རྒྱ་ནག་གི་དམག་སྤྱི་གཞོན་པ་ལའོ་ཡུན་ཟེར་བ་ཞིག་གིས་དམངས་གཙོའི་རང་དབང་འཐོབ་ན་གུང་ཁྲན་ཏང་མི་ཚོའི་རུས་ཐལ་ཡང་ལྷག་གི་མ་རེད་ཅེས་བརྗོད་པ་དེ་ཉེས་པ་གནམ་ལ་མི་ཤོང་བའི་སྐྱག་རྫུན་ཡིན་སྐོར་སྐྱོན་བརྗོད་བྱས་འདུག
ཁ་སང་ཤིན་ཐང་རིན་གྱིས་གནས་ཚུལ་སྤེལ་བ་ལྟར་ན། ཉེ་ཆར་རྒྱ་ནག་གི་གླག་རྒོད་དམག་ཚོགས་ (War Hawk) ཀྱི་དམག་སྤྱི་གཞོན་པ་ལའོ་ཡུན་ཟེར་བ་ཞིག་རོ་མ་ནི་ཡའི་དམར་ཤོག་སྲིད་འཛིན་ཟུར་བའི་དྲན་གསོའི་རྡོ་རིང་ལ་ལྟ་སྐོར་དུ་ཕྱིན་པ་དང་སྟབས་བསྟུན། གསར་འགོད་པས་ཁོ་བོར་བཅར་འདྲི་བྱེད་སྐབས། གལ་སྲིད་དམངས་གཙོའི་རང་དབང་ཟེར་བར་དབང་ཆ་འཐོབ་ན་སྡུག་མྱོང་མཁན་མང་ཚོགས་རེད། ཕྱི་ཚུལ་ནས་དམངས་གཙོའི་གསར་བརྗེ་ཞིག་ཡིན་ཡང་། དོན་དངོས་སུ་ཁྲག་དྲི་བྲོ་བའི་འཐབ་རྩོད་ཅིག་རེད། མཇུག་མཐར་གུང་ཁྲན་ཏང་མི་ཚོའི་རུས་ཐལ་སྒམ་ཆུང་ཡང་ཉར་རྒྱུ་མ་རེད། ཁོ་ཚོར་རང་དབང་ཡོད་ན་ཕྱོགས་གཞན་པའི་མི་རྣམས་ལ་རང་དབང་མེད་དགོས་པ་སྟོན་གྱི་ཡོད་པ་རེད་ཅེས་བརྗོད་ཡོད་སྟབས། རྒྱ་ནག་གི་སྤྱི་ཚོགས་བརྒྱུད་ལམ་ཁག་ནས་གལ་སྲིད་དངོས་གནས་དེ་འདྲ་ཞིག་ཡིན་ན། གུང་ཁྲན་ཏང་དང་དམངས་གཙོ་གཉིས་མཉམ་གནས་མི་ཐུབ་པའི་དགྲ་ནག་ཡིན་ནམ་ཞེས་གླེང་སློང་ཆེན་པོ་བྱེད་ཀྱི་ཡོད་འདུག
ཨ་རིར་གནས་སྡོད་བྱས་ཡོད་པའི་རྒྱ་ནག་སྤྱི་ཚོགས་ཉམས་ཞིབ་པ་ཀྲང་ཅན་ (Zhang Jian) གྱིས། ཁོས་དེ་ལྟར་བཤད་པའི་རྒྱུ་མཚན་གསལ་བོ་རེད། དམར་ཤོག་རིང་ལུགས་ཀྱི་རོ་མ་ནི་ཡའི་དབང་བསྒྱུར་མཇུག་བསྡུས་པ་དང་བསྟུན། མང་ཚོགས་ཀྱིས་སྔོན་ཆད་ཀྱི་ལག་དམར་རྣམས་ལ་འཁོན་ལན་སློག་སྟེ། ཆབ་སྲིད་ལྷན་ཁང་གི་ཚོགས་མི་ཚོའི་རུས་ཐལ་སྦེད་སའང་ད་སྐབས་དྲན་གསོའི་རྡོ་རིང་ཞིག་ཏུ་གྱུར་ཡོད་པ་ལའོ་ཡུན་གྱིས་མཐོང་ཡོད་སྟབས། རྒྱ་ནག་ལ་ཡང་གནད་དོན་འདི་དང་གཅིག་མཚུངས་རེད། སྤྱིར་བཏང་ཁོ་བོའི་སེམས་ཁྲལ་དེ་གུང་ཁྲན་ཏང་གི་སེམས་ཁྲལ་ཡང་ཡིན་པ་རེད། ཅེས་བརྗོད་འདུག
ཡང་ལའོ་ཡུན་གྱིས་བཅར་འདྲིའི་སྐབས། འབངས་མི་སེར་ད་དུང་གུང་ཁྲན་ཏང་ལ་བརྩེ་དུང་ཡོད་པ་དང་། གལ་སྲིད་གུང་ཁྲན་ཏང་དང་འབངས་མི་སེར་གཉིས་ཁ་བྲལ་བ་ཡིན་ན། འབངས་མི་སེར་གྱིས་གུང་ཁྲན་ཏང་རྩིས་མེད་གཏོང་རྒྱུ་རེད། ཅེས་ཀྱང་བརྗོད་པ་དེར་ཀྲང་ཅན་གྱིས། ལའོ་ཡུན་གྱིས་གུང་ཁྲན་ཏང་ནང་ཁུལ་གྱི་དབང་ཆ་འཐབ་རྩོད་གསལ་བོ་ཤེས་ཀྱི་ཡོད་པ་ཡིད་ཆེས་ཡོད། ཁོའི་ད་ལྟའི་གོ་གནས་ལ་བལྟས་ན་རྒྱ་ནག་དམག་ཁུལ་ནང་ལོགས་མཐོང་གི་འདུག ཕྱོགས་གཞན་པའི་ཁྲག་དྲི་བྲོ་བའི་འཐབ་རྩོད་ཀྱིས་རང་ཉིད་ཀྱི་ལས་རོགས་གཙང་མ་བཟོ་རྩིས་ཡིན་པས་མ་འོངས་པའི་རྒྱ་ནག་གསལ་བོ་མཐོང་ཐུབ་པ་མ་ཟད། རྒྱ་ནག་གི་དམག་མི་ཚོར་དེང་རབས་རང་བཞིན་གྱི་ཡར་རྒྱས་མེད་པ་གསལ་བོ་མངོན་འདུག ཅེས་བརྗོད་འདུག
ཡང་ཀྲང་ཅན་གྱིས། སྐད་ཆ་བཤད་སྟངས་འདི་ནི་རྒྱ་ནག་གོམས་འདྲིས་ཕྱིན་པའི་གཡོ་བྱུས་དེ་རེད། མི་ཚང་མའི་འཐུས་ཚབ་མི་གཅིག་གིས་བྱས་པ་དང་། མི་གཅིག་གི་བསམ་བློ་དེ་རྒྱ་ནག་མི་མང་ཡོངས་ཀྱི་བསམ་བློའི་ཚབ་མཚོན་བྱེད་ཀྱི་ཡོད་ལ། དེ་དག་ལ་དམིགས་ཡུལ་གཅིག་ཡོད་པ་དེ་རང་ཉིད་ཀྱི་སྐད་ཡིག་གཅིག་པུས་མང་ཚོགས་ཡོངས་ཀྱི་ཀླད་པ་འཁྲུད་རྒྱུ་དེ་རེད། ཅེས་བརྗོད་འདུག
སྐབས་དོན་དཔྱད་ཞིབ་པ་ཁྲིན་མིན་ཧེ་ (Chen Minghui) ཡིས། གུང་ཁྲན་ཏང་རྫུན་མ་དེ་འདྲའི་རླབས་ཆེན་ཞིག་དང་འོད་སྟོང་ལྡན་པ་དངོས་གནས་མང་ཚོགས་ཀྱིས་རྒྱབ་སྐྱོར་ཐོབ་ཡོད་ན་སྟངས་འཛིན་ཡོད་ཚད་སྒོ་འབྱེད་པ་དང་། མི་མང་ཡོངས་ལ་འོས་འཕེན་གྱི་ཐོབ་ཐང་སྤྲད། གུང་ཁྲན་ཏང་གི་བཀག་སྡོམ་ཡོད་ཚད་ཀློད་དང་། ཕལ་ཆེར་གུང་ཁྲན་ཏང་ལམ་སེང་འཐོར་ཞིག་ཏུ་འགྲོ་ངེས་རེད། ཅེས་དང་། ལའོ་ཡོན་གྱི་སྐད་ཆ་རྣམས་ཉེས་བ་གནམ་ལ་མི་ཤོང་བའི་སྐྱག་རྫུན་ཞིག་ཡིན་སྐོར་བརྗོད་འདུག
ལའོ་ཡུན་ནི་ ༡༩༥༠ ལོའི་ཟླ་ ༡༠ ཚེས་ ༢༠ ཉིན་སི་ཁྲོན་ཞིང་ཆེན་ཀང་ཡོན་གྲོང་ཁྱེར་ཚང་ཞི་རྫོང་དུ་སྐྱེས་ཤིང་། རྒྱ་ནག་བཅངས་གྲོལ་དམག་གི་རྒྱལ་སྤྱིའི་འབྲེལ་མཐུད་སློབ་ཆེན་ནས་མཐར་ཕྱིན་ཡོད་པ་དང་། ད་ལྟ་དམག་དོན་ཚན་རིག་སློབ་གླིང་གི་འཛམ་གླིང་དམག་དོན་ཉམས་ཞིབ་སྡེ་ཚན་གྱི་འགན་འཛིན་གཞོན་པ་སོགས་ཀྱི་ལས་འགན་འཁུར་བཞིན་ཡོད་འདུག
གསར་འགོད་པ། འཇིགས་མེད་རྒྱ་མཚོ།
