ཟླ་འདིའི་ཚེས་ ༡༩ ཉིན་རྒྱ་ནག་གི་སྲིད་འཛིན་ཞི་ཅིན་ཕིན་གྱིས་དབྱིན་ཡུལ་ནང་སྲིད་འཛིན་གྱི་རྒྱལ་དོན་སྐོར་སྐྱོད་ཐོག་མ་དེ་བྱ་རྒྱུ་ཡིན་འདུག
ཁ་སང་རྒྱ་ནག་ཕྱི་འབྲེལ་ལས་ཁུངས་ནས་གསར་འགོད་གསལ་བསྒྲགས་ཤིག་སྤེལ་ཏེ། དབྱིན་ཡུལ་གྱི་རྒྱལ་མོ་ཨ་ལེ་ཛ་བྷ་ཋི་ (Elizabeth II) མཆོག་གིས་སྲིད་འཛིན་ཞི་ཅིན་ཕིན་མགྲོན་འབོད་གནང་པ་ལྟར། ཟླ་འདིའི་ཚེས་ ༡༩ ནས་ ༢༣ བར་སྲིད་འཛིན་ཞི་ཅིན་ཕིན་གྱིས་དབྱིན་ཡུལ་དུ་རྒྱལ་དོན་སྐོར་སྐྱོད་བྱ་རྒྱུ་ཡིན་པ་དང་། དེ་ནི་འདས་པའི་ལོ་ངོ་ ༡༠ ནང་གི་རྒྱ་ནག་གི་ཆེས་མཐོའི་དབང་འཛིན་པས་དབྱིན་ཡུལ་ནང་རྒྱལ་དོན་སྐོར་སྐྱོད་བྱས་པ་ཐོག་མ་དེ་ཆགས་ཀྱི་ཡོད་པ་མ་ཟད། རྒྱ་ནག་གིས་བསྐྱར་དུ་ཡུ་རོབ་གླིང་ལ་ཕྱི་འབྲེལ་འཛུགས་པའི་གོམ་སྟབས་གལ་ཆེན་ཞིག་ཡིན་སྐོར་བརྗོད་འདུག
རྒྱ་ནག་ཕྱི་འབྲེལ་ལས་ཁུངས་ཀྱི་འགན་འཛིན་གཞོན་པ་ཝང་ཁྲའོ་ (Wang Chao) ཡིས། ཞི་ཅིན་ཕིན་གྱིས་ལོན་ཊོན་ (London) དང་མན་ཆེ་སི་ཊར་ (Manchester) སོགས་གྲོང་ཁྱེར་ཁག་ཅིག་ནང་སྐོར་སྐྱོད་བྱེད་སྐབས། དབྱིན་ཇིའི་རྒྱལ་མོས་སྣེ་ལེན་ཟབ་རྒྱས་གནང་སྟེ་དབྱིན་ཇིའི་རྒྱལ་བརྒྱུད་ཀྱི་རྟ་ཐོག་དམག་དཔུང་རྒྱས་ཤོམ་དང་གསོལ་སྟོན་བཤམ་རྒྱུ་ཡིན་པ་དང་། དེ་བཞིན་དབྱིན་ཇིའི་སྲིད་བློན་ཌ་ཝེ་ཌི་ཁེམ་རོན་ (David Cameron) དང་ཁ་གཏད་ཚོགས་པའི་གྲོས་ཚོགས་འཐུས་མིར་མཇལ་འཕྲད་བྱས་ཏེ། གྲོས་ཚོགས་ནང་གཏམ་བཤད་བྱ་རྒྱུ་དང་། ལོན་ཊོན་གྲོང་ཁྱེར་སྤྱི་ཁྱབ་པའི་གོ་སྒྲིག་འོག་ཞི་ཅིན་ཕིན་ལ་དགོང་མོའི་གསོལ་སྟོན་བཤམ་སྟེ་གཏམ་བཤད་བྱ་རྒྱུ་ཡིན་སྐོར་བརྗོད་འདུག
ཡང་ཁོང་གིས། ཐེངས་འདིའི་རྒྱལ་འབྲེལ་སྐོར་སྐྱོད་ནི་འདས་པའི་ལོ་ངོ་ ༡༠ རྗེས་སུ་ཕྱོགས་གཉིས་ཀྱི་འཐབ་ཇུས་དཔུང་རོགས་ཀྱི་འབྲེལ་ལམ་ཐེངས་གཉིས་པ་དེ་མགོ་བཙུགས་པ་ཡིན་ཞིང་། རྒྱལ་ཁབ་གཉིས་ཀྱི་འབྲེལ་ལམ་རྒྱུན་མཐུད་དང་མཐོར་འདེགས་གཏོང་བའི་དུས་ལ་བབས་ཡོད་པ་དང་། གསར་དུ་འཕེལ་རྒྱས་ཀྱི་གོ་སྐབས་ལ་གདོང་ལེན་བྱ་རྒྱུ་མ་ཟད། རྒྱལ་ཁབ་གཉིས་ཀྱིས་ཆེས་མཐོའི་གྲོས་མོལ་སྣ་ཚོགས་དང་འཕྲུལ་ལས་བཟོ་རིགས་གོང་སྤེལ། ཚོང་འབྲེལ་དང་མ་དངུལ། དཔལ་འབྱོར་དང་རིག་གཞུང་སོགས་ཀྱི་ཐོག་མཉམ་འབྲེལ་བྱ་རྒྱུ་ཡིན་སྐོར་བརྗོད་འདུག
དེ་རིང་བྷི་བྷི་སི་གསར་ཁང་གི་རྒྱ་ཡིག་སྡེ་ཚན་ནས་གནས་ཚུལ་སྤེལ་བའི་ནང་། ཐེངས་འདིར་ཞི་ཅིན་ཕིན་དབྱིན་ཡུལ་དུ་སྐོར་སྐྱོད་བྱ་འཆར་ཡོད་པ་དེ་དབྱིན་ཇིའི་སྲིད་གཞུང་གི་ཕྱོགས་ནས་བརྗོད་ན། དཔའ་འབྱོར་བསྡུ་རུབ་ཀྱི་གོ་སྐབས་ཤིག་ཏུ་ངོས་འཛིན་བྱེད་ཀྱི་ཡོད་སྟབས། དབྱིན་ཇིའི་སྲིད་གཞུང་དང་། མདོར་ན་ས་གནས་སྲིད་གཞུང་སོགས་ཀྱིས་ཞི་ཅིན་ཕིན་གྱི་སྐོར་སྐྱོད་ལ་མཐོང་ཆེན་བྱེད་བཞིན་སྐོར་དང་། ཞི་ཅིན་ཕིན་ནི་དབྱིན་ཡུལ་དུ་མགྲོན་འབོད་ཞུས་པའི་རྒྱ་ནག་གི་སྲིད་འཛིན་གསུམ་པ་དེ་ཆགས་ཡོད་པས། ཕྱོགས་གཉིས་ཀྱི་འབྲེལ་མཐུད་ལས་ཁུངས་བརྒྱུད་ནས་གསང་བའི་འབྲེལ་འདྲིས་ཟབ་མོ་བྱས་ཏེ། ཞི་ཅིན་ཕིན་གྱི་རྒྱལ་དོན་སྐོར་སྐྱོད་ཀྱི་བརྒྱུད་རིམ་ལ་རྒྱུས་ལོན་ཞིབ་ཕྲ་བྱེད་ཀྱི་ཡོད་སྐོར་བཀོད་འདུག
རྒྱ་ནག་ལ་མཚོན་ན་དབྱིན་ཡུལ་ནི་རྒྱ་ནག་གི་ཤེས་ཡོན་ལག་རྩལ་དང་ཚོང་རོགས་གལ་ཆེན་ཞིག་ཡིན་པར་ངོས་འཛིན་བྱེད་ཀྱི་ཡོད་སྟབས། ཧུའུ་ཅིན་ཐའོ་དབྱིན་ཡུལ་དུ་སྐོར་སྐྱོད་བྱས་པའི་ལོ་ངོ་ ༡༠ རྗེས་སུ་རྒྱ་ནག་གི་ཆེས་མཐོའི་དབང་འཛིན་པ་སླར་ཡང་དབྱིན་ཡུལ་དུ་བསྐྱོད་རྒྱུ་དེ་འོས་ཤིང་འཚམ་པ་ཞིག་ཡིན་སྐོར་བརྗོད་ཡོད་ཀྱང་། རྒྱལ་སྤྱིའི་ཆབ་སྲིད་དཔྱད་བརྗོད་པ་ཞིག་གིས། རྒྱ་ནག་ནང་འགྲོ་བ་མིའི་ཐོབ་ཐང་དང་རང་དབང་། ཏཱ་ལའི་བླ་མ་དང་ལྷན་དུ་བོད་རྒྱའི་དཀའ་རྙོད་ཐད་གྲོས་མོས། ཧོང་ཀོང་དམངས་གཙོའི་ལས་འགུལ། རྒྱ་ནག་གི་ལྷོ་ཤར་གླིང་ཕྲན་རྩོད་གླེང་། ཨེ་ཤ་ཡའི་ཁྱིམ་མཚེས་རྒྱལ་ཁབ་ཁག་གི་འགལ་བ། དེ་བཞིན་གཞུང་འབྲེལ་དྲ་ལམ་ཁག་གི་གསང་བ་རྐུ་ཁྱེར་སོགས་ཀྱི་མཚོན་པའི་རྩོད་རྙོག་རྣམས་འདུམ་འགྲིག་དགོས་པ་ལས། དབྱིན་ཇིའི་གཞུང་གིས་རྒྱལ་སྤྱིའི་རྩ་འཛིན་ཁག་སྣང་མེད་དུ་བསྐྱུར་ནས་རྒྱ་ནག་དང་ལྷན་དུ་ཁེ་ལས་ཁོ་ན་གཉེར་བར་སྐྱོན་བརྗོད་བྱས་འདུག
གསར་འགོད་པ། འཇིགས་མེད་རྒྱ་མཚོ།
