མདང་དགོང་རྒྱ་ནག་ཧྥིན་ཏིང་ཧྲན་གྲོང་ཁྱེར་གྱི་རྒན་གསོ་ཁང་ཞིག་ལ་གློ་བུར་མེ་སྐྱོན་ཤོར་ཏེ་མི་ ༣༨ འདས་གྲོངས་སུ་ཕྱིན་ཡོད་འདུག
མདང་དགོང་རྒྱ་ནག་ཧེ་ནན་ཞིང་ཆེན་ཧྥིན་ཏིང་ཧྲན་གྲོང་ཁྱེར་གྱི་སྒེར་གཉེར་རྒན་གསོ་ཁང་ཞིག་ལ་གློ་བུར་མེ་སྐྱོན་ཤོར་ཏེ། མི་ ༣༨ གྲོངས་ཡོད་པ་དང་མི་ ༦ ལ་རྨས་སྐྱོན་ཚབས་ཆེན་ཕོག་ཡོད་པ་མ་ཟད། རྐྱེན་འདས་སུ་སོང་བའི་མི་དག་གི་ལུས་པོ་མང་ཆེ་བ་མེས་འཚིགས་ནས་སུ་ཡིན་མིན་ངོ་རྟགས་ཆོད་ཁག་པོ་ཆགས་ཡོད་འདུག
རྒྱ་ནག་ཤིན་ཧྭ་གསར་ཁང་གིས། “མདང་དགོང་ཧྥིན་ཏིང་ཧྲན་གྲོང་ཁྱེར་གྱི་སྒེར་གཉེར་རྒན་གསོ་ཁང་ཞིག་ལ་མེ་ སྐྱོན་ཤོར་ཏེ། རྒན་འཁོགས་མང་པོ་གྲོངས་ཡོད་པ་མ་ཟད། ཁོ་ཚོ་མེས་འཚིགས་ནས་སུ་ཡིན་མིན་ངོ་རྟགས་ཆོད་ཀྱི་མེད་སྟབས། རྒྱ་ནག་གཞུང་གིས་ཞིང་ཆེན་སྲིད་གཞུང་ལ་གནས་ཚུལ་དེ་ཐག་གཅོད་ཡག་པོ་བྱེད་དགོས་པའི་བཀའ་བཏང་ཡོད་པ་རེད།”ཅེས་དང་། མེ་སྐྱོན་ཁྲོད་ཚེ་སྲོག་ཐར་མཁན་ལོ་ན་ ༨༢ ལ་སོན་པ་ཀྲའོ་ཡུ་ལན་ (Zhao Yulan) གྱིས། “ང་དང་ཉལ་ཁང་གཅིག་པའི་སྡོད་རོགས་ ༡༡ ཡོད་པ་ལས་ང་དང་རོགས་པ་ཞིག་སྲོག་ཉེན་ལས་ཐར་ཐུབ་ཙམ་བྱུང་ཡོད་པ་མ་གཏོགས། གཞན་རྣམས་མེ་སྐྱོན་ཁྲོད་འདས་གྲོངས་ཕྱིན་སོང་།”ཅེས་བརྗོད་འདུག
༢༠༡༥ ལོའི་ཟླ་ ༢ ནང་ཀོང་ཏུང་ཞིང་ཆེན་ཧུ་ཏུང་གྲོང་ཁྱེར་གྱི་དགུ་ཚིགས་ཁྲོམ་རྭ་ཞིག་ཏུ་ལོ་དགུ་ཅན་གྱི་ཕྲུ་གུ་ཞིག་གིས་ཤོག་སྦག་སྤར་བའི་མེ་སྐྱོན་བྱུང་ནས་མི་ ༡༧ བསད་པ་དང་། ༢༠༡༣ ལོར་རྒྱ་ནག་བྱང་ཤར་གྱི་གྲོང་བརྡལ་ནང་རྟེན་གཞི་བྱས་པའི་བྱ་གསོ་ཁང་གི་དོ་དམ་པ་ཞིག་གིས་ལས་མི་ཚོ་གསང་སྤྱོད་ལ་འགྲོ་རུ་མ་བཅུག་པར་སྒོ་བརྒྱབ་ནས་ལས་ཀ་སྐུལ་ཡོད་སྟབས། བཟོ་གྲྭ་མེས་འཚིགས་ནས་ལས་མི་ ༡༡༩ འདས་གྲོངས་ཕྱིན་ཡོད། ༢༠༡༣ ལོར་ཧེ་ལོན་ཅང་གི་སྨན་ཁང་ཞིག་ནང་སྨན་ཁང་དོ་དམ་པ་དང་ནད་པ་བར་དངུལ་གྱི་རྩོད་ཉོག་བྱུང་སྟེ། ནད་པ་དེས་སྨན་ཁང་ལ་མེས་བརྒྱབ་ནས་ནད་པ་ ༡༡ བསད་ཡོད་པ་དང་། ༢༠༡༥ ལོའི་ཟླ་ ༢ ནང་ཧུ་ནན་གྱི་སྨན་ཁང་ཞིག་ནང་ལས་མི་དང་སྨན་ཁང་དོ་དམ་བར་ཁ་རྩོད་ཤོར་ཏེ། ལས་མི་དེས་མི་ ༣ བསད་པ་དང་། མི་ ༡༥ ལྷག་ལ་རྨས་སྐྱོན་བཏང་ཡོད།
མདང་དགོང་མེ་སྐྱོན་ཤོར་བའི་རྒྱ་ནག་ཧྥིན་ཏིང་ཧྲན་གྲོང་ཁྱེར་གྱི་རྒན་གསོ་ཁང་དེའི་ནང་ཁྱོན་རྒན་འཁོགས་ ༥༡ ཡོད་འདུག་པ་དང་། རྒྱ་ནག་གཞུང་གིས་རྟོག་ཞིབ་ཚོགས་ཆུང་མངགས་ཏེ་དོན་རྐྱེན་དེ་སུས་བྱས་ཡོད་མེད་བརྟག་དཔྱད་གཏོང་བཞིན་ཡོད་འདུག དེ་རིང་ཞི་ཅིན་ཕིན་གྱིས་རྒྱ་ནག་གཞུང་འབྲེལ་བརྒྱུད་ལམ་ཁག་ཐོག ད་ལྟ་རྒྱ་ནག་གཞུང་གི་ཉེན་སྐྱོབ་རུ་ཁག་གིས་རྨས་མ་དང་འདས་པོ་བ་ཚོའི་ནང་མིར་རོགས་རམ་བྱས་ཏེ། ཁོ་ཚོའི་སེམས་ཀྱི་རྨ་ཁ་གང་ཐུབ་གསོ་ཐབས་བྱེད་བཞིན་བརྗོད་འདུག
ཟླ་འདིའི་ཚེས་ ༢༦ ཉིན་རྒྱ་གར་དུས་བབ་དང་ཡཱ་ཧོ་གསར་ལམ་ཐོག་གནས་ཚུལ་སྤེལ་དོན་ལྟར་ན། རྒྱ་ནག་ནང་བཟོ་གྲྭ་དང་སྡོད་ཁང་། སློབ་གྲྭ་སོགས་ལ་མེ་སྐྱོན་ཤོར་གྱི་ཡོད་པ་ནི་རྒྱུན་གཏན་གྱི་གནས་ཚུལ་ཞིག་ཆགས་ཡོད་ཀྱང་། རྒྱ་ནག་གཞུང་གིས་དོན་རྐྱེན་དེ་དག་སེལ་ཐབས་མ་བྱས་པར་སྣང་མེད་བཏང་ནས་འཇོག་གི་ཡོད་པ་མ་ཟད། ཚོང་པ་དང་ཕྱུག་བདག་རྒྱུ་ཆེན་ཚོས་དངུལ་སྤྲད་ནས་ལྐོག་ཟ་རུལ་སུངས་ཅན་གྱི་མགོ་ཁྲིད་དང་ལས་བྱེད་བ་ཚོ་བསླུས་ནས་གནས་ཚུལ་འགེབ་སྲུང་བྱེད་བཞིན་ཡོད་སྟབས། ད་ལྟ་རྒྱ་ནག་ནང་མེ་སྐྱེན་དེ་འདྲ་རྒྱུན་ཆད་མེད་པར་བྱུང་བཞིན་ཡོད་སྐོར་བཀོད་འདུག
གསར་འགོད་པ། དོན་གྲུབ།
