རྒྱ་ནག་གཞུང་གིས་སྟག་རྒན་ལིན་ཅི་ཧྭ་ཡི་ནུ་བོ་ལིན་ཝན་ཁྲིན་ཕྱིར་རྒྱ་ནག་ལ་རྩིས་སྤྲོད་བྱེད་དགོས་པའི་ཐད་ཨ་རིའི་གཞུང་ལ་རེ་སྐུལ་ཞུ་བཞིན་ཡོད་པའི་ཐད་གསར་ལམ་ཁག་ཏུ་གླེང་སློང་སྣ་ཚོགས་འབྱུང་བཞིན་ཡོད།
ཉེ་བའི་ཟླ་ཤས་རིང་རྒྱ་ནག་གཞུང་གིས་ཨོ་བྷ་མའི་སྲིད་གཞུང་ལ་ཆབ་སྲིད་ཀྱི་རྒྱབ་ལྗངས་ཡོད་པའི་རྒྱ་ནག་གི་ཚོང་པའམ་རྒྱ་ནག་འཐབ་ཕྱོགས་གཅིག་གྱུར་གྱི་འགན་འཛིན་ཟུར་བ་ལིན་ཅི་ཧྭ་ཡི་ནུ་བོ་ལིན་ཝན་ཁྲིན་ཨ་རི་ནས་ཕྱིར་རྒྱ་ནག་ལ་རྩིས་སྤྲོད་བྱེད་དགོས་པའི་གནོན་ཤུགས་བཞིན་ཡོད་པ་དེར། ཁ་སང་ཨ་རིའི་ཕོ་བྲང་དཀར་པོས་རྒྱ་ནག་གཞུང་ལ་ལིན་ཝན་ཁྲིན་ལ་ནག་ཉེས་ཡོད་པའི་དཔང་རྟགས་གསལ་བོ་ཞིག་སྤྲོད་དགོས་ཚུལ་བརྗོད་དེ། ལིན་ཝན་ཁྲིན་རྒྱ་ནག་ཏུ་རྩིས་སྤྲོད་དགོས་པའི་རེ་སྐུལ་དེར་ངོས་ལེན་མེད་སྐོར་བརྗོད་འདུག
ཁ་སང་ཨ་རིའི་ནེའུ་ཡོག་དུས་བབ་སྟེང་། ཨ་རིའི་ཕོ་བྲང་དཀར་པོའི་མགྲིན་ཚབ་པ་ཇོ་ཞི་ཨིར་ནེ་སི་ཌི་ (Josh Earnet) ལགས་ཀྱིས། དམིགས་བསལ་གྱི་གྱོད་དོན་ཞིག་གི་སྟེང་ལ་ངས་ཞིབ་ཕྲའི་གནས་ཚུལ་བརྗོད་ཐུབ་ཀྱི་མེད། འོན་ཀྱང་། རྒྱ་ནག་ནག་གཞུང་གིས་ཡིད་ཆེས་ཁུངས་འཕེར་གྱི་དཔང་རྟགས་གསལ་བོ་ཞིག་སྤྲད་པ་ཡིན་ན་ཨ་རིའི་གཞུང་གིས་བརྟག་དཔྱད་གཏོང་གི་ཡིན་སྐོར་རྗོད་ཀྱི་ཡོད། དེ་མིན་ཨ་རི་ནི་རྒྱལ་ཁབ་གཞན་གྱི་རུལ་སུངས་པ་སྦེད་སྐུང་བྱེད་ས་ཞིག་རེད་ཟེར་བ་དེར་གཞི་རྩ་གང་ཡང་ཡོད་པ་མ་རེད། ཅེས་བརྗོད་འདུག ཁོང་གིས་མུ་མཐུད་དུ། ཨ་རྒྱ་གཉིས་ཀྱི་འབྲེལ་ལམ་གནས་སྟེང་སྐོར་ལ། ཤེས་ཡོན་གྱི་ཐོན་དངོས་བདག་དབང་སྐོར་ལ་རྒྱ་ནག་ཕྱོགས་ནས་མདང་གི་མེད་སྟབས། དཔེར་ན། རྒྱ་ནག་ལྷོ་བརྒྱུད་རྒྱ་མཚོའི་ངོས་ཀྱི་འགུལ་སྐྱོད་དེ་རྩོད་གཞིར་གྱུར་པ་རེད། ཡིན་ན་ཡང་། ཨ་རིའི་ཕྱོགས་ནས་རྒྱ་ནག་ལ་མཉམ་འབྲེལ་རྒྱུན་གནས་ཡོང་ཐུབ་པར་རེ་བ་བཅངས་ཡོད། ཅེས་སོགས་བརྗོད་འདུག
ལིན་ཝན་ཁྲིན་གྱི་གྱོད་དོན་ལ་ཆ་རྒྱུས་ཡོད་པའི་ཨ་རིའི་གཞུང་ཞབས་མི་སྣ་ཁག་ཅིག་གིས། “གལ་སྲིད་ལིན་ཝན་ཁྲིན་ཆབ་སྲིད་ཀྱི་སྐྱབས་བཅོལ་བྱ་རྒྱུར་ཐབས་ཤེས་བྱས་པ་ཡིན་ན། མ་འོངས་པར་ཁོ་ནི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ལོ་རྒྱུས་ལ་གནོད་སྐྱོན་ཚབས་ཆེན་བཟོས་པའི་བྲོས་བྱོལ་ངོ་ལོག་པ་དེ་ཆགས་སྲིད་པ་རེད།” ཅེས་བརྗོད་འདུག
ཁ་སང་ཨ་རིའི་སི་ལེ་ཊེ་ (Slate) དྲ་བའི་དཔྱད་བརྗོད་ཅིག་གི་ནང་། ལིན་ཝན་ཁྲིན་འཛིན་བཟུང་བྱེད་པ་དེ་ནི་རྒྱ་ནག་གི་རུལ་སུངས་ལ་རྒོལ་རྡུང་གཏོང་པའི་ལས་འགུལ་ཁྲོད་རྒྱུ་ནོར་དང་འབྲེལ་བ་ཡོད་པའི་མི་སུ་ཡིན་རུང་། དེར་སུས་ཀྱང་སྲུང་སྐྱོབ་བྱེད་ཐུབ་མེད་པ་ཞིག་མཚོན་ཀྱི་འདུག ཡིན་ན་ཡང་། རུལ་སུངས་རྒོལ་རྡུང་གི་ལས་འགུལ་ཁྲོད་དུ་རྒྱལ་ཁབ་གཞན་ལ་ཡང་བསམ་ཡུལ་འདས་པའི་གསང་བའི་ཁེ་ཕན་རག་གི་འདུག གང་ཡིན་ཞེ་ན། རྒྱ་ནག་གིས་གསང་བའི་དྲ་རྒྱར་ལྐོག་མྱུལ་བྱེད་པའི་ལས་འགུལ་དེར། ད་ལྟའི་ཨོ་བྷ་མའི་སྲིད་གཞུང་གིས་ཐབས་ཤེས་སྣ་ཚོགས་ཀྱིས་ཁ་གཏད་ལྕོག་བཞིན་པའི་སྐབས་འདིར་ལིན་ཝན་ཁྲིན་ནི་རིན་ཐང་དང་བེད་སྤྱོད་ཆེ་བའི་དམིགས་འབེན་ཞིག་ཆགས་ཞེས་བཀོད་འདུག
ཁ་སང་ཨ་རིའི་རྒྱ་ནག་གཞུང་ཚབ་ཁང་གི་ཧི་ཝེ་ཝོན་ (He Weiwen) ཡིས་རྒྱ་ནག་གུང་ཁྲན་ཏང་གི་གཞུང་འབྲེལ་དྲ་བ་གོ་ལའི་དུབ་བབ་གསར་ཁང་ལ། “ཨ་རིའི་གསར་འགྱུར་བརྒྱུད་ལམ་ཁག་ཏུ་ལིན་ཝན་ཁྲིན་ལ་གསང་བ་ཆེན་པོ་ཞིག་ཡོད་ཚུལ་གླེང་སློང་ཡོང་གི་ཡོད་པ་དེ་ནི་རྟོག་བཟོ་ཞིག་ལས་དངོས་ཡོད་གནས་ཚུལ་ཞིག་རྩ་བ་ནས་མ་རེད། ཁོ་ནི་ལིན་ཅི་ཧྭ་ཡི་ནུ་བོ་ཡིན་པ་ལས་གཞན་སུ་གང་ཡང་མ་རེད། ཨ་རིའི་སྲིད་འཛིན་ཨོ་བྷ་མ་དང་རྒྱ་ནག་གི་མཐོ་རིམ་དཔོན་རིགས་བར་འབྲེལ་བ་ག་རེ་བྱུང་ཡོད་མེད་ད་ལྟ་མི་གཅིག་གིས་ཀྱང་ཤེས་ཀྱི་ཡོད་པ་མ་རེད། སྲིད་འཛིན་ཨོ་བྷ་མས་ལིན་ཝན་ཁྲི་རྒྱ་ནག་གི་ཆབ་སྲིད་གྲོས་དོན་ཞིག་ལ་བརྗེ་བོ་རྒྱག་རྒྱུ་རེད་ཟེར་བ་ནི་ཁུངས་ལུང་མེད་པ་དང་། དོན་དངོས་མིན་པའི་ཚོད་དཔག་རྐྱང་རྐྱང་རེད།” ཅེས་སོགས་བརྗོད་འདུག
གསར་འགོད་པ། འཇིགས་མེད་རྒྱ་མཚོ།
དངོས་གནས་གསར་འགྱུར་ཡག་པོ་བཀོད་འདུག་བཀའ་དྲིན་ཆེ།