དྷ་རམ་ས་ལའི་ཁེ་འཁོར་གྱི་རྒྱ་གར་དབུལ་གྲོང་དག་གི་བྱིས་པ་ཚོར་སློབ་སྦོང་དང་། ནད་པ་ཚོར་སྨན་བཅོས་བཅས་ཀྱི་རོགས་སྐྱོར་གནང་བཞིན་པའི་བོད་པའི་གཏོང་ལེན་བདེ་རྩ་ཚོགས་པའི་གསར་འགོད་ལྷན་ཚོགས་བསྡུས།
དེ་རིང་ཉིན་གུང་ཆུ་ཚོད་ ༡༢།༣༠ སྟེང་དྷ་ཤོད་དྷོ་ལ་དྷར་གསོལ་མགྲོན་ཁང་གི་ཚོགས་ཁང་དུ། གཏོང་ལེན་བདེ་རྩ་ཚོགས་པས་གསར་འགོད་གསལ་བསྒྲགས་བསྐྱངས་ཏེ། གཏོང་ལེན་བདེ་རྩ་ཚོགས་པའི་འགན་འཛིན་གྲྭ་བློ་བཟང་འཇམ་དབྱངས་ལགས་ཀྱིས། འདས་པའི་ལོ་ངོ་ ༡༡ རིང་གཏོང་ལེན་བདེ་རྩ་ཚོགས་པས་རྒྱ་གར་གྱི་དབུལ་གྲོང་ཁག་ནང་ལས་ཀ་མང་པོ་བྱས་ཡོད་པ་དང་། དམིགས་བསལ་ཤེས་ཡོན་ཐོག་ལ་གྲུབ་འབྲས་ཡག་པོ་ཐོན་ཡོད་པ་དང་། ཕྲུ་གུ་མང་པོ་སློབ་གྲྭར་འགྲོ་བའི་གོ་སྐབས་བསྐྲུན་པ། གད་སྙིགས་དང་སྤྱི་ཚོགས་ཁྲོད་སློང་མོ་བྱས་ཏེ་སྔོན་ཆད་སློབ་གྲྭར་འགྲོ་བའི་གོ་སྐབས་རག་མྱོང་མེད་ཀྱང་། ད་ལྟ་རྒྱ་གར་མཐོ་སློབ་ལ་འགྲོ་ཐུབ་པ་དེ་གཏོང་ལེན་བདེ་རྩ་ཚོགས་པའི་ཤེས་ཡོན་སྡེ་ཚན་གྱི་གྲུབ་འབྲས་ཡིན་སྐོར་སོགས་ངོ་སྤྲོད་གནང་སོང་།
གྲྭ་བློ་བཟང་འཇམ་དབྱངས་ལགས་ཀྱིས་བརྗོད་དོན། གཏོང་ལེན་ཚོགས་པས་ཉམ་ཐག་དབུལ་བོ་ཚོར་རོགས་སྐྱོར་བྱེད་པའི་རྒྱུ་མཚན་གཙོ་བོ་༧གོང་ས་མཆོག་གི་བཀའ་དགོངས་ལྟར་མི་གཞན་ལ་རོགས་སྐོར་དང་། ལྷག་དོན་ཉམ་ཐག་ལ་ཕན་ཐོགས་པ་དེ་ང་རང་གྲྭ་བ་ཞིག་ཡིན་པའི་ཆ་ནས་འོས་འགན་རེད་ལ། ༧རྒྱལ་བ་རིན་པོ་ཆེ་མཆོག་གི་ཐུགས་རྒྱས་པ་དང་སྐུ་ཚེ་བརྟན་པའི་ལས་ཀ་ཆེད་དུ་ཡིན་པ་ཞིག་ལ་ངོས་འཛིན་བྱེད་ཀྱི་ཡོད། རྒྱ་གར་དེ་ལོ་རྒྱུས་ཐོག་དང་ལྷག་པར་དུ་འདས་པའི་ལོ་ ༥༦ རིང་ང་ཚོར་བཀའ་དྲིན་ཆེན་པོ་དང་ང་ཚོས་ཀྱང་ཁ་ཞེ་གཉིས་མེད་ཀྱིས་ཐུགས་རྗེ་ཆེ་ཞེས་པའི་ཁེ་ཕན་ཡོད་པར་གཞི་བཞག་ནས་གཏོང་ལེན་བདེ་རྩ་ཚོགས་པའི་ལས་ཀ་བྱེད་ཀྱི་ཡོད།
འདི་གའི་ལས་ཀ་ཚགས་ཚུད་ཡོང་བ་དེ་༧གོང་ས་མཆོག་གི་ཐུགས་རྗེ་བཀའ་དྲིན་དང་ཏཱ་ལའི་བླ་མའི་དགེ་རྩ་ཚོགས་པས་རོགས་སྐྱོར་བྱས་སྟབས། གཏོང་ལེན་གྱིས་མི་མང་འདི་འདྲར་རོགས་པ་བྱེད་ཐུབ་པ་དང་། ལྷག་པར་མི་མང་སྟོང་ཕྲག་ནས་སྟོང་ཕྲག་ལ་ཉིན་ལྟར་འཕྲོད་བསྟེན་ལྟ་སྐྱོང་དང་། གསོན་པའི་རེ་བ་བརླག་སྟེ་ཤི་བར་སྒུག་ཡོད་མཁན་ནད་པ་བརྒྱ་ཕྲག་ལྷག་ལ་སྨན་བཅོས་ཐོབ་སྟེ་ད་ལྟ་ལུས་པོ་བདེ་ཐང་ཆགས་ཡོད་པ་རེད།
སྤྱིར་བཏང་གསར་འགོད་གསལ་བསྒྲགས་བྱས་པ་དེ་གཏོང་ལེན་དྲིལ་བསྒྲགས་ཀྱི་རྒྱུ་མཚན་མེད་ཀྱང་། ཏཱ་ལའི་བླ་མའི་དགེ་རྩ་ཚོགས་པ་དང་གཏོང་ལེན་བདེ་རྩ་ཚོགས་པ་འདི་ལྟ་བུའི་བོད་པའི་ཚོགས་པ་ཞིག་གིས་རྒྱ་གར་སྤྱི་ཚོགས་ནང་ཁ་ཡོད་ལག་ཡོད་ཀྱིས་ལས་རིམ་འདི་འདྲ་སྤེལ་བཞིན་ཡོད་པ་དེ་མི་ཚང་མས་མཁྱེན་རྟོགས་དགོས་པ་དེའང་གལ་ཆེན་པོར་མཐོང་གི་ཡོད།
ང་ཚོས་འདིར་ཡོད་པའི་ཕྲུ་གུ་དག་དང་ལྷག་པར་དུ་ཁྱིམ་ཚང་ནང་ཡོད་པའི་ཕྲུ་གུ་དེ་དག་སློབ་གྲྭ་འགྲོ་ཐུབ་ཙམ་དང་བརྒྱ་ཆ་ལེན་ཐུབ་པ་ཙམ་མ་ཡིན་པར་གཙོ་བོ་མི་བཟང་པོ་དང་ཀུན་སྤྱོད་ཡག་པོ་ཡོང་རྒྱུར་འབད་བརྩོན་ཆེན་པོ་བྱེད་ཀྱི་ཡོད། གལ་སྲིད་ང་ཚོས་མི་ཡག་པོ་ཞིག་སྐྱེད་སྲིང་ཐུབ་པ་ཡིན་ན་རྗེས་སུ་ཕྲུ་གུ་ཁོ་རང་ཚོར་གོ་སྐབས་བྱུང་ན་གཞན་དང་སྤྱི་ཚོགས་ལ་ཕན་ཐོགས་པ་ཞིག་ཆགས་ཀྱི་ཡོད་སྟབས། སློབ་གསོ་བསྒྲུབ་པ་དང་སློབ་གྲྭར་འགྲོ་བ་ཙམ་མིན་པར་ཕྲུ་གུ་ཚོའི་ཕྱོགས་གང་ཐད་ནས་ཡར་རྒྱས་གཏོང་གི་ཡོད། དཔེར་ན། ཕྱི་ལོ་ ༢༠༠༣ དང་ ༢༠༠༤ ལོའི་བར་ང་ཚོས་ཡོང་གི་མ་རེད། ང་ཚོས་འཇོན་གྱི་མ་རེད། གནས་སྟངས་འདི་ང་ཚོའི་ལས་དབང་རེད་ཅེས་ཤོད་ནས་སྡོད་མཁན་དེ་ཚོ་ཡང་། ད་ལྟ་འདི་འདྲའི་གཟེངས་སུ་མཐོན་ཏེ་སྤྱི་ཚོགས་ནང་མི་གཞན་པ་ལྟར་འདྲ་འདྲ་འཐོན་ཐུབ་པ་དེ་གཏོང་ལེན་ཚོགས་པའི་བྱས་རྗེས་དང་གྲུབ་འབྲས་ཤིག་ལ་ངོས་འཛིན་བྱེད་ཀྱི་ཡོད། ཅེས་གསུང་སོང་།
ཁོང་གིས་མུ་མཐུད་དུ། ང་ཚོའི་རེ་བར་གལ་ཏེ་ང་ཚོས་སློབ་མའི་སྡོད་ཁང་རྒྱག་ཐུབ་པ་བྱུང་ན། དབུལ་གྲོང་གི་ཕྲུ་གུ་མང་པོར་སློབ་སྦྱོང་གི་གོ་སྐབས་སྤྲོད་ཐུབ་ཀྱི་ཡོད་པ་རེད། ཏཱ་ལའི་བླ་མའི་དགེ་རྩ་ཚོགས་པ་གཙོས་བའི་གཏོང་ལེན་བདེ་རྩ་ཚོགས་པའི་ཡན་ལག་ཁག་དང་། ང་ཚོ་བཙན་བྱོལ་བོད་མིའི་སྤྱི་ཚོགས་ཁྲོད་ཀྱི་རོགས་ཚོགས་ཁག་བཅས་ཀྱི་རྒྱབ་སྐྱོར་ལ་བརྟེན་ནས། ལོ་རྗེས་མར་ང་ཚོས་ཧི་མ་ཅལ་མངའ་ཁུལ་གྱི་ཕྲུ་གུ་ ༡༣༠ ལྷག་ལ་སློབ་སྦྱོང་གི་གོ་སྐབས་སྤྲོད་རྒྱུའི་འཆར་གཞི་ཡོད།
ང་ཚོ་གཏོང་ལེན་བདེ་རྩ་ཚོགས་པར་ཕ་མ་ཡོད་པའི་ཕྲུ་གུ་ ༡༠༠ དང་། ཕ་མ་དང་བདག་པོ་མེད་པའི་ཕྲུ་གུ་ ༡༥༠ ལྷག་ཡོད་པ་ཚོའི་ཉིན་རེའི་བཞེས་ལག་དང་སློབ་སྦྱོང་སོགས་ཀྱི་འགྲོ་གྲོན་བརྒྱ་ཆ་ ༥༠ ཏཱ་ལའི་བླ་མའི་དགེ་རྩ་ཚོགས་པས་གནང་གི་ཡོད་པ་དང་། འདི་ལ་རྒྱ་གར་གཞུང་གིས་དམིགས་བསལ་རོགས་སྐྱོར་གང་ཡང་གནང་གི་མེད་སྟབས། དེ་རིང་འདིར་རྒྱ་གར་གསར་འགོད་པ་མང་པོ་ཕེབས་ཡོད་པ་ལྟར། གནས་ཚུལ་འདི་རྒྱ་གར་སྤྱི་གཞུང་གཉིས་ཀྱིས་མཁྱེན་རྟོགས་ཡོང་དགོས་པ་ཧ་ཅང་གལ་ཆེན་པོ་རེད་བསམ་གྱི་འདུག ཏཱ་ལའི་བླ་མའི་དགེ་རྩ་ཚོགས་པའི་ངོས་ནས་ཁྱིམ་ཚང་དང་དབུལ་གྲོང་། འཕྲོད་བསྟེན་བཅས་སྡེ་ཚན་གསུམ་གྱི་ཐོག་སྦྱིན་བདག་གནང་གི་ཡོད་པ་རེད། ཅེས་བརྗོད་སོང་།
སྐབས་དེར་གཏོང་ལེན་སློབ་གྲྭའི་སློབ་མ་ཞིག་གིས། ང་གཏོང་ལེན་སློབ་གྲྭར་མ་བསླེབས་སྔོན་ལ་གད་སྙིགས་འཐུ་བ་དང་། སྐབས་རེར་སློང་མོ་རྒྱག་གི་ཡོད། ང་འཚར་ལོངས་བྱུང་སའི་དབུལ་གྲོང་གི་འཚོ་གནས་ཧ་ཅང་སྐྱོ་བོ་ཡོད་སྟབས། ངས་གནས་སྟངས་དེ་གསལ་བོར་ཞུ་ཐུབ་པ་མི་འདུག ང་གཏོང་ལེན་སློབ་གྲྭར་འཛུལ་རྗེས་ངའི་མི་ཚེ་ལ་འགྱུར་བ་ཐེབས་སོང་། གཏོང་ལེན་སློབ་གྲྭའི་ཁོར་ཡུག་དང་ང་རང་འཚར་ལོངས་བྱུང་སའི་དབུལ་གྲོང་གི་ཁོར་ཡུག་གཉིས་རྦད་དེ་འདྲ་གི་མི་འདུག ང་གཏོང་ལེན་སློབ་གྲྭའི་ཁོར་ཡུག་བཟང་བོ་འདི་ནས་འཚར་ལོངས་བྱུང་ཡོང་བའི་སྐབས་ལ། ངའི་གཤིས་སྤྱོད་ཐད་ནས་ཡག་པོ་ཆགས་ཀྱི་ཡོད་པ་མ་ཟད། ངའི་མ་འོངས་མི་ཚེ་མདུན་ལམ་ཡང་ཡག་པོ་ཡོང་བའི་ཡིད་ཆེས་ཡོད། ཅེས་བརྗོད་སོང་།
གསར་འགོད་པས་རྒྱུས་ལོན་བྱུང་བ་ལྟར་ན། གཏོང་ལེན་བདེ་རྩ་ཚོགས་པའི་སློབ་སྐྱོང་འོག་ད་བར་རྒྱ་གར་གྱི་སྨན་སློབ་དང་བཟོ་སློབ་སོགས་མཐོ་རིམ་སློབ་ཁག་ནས་ཕྲུ་གུ་ ༧ ཙམ་ཐོན་ཡོད་པ་དང་། ལོ་རྗེས་མར་ཕྲུ་གུ་དེ་ལས་མང་བ་འཐོན་ཐུབ་པའི་འཆར་གཞི་ཡོད་འདུག
གསར་འགོད་པ། པདྨ་རྒྱལ།
གསར་འགྱུར་འདི་རིགས་གང་མང་སྟོན་དགོས་གལ། གསར་འགོད་པ་རྣམས་ཀྱི་ཆོས་ཀྱི་ངོ་བོ་ཨོ་མ་ནི་པད་མའི་ཧུ་གཅིག་པོ་མིན་པ་བསླབས་དགོས། གིང་ས་མཆོག་གི་སྐུ་སྒིར་དང་གཏོང་ལེན་ལ་ཐུགཟ་རྗེ་ཆེ་དང་བཀའ་འདྲིན་ཆེ་ཞུ།
ཕན་པ་སུ་ལ་གྲུབ་ཀྱང་ཁྱད་མེད་རེད། བོད་པ་ཡིན་རུང་རྒྱ་གར་བ་ཡིན་རུང་དོན་དངོས་ལ་འགྲོ་བ་མི་ཡི་མི་ལ་ཕན་པ་གྲུབ་པ་རེད། དགའ་བསུ་ཞུ།།
རང་ཡུལ་མུན་པས་འཐིབ། གཞན་ཡུལ་འོད་ཀྱིས་རྒྱང་།་ཞེས་པ་དེ་འདྲ་པོ་རེད།
བཀའ་དྲིན་ཆེ། གྲྭ་བློ་བཟང་འཇམ་དབྱངས་ལགས།
ཐོག་མ་གཏོང་ལེན་ཚོགས་པའི་ཚོགས་གཙོ་མཆོག་ལ་འཚམས་འདྲི་ཞུ་རྒྱུ་དང་རླབས་ཆིན་གྱི་ལས་ཀ་དེ་འདྲ་དང་པོ་སེམས་ལ་དྲན་པ་ཁྱེད་ཀྱི་རྗེས་སུ་ཡི་རིངས་ཡོད་ལགས,,,,,,
རླབས་ཆེན་རེད་མི་རིགས་ཀྱི་དཔའ་བོ་རེད་རྗེས་སུ་ཡི་རིངས་དང་བཀྲིན་ཆེ་ཞུ་འདོད་བྱུང་།
ཆོས་ཀྱི་སྙིང་པོ་དེ་རང་རེད་ལ། སྙིང་དབུས་ནས་བཀའ་དྲིན་ཆེ་ཞུ།