རྒྱ་གར་གྱིས་མཆོད་འབུལ་ཞུ་རྒྱུ་ཡིན།

རྒྱ་གར་གཞུང་གིས་ནང་པའི་སྟོན་པ་ཤཱཀྱ་ཐུབ་པ་སྐུ་འཁྲུངས་པ་དང་སངས་རྒྱས་པ་མྱ་ངན་ལས་འདས་པ་བཅས་ཀྱི་དུས་ཆེན་གསུམ་འཛོམས་ཉིན་དང་བསྟུན་ཏེ། གཟའ་ཟླ་བའི་ཉིན་རྒྱལ་ས་ལྡི་ལིར་བལ་ཡུལ་གྱི་ས་ཡོམ་ཁྲོད་རྐྱེན་འདས་སུ་སོང་བ་དག་གི་ཆེད་དུ་རྒྱལ་སྤྱི་རང་བཞིན་གྱི་མཆོད་འབུལ་སྨོན་ལམ་རྒྱ་ཆེན་པོ་ཞིག་གནང་རྒྱུའི་གསལ་བསྒྲགས་བྱས་འདུག

ཁ་སང་རྒྱ་གར་དབུས་གཞུང་ནང་སྲིད་ལྷན་ཁང་གིས་གསར་འགོད་གསལ་བསྒྲགས་སྤེལ་བ་ལྟར་ན། ཟླ་འདིའི་ཚེས་ ༤ ཉིན་རྒྱལ་ས་ལྡི་ལིའི་ཌལ་ཁཱ་ཌོ་ར་རྩེད་ཐང་ (Talkatora stadium) དུ། རྒྱ་གར་དབུས་གཞུང་རིག་གཞུང་ལྷན་ཁང་དང་རྒྱལ་སྤྱིའི་ནང་བསྟན་མཐུན་ཚོགས་གཉིས་ཀྱི་གོ་སྒྲིག་འོག སངས་རྒྱས་བཅོམ་ལྡན་འདས་སྐུ་འཁྲུངས་པ་དང་སངས་རྒྱས་པ། མྱ་ངན་ལས་འདས་པ་བཅས་ཀྱི་དུས་ཆེན་གསུམ་འཛོམས་ཀྱི་ཉིན་མོ་དང་བསྟུན་ཏེ། རྒྱ་གར་གཞུང་གིས་བལ་ཡུལ་གྱི་ས་འགུལ་ཁྲོད་རྐྱེན་འདས་སུ་སོང་བ་དག་གི་ཆེད་དུ་རྒྱལ་སྤྱི་རང་བཞིན་གྱི་གདུང་སེམས་མཉམ་སྐྱེད་མཆོད་འབུལ་སྨོན་ལམ་གཞི་རྒྱ་ཆེན་པོ་ཞིག་འཚོགས་རྒྱུ་ཡིན་སྐོར་བསྒྲགས་འདུག

རྒྱ་གར་དབུས་ནང་སྲིད་བློན་ཆེན་གཞོན་པ་ཀེ་རན་རེ་ཇི་ཇུ་ (Kiren Rijiju) མཆོག་གིས་བརྙན་འཕྲིན་བརྒྱུད་ལམ་ (IBNLive) ཞེས་པའི་ཐོག་བརྗོད་དོན། “ད་ཐེངས་ཀྱི་གདུང་སེམས་མཉམ་སྐྱེད་མཆོད་འབུལ་སྨོན་ལམ་དེ་ནི་རྒྱལ་སྤྱིའི་ནང་བསྟན་མཐུན་ཚོགས་དང་། སྲིད་བློན་ནཱ་རེན་ཌ་མུ་དྷེ་མཆོག་གིས་རྒྱ་གར་གྱི་གནའ་རབས་རིག་གཞུང་བཟང་པོ་དག་ཉམས་པ་སླར་གསོ་དང་མི་ཉམས་རྒྱུན་འཛིན་དང་འབྲེལ་ཏེ་བལ་ཡུལ་གྱི་ས་འགུལ་ཁྲོད་རྐྱེན་འདས་སོང་བའི་བལ་པོ་དང་བོད་རིགས་ཚོར་གདུང་སེམས་མཉམ་སྐྱེད་ཞུ་ཆེད་གོ་སྒྲིག་བྱས་པ་ཞིག་ཡིན།”ཞེས་དང་། ཁོང་གིས་མུ་མཐུད་དུ། “ཁ་ཆེ་བ་ཚོས་མེ་ཁཱ་ (Mecca) དང་། ཡེ་ཤུ་བ་ཚོས་བྷེ་ཋ་ལེ་ཧམ་ (Bethlehem) གནས་གཙོ་བོར་བརྩི་བཞིན་ཡོད་པ་ལྟར། ནང་པ་ཚོས་རྒྱ་གར་ནི་སངས་རྒྱས་བཅོམ་ལྡན་འདས་ཀྱི་མཛད་པ་སྟོན་ཡུལ་གྱི་གནས་གཙོ་བོར་ངོས་འཛིན་བྱས་ཏེ་རྒྱུན་ཆད་མེད་པར་གནས་སྐོར་ལ་ཡོང་བཞིན་ཡོད་སྟབས། ལོ་ལྟར་རྒྱ་གར་གཞུང་གིས་སངས་རྒྱས་བཅོམ་ལྡན་འདས་ཀྱི་དུས་ཆེན་གསུམ་འཛོམས་ཀྱི་ཉིན་མོ་དེ་སྲུང་གཙི་བྱ་རྒྱུ་ཡིན།”ཞེས་བརྗོད་འདུག

རྒྱ་གར་དུས་བབ་དང་ཛི་བརྙན་འཕྲིན་བརྒྱུད་ལམ་ (Zee news) ཐོག་གནས་ཚུལ་སྤེལ་དོན་ལྟར་ན། ༡༩༥༦ ལོར་སྲིད་བློན་ནེ་རུའི་གཞུང་གིས་གནས་མཆོག་རྡོར་རྗེ་གདན་དུ་སངས་རྒྱས་བཅོམ་ལྡན་འདས་སྐུ་བལྟམས་ནས་ལོ་ངོ་ ༢༥༠༠ འཁོར་བ་དང་། ༢༠༠༧ ལོར་སྐུ་མྱ་ངན་ལས་འདས་ནས་ལོ་ངོ་ ༢༥༥༠ འཁོར་བའི་དུས་དྲན་གཉིས་ལས་ད་བར་གཞུང་ཕྱོགས་ཀྱིས་སྲུང་གཙི་ཞུས་མེད་ཀྱང་། འདི་ལོ་ནཱ་རེན་ཌ་མུ་དྷེས་སྣེ་ཁྲིད་པའི་རྒྱ་གར་གཞུང་གིས་ལོ་ལྟར་ཟླ་ ༥ ཚེས་ ༤ ཉིན་ཏེ་སངས་རྒྱས་བཅོམ་ལྡན་འདས་སྐུ་འཁྲུངས་པ་དང་སངས་རྒྱས་པ། མྱ་ངན་ལས་འདས་པ་བཅས་དུས་ཆེན་སུམ་འཛོམས་གྱི་ཉིན་མོ་སྲུང་གཙི་ཞུ་རྒྱུ་ཕྱིར་བསྒྲགས་བྱས་ཡོད་པ་མ་ཟད། ཐེངས་འདིའི་དུས་སྟོན་ཐོག་སྲིད་བློན་ནཱ་རེན་ཌ་མུ་དྷེ་མཆོག་དང་ཡུལ་སྐོར་སྤྲོ་འཆམ་དང་རིག་གཞུང་བློན་ཆེན་བློན་ཆེན་མཱ་ཧེ་ཤི་ཤར་མཱ་(Mahesh Sharma)། རྒྱ་གར་གྲོས་ཚོགས་འཐུས་མི་དང་ཕྱི་རྒྱལ་གྱི་གཞུང་ཚབ་པ། དེ་བཞིན་རིགས་གཅིག་མཁས་དབང་དང་འཛམ་གླིང་ས་ཕྱོགས་གང་ས་ནས་ཡོང་བའི་གྲྭ་བཙུན་སོགས་མཉམ་ཞུགས་བྱ་རྒྱུ་ཡིན་འདུག་ཅེས་སོགས་བཀོད་འདུག

དེ་རིང་ཀེ་རན་རེ་ཇི་ཇུ་ (Kiren Rijiju) མཆོག་གིས་རྒྱ་གར་དུས་བབ་ཐོག “སངས་རྒྱས་བཅོམ་ལྡན་འདས་ནི་རྒྱ་གར་གྱིས་འཛམ་གླིང་ལ་ཕུལ་བའི་ལེགས་སྐྱེས་གལ་ཆེ་ཤོས་ཤིག་ཡིན་སྟབས། རྒྱ་གར་གཞུང་གིས་སངས་རྒྱས་བཅོམ་ལྡན་འདས་ཀྱིས་ཡུལ་དེར་མཛད་པ་འཕྲིན་ལས་གྲངས་ལས་འདས་པ་བསྐྱངས་ཏེ། གདུལ་བྱ་མང་པོ་ཐར་བའི་ལམ་ལ་འཁྲིད་གནང་མཛད་པ་མ་ཟད། ད་ལྟའང་ཁོང་གིས་གསུངས་པའི་བཀའ་དང་བསྟན་བཅོས་ཀྱིས་རྗེས་འཇུག་པ་གྲངས་མང་ལ་ཕན་བདེ་སྐྲུན་བཞིན་ཡོད་སྟབས། ད་ལྟ་རྒྱ་གར་གཞུང་གིས་ཁོང་གི་མཛད་རྗེས་ལ་ངོས་འཛིན་ཞུ་དགོས་པ་ཆགས་ཡོད།”ཅེས་བརྗོད་འདུག

ཆབ་སྲིད་དབྱེ་ཞིབ་པ་ཁག་གཅིག་གིས། རྒྱ་གར་བྷེ་ཇེ་པུ་གཞུང་གིས་རྒྱ་གར་གྱི་རྩ་ཁྲིམས་ཟིན་བྲིས་གནང་མཁན་ཌོག་ཌར་ཨེམ་བྷེ་ཋ་ཁཱར་གྱི་འཁྲུངས་སྐར་སྲུང་གཙི་ཞུས་ཡོད་པ་མ་ཟད། ད་ཐེངས་ནང་པའི་དུས་ཆེན་སུམ་འཛོམས་དེ་སྲུང་གཙི་བྱ་རྒྱུའི་་ཐག་གཅོད་བྱས་པ་དེ་ནི། ཆབ་སྲིད་ཀྱི་དམིགས་ཡུལ་ཞིག་བཟུང་སྟེ་མ་འོངས་པར་མུ་མཐུད་བྷེ་ཇེ་པུ་ལ་འོས་འཐོབ་ཐབས་ཀྱི་ལམ་ཁ་བཟོ་བཞིན་ཡོད་སྐོར་བརྗོད་འདུག