དེ་རིང་སྔ་དྲོའི་ཆུ་ཚོད་ ༩།༠༠ ཐོག་དྷ་ས་དབུས་སྣེ་ལེན་ཁང་གི་ཚོགས་ཁང་དུ་བོད་མིའི་སྒྲིག་འཛུགས་ནང་སྲིད་ལས་ ཁུངས་ཀྱི་གོ་སྒྲིག་འོག རྒྱ་བལ་འབྲུག་གསུམ་གྱི་ས་གནས་མགོ་འཛིན་རྣམས་ཀྱི་འཛིན་སྐྱོང་ཚོགས་ཆེན་ཐེངས་ ༡༠ པ་དེ་མགོ་འཛུགས་གནང་ཡོད་པ་དང་། སྐུ་མགྲོན་གཙོ་བོར་སྲིད་ཚབ་དང་ནང་སྲིད་བཀའ་བློན་གཅིག་ལྕོགས་རྒྱ་རི་སྒྲོལ་མ་ མཆོག་དང་། དམིགས་བསལ་སྐུ་མགྲོན་དུ་ལྡི་ལི་དོན་གཅོད་བཀའ་ཟུར་བསྟན་པ་ཚེ་རིང་མཆོག དེ་བཞིན། ཤེས་རིག་དང་འཕྲོད་བསྟེན་བཀའ་བློན་གཙོས་བཀའ་དྲུང་དང་ལས་ཁུངས་ཁག་གི་དྲུང་ཆེ་རྣམ་པ། གཞན་ཚོགས་འདུར་ཕེབས་མཁན་གཞིས་ཆགས་ཁག་ ༤༦ གི་ས་གནས་མགོ་འཛིན་ ༤༤ བཅས་འདུ་འཛོམས་སོང་། མཛད་རིམ་གྱི་ཐོག་མར་སྐུ་མགྲོན་གཙོ་བོ་སྲིད་ཚབ་མཆོག་ནས་ཚོགས་འདུའི་དབུ་འབྱེད་ཀྱི་སྣང་གསལ་ཞལ་འབྱེད་གནང་བ་དང་འབྲེལ། བཀའ་བློན་རྣམ་གཉིས་ཀྱིས་༧གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་བསྒྲོན་རྗེས། བོད་རྒྱལ་ཁབ་དང་མི་རིགས་ཆེད་རང་སྲོག་ཤོར་བའི་རྒྱལ་གཅེས་བ་རྣམས་ལ་མྱ་ངན་ཞུས་སོང་།
དེ་ནས་ནང་སྲིད་བཀའ་བློན་རྒྱ་རི་སྒྲོལ་མ་མཆོག་གིས་གསུང་བཤད་གནང་དོན། བོད་ནང་གི་གནས་སྟངས་དེ་བཟང་ཕྱོགས་སུ་འགྲོ་ཡི་མེད་པར། མུ་མཐུད་ཛ་དྲག་འོག་གནས་ཡོད་སྟབས། བོད་མིའི་སྒྲིག་འཛུགས་ནང་ལ་ལས་འགན་འཁྱེར་མཁན་ང་རང་ཚོའི་ཐོག་ནས་ཀྱང་། ད་ལྟའི་དུས་སྐབས་འདིར་༧གོང་ས་མཆོག་གིས་དུས་དང་རྣམ་པ་ཀུན་ཏུ་རེ་བ་བཟང་ས་ནས་རྒྱོབས། གྲ་སྒྲིག་སྡུག་ས་ནས་བྱོས་ཞེས་བཀའ་གནང་བ་ལྟར། བོད་ནང་གི་བོད་མི་ཚོས་ཁ་ཞེ་གཉིས་མེད་ཀྱིས་བོད་ཀྱི་མི་རིགས་དང་རྒྱལ་ཁབ། རྩ་དོན་གྱི་ཆེད་དུ་བྱ་བ་འདི་འདྲ་ཞིག་སྤེལ་སྐབས་ང་རང་ཚོའི་ལག་ཆ་ཆེ་ཤོས་དེ་ག་རེ་རེད་ཟེར་ན། བོད་ཀྱི་བདེན་མཐའ་དེ་འཚེ་མེད་ཞི་བའི་ཐོག་ནས་གསལ་རྒྱུ་ཡིན་པ་དེར་འགྱུར་བ་མེད་པའི་ལྟ་གྲུབ་ཅིག་ཆགས་ཡོད་སྟབས། ད་ལྟ་ང་ཚོས་༧གོང་ས་མཆོག་གི་བཀའ་དྲིན་ལ་རྟེན་ནས་བྱུང་བའི་སྒྲིག་འཛུགས་འདིར་གཞུང་དང་སྒྲིག་འཛུགས་ག་རེ་འབོད་གྱི་ཡོད་ནའང་རེད། མ་འོངས་པར་གནས་སྟངས་ལ་དཔག་པའི་མིང་ག་རེ་བཏགས་ཀྱང་རུང་། ད་ལྟ་བོད་ནང་གི་བོད་མི་ཚོས་ངོས་བཞེས་གནང་གི་ཡོད་པ་བཞིན་བཙན་བྱོལ་དུ་ཡོད་མཁན་བོད་མི་ཚོས་ནུས་པ་ཆིག་སྒྲིལ་བྱས་ཏེ། སྒྲིག་འཛུགས་འདི་ཧྲ་ཏག་ཏག་ཅིག་ཆགས་ཐུབ་པ་བཟོ་རྒྱུ་ལས་འགན་གལ་ཆེ་ཤོས་དེ་ཆགས་ཡོད། ཅེས་སོགས་གསུངས་སོང་།
སྲིད་ཚབ་མཆོག་གིས་ས་གནས་མགོ་འཛིན་གྱི་ལས་འགན་དང་ལས་དོན་སྒྲུབ་ཕྱོགས་ཐོག་གསུངས་དོན། ས་གནས་མགོ་འཛིན་གྱི་ཚོགས་ཆེན་བརྒྱད་པའི་ཐོག་ལ་ངས་བློ་འཚབ་ཅིག་ཞུས་པ་ཡིན། སྤྱིར་ས་གནས་མགོ་འཛིན་ཡིན་རེད་ལ། སྡེ་ཚན་གང་ཞིག་གི་ལས་བྱེད་ཡིན་ནའང་རེད། མི་མ་འདྲ་བ་མང་པོ་ཡོད་པ་མ་ཟད། དཀའ་ལས་རྒྱག་མི་རྒྱག་ཀྱང་སྣ་ཚོགས་རེད། ནུས་པ་ཆེ་ཆུང་ཡང་ཅི་རིགས་རེད། ཡིན་ཡང་མཐའ་མ་ང་རང་ཚོའི་ལས་འགན་ག་རེ་རེད་ཟེར་ན། གཞུང་ཞབས་ཀྱི་ལས་ཀ་ཞིག་ཡིན་ན། གནས་སྤོ་འགྲོ་རྒྱུ་དེ་རང་བཞིན་ཞིག་ཆགས་ཀྱི་ཡོད་པ་མ་ཟད། དེ་བཞིན། ས་གནས་མི་མང་གི་ཐད་བསྐོས་གནང་བའི་ས་གནས་མགོ་འཛིན་ཞིག་ཡིན་ཡང་དུས་ཚོད་ངེས་ཅན་ཞིག་གི་བར་འགན་འཁུར་རྗེས་མི་གཞན་ཞིག་ལ་རྩིས་སྤྲོད་དགོས་པ་རེད། ང་ནང་སྲིད་ལས་ཁུངས་ལ་སླེབ་སྐབས་འཐུས་ཤོར་ཟེར་ནའང་རེད་སྐྱོན་གཅིག་ནི། ས་གནས་མགོ་འཛིན་འཕོ་འགྱུར་འགྲོ་སྐབས་ཀྱི་རྩིས་སྤྲོད་རྩིས་ལེན་སྐབས། ཅོག་ཙེ་དང་འཛིན་ཆས། ཡིག་སྣོད་སོགས་རྩིས་སྤྲོད་བྱེད་ཀྱི་ཡོད་ཀྱང་། ཡིག་སྣོད་ནང་གི་ནང་དོན་དང་མི་གཞན་དང་འབྲེལ་བ་བྱས་པའི་འབྲེལ་བ་དེ་དག་རྩིས་སྤྲོད་ཐུབ་ཀྱི་མི་འདུག་བསམ་པ་ཞིག་བྱུང་སོང་། ངས་ཚོགས་ཆེན་ཐེངས་བརྒྱད་པའི་ཐོག་རྩིས་སྤྲོད་རྩིས་ལེན་བྱེད་སྐབས་ང་ཚོས་ཟུར་དཔང་དུ་རྩིས་སྤྲོད་བྱེད་མཁན་དེ་ལས་གནས་རིམ་པ་མཐོ་བ་དང་རྒན་པ་ཞིག་གཏོང་ཐབས་བྱེད་རྒྱུ་ཡིན་ལབ་ཡོད་པ་མ་ཟད། རྩིས་ལེན་མཁན་ངོས་ནས་ཀྱང་འདོད་བློ་མ་ཁེངས་པར་སྐད་ཆ་ཡིན་ནའང་ཡག་པོ་ཞིག་འདྲི་དགོས་ཀྱི་འདུག་ཟེར་ནས་ཤུགས་ཆེན་པོ་བྱས་ནས་བརྗོད་པ་ལྟར། བར་ལམ་ཞིག་ནས་ཏོག་ཙམ་ཡག་ཏུ་ཕྱིན་པ་མིན་འགྲོ་བསམ་པ་ཞིག་འདུག དེ་བཞིན། དབུས་ཀྱི་ཐོག་ནས་ཡིན་ཡང་ལས་དོན་གང་འདྲ་ཞིག་བྱས་ཀྱང་། ད་ལྟ་བཀའ་བློན་གཙོས་པའི་འགན་འཁུར་མཁན་དག་གཏན་འཇགས་མིན་པར་བརྟེན། ང་ཚོ་མེད་པ་ཡིན་ཡང་ང་ཚོའི་སྐབས་ལ་འབྲེལ་བ་ཞིག་བཟོ་ཐུབ་ཡོད་ན་དེ་སྒྲིག་འཛུགས་དང་སྒྲིག་འཛུགས་བར་ལ་གནས་དགོས་ཀྱི་ཡོད་པ་གལ་ཆེན་པོ་ཞིག་ཡིན་པར་མཐོང་གི་ཡོད་སྟབས། ང་ཚོས་མི་དང་མིའི་བར་ལ་འབྲེལ་བ་ཉར་རྒྱུ་གལ་ཆེན་པོ་ཡིན་པར་ངོས་འཛིན་བྱེད་བཞིན་ཡོད་པ་ལྟར། ས་གནས་མགོ་འཛིན་རྣམ་པའི་ངོས་ནས་ཀྱང་དེ་བཞིན་ངོས་འཛིན་གནང་བའི་རེ་བ་ཡོད། ཅེས་སོགས་གསུངས་སོང་།
དམིགས་བསལ་སྐུ་མགྲོན་བཀའ་ཟུར་དང་ལྡི་ལི་དོན་གཅོད་བསྟན་པ་ཚེ་རིང་མཆོག་གིས་ས་གནས་མགོ་འཛིན་ལ་ཤེས་ཡོན་གཉིས་ཀ་ཚང་དགོས་རྒྱུ་གལ་ཆེན་ཡིན་སྐོར་གསུངས་དོན། ང་ཚོའི་ས་གནས་མགོ་འཛིན་ཚོ་ཁྲིམས་དང་ཤེས་ཡོན་རིག་གཞུང་དང་སྤྱི་ཚོགས་ཞབས་ཞུ། ཆབ་སྲིད་སོགས་ཀྱི་ཐོག་ལ་ཏོག་ཙམ་མཁྱེན་ཡོན་ཡོད་མཁན་དགོས་པ་རེད་བསམ་གྱི་འདུག དེ་རིང་ཁ་སང་གི་མི་མང་ཚོ་སྔོན་མ་དང་མི་འདྲ་བར་ཤེས་བྱ་ཡོན་ཏན་ལྡན་པ་ཆགས་ཡོད། ཤེས་བྱ་ཡོན་ཏན་ཡོད་པ་དེ་ཚོའི་གོ་སྟོན་གཙོ་སྐྱོང་བྱེད་དགོས་ན། གོ་སྟོན་གཙོ་སྦྱོང་བྱེད་མཁན་ཚོས་གནས་ཚུལ་མ་ཤེས་པ་དང་མ་རྟོགས་པ་ཡིན་ན། གོ་སྟོན་གཙོ་སྐྱོང་བྱ་རྒྱུར་ཏན་ཏན་སྐུ་ངལ་འཕྲད་རྒྱུ་ཡིན་སྟབས། ཚང་མས་གང་ཅིའི་ཐོག་ལ་ཐུགས་སྣང་གནང་སྟེ། མི་མང་གི་ཆེ་མཐོང་དང་གུས་བརྩི། དགའ་མོས་ཐོབ་ཐུབ་པ་ཞིག་བྱེད་དགོས་པ་རེད་བསམ་གྱི་འདུག དེ་འདྲ་མེད་པ་ཡིན་ན་མི་མང་གིས་ས་གནས་མགོ་འཛིན་གྱིས་གང་ཡང་ཤེས་ཀྱི་མ་རེད་ལ། གང་ཡང་འཇོན་གྱི་མ་རེད་ཟེར་ནས་འཕྱ་སྨོད་བྱ་ཡུལ་ཞིག་ཏུ་འགྱུར་བ་ཡིན་ན། ང་ཚོའི་ས་གནས་མགོ་འཛིན་ཚོ་གཞིས་མིའི་དབུ་ལ་བཞུགས་ནས་ལམ་སྟོན་བྱ་རྒྱུའི་སྐུ་ངལ་ཡོང་གི་རེད།
ང་ཚོའི་སྒྲིག་འཛུགས་འདི་དམངས་གཙོའི་སྒྲིག་འཛུགས་ཤིག་ཆགས་ཡོད་པ་མ་ཟད། འདིར་ཁྲིམས་དང་སྒྲིག་གཞི་ཡང་མང་པོ་ཞིག་ཡོད་སྟབས། རྣམ་པ་ཚོས་དེ་དག་མཁྱེན་ཐུབ་པ་བྱས་ཏེ་མང་ཚོགས་ཚོར་འགྲོ་ལུགས་འགྲོ་སྟངས་དང་རྒྱུ་མཚན་དང་ལྡན་པའི་ཐོག་ནས་འགྲེལ་བཤད་སྐྱོན་པ་ཡིན་ན་ཕན་ཐོགས་ཆེན་པོ་ཡོད་པ་རེད་བསམ་གྱི་འདུག དེ་མིན་རྒྱུ་མཚན་དང་འགྲོ་ལུགས་འགྲོ་སྟངས་གང་ཡང་བགྲང་རྒྱུ་མེད་པའི་ཐོག་ནས་ས་གནས་མགོ་འཛིན་ཡིན་ཟེར་ཏེ། དབང་ཤེད་ཀྱི་ཐོག་ནས་ཐག་གཅོད་བྱས་པ་དང་འགྲེལ་བཤད་བརྒྱབ་པ་སོགས་བྱས་ཚེ། མ་འོངས་པར་མང་ཚོགས་ཚོས་གུས་བརྩི་དང་ཉན་བཤད་བྱ་རྒྱུར་སྐུ་ངལ་འཕྲང་ངེས་ཡིན་སྟབས། ཚང་མས་དེ་ཚོའི་ཐོག་ལ་ཐུགས་སྣང་གནང་སྟེ་གོ་ཆོད་ཀྱི་ས་གནས་མགོ་འཛིན་ཞིག་ཆགས་ཐུབ་པར་འབད་བརྩོན་གནང་རོགས་ཞེས་འབོད་སྐུལ་ཞུ་བཞིན་ཡོད། ཅེས་སོགས་གསུངས་སོང་།
ཚོགས་འདུའི་ལས་རིམ་ནང་བཀོད་པ་ལྟར་ན། ཐེངས་འདིའི་ཉིན་གསུམ་རིང་གི་ཚོགས་འདུའི་ཐོག་གྲོས་གཞི་ ༧ ཡོད་པ་ནི། ༡། ཚོགས་ཆེན་སྔ་མའི་ཐོག་གྲོས་ཆོད་བཞག་ཡོད་པ་ཁག་ལག་བསྟར་ཇི་ཞུས་དང་། ༢། ས་གནས་མགོ་འཛིན་སོ་སོའི་ཁྱབ་ཁོངས་ས་གནས་ཀྱི་མི་འབོར་གྱི་ཐོ་བསྡུ་ལེན་གནང་སྟངས། ༣། ཕྱོགས་མཐའི་ས་གནས་མགོ་འཛིན་ལས་ཁུངས་ཁག་གི་རྒྱུན་གྲོན་རང་འཚོ། ས་གནས་ཀྱི་འཛུགས་སྐྲུན་ལས་འཆར་ཁག་གི་དགོས་དངུལ་ས་གནས་རང་ནས་ཐབས་ཤེས་གནང་ཕྱོགས། ༤། གཞིས་ཆག་ཁག་ཅིག་ཏུ་ས་ཞིང་སྟོང་པ་བེད་མེད་དུ་ལུས་པ་རྣམས་བོད་མི་ས་ཁང་ཐོབ་སྐལ་མེད་མཁན་ཚོར་བགོ་འགྲེམས་བྱེད་ཕྱོགས། ༥། བོད་མིའི་སྒྲིག་འཛུགས་ཀྱིས་ ༢༠༡༦ ལོའི་ཟླ་ ༡ ནང་རྡོར་རྗེ་གདན་དུ་དཔལ་དུས་ཀྱི་འཁོར་ལོའི་དབང་ཆེན་གོ་སྒྲིག་གནང་གཏན་འཁེལ་བར་ཉམ་ཐག་རྒས་གཅོང་ཚོར་ལམ་གྲོན་དང་སྡོད་གུར་གོ་སྒྲིག་ཞུ་ཕྱོགས། ༦། བོད་མི་མང་སྤྱི་འཐུས་ལྷན་ཚོགས་ཀྱི་མང་ཚོགས་རྩིས་ཁྲ་ཚོགས་ཆུང་གི་དྭོགས་འདྲི་ཁག་ལ་ལན་འདེབས་ཁ་གསལ་གནང་ཕྱོགས། ༧། གཞིས་ཆགས་ཁག་གི་ས་ཁང་བདག་འཛིན་དང་བེད་སྤྱོད་བྱེད་ཕྱོགས་ཀྱི་སྒྲིག་གཞི་བསྐྱར་བཅོས་ལག་བསྟར་ཞུ་ཕྱོགས་བཅས་ཡིན་འདུག
