི་གནད་དོན་ཐག་གཅོད་བྱ་དགོས་ན་གུང་ཁྲན་ཏང་གི་གནད་དོན་ཐག་གཅོད་བྱ་དགོས། གང་ཡིན་ཞེ་ན། ཤོག་ཁག་ཅིག་གི་སྒེར་གཅོད་ལམ་ལུགས་ནི་རླུང་བུ་བཞིན་ཡིན་པ་དང་། ལྐོག་ཟ་རུལ་སུངས་ཀྱི་འཁྲུག་རྩོད་ཀྱང་དབང་ཆའི་འགེབས་སྲུང་ཞིག་ཡིན། ཤོག་ཁག་གཅིག་གི་སྒེར་གཅོད་གནས་སྟངས་འོག་མི་གཅིག་གིས་སྤྱི་ཚོགས་ཀྱི་གཞི་རྩའི་གནད་དོན་ཐག་གཅོད་བྱ་མི་ཐུབ། ཁྲིམས་སྐྱོང་བྱ་བ་དང་དམངས་གཙོ་ཡིས་ད་བཟོད་རྒྱ་ནག་གིས་གནད་དོན་ཐག་གཅོད་བྱེད་ཐུབ། མ་འོངས་པའི་རྒྱ་ནག་གི་ཆབ་སྲིད་ཁ་ཕྱོགས་གང་འདྲ་ཞིག་ལ་འགྲོ་མིན་དེ་ཁྲིམས་ལུགས་ལྟར་སྲིད་འཛིན་རྒྱུ་དེ་ཡིན། ཕྱོགས་གཅིག་ནས་བལྟས་ན་འདི་ནི་གུང་ཁྲན་ཏང་གི་སྐད་ཆ་སྟོང་པ་ཞིག་དང་ཡིད་ཆེས་བྱེད་དཀའ་བ་ཞིག་ཡིན་ཡང་། ཕྱོགས་གཞན་ཞིག་ནས་བལྟས་ན་དབང་ཆ་རྩོད་ལན་འདིས་ལམ་ལུགས་གསར་བ་ཞིག་དང་སྤྱི་ཚོགས་གསར་བ་ཞིག་གི་སྒུལ་ཤུགས་སུ་འགྱུར་ངེས་ཡིན། ཕར་གསོད་ཚུར་དམེ་ཡི་མཇུག་མཐར་ལམ་ལུགས་བཅོས་བསྒྱུར་བྱ་དགོས་ཐུག་སྲིད་ཅེས་བརྗོད་འདུག