རྒྱ་གར་གྱི་རྒྱལ་ས་ལྡི་ལིར་ཚོགས་པའི་མདོ་ཁམས་ཆུ་བཞི་སྒང་དྲུག་གི་འགན་འཛིན་ལྷན་ཚོགས་ཐེངས་ ༤༥ པ་མཇུག་སྒྲིལ་འདུག
ཟླ་འདིའི་ཕྱི་ཚེས་ ༢༥ ནས་ ༢༧ བར་མདོ་ཁམས་ཆུ་བཞི་སྒང་དྲུག་གི་འགན་འཛིན་ལྷན་ཚོགས་ཐེངས་ ༤༥ པ་རྒྱ་གར་གྱི་རྒྱལ་ས་ལྡི་ལིའི་ཆུ་སྒང་དཔའ་བོའི་རྗེས་དྲན་ཚོགས་ཁང་དུ་ཚོགས་ཡོད་པ་དང་། ལྷན་ཚོགས་ཐོག་ཆུ་སྒང་དབུས་རྒྱུན་རྣམ་པའི་གཙོས་རྒྱ་གར་དང་བལ་ཡུལ། ཨ་རིའི་ནང་ཡོད་པའི་ས་གནས་ཁག་གི་རྒྱུན་ལས་དང་ཚོགས་མི་བཅས་ཁྱོན་མི་ ༨༠ ཙམ་མཉམ་ཞུགས་གནང་ཡོད་ཅིང་། ཚོགས་ཐོག་ཏུ་ས་གནས་ཁག་ ༡༨ ཙམ་ནས་ཕྱི་ལོ་ ༢༠༡༤ ཕྱི་ཟླ་ ༦ ཚེས་ ༢༦ ནས་ ༢༠༡༥ ཟླ་ ༤ ཚེས་ ༡༨ བར་གྱི་རྩིས་ཁྲ་དང་ལས་བསྡོམས་སྙན་སྒྲོན་ཞུས་པའི་ཐོག་གོ་བསྡུར་གནང་ཡོད་པ་དང་འབྲེལ། གྲོས་གཞི་གྲོས་འཆར་ཁག་གི་ཐོག་བགྲོ་གླེང་དང་། ཕྱི་ལོ་ ༢༠༡༥ དང་ ༢༠༡༦ ལོའི་སྔོན་རྩིས་གཏན་འབེབས་བཅས་གནང་ཡོད་འདུག
དེ་རིང་ཕྱི་ཚེས་ ༢༧ ཉིན་སྤྱི་མོས་ཐོག་ནས་གྲོས་ཆོད་དོན་ཚན་ ༡༣ གཏན་འབེབས་གནང་ཡོད་པའི་ནང་། རང་ཁོངས་བོད་ཡིག་གཙོ་གཉེར་གྱི་མཐོ་སློབ་འགྲིམ་བཞིན་པའི་སློབ་མ་ཚོར་ཆེ་མཐོང་དང་སྐུལ་ལྕག་གཏོང་ཆེད། སཱ་ར་དང་ཝར་ཎ། སྨན་རྩིས་ཁང་། ནོར་གླིང་བཅས་ཀྱི་སློབ་མ་ ༥ བཅས་ཁྱོན་མཐོ་རིམ་སློབ་མ་གྲངས་ ༧༢ ལ་ལོ་རེར་སློབ་ཡོན་དོད་འབུལ་ཐབས་ལ་འབད་བརྩོན་བྱ་རྒྱུ་དང་། རྒན་རབས་རྣམ་པའི་བཀའ་དྲིན་རྗེས་དྲན་ཆེད་རང་ཁོངས་ཀྱི་རྒན་པ་མི་གྲངས་ ༡༠༠ ལ་འཚོ་སྣོན་རོགས་དངུལ་འབུལ་རྒྱུ། གཞན་ཡང་། ཡུ་རོབ་ཁུལ་དང་བྱང་ཨ་རིའི་ཁུལ་གྱི་ས་གནས་ཁག་མཉམ་འབྲེལ་གྱི་ཐོག་ནས་འགྲོ་གྲོན་རང་གཏོང་གིས། ལོ་འཁོར་ལས་བསྡོམས་ཀྱི་ཚོགས་ཆེན་རེ་བསྡུ་ཐུབ་ན་དགེ་མཚན་ཆེན་པོ་ཡོད་པ་དང་། ཨ་རིའི་ཁོ་ལོ་ར་ཌོ་(Colorado)ནི་ཨ་རི་གཞུང་གིས་ཆུ་སྒང་བསྟན་སྲུང་དང་བླངས་དམག་མིར་གསང་བའི་དམག་སྦྱོང་སྤྲོད་སའི་ལོ་རྒྱུས་རང་བཞིན་ལྡན་པའི་ས་གནས་གལ་ཆེན་ཞིག་ཡིན་སྟབས། དགོས་མཁོའི་མཐུན་རྐྱེན་དང་གོ་སྐབས་བྱུང་ཚེ་དེར་དཔའ་བོའི་རྗེས་དྲན་གྱི་རྡོ་རིང་ཞིག་གསར་བཞེངས་གནང་ཐུབ་ན་དགེ་མཚན་ཆེན་པོ་ཡོད་པ། དེ་བཞིན། ཟླ་འདིའི་ཕྱི་ཚེས་ ༢༥ ཉིན་བལ་ཡུལ་གྱིས་གཙོས་བོད་དང་རྒྱ་གར་བཅས་ཀྱི་ནང་ས་ཡོམ་གྱིས་གོད་ཆག་ཆེན་པོ་བྱུང་བར་གདུང་སེམས་མཉམ་སྐྱེད་དང་འདས་གསོན་ཡོངས་ལ་བསྔོ་སྨོན་སེམས་གསོ་ཞུ་བཞིན་ཡོད་སྐོར་སོགས་བཀོད་འདུག
དེ་ཡང་༧གོང་ས་མཆོག་གི་སྐུ་ཕྱྭའི་ཐད་སྔར་ལྷག་དོ་ནན་ཡོང་ཐབས་དང་། སྐུའི་ཞབས་རིམ་ཆེན་མོ་དང་འབྲེལ་བའི་གྲོས་ཆོད་ཁག་ཅིག་སྤྱི་མོས་གཏན་འབེབས་བྱུང་བའི་ནང་། ༧གོང་ས་མཆོག་གི་སྐུའི་ཆ་ཤས་ཕྲ་མོ་ཙམ་ལའང་བར་ཆད་འབྱུང་སྲིད་པའི་བྱ་ངན་རྩོམ་མཁན་དང་། དངོས་སུ་ངོ་རྒོལ་མཚན་སྨད་ཞུ་མཁན་རིགས་ལ་མཐའ་གཅིག་ཏུ་ངོ་རྒོལ་བྱ་རྒྱུ་དང་། བོད་མིའི་སྒྲིག་འཛུགས་ཀྱི་བདེ་སྲུང་ལས་ཁུངས་དང་། འབྲེལ་ཡོད་རྒྱ་གར་དབུས་སའི་གཞུང་བཅས་ལ་སྔར་ལྷག་སྐུ་ཕྱྭའི་ཉེན་སྲུང་ཐད་དོ་ནན་དགོས་པའི་སྙན་ཞུ་འབུལ་རྒྱུ་དང་འབྲེལ་རྒྱུན་དུ་ཞབས་རིམ་གསོག་སྒྲུབ་གང་ནུས་བྱ་རྒྱུ་དང་། འདི་ལོར་༧གོང་ས་མཆོག་ཕྱི་ལུགས་ཀྱི་དགུང་གྲངས་ ༨༠ ཕེབས་བཞིན་པའི་སྐབས་དང་བསྟུན། དབུས་རྒྱུན་གྱིས་སྣེ་ཁྲིད་དེ་ས་གནས་སོ་སོ་ནས་ཚེ་ཐར་སྲོག་བླུ་དང་ཤིང་སྣ་འདེབས་འཛུགས་གང་མང་ཐུབ་ཐབས་དང་། ཁོར་ཡུག་གཙང་སྦྲའི་ལས་གཞི་རྒྱ་ཆེར་སྤེལ་རྒྱུ། གཞན། ༸རྒྱལ་བའི་བསྟོད་ཚོགས་ཀྱི་ཆེད་དེབ་ཅིག་པར་སྐྲུན་འགྲེམ་སྤེལ་བྱ་རྒྱུ་བཅས་བཀོད་འདུག
བསྡུ་བའི་ཞབས་བཞི་ཕྱིན་དྲུག་ཕྱག་གི་རྒྱ།།
སྲིད་ཞིའི་ཁྱོན་ལ་གདེངས་མཛད་ཁྲོ་བོའི་ལྷ།།
མ་རིགས་བགེགས་ལ་རྔམ་པ་ཅི་བཞིན་དུ།།
ཆུ་བཞི་སྒང་དྲུག་དཔའ་བོའི་བྱུང་རབས་བརྗིད།།
སྐབས་གསུམ་གནས་ལ་སྐྱེངས་པ་ཀུན་སྟེར་བའི།།
ཆོས་ལྡན་ཞིང་ཞེས་གངས་དཀར་ར་བ་ཆེ།།
འཁྱོག་འགྲོ་དམར་པོས་མ་རུངས་དུག་གི་ལྕེས།།
འགམ་པར་བརྩམས་ཚེ་སེམས་ལྡན་སུ་ཡིས་བཟོད།།
ཁྱད་པར་༧ ལྷ་གཅིག་ཕྱག་ན་པད་མོའི་གར།།
འགྲོ་ཁམས་ནམ་མཁའི་ནོར་བུ་ཉག་གཅིག་ཡང་།།
སྐྱིན་ཐང་གདུང་གི་འབྲས་ལྡན་སྙེ་མ་ལྟར།།
གྱུར་ཚེ་སྲོག་དང་བསྡོ་བར་ཅིའི་མི་བྱེད།།
ཨ་འབྲུག་མགོན་པོས་ནོར་རྩེན་མཛོད་ཕྱེ་ནས།།
དཔུང་ཆེན་མཁོ་རྒུའི་མཐུན་རྐྱེན་སྦྱར་དང་ལྷན།།
བསྟན་སྲུང་དང་བླངས་དཔའ་རྟུལ་ངར་མའི་ཚོགས།།
མེ་ཆར་བཞིན་དུ་ཀུན་ནས་འབབ་པར་བྱས།།
ཀུན་གསལ་སྒེག་མོའི་ཕྱག་གི་མེ་ལོང་ཆེ།།
ས་ལ་ལྷུང་འདྲའི་ལྕགས་ཚ་གྲུ་གུ་ཐང་།།
མདོ་ཁམས་མི་ཡི་སེང་གེའི་དཔུང་ཆེན་གྱིས།།
སྐྱོམ་པར་བྱས་པས་གདེངས་ཅན་ཕོ་བྲང་བསྙིལ།།
རུས་པའི་བཙན་རྫོང་བཟུང་བའི་ཕ་རོལ་ན།།
དགྲ་བོའི་རོ་ཡང་ལྷུན་པོའི་གཟུགས་སུ་བཀོད།།
རང་གཞན་ཁྲག་གི་རྒྱ་མཚོ་གཏིང་རིང་དེས།།
ཆུ་ཡི་སྐྱར་མོ་དག་ལ་ངལ་བ་བྱིན།།
བརྒྱ་ཤི་སྟོང་ལངས་མང་སྣ་ཉུང་གཏད་ཀྱིས།།
གནམ་གྱི་གྲུ་དང་ས་ཡི་སྒྱོགས་ཆེན་སོགས།།
ཚོན་གྱི་རིགས་བྱེད་བྱེ་བའི་ཆར་ཕབ་ཀྱང་།།
ཐུ་བྷོད་འབྲོང་གི་སྙིང་ཁམས་ཞུམ་མ་གྱུར།།
དེ་ལྟ་མོད་ཀྱི་དཀར་མིན་ལས་དབང་གིས།།
རང་ས་འཛིན་པའི་རེ་འབྲས་ཕྲ་ན་ཡང་།།
༧མི་ཡི་ནོར་བུ་བཀའ་འཁོར་དང་བཅས་པ།།
འཕགས་ཡུལ་ཕེབས་ལ་རང་སྲོག་གཏའ་མར་བཞག།