རྒྱ་ནག་རྡོ་སྣུམ་སྡེ་ཁག་གི་ཀྲུང་ཧྲི་ཧྭ་ཡི་བཟོ་གྲྭའི་འགན་འཛིན་ཝང་ཐན་ཕོའུ་རྒྱ་གཞུང་གིས་ཞིབ་བཤེར་བྱེད་བཞིན་ཡོད་པ་ཁྱབ་བསྒྲགས་བྱས་འདུག
ཁ་སང་རྒྱ་གཞུང་དབུས་སྒྲིག་ཁྲིམས་ཞིབ་བཤེར་ལྷན་ཁང་གི་དྲ་བའི་སྟེང་། རྒྱ་ནག་རྡོ་སྣུམ་ཀྲུང་ཧྲི་ཧྭ་ (中石化) བཟོ་གྲྭའི་འགན་འཛིན་གཙོ་བོ་ཝང་ཐན་ཕོའུ་(Wang Tianpu) ནག་ཉེས་ཚབས་ཆེན་བཟོས་པའི་དོགས་གཞིའི་འོག་ཞིབ་བཤེར་བྱེད་བཞིན་ཡོད་པ་ཁྱབ་བསྒྲགས་བྱས་པ་དང་། བརྒྱུད་ལམ་ཁག་ཏུ་ཝང་ཐན་ཕོའུ་ཡིས་ཀྲུའུ་ཡོན་ཁཱང་གི་བུ་ཀྲུའུ་པེན་ (Zhou Bin) ལ་ཁེ་བཟང་བསྐྲུན་ཡོད་པ་དང་། ཝང་ཐན་ཕོའུ་ནི་ཀྲུའུ་ཡོན་ཁཱང་གི་བློ་ཁེལ་ས་ཞིག་ཡིན་སྐོར་སོགས་བརྗོད་འདུག
ཝང་ཐན་ཕོའུ་མཐའ་མཇུག་ཕྱིར་ཐོན་པ་དེ་ཟླ་འདིའི་ཚེས་ ༢༤ ཉིན་ཡིན་པ་དང་། སྐབས་དེར་ཁོས་རྒྱ་ནག་རྡོ་སྣུམ་བཟོ་གྲྭའི་སྐབས་དང་པོའི་འགན་འཛིན་ལྷན་ཚོགས་ཐེངས་ ༢༥ བའི་སྟེང་། ཁོས་ལས་རིགས་དང་འབྲེལ་བའི་གནས་ཚུལ་སྙན་སེང་ཞུས་ཡོད་འདུག
ཁ་སང་ཕྱི་དྲོར་རྒྱ་ནག་ཚད་ཞིན་དྲ་བར་གནས་ཚུལ་མཁོ་སྤྲོད་བྱེད་མཁན་ཞིག་གིས་བརྗོད་པ་ལྟར་ན། ཝང་ཐན་ཕོའུ་ཡིས་རང་གི་གཉེན་ཉེ་ལ་རོགས་སྐྱོར་བྱེད་ཆེད་དུ་རྒྱ་ནག་རྡོ་སྣུམ་བཟོ་གྲྭའི་ཚོང་ཟོག་མངག་ཐོ་འབོད་ཆེན་བླངས་པ་དང་། ཀྲུའུ་ཡོན་ཁཱང་གི་བུ་ཀྲུའུ་པེན་ལ་རྒྱལ་ཁའི་སྣུམ་ཞིང་( 胜利油田) གི་ཡོ་ཆས་ཉོ་ཚོང་ཁེ་ཕན་བསྐྲུན་ཡོད་པ་མ་ཟད། ད་ལོའི་ཕྱི་ཟླ་དང་པོའི་ནང་རྒྱ་ནག་རྡོ་སྣུམ་བཟོ་གྲྭའི་ནང་ལོགས་སུ་ཝང་ཐན་ཕོའུ་ལ་གནོད་སྐྱོན་བྱུང་སྲིད་པའི་གླེང་སློང་བྱུང་ཡོད་འདུག
རྒྱ་གཞུང་ཕིན་ཕད་ (Pengpai) གསར་འགྱུར་དྲ་བའི་སྟེང་། ཀྲུང་ཧྲི་ཧྭ་བཟོ་གྲྭའི་མི་ཞིག་གིས་བརྗོད་པ་ལྟར་ན། ཝང་ཐན་ཕོའུ་དང་ཀྲུའུ་ཡོན་ཁཱང་གཉིས་ལ་འབྲེལ་བ་ཡག་པོ་ཡོད་པ་དང་། ༢༠༡༡ ལོའི་སྔ་རྗེས་སུ་ཝང་ཐན་ཕོའུ་ཡི་གླེང་མོལ་ནང་དུ་ཐེངས་ཅིག་ཁོས་ཀྲུའུ་ཡོན་ཁཱང་ལ་མཇལ་འཕྲད་བྱས་སྐབས། ཀྲུའུ་ཡོན་ཁཱང་གིས་ཝང་ཐན་ཕོའུ་ནི་ཁྱིམ་ཚང་གཅིག་གི་མི་ཡིན་ཚུལ་བརྗོད་ཡོད། ཅེས་དང་། ཝང་ཐན་ཕོའུ་ཞིབ་བཤེར་གྱིས་ཅི་ལོའུ་རྡོ་སྣུམ་ (齐鲁石化)ལ་འབྲེལ་བ་ཡོད་པའི་གནས་ཚུལ་འཐོན་སྲིད། གང་ཡིན་ཞེ་ན། ཅི་ལོའུ་རྡོ་སྣུམ་ནི་སྔོན་ཆད་རྒྱལ་ཁའི་སྣུམ་ཞིང་གི་རྡོ་སྣུམ་བཙོ་སྦྱང་གི་ཆ་ཤས་ཡིན་པ་དང་། ཝང་ཐན་ཕོའུ་དང་ཀྲུའུ་ཡོན་ཁཱང་གཉིས་རྒྱལ་ཁའི་སྣུམ་ཞིང་ནས་ཡོང་པའི་དཔོན་རིགས་ཡིན་པར་རྩི་ཆོག ཅེས་སོགས་བརྗོད་འདུག
དེ་རིང་ཀྲུང་གོར་ལྟ་བ་ཞེས་པའི་དྲ་བས་གནས་ཚུལ་སྤེལ་བ་ལྟར་ན། རྒྱ་ནག་རྡོ་སྣུམ་སྡེ་ཁག་ཏུ་ཀྲུང་ཧྲི་ཧྭ་ ( 中石化) དང་། རྒྱ་ནག་རྡོ་སྣུམ་ ( 中石油) ཀྲུང་ཧེ་སྣུམ་ ( 中海油) སོགས་ནི། སྔོན་ཆད་རྒྱ་ནག་གི་སྲིད་འཛིན་ཟུར་བ་ཅང་ཙེ་མིན་ཤོག་ཁག་གི་དབང་ཤུགས་ཁྱབ་ཁོངས་དང་། དམིགས་བསལ་རྡོ་སྣུམ་ར་སྐོར་དེ་ཅང་ཤོག་མི་སྣ་གཙོ་གྲས་གཉིས་པ་ཚིན་ཆིན་ཧོན་གྱི་ས་ཁུལ་ཡིན་འདུག
ཕྱིའི་བརྒྱུད་ལམ་ཁག་ཏུ་སྔོན་ཆད་ཚིན་ཆིན་ཧོན་ནི་རྡོ་སྣུམ་ཤོག་ཁག་གི་ཚོགས་གཙོ་ཡིན་པ་དང་། རྗེས་སུ་ཀྲུའུ་ཡོན་ཁཱང་གིས་ཚོགས་གཙོའི་འགན་ཁུར་ཡོད་འདུག་པར་བརྗོད་པ་དང་། དེ་བཞིན་དུ་རྡོ་སྣུམ་ར་སྐོར་ནང་ཚུད་པའི་ཆབ་སྲིད་ལྷན་ཁང་གི་མགོ་གཙོ་ཟུར་པ་ཀྲུའུ་ཡོན་ཁཱང་དང་རྒྱ་ནག་རྡོ་སྣུམ་འགན་འཛིན་ཟུར་བ་ཅང་ཅད་མིས་ (Jiang Jiemin)། ཀྲུང་ཧྲི་ཧྭ་ཡི་འགན་འཛིན་ཟུར་བ་ཁྲིན་ཐོན་ཧེ་ (Chen Tonghai)། ད་ལྟའི་ཀྲུང་ཧྲི་ཧྭ་ཡི་འགན་འཛིན་ཧྥོ་ཁྲིན་ཡོའུ་ (Fu Chengyu)། སྔོན་ཆད་ཀྲུང་ཧྲི་ཧྭ་མའོ་མིན་རྡོ་སྣུམ་བཟོ་གྲྭ་ (中石化茂名石油工业公司)ཡི་འགན་འཛིན་དང་། ད་ལྟ་རྒྱ་ནག་རྒྱལ་སྲིད་སྤྱི་ཁྱབ་ཁང་གི་འགན་འཛིན་གཞོན་པ་ཀྲང་ཀོ་ལི་ (Zhang Gaoli) སོགས་ནི་ཚིན་ཆིན་ཧོན་གྱིས་བློ་ཁེལ་སའི་མི་ཡིན་པར་བརྗོད་བཞིན་ཡོད་འདུག
ཝང་ཐན་ཕོའུ་ནི་ཕྱི་ལོ་ ༡༩༦༢ ལོའི་ཟླ་ ༩ བའི་ནང་ཧྲན་ཏོན་ཁྲང་ལི་ནས་སྐྱེས་ཤིང་། ༡༩༨༥ ལོའི་ཟླ་ ༧ པའི་ནང་ཆིན་ཏོ་ཧྭ་ཀོན་སློབ་ཆེན་ནས་མཐར་ཕྱིན་ཡོད་འདུག
གསར་འགོད་པ། འཇིགས་མེད་རྒྱ་མཚོ།
