དེ་རིང་ཕྱི་དྲོར་དྷ་རམ་ས་ལའི་བོད་པའི་སྐྱེས་མ་ཁག་ཅིག་གིས་སྣེ་འཁྲིད་དེ་ཉེ་ལམ་རྒྱ་གར་བ་གསུམ་གྱིས་བོད་པའི་ཕོ་གསར་ཞིག་ལ་གྲིས་བརྒྱབ་སྟེ་བསད་པའི་འདས་པོ་ཁོང་གི་ཆེད་དུ་མར་མེ་ཁྲོམ་སྐོར་གནང་སོང་།
དེ་རིང་ཕྱི་དྲོ་ཆུ་ཚོད་ ༥།༣༠ ཐོག་མེག་གྷན་ཁྲོམ་ཆུང་དུ། དྷ་རམ་ས་ལ་ཁུལ་གྱི་སྐྱེས་མ་ཁག་ཅིག་གིས་སྣེ་འཁྲིད་དེ། རེས་གཟའ་པ་སངས་ཉིན་གྱི་དགོང་མོ་བོད་པའི་ཕོ་གསར་གཅིག་རྒྱ་གར་ཡུལ་མི་གསུམ་གྱིས་གྲིས་བརྒྱབ་ནས་བསད་པ་ཁོང་གི་ཆེད་དུ། དྷ་སའི་བོད་རིགས་མང་ཚོགས་ ༤༠༠ ལྷག་འདུ་འཛོམས་གནང་སྟེ་མར་མེ་ཁྲོམ་སྐོར་གནང་སོང་། སྐབས་དེར་མེག་གྷན་རླངས་འཁོར་འབབ་ཚིགས་ནས་མགོ་བཙུགས་ཏེ། བོད་པ་དང་རྒྱ་གར་བ་དེ་དག་འཁྲུག་འཛིང་ཤོར་ཡུལ་དེར་ཞི་བའི་གོམ་བགྲོད་གནང་རྗེས། ཕྱིར་མེག་གྷན་ཁྲོམ་གཞུང་བརྒྱུད་གཙུག་ལག་ཁང་བར་ཞི་བའི་རྔམ་སྟོན་ཁྲོམ་སྐོར་གནང་སོང་།
དེ་རིང་ཞོགས་པར་འདས་པོ་ཁོང་གི་ཕུང་བོ་མེར་བསྲེགས་གནང་རྗེས། གཞུང་འབྲེལ་མིན་པའི་ཚོགས་པ་ཁག་གི་མི་སྣ་དང་བཞུགས་སྒར་ཁུལ་གྱི་མང་ཚོགས་ཚོས་རྒྱུན་པར་བོད་པ་ཚོས་གུས་གུས་ཞུམ་ཞུམ་བྱེད་རྒྱུ་མང་དྲགས་པའི་མཇུག་འབྲས་ཡིན་སྐོར་དང་། ཁག་ཅིག་གིས་ད་རེབ་ཀྱི་གོ་སྐབས་འདི་དང་བསྟུན་ཏེ་བོད་པ་ཚོས་ཞི་བའི་རྔམ་སྟོན་ཁྲོམ་སྐོར་བྱེད་དགོས་སྐོར་ཤོད་མཁན་བཅས་བྱུང་ཡོད་པ་རེད།
དོ་ནུབ་མར་མེ་ཁྲོམ་སྐོར་གོ་སྒྲིག་བྱེད་མཁན་བུད་མེད་གཅིག་གིས་གསར་འགོད་པར་འདི་ལྟར་བརྗོད་བྱུང་། དེ་རིང་ང་ཚོ་བུད་མེད་བདུན་གྱིས་དང་བླངས་ཐོག་ཁྲིམས་ཁང་ལ་སོང་ཏེ། སང་ཉིན་ཞི་བའི་ཐོག་མེག་གྷན་ཁྲོམ་ལམ་ནས་སྨོན་ལམ་འདོན་རྒྱུར་ཆོག་མཆན་ཞུས་པ་ཡིན། དྷ་སའི་ཆེས་མཐོའི་ཉེན་རྟོག་པ་ (SP) ལ་སྙན་ཞུ་བྲིས་ནས་ཆོག་མཆན་ཞུས་པ་ཡིན། སྐབས་དེར་མི་མང་པོ་དྷ་ཤོད་ཁྲིམས་ཁང་ལ་ཕེབས་ཏེ་གནས་ཚུལ་ཞུས་པ་དང་། དེ་ནས་མི་མང་གིས་ས་རྟགས་བསྡུ་རུབ་བྱས་ནས་འབོད་སྐུལ་ཞུས་པ་རེད། ཆེས་མཐོའི་ཉེན་རྟོག་པ་དེ་དཔེ་ཡག་པོ་འདུག ང་ཚོར་རྒྱབ་སྐྱོར་ཡག་པོ་གནང་སོང་། དེ་ནས་བདེན་དཔང་བྱེད་མཁན་བུ་མོ་དེར་ཆུ་ཚོད་ ༢༤ རིང་སྲུང་སྐྱོབ་བྱ་རྒྱུ་ཡིན་ཞེས་གསུངས་སོང་། དེའི་རྗེས་ང་ཚོ་ས་གནས་ཆེས་མཐོའི་ལས་ཁུངས་ (SHO) ལ་ཕྱིན་ཏེ་བཀའ་འཁྲོལ་ཞུས་ཏེ་ཆོག་མཆན་ཐོབ་སོང་། དེར་བརྟེན། སང་ཉིན་བརྟན་བཞུགས་ཚར་པའི་རྗེས་ལ་མི་མང་མེག་གྷན་དུ་ཕེབས་ཏེ་སྨོན་ལམ་གདོན་རྒྱུ་དང་། ལག་ཏུ་བརྗོད་ཚིག་སྣ་ཚོགས་འཁོད་པའི་འཕྲད་དར་ཁ་ཤས་བསྣམས་ཏེ་སྨོན་ལམ་འདོན་དགོས་པ་རེད། དེ་ཚར་བ་དང་ང་ཚོས་མར་མེ་ཁྲོམ་སྐོར་ཞིག་བྱས་ནས་མཇུག་བསྒྲིལ་རྒྱུ་ཡིན། ཞེས་བརྗོད་སོང་།
གསར་འགོད་པ། འཇིགས་མེད་རྒྱ་མཚོ།
རྡ་ས་ཁུལ་གྱི་བོད་རིགས་མང་ཚོགས་ཀྱིས་ལས་འགུལ་ཤུགས་ཆེ་མ་སྤེལ་ན་དགའ། མི་གསོད་ལག་དམར་བ་རྒྱ་གར་ཉེན་རྟོག་པས་དེ་མ་ཐག་འཛིན་བཟུང་བྱས་འདུག ཁྲིམས་ལྟར་མི་བསད་པའི་ཉེས་ཆད་ལག་བསྟར་བྱེད་ཀྱིན་ཡོད་མེད་ལ་ངེས་པར་དུ་ལྟ་དགོས་པ་ལས། ཟས་བཅད་ངོ་རྒོལ་དང་། ཁྲོམ་སྐོར་སོགས་བྱས་ནས་མང་ཚོགས་རང་བཞིན་གྱིས་ལས་འགུལ་སྤེལ་བ་ནི་རྒྱ་གར་ས་གནས་ཡུལ་མི་ལ་ཕོག་ཐུག་འགྲོ་སྲིད་པས་ཚང་མས་ངེས་པར་དུ་གཟབ་དགོས། ས་གནས་ཡུལ་མི་དང་བོད་མིའི་བར་དུ་མཐུན་ལམ་ངེས་པར་ཡག་པོ་ཡོད་དགོས་པ་རེད། ལྷག་པར་དུ་འདི་འདྲའི་རིགས་ཀྱི་ལས་འགུལ་སྤེལ་ན་ནང་ཁུལ་ལ་གཏོར་རླག་བྱེད་མཁན་གྱི་མི་ངན་དེ་འདྲས་གོ་སྐབས་བཟུང་ནས་རྒྱ་གར་གྱི་ཡུལ་མི་དང་བོད་མིའི་བར་ལ་འཁྲུག་འཛིང་དང་། མི་མང་གཉིས་ཀྱི་བར་ལ་འགལ་རྐྱེན་བཟོ་མཁན་དེ་འདྲ་ཡང་འབྱུང་སྲིད་པས་ངེས་པར་དུ་ཚང་མས་ཡིད་གཟབ་གནང་དགོས་པ་རེད་སྙམ།
སྐྱེས་མ་བདུན་ལ་མངགས་བརྗོད་ཡོད།་་་ཡིན་ནའི་ང་ཚོས་ཐལ་ཆེ་བའི་གནས་ཚུལ་མ་ལྷག་པ་བྱེད་དགོས།་་་ཉེས་ཅན་པ་ཁྲིམས་ལ་སྦྱར་དགོས་ལ་ཁྲིམས་ཆད་ནན་པོ་གཏོང་དགོས་པ་ལས་ཡན་པོར་འཇོག་མི་རུང་།་་་འོན་ཀྱང་རྒྱ་གར་བ་དམངས་ལ་དོ་ཕོག་མི་ཡོང་བ་བྱེད་དགོས།་་དེ་བར་བསམ་སྦྱོར་ངན་པས་དཀྲོག་རྐྱེན་གྱིས་དོན་རྐྱེན་གཞན་ལྷག་མི་སྲིད་པ་མིན་པས་ཚང་མས་ཐུགས་ཟབ་གནང་དགོས།
ཡུལ་མི་ལ་མ་གནོད་པར་གནང་གལ་ཆེའོ།
བུ་མེད་བདུན་པོ་རྗེས་སུ་ཡིན་རིང་ཡོད།