དེ་རིང་སྔ་དྲོར་སྙིང་སྟོབས་གླིང་དུ་ཡུལ་མི་དང་མཐུན་སྒྲིལ་གོང་འཕེལ་གྱི་ལས་འགུལ་ཞིག་སྤེལ་ཏེ་རྒྱ་གར་གྱི་ཡུལ་མི་ཉམ་ཐག་ཚོར་གྱོན་གོས་དང་རས་གདན་བཅས་གནང་སོང་།
དེ་རིང་སྔ་དྲོའི་ཆུ་ཚོད་ ༡༡ ཙམ་ལ། ནོར་གླིང་དུ་རྟེན་གཞི་བྱས་པའི་སྙིང་སྟོབས་གླིང་གིས་ཡུལ་མི་དང་མཐུན་སྒྲིལ་གོང་འཕེལ་གྱི་ལས་འགུལ་ཞིག་སྤེལ་སོང་བ་དང་། སྐབས་དེར་སྐུ་མགྲོན་གཙོ་བོ་སྙིང་སྟོབས་གླིང་གི་སྦྱིན་བདག་རྙིང་གྲས་རྒྱ་གར་གྱི་རོ་ཊ་རའི་སྐྱིད་སྡུག་ཚོགས་(Rotary Club) པའི་ཚོགས་གཙོ་སྐུ་ཞབས་ཝི་སི་པཱར་མཱར་(V.S Parmar)ལགས དང་། ཧིན་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་ཨཱ་ཇི་མན་ཀོ་ཊི་ཡ་(Ajay Mankotia)ལགས། བོད་ཀྱི་གཏོང་ལེན་ཚོགས་པའི་སྐུ་ཚབ་དང་སློབ་ཕྲུག་གི་གཙོས་རྒྱ་གར་གྲོང་གསེབ་ཁག་ནས་ཡོང་བའི་ཉམ་ཐག་ཡུལ་མི་ཁག་ཅིག་དང་། དེ་བཞིན་སྤྱི་ཟུར་ངག་དབང་ལྷ་མོ་ལགས་ཀྱི་དབུས་སྙིང་སྟོབས་གླིང་གི་དགེ་ལས་སློབ་ཕྲུག་བཅས་མི་གྲངས་ ༡༠༠ ཡས་མས་འཛོམས་འདུག མཛད་སྒོའི་ཐོག་སྙིང་སྟོབས་གླིང་གི་སློབ་ཕྲུག་ཚོས་གཞས་སྣ་འཁྲབ་སྟོན་དང་། གཏོང་ལེན་ཚོགས་པའི་སློབ་ཕྲུག་རྣམས་དང་ཡུལ་མི་ཉམ་ཐག་ཚོར་གྱོན་གོས་དང་རས་གདན་བཅས་ཀྱི་སྦྱིན་གཏོང་གནང་སོང་།
ཐོག་མར་སྙིང་སྟོབས་གླིང་གི་འགན་འཛིན་ངག་དབང་ལྷ་མོ་ལགས་ཀྱིས་སྙིང་སྟོབས་གླིང་དང་པོ་ཧ་ཅང་སྐྱོ་པོ་ཞིག་ནས་གཏོང་ཕོད་ཅན་གྱི་སྦྱིན་བདག་རྣམ་པའི་བཀའ་དྲིན་དང་དབུ་ལས་ཡོངས་ཀྱིས་དཀའ་ལས་བརྒྱབ་པ་ལ་བརྟེན་ནས་རིམ་གྱིས་ཕྱི་ནང་གི་མཐུན་རྐྱེན་ཡར་རྒྱས་སོང་ཡོད་ལ། ཚོགས་པ་དེ་བཙུགས་པའི་དམིགས་ཡུལ་ནི་ཉམ་ཐག་དབང་པོ་སྐྱོན་ཅན་རྣམས་ལ་བདག་སྐྱོང་གང་ལེགས་བྱེད་པའི་ཆེད་དུ་ཡིན་པ་སོགས་ངོ་སྤྲོད་གནང་རྗེས། སྐུ་མགྲོན་གཙོ་བོ་སྐུ་ཞབས་ཝི་སི་པཱར་མཱར་ལགས་ཀྱིས་གསུང་བཤད་གནང་སྐབས། ངག་དབང་ལྷ་མོ་ལགས་སུ་མི་མང་ལ་ཞབས་འདེགས་ཞུ་བའི་སེམས་ཤུགས་ཆེན་པོ་ཡོད་ལ། བོད་པ་དང་རྒྱ་གར་གཉིས་ཀྱི་སྤྱི་ཚོགས་ནང་འདི་འདྲའི་བུད་མེད་སེམས་ཤུགས་ཅན་ཡོད་པ་དེ་ཧ་ཅང་ཡག་པོ་རེད། ས་གནས་འདིའི་མི་མང་ལ་མཚོན་ནས་བཤད་ན། འདི་འདྲའི་སྤྱི་ཚོགས་ཞབས་ཞུའི་ཚོགས་སྡེ་ཞིག་ཡོད་པ་དེས་ཕྲུ་གུ་རྣམས་ལ་ལྟ་སྐྱོང་བྱ་བར་ཕན་གྱི་ཡོད་པ་རེད། སྤྱིར་དྷ་རམ་ས་ལ་དང་ཧི་མ་ཅལ་མངའ་སྡེའི་ནང་ཚོགས་སྡེ་ཁག་མང་པོ་ཡོད་ཀྱང་། དུས་ཡུན་རིང་པོ་ཞིག་ལ་ཚོགས་སྡེ་འདི་དག་གིས་སྤྱི་ཚོགས་ལ་ཞབས་འདེགས་ཞུས་ཏེ་གནས་ཐུབ་ཀྱི་ཡོད་པ་མ་རེད། དེའི་རྒྱུ་མཚན་གཅིག་ནས་སློབ་ཕྲུག་ཚོར་སློབ་སྦྱོང་སྤྲོད་རྒྱུ་དཀའ་ལས་ཁག་པོ་ཡོད་པ་དང་། གཉིས་ནས་མཐུན་རྐྱེན་མང་པོ་ཞིག་དགོས་ཀྱི་ཡོད་དུས། རྒྱ་གར་གཞུང་འབྲེལ་ཚོགས་སྡེ་ཁག་ནས་མཐུན་རྐྱེན་སྦྱོར་གྱི་ཡོད་པ་མ་རེད། ཡིན་ནའང་ངག་དབང་ལྷ་མོ་ལགས་ཀྱིས་སློབ་ཕྲུག་ཚོར་སློབ་སྦྱོང་སྤྲོད་ཐབས་སུ་དཀའ་ལས་རྒྱག་བཞིན་ཡོད་པ་མ་ཟད། ངའི་གོ་ཐོས་ལྟར་ན། ཁོ་མོས་གསོ་སྐྱོང་བྱས་པའི་སློབ་ཕྲུག་ཁ་ཤས་ད་ལྟ་འཛིན་རིམ་བཅུ་གཅིག་བཅུ་གཉིས་ནང་ཡོད་པ་རེད་ཟེར་གྱི་འདུག་པས། ཤེས་ཡོན་དང་སློབ་གསོ་དེས་མ་འོངས་པར་ཁོ་ཚོའི་མདུན་ལམ་ལ་ཕན་ཐོགས་ཏན་ཏན་ཡོང་གི་རེད། ཅེས་བརྗོད་སོང་།
སྐུ་ཞབས་ཨཱ་ཇི་མན་ཀོ་ཊི་ཡ་ལགས་ཀྱིས་སྙིང་སྟོབས་གླིང་གི་དབུ་ལས་ཡོངས་ཀྱི་ཕྱག་ལས་གནང་ཕྱོགས་ལ་བསྔགས་བརྗོད་གནང་བ་དང་འབྲེལ་བརྗོད་དོན། ང་ཚོ་བོད་པ་དང་རྒྱ་གར་བར་མཐུན་པོ་བྱས་ནས་སྡོད་དགོས་པ་དེ་གལ་ཆེན་པོ་ཞེ་དྲགས་རེད་བསམ་གྱི་འདུག མཐུན་པོ་ཟེར་དུས་ཡིན་གཅིག་མིན་གཅིག་གིས་བོད་པས་རྒྱ་གར་བར་ཆང་ས་བརྒྱབ་ནས་སྡོད་དགོས་རེད་ཟེར་གྱི་མེད། ང་ཚོའི་འབྲེལ་ལམ་ཡར་རྒྱས་བཏང་སྟེ་ཚང་མ་མཉམ་རུབ་བྱས་ནས་སྡོད་དགོས་པ་དེ་གལ་ཆེན་པོ་རེད། དེ་ནས་ང་ཚོས་ཁོར་ཡུག་གཙང་བཟོ་ལ་དོ་གནང་ཆེན་པོ་བྱེད་དགོས་ཀྱི་འདུག སྲིད་བློན་མུ་དྷི་མཆོག་གིས་དགོངས་པ་རྒྱ་ཆེན་པོ་བཞེས་ནས་ཁོར་ཡུག་གཙང་མ་ཉར་དགོས་གསུང་གིན་ཡོད་པ་ལྟར། ང་ཚོས་ངོས་ནས་ཀྱང་དེ་ལྟར་ལག་བསྟར་ཐུབ་པ་བྱེད་དགོས། ཁྱེད་རང་ཚོ་དབང་པོ་སྐྱོན་ཅན་ཡིན་བསམ་ནས་སེམས་ཤུགས་ནམ་ཡང་ཆགས་རྒྱུ་ཡོད་པ་མ་རེད། ཅེས་བརྗོད་སོང་།
དེའི་རྗེས་དྷ་ས་ས་གནས་འཐུས་ཚོགས་ཀྱི་ཚོགས་གཙོ་ངག་དབང་ཐར་པ་ལགས་ཀྱིས། ཕྲུ་གུ་གཉིས་གསུམ་ཡོད་པའི་སྒེར་སོ་སོ་ཡིན་ནའང་གུང་གསེང་གི་སྐབས་སུ་ཕྲུ་གུར་ལྟ་སྐྱོང་བྱེད་མ་ཐུབ་པའི་དཀའ་ངལ་མང་པོ་འཕྲད་ཀྱི་ཡོད་ཀྱང་། སྙིང་སྟོབས་གླིང་ནས་རིག་འཚོ་མ་ཟིན་པ་དང་དབང་པོ་སྐྱོན་ཅན་གྱི་སློབ་ཕྲུག་ཚོར་ལྟ་སྐྱོང་བྱས་པ་མ་ཟད། ཁག་ཅིག་ད་ལྟ་སྙིང་སྟོབས་གླིང་ནས་ཐོན་ཏེ་སྤྱིར་བཏང་གི་སློབ་གྲྭ་ནང་ཚུད་ཐུབ་པ་བྱུང་བར་དམིགས་བསལ་གྱིས་ངག་དབང་ལྷ་མོ་ལགས་དང་། འབྲེལ་ཡོད་ལས་བྱེད་ཚང་མར་ཐུགས་རྗེ་ཆེ་ཞུས་པ་དང་། མ་འོངས་པར་དྷ་ས་ས་འཐུས་ཀྱི་ངོས་ནས་རོགས་རམ་གང་ཐུབ་གནང་རྒྱུ་ཡིན་སྐོར་བརྗོད་སོང་།
མཇུག་ཏུ་གསར་འགོད་པས་ངག་དབང་ལྷ་མོ་ལགས་སུ་བཅར་འདྲི་ཞུ་སྐབས། ཁོང་མོས་དེ་རིང་གི་ལས་འགུལ་གྱི་དགོས་དམིགས་ངོ་སྤྲོད་གནང་དོན། ༧རྒྱལ་བ་རིན་པོ་ཆེའི་ཐུགས་རྗེ་བཀའ་དྲིན་གྱིས་དེང་སང་ང་ཚོ་བོད་པའི་ནང་ཤེས་ཡོན་ཡོད་མཁན་དང་རྒྱུ་དཔལ་འབྱོར་ཡོད་མཁན་ག་ཚོད་ཡོད་པ་རེད། སོ་སོའི་འཚོ་གོས་ཞེ་དྲགས་ཡག་པོ་ཆགས་ཏེ་འཛམ་བུ་གླིང་གི་ས་ཆ་གང་སར་སྐོར་བ་བརྒྱབ་ནས་འགྲོ་མཁན་མང་པོ་ཞེ་དྲགས་ཡོད་པས། དེ་ཚོ་ཚང་མས་མང་པོ་མ་བྱུང་ནའང་མི་ལྔ་དང་བཅུ་བདག་པོ་བརྒྱབ་སྟེ། བོད་པའི་སྤྱི་ཚོགས་ནང་ཉམ་ཐག་ཟེར་བ་དང་། ནད་པ་དང་རྒན་འཁོགས་ལྷག་འདུག་ཟེར་བ་མེད་པ་ཞིག་བྱུང་ན་བསམ་ཏེ། དེ་རིང་འདིར་མཛད་སྒོ་ཚོགས་པ་དེའང་མི་ལ་སེམས་ཤུགས་སྤེལ་ཆེད་དང་། ཡང་འགའ་རེར་རོགས་རམ་གནང་འདོད་ཡོད་ནའང་ག་རེ་གནང་དགོས་ཡིན་ན་བསམ་ནས་ལུས་བསྡད་མཁན་ཚོར་འདི་འདྲ་བྱ་རྒྱུ་འདུག་བསམ་པ་ཞིག་ཡོང་བའི་ཆེད་དུ་ཡིན། ཞེས་བརྗོད་སོང་།
ཡང་ཁོང་མོས་ངོ་སྤྲོད་གནང་བ་ལྟར་ན། སྙིང་སྟོབས་གླིང་དུ་སློབ་འཇུག་གི་གྲངས་ཚད་ ༥༠ ཡིན་ལ། ད་ལྟའི་ཆར་དགེ་ལས་ ༡༦ ཡོད་འདུག ཕྱི་ལོ་ ༡༩༩༩ ལོར་སྙིང་སྟོབས་གླིང་གསར་དུ་བཙུགས་པ་ནས་ད་ལྟའི་བར་སློབ་གྲྭ་དེ་ནས་ལུས་སེམས་གསོ་བཅོས་དང་ལག་རྩལ་སློབ་སྦྱོང་བཅས་བྱས་པ་བརྒྱུད། ཁྱོན་བསྡོམས་སློབ་མ་ ༥ ཚད་ལྡན་སློབ་གྲྭ་ཁག་ཏུ་ཚུད་ཡོད་པ་དང་། དེའི་ནང་ནས་བུ་མོ་ཞིག་གིས་ཉེ་སྔོན་འཛིན་རིམ་ ༡༠ པའི་ཡིག་ཚད་བཏང་ཟིན་ཡོད་འདུག ད་ལྟའི་ཆར་སྙིང་སྟོབས་གླིང་གི་སློབ་ཕྲུག་མང་ཆེ་བ་བོད་རིགས་ཡིན་པ་དང་། ཧི་མ་ལ་ཡའི་རི་རྒྱུད་སོགས་ནས་ཡིན་པའི་དབང་པོ་སྐྱོན་ཅན་གྱི་སློབ་ཕྲུག་ ༤ ཡོད་འདུག
གསར་འགོད་པ། པདྨ་མཚོ།
