དམག་འཁྲུག་ཁྲོད་ཀྱི་སློབ་གསོའི་བྱ་བ།

མཉམ་སྦྲེལ་རྒྱལ་ཚོགས་ཀྱི་རྒྱལ་སྤྱིའི་བྱིས་པའི་ཛ་དྲག་མ་དངུལ་ཐེབས་རྩ་ཁང་གིས་དམག་འཁྲུག་རྐྱེན་པས་དཀྱིལ་ཤར་ཡུལ་གྲུའི་བྱིས་པ་ས་ཡ་ ༡༣ ཙམ་སློབ་གྲྭར་འགྲོ་ཐུབ་མེད་སྐོར་བརྗོད་འདུག

ཁ་སང་མཉམ་སྦྲེལ་རྒྱལ་ཚོགས་ཀྱི་རྒྱལ་སྤྱིའི་བྱིས་པའི་ཛ་དྲག་མ་དངུལ་ཐེབས་རྩ་ཁང་ (UNICEF) གིས་ ༼དམག་འཁྲུག་འོག་གི་ཤེས་ཡོན་སློབ་གསོ།༽ཞེས་པའི་སྙན་ཐོ་ཞིག་བཏོན་ཏེ། ཉེ་ལམ་དཀྱིལ་ཤར་ཡུལ་གྲུ་དང་ནུབ་ཨ་ཧྥི་རི་ཁའི་ནང་དམག་འཁྲུག་བྱུང་ནས་བྱིས་པ་ས་ཡ་ ༡༣ ལྷག་སློབ་གྲྭར་འགྲོ་ཐུབ་མེད་སྟབས། ད་ལྟ་ཁོ་ཚོའི་མ་འོངས་མདུན་ལམ་ལ་དཀའ་ངལ་ཤུགས་ཆེ་འཕྲད་བཞིན་ཡོད་པ་ཕྱི་བསྒྲགས་བྱས་འདུག

རོའུ་ཌར་གསར་ལམ་ཐོག་དཀྱིལ་ཤར་ཡུལ་གྲུ་དང་ནུབ་ཨ་ཧྥི་རི་ཀའི་མངའ་ཁུལ་མཉམ་སྦྲེལ་རྒྱལ་ཚོགས་ཀྱི་རྒྱལ་སྤྱིའི་བྱིས་པའི་ཛ་དྲག་མ་དངུལ་ཐེབས་རྩ་ཁང་གི་འགན་འཛིན་པི་ཌར་སཱ་ལཱ་མཱ་ (Peter Salama) ལགས་ཀྱིས། འདས་པའི་ལོ་ཤས་གོང་ནས་བཟུང་དཀྱིལ་ཤར་ཡུལ་གྲུ་དང་ནུབ་ཨ་ཧྥི་རི་ཀའི་རྒྱལ་ཁབ་ནང་དམག་འཁྲུག་གི་གོད་ཆག་ཤུགས་ཆེ་བྱུང་ཡོད་སྟབས། ད་ལྟ་སི་རེ་ཡ་དང་ཨི་རག ཡེ་མན་དང་ལི་བྷེ་ཡའི་མི་རབས་གསར་པ་ཚོར་ཤེས་ཡོན་སྦྱོང་རྒྱུའི་གོ་སྐབས་དམན་པར་བརྟེན། མཚོ་ཐོག་བརྒྱུད་གྷེར་སི་དང་ཨི་ཌ་ལི་སོགས་ནང་སྐྱབས་བཅོལ་དུ་ཡོང་སྟེ། ཤེས་ཡོན་གྱི་གོ་སྐབས་ཐབས་འཚོལ་བྱེད་བཞིན་ཡོད་ཀྱང་། ད་དུང་རྒྱལ་ཁབ་མང་པོ་ཞིག་གིས་ཁོ་ཚོར་གཞི་རྩའི་འགྲོ་བ་མིའི་ཐོབ་ཐང་གི་དགོས་མཁོ་བསྐྲུན་རྒྱུར་དང་ལེན་བྱེད་ཀྱི་མེད། ཅེས་བརྗོད་འདུག

སྙན་ཐོའི་ནང་། སི་རེ་ཡའི་ཁྱིམ་མཚེས་རྒྱལ་ཁབ་ལེ་བྷ་ཎན་དང་ཇོར་ཌན། ཀྲར་ཀི་དང་སུ་ཌན། པ་ལི་སི་ཐན་བཅས་ཀྱིས་དཀྱིལ་ཤར་ཡུལ་གྲུའི་སྐྱབས་བཅོལ་བ་མང་པོར་སྡོད་གནས་དང་འཚོ་བའི་མཐུན་རྐྱེན་སྦྱོར་སྤྲོད་བྱེད་བཞིན་ཡོད། ཨི་རག་དང་སི་རེ་ཡ། ཡེ་མན་དང་ལི་བྷེ་ཡ་བཅས་ཀྱི་ནང་ཨི་རག་དང་སི་རེ་ཡའི་མཉམ་འབྲེལ་དྲག་སྤྱོད་ཤོག་ཁག་གིས་ཡུལ་བདེ་ཞི་འཇགས་གཏོར་བཅོམ་དང་། སློབ་གྲྭ་དང་སློབ་གསོའི་བསྟི་གནས་ཁག་ལ་གཏོར་རྒོལ་བཏང་དང་གཏོང་བཞིན་ཡོད་སྟབས། ད་ལྟ་རྒྱལ་ཁབ་དེ་དག་གི་སློབ་གྲྭ་ ༩༠༠༠ ཙམ་སྒོ་རྒྱག་དགོས་ཐུག་ཡོད་པ་མ་ཟད། དགེ་རྒན་སྟོང་ཕྲག་མང་པོས་ལས་གནས་བསྐྱུར་བ་དང་ཕྲུ་གུར་ཤེས་ཡོན་སྦྱོང་རྒྱུའི་གོ་བསྐལ་མེད་པ་སོགས་ཆགས་ཏེ། རྒྱལ་ཁབ་གཞན་ནང་སྐྱབས་བཅོལ་འགྲོ་དགོས་བྱུང་ཡོད། ད་ལྟ་སྐྱབས་བཅོལ་སྤྲོད་མཁན་རྒྱལ་ཁབ་ཁག་གིས་མི་འབོར་ཆེ་བའི་སྐྱབས་བཅོལ་བའི་བུ་ཕྲུག་དག་ལ་སློབ་སྦྱོང་སྤྲོད་རྒྱུར་དཀའ་ངལ་ཤུགས་ཆེ་འཕྲད་བཞིན་ཡོད་པ་མ་ཟད། རྒྱལ་ཁབ་སོ་སོའི་སློབ་གསོའི་བྱ་གཞག་ལ་དཀའ་ངལ་ཤུགས་ཆེ་འཕྲད་བཞིན་ཡོད་སྟབས། ད་ཆ་སི་རེ་ཡ་དང་ཨི་རག ཡེ་མན་དང་ལི་བྷེ་ཡ། ནེ་ཇེ་རི་ཡ་བཅས་ཀྱི་བུ་ཕྲུག་ས་ཡ་ ༡༣ དང་འབུམ་༣༠ ལྷག་ལ་ཤེས་ཡོན་གྱི་གོ་སྐབས་མེད་པར་གྱུར་བཞིན་ཡོད། ཅེས་བཀོད་འདུག

ཉེ་ལམ་ལོ་ཤས་ནས་བཟུང་དཀྱིལ་ཤར་ཡུལ་གྲུ་ཁག་ནང་འཇིགས་སྐུལ་རིང་ལུགས་པས་གཏོར་རྒོལ་ཤུགས་ཆེ་བྱེད་བཞིན་ཡོད་སྟབས། ད་ཆ་རྒྱལ་ཁབ་དེ་དག་གི་ཡུལ་མི་མང་ཆེ་བ་དམག་ཆེན་གཉིས་པའི་སྐབས་ལྟར་རྒྱལ་ཁབ་གཞན་ནང་ཉེན་ཡོལ་འགྲོ་དགོས་བྱུང་བཞིན་ཡོད་པ་མ་ཟད། བུ་ཕྲུག་དག་ནང་མིའི་འཚོ་བ་ཆེད་སློབ་གྲྭ་ནས་འདོན་ཏེ་ལས་ཀ་བྱེད་དགོས་སྟབས། ཁོ་ཚོ་མང་པོ་ཞིག་འཇིགས་སྐུལ་རིང་ལུགས་པའི་ཤོག་ཁག་ནང་འཛུལ་བཞིན་ཡོད། ད་ལྟ་དཀྱིལ་ཤར་ཡུལ་གྲུའི་བྱིས་པ་དང་དགེ་རྒན་མང་པོ་ཞིག་འཇིགས་སྐུལ་རིང་ལུགས་པས་བསད་པ་དང་བཙན་ཁྲིད། སློབ་གྲྭ་སྒོ་བརྒྱབ་དགོས་ཐུག་པ་སོགས་ཀྱི་དཀའ་ངལ་མང་དག་ཅིག་འཕྲད་དེ། མི་རབས་གསར་པ་ཚོར་སྐྱི་གཡའ་བའི་སྡུག་བསྔལ་དང་མདུན་ལམ་མེད་པ་སོགས་མ་འོངས་རྒྱལ་ཁབ་འཛུགས་སྐྲུན་ཐོག་བསམ་བརྗོད་ལས་འདས་པའི་གྱོང་གུད་ཤུགས་ཆེ་འཕྲད་བཞིན་ཡོད།

དབྱིན་ཡུལ་གྱི་གྷར་ཌིན་གྱིས་དཀྱིལ་ཤར་ཡུལ་གྲུའི་དམག་འཁྲུག་གི་རྐྱེན་པས་མང་ཚོགས་ཀྱི་བདེ་འཇགས་དང་འཚོ་བར་དཀའ་ངལ་ཤུགས་ཆེ་འཕྲད་བཞིན་ཡོད་སྟབས། རྒྱལ་སྤྱིའི་རྒྱལ་ཁབ་ཁག་གིས་སྐྱབས་བཅོལ་ཡོང་མཁན་ཚོར་བཀག་འགོག་མ་བྱས་པར་སྡོད་གནས་དང་འཚོ་བའི་མཐུན་རྐྱེན་སྦྱར་ཏེ། ཁོ་ཚོའི་དཀའ་ངལ་སེལ་ཐབས་བྱ་རྒྱུ་ནི་འགྲོ་བ་མིའི་རིགས་ཀྱི་འགན་འཁྲི་ཆགས་ཡོད། ཅེས་བརྗོད་འདུག

གསར་འགོད་པ། དོན་གྲུབ།