སུ་ཇ་བོད་ཁྱིམ་གྱི་སློབ་ཕྲུག་ཁག་ཅིག་གིས་མི་རབས་རྒན་པ་རྣམས་ཀྱི་བཀའ་དྲིན་རྗེས་སུ་དྲན་ཏེ་རྒན་རྒོན་ཚོའི་ཕྱིའི་ཁོར་ཡུག་དང་ནང་གི་ཉལ་ཆས་སོགས་གཙང་མ་བཟོས་ཏེ་བཀའ་དྲིན་རྗེས་དྲན་ཞུས་འདུག
དེ་རིང་ཉིན་རྒྱབ་སུ་ཇ་བོད་ཁྱིམ་སློབ་གྲྭའི་སློབ་ཕྲུག་གཉིས་འདི་གའི་གསར་ཁང་ལ་ཕེབས་ཏེ། ཁོ་རང་ཚོས་དགུན་ཁའི་གུང་གསེང་དང་བསྟུན་ཏེ་དྷ་རམ་ས་ལའི་ཉེ་འཁོར་གྱི་རྒས་གསོ་ཁང་ཁག་ཅིག་ལ་དང་བླངས་ཞབས་ཞུ་བསྒྲུབས་པའི་སྐོར་ངོ་སྤྲོད་གནང་སོང་།
ཁོང་གཉིས་ཀྱིས་བརྗོད་པ་ལྟར་ན། སུ་ཇ་སློབ་གྲྭའི་འཛིན་རིམ་བཅུ་གཅིག་གི་སློབ་ཕྲུག་ཁག་ཅིག་གིས་གྲོས་བསྡུར་བྱས་ཏེ། ༧གོང་ས་མཆོག་དགུང་གྲངས་ ༨༠ ཕེབས་པ་དང་བསྟུན་ཏེ། རྒན་པའི་བཀའ་དྲིན་རྗེས་དྲན་དང་། བོད་པའི་ཡ་རབས་བཟང་སྤྱོད། མི་རབས་གསར་པ་ཚོར་མིག་དཔེ་བཟང་པོ་འཇོག་ཐབས་བཅས་ཀྱི་ཆེད་དུ། ད་ལོའི་དགུན་ཁའི་གུང་གསེང་དང་བསྟུན་ཏེ་སློབ་ཕྲུག་ ༩ ཡིས་མ་སྐུལ་དང་བླངས་ཐོག་དྷ་རམ་ས་ལའི་ཉེ་འཁོར་གྱི་རྒས་གསོ་ཁང་ ༣ ལ་ཞབས་ཞུ་བསྒྲུབ་རྒྱུའི་ཐག་གཅོད་བྱས་པ་ཡིན་འདུག
སུ་ཇ་བོད་ཁྱིམ་སློབ་གྲྭ་ཟླ་སྔོན་མའི་ཚེས་ ༡༦ ཉིན་ནས་གུང་གསེང་བཏང་ཡོད་པ་དང་། ཚེས་ ༢༠ ཉིན་ནས་སློབ་ཕྲུག་ཕོ་མོ་ ༧ གྱིས་སུ་ཇ་སློབ་གྲྭའི་རྒན་རྒོན་ ༣ ལ་ཞབས་ཞུ་བསྒྲུབས་པ་ནས་མགོ་བཙུགས་ཏེ། ཅོན་ཏ་ར་རྒས་གསོ་ཁང་དང་། དྷ་སྟེང་རྒས་གསོ་ཁང་། དྷ་ས་བྱམས་པ་གླིང་རྒས་གསོ་ཁང་བཅས་སུ་བདུན་ཕྲག་རེ་རེ་བྱས་ཏེ་དང་བླངས་ཞབས་ཞུ་བསྒྲུབས་ཡོད་འདུག
སློབ་ཕྲུག་དེ་དག་གི་དང་བླངས་ཞབས་ཞུའི་རྣམ་གྲངས་ ༥ ཡོད་པ་ནི། དང་པོ། རྒས་གསོ་ཁང་གི་ཁོར་ཡུག་གཙང་མ་བཟོ་བ་དང་། གཉིས་པ། རྒན་རྒོན་ཚོའི་ཉལ་ཁང་གཙང་མ་བཟོང་བ། གསུམ་པ། ཉལ་ཆས་དང་གྱོན་གོས་གཙང་མ་བཟོ་བ། བཞི་པ། གཟུགས་པོ་འཁྲུད་པ་དང་སྐྲ་དང་སེན་མོ་གཙང་མ་བཟོས་པ། ལྔ་པ། གཟིགས་པོར་འཕུར་མཉེད་དང་སྨན་བཅོས། ཁ་བརྡ་སེམས་གསོ་སོགས་བྱས་ཏེ་ཁམས་དྭངས་མོ་བཟོ་རྒྱུ་སོགས་ཡིན་འདུག
ཕ་ཡུལ་རྒྱལ་རོང་ནས་ཡིན་པའི་སློབ་ཕྲུག་བཀྲ་ཤིས་ལགས་སུ། ཐེངས་འདིར་རྒས་གསོ་ཁང་ཁག་ཏུ་དང་བླངས་ཞབས་ཞུ་བསྒྲུབས་པའི་མྱོང་ཚོར་དྲིས་པར་ཁོང་གིས། “ཚོར་བ་ཤུགས་ཆེན་པོ་ཞིག་གང་བྱུང་སོང་ཟེར་ན། རྒན་རྒོན་དེ་ཚོར་བོད་དོན་ལ་སེམས་ཤུགས་ཆེན་པོ་དང་། སྐུ་མདུན་ལ་དད་པ་དམ་ཚིག་ཆེན་པོ་ཧ་ལས་པ་འདུག ཁོ་རང་ཚོས་ང་ཚོར་བཤད་རྒྱུ་གཙོ་བོ་ཨང་དང་པོ་སྐུ་མདུན་གྱི་བཀའ་གསུང་ཅི་སྒྲུབ་ཞུ་དགོས་པ་དང་། གཉིས་པ་དེ་རང་རང་གི་གནས་སྟངས་འགྲིག་ཙམ་བྱུང་ན་བསྡད་འཇོག་རྒྱུ་མ་ཡིན་པར་བོད་སྤྱི་དོན་ལ་ལས་ཀ་བྱེད་དགོས་པ་ཤུགས་ཆེན་པོ་གསུང་གི་འདུག” ཅེས་བརྗོད་སོང་།
ཕ་ཡུལ་གཞིས་ཀ་རྩེ་ནས་ཡིན་པའི་བཀྲ་ཤིས་ལགས་ཀྱིས། “ང་ཚོ་རྒས་གསོ་ཁང་ཁག་ཏུ་འགྲོ་སྐབས། རྒན་རྒོན་ཁ་ཤས་ཀྱི་གཤིས་ཀ་གྱོང་པོ་ཞེ་དྲགས་འདུག ཁ་ཤས་ཀྱིས་ཁོ་རང་ཚོའི་ཅ་ལག་དང་གྱོན་ཆས་དེ་ཚོར་ལག་པ་འཆང་འཇུག་གི་མི་འདུག གང་ཡིན་ཟེར་ན། ག་ཚོར་དོགས་པ་ཟ་བཞིན་ཡོད་ས་རེད། སྔོན་མ་ཁོ་རང་ཚོར་འབྲེལ་བ་ཡོད་མཁན་གཞོན་སྐྱེས་དེ་འདྲས་དངུལ་དང་ཅ་དངོས་རྐུ་མ་བརྒྱབ་པ་དེ་འདྲ་བྱུང་ཡོད་ས་རེད། ང་ཚོས་གཙང་མ་ཡག་པོ་བཟོས་ཚར་བའི་རྗེས་ལ་ཁོ་རང་ཚོས་དགའ་བོ་ཞེ་དྲགས་གནང་གི་འདུག” ཅེས་བརྗོད་བྱུང་།
ཁོས་མུ་མཐུད་དུ་བརྗོད་དོན། “རྒན་རྒོན་དེ་ཚོས་ཅ་ལག་འདྲ་མི་འདྲ་ཉར་འདུག ཁ་ཤས་ལ་ཤིང་བཟོ་བའི་ཆ་ལག་ཆ་ཚང་བ་དེ་འདྲ་འདུག ང་ལ་ཉམས་མྱོང་ག་རེ་བྱུང་སོང་ཟེར་ན། རྒན་རྒོན་དེ་ཚོའི་ཅ་ལག་སྔོན་མ་གང་དུ་བཞག་ཡོད་པ་དེ་རང་ལ་འཇོག་རྒྱུ་མ་གཏོགས་འཇོག་ས་བརྗེ་བོ་བརྒྱབ་པ་ཡིན་ན། ཁོ་རང་ཚོས་མ་རྙེད་པ་དང་། དྲན་པ་རྗེད་འགྲོ་ཡི་འདུག དེ་ནས་ཁོ་རང་ཚོའི་ཅ་ལག་དེ་ལ་འགྱུར་བ་རྐང་གཅིག་ཀྱང་གཏོང་ཆོག་གི་མི་འདུག དཔེར་ན། ཁ་པར་ཞིག་ཡིན་ན། ཁོ་རང་ཚོའི་ཁ་པར་དེ་ཡག་པོ་མེད་ནའང་དེ་ལས་ཡག་ཅིག་སྤྲད་ན་ཁྱོན་ནས་ལེན་རོགས་བྱེད་ཀྱི་མི་འདུག” ཅེས་བརྗོད་སོང་།
ཁོང་གཉིས་ལ་ཐེངས་འདིའི་ཞབས་ཞུ་བ་ཚོ་སྡོད་ས་དང་ཟ་མ། ཕར་ཚུར་འགྲུལ་བཞུད་ཀྱི་འགྲོ་སོང་སོགས་ཇི་ལྟར་བཏང་བ་ཡིན་སྐོར་དྲིས་པར། ཁོང་ཚོས་ཐོག་མ་སུ་ཇ་བོད་ཁྱིམ་གྱི་དགེ་ལས་སློབ་ཕྲུག་ཚོར་ཞལ་འདེབས་རེ་བསླངས་ཏེ་དངུལ་ཏོག་ཙམ་རག་ཡོད་པ་དང་། རྗེས་ལ་ཁོ་རང་ཚོའི་ལས་དོན་ལ་རྒྱབ་སྐོར་གནང་མཁན་མི་སྒེར་བ་རེ་ཟུང་གིས་ཀྱང་ཞལ་འདེབས་སྤྲད་དེ་འགྲོ་སོང་ཚང་མ་དེ་ནས་བཏང་ཡོད་པ་མ་ཟད། དངུལ་དེས་རྒས་གསོ་ཁང་ཁག་ལ་ཞལ་ལག་སྟབས་བདེ་རེའང་བཏང་ཡོད་སྐོར་ངོ་སྤྲོད་གནང་སོང་།
སློབ་ཕྲུག་དང་བླངས་ཞབས་ཞུ་ཚོགས་ཆུང་དེའི་ལས་བསྡོམས་ནང་འཁོད་པ་ལྟར་ན། ཅོན་ཏ་ར་རྒས་གསོ་ཁང་དུ་རྒན་རྒོན་ ༢༤ དང་། དྷ་སྟེང་བོད་ཁྱིམ་དུ་རྒན་འཁོགས་ ༢༧ ། བྱམས་པ་གླིང་རྒས་གསོ་ཁང་དུ་རྒན་རྒོན་ ༡༦༦ བཅས་ཡོད་འདུག དང་བླངས་སློབ་ཕྲུག་ ༧ ནི། བསྟན་འཛིན་དང་ནམ་མཁའ། སྤེན་པ། མཁའ་འགྲོ། ངག་དབང་དར་རྒྱས། ཉི་མ། བཀྲ་ཤིས་བཅས་ཡིན་འདུག
གསར་འགོད་པ། དོན་འགྲུབ་བཀྲ་ཤིས།
བོད་ཀྱི་སྤྱི་ཚོགས་ནང་རྒན་གསོ་ཁང་དར་ནས་དུས་ཡུན་རིང་པོ་འགོར་མེད། རྒན་གསོ་ཁང་འཛུགས་པའི་དམིགས་ཡུལ་ནི་ལྟ་སྐྱོང་བྱེད་མཁན་མེད་པའི་རྒན་རབས་ཚོའི་དཀའ་ངལ་སེལ་ཆེད་རེད། བོད་ལ་མཚོན་ན། རྒན་བཀུར་ཆུང་བྱམས་ཀྱི་ལུགས་སྲོལ་བཟང་པོ་ཡོད་པས། དུས་རབས་མང་པོ་ཞིག་གི་རིང་རྒན་གསོ་ཁང་འཛུགས་དགོས་མ་བྱུང་བ་རེད། འོན་ཀྱང་དུས་ཚོད་ཀྱི་འགྱུར་འགྲོས་དང་བསྟུན་ནས་མི་ཡི་གཤིས་ཀ་དང་སྤྱི་ཚོགས་ཀྱི་ཡུལ་སྲོལ་གོམས་གཤིས་ལ་འགྱུར་བ་ཕྱིན་པས། བོད་མི་ཚོས་རང་ཉིད་ཀྱི་ཕ་མ་རྒན་འཁོག་ཆགས་ཏེ་སྐྱོང་གཉོར་བྱ་འདོད་མེད་པར་རྒན་གསོ་ཁང་ལ་གཏོང་ཐབས་བྱེད་པའི་དུས་ཚོད་དེ་དངོས་སུ་ཤར་པ་རེད། ཟས་ཞིམ་པོ་དང་གོས་འཇམ་པོ་སྤྱོད་རྒྱུ་མེད་པའི་ཁར་སེམས་ཀྱང་སྐྱིད་པོ་མེད་པའི་དེ་རིང་གི་རྒན་རབས་འདི་དག་ནི། དེང་སང་སྤྱི་ཚོགས་ནང་ཡིན་མདོག་གིས་འགྲོ་བའི་མི་མང་པོ་ཞིག་གི་བྱམས་ལྡན་ཕ་མ་རྣམ་ཡིན་ལ། ཁོང་ཚོ་ནི་བོད་མི་ཚོའི་ཡ་རབས་ལུགས་ཀྱི་ཡུལ་སྲོལ་གོམས་གཤིས་ཉམས་རྒུད་དུ་འགྲོ་བཞིན་པའི་དཔེ་མཚོན་གསོན་པོ་རེའང་ཡིན་པ་མ་ཟད། རང་རློམ་ཆེན་པོས་ངང་འགྲོ་བའི་དེང་སང་གི་ན་གཞོན་མང་པོ་ཞིག་གི་མ་འོངས་པའི་འགྲོ་ལམ་ཡང་ཡིན།
གསར་འབྱོར་ཀ་ཅག་ཆུང་ཆུང་སེམས་ཤུགས་ཆེན་པོ་ཡོངས་ལ་ལེགས་སོ་ཡོད
བཀའ་དྲིན་ཆེ།
ངོ་མ་བཀའ་དྲིན་ཆེ།
ཡག་པོ་ཞེ་དྲག་རེད། འདི་ལ་ཁ་ཡོད་ལག་ཡོད་ཟེར་གྱི་ཡོད་རེད། རྒན་འཁོགས་གཞན་ཞིག་གིས་རྐང་པའི་མཛུབ་མོ་མཐོང་དུས་ནང་སྲིད་ལས་ཁུངས་ཀྱིས་རྒན་འཁོགས་ཚོའི་འཕྲོད་བསྟེན་ལ་ད་རུང་མ་འདང་ཕྱོགས་གཅིག་བསྟན་འདུག གང་ལྟར་དང་བླངས་སློབ་ཕྲུག་ཚོར་ཡིད་རངས་བསྔགས་བརྗོད་བྱེད་ཀྱི་ཡོད།
སློབ་ཕྲུག་ཚོ་མི་རིགས་ཤིག་དང་རྒྱལ་ཁབ་ཅིག་གི་རེ་བ་དང་མ་འོངས་པ་ཡིན་སྟབས། འདི་ལྟ་བུའི་མ་སྐུལ་དང་བླངས་ཀྱི་བྱ་སྤྱོད་རྣམས་ནི་དངོས་གནས་དགའ་འོས་པ་དང་བསྟོད་བསྔགས་བྱེད་འོས་པ་མ་ཟད། སློབ་གྲྭ་གཞན་གྱི་སློབ་ཕྲུག་ཚོས་ཀྱང་མིག་དཔེར་ལྟ་འོས་སོ།
ཤིན་ཏུ་ལེགས། བཀའ་དྲིན་ཆེ། ཆོས་ཀྱི་སྙིང་པོ་དེ་རང་རེད་སྙམ།
བསྔགས་བརྗོད་བྱེད་འོས་པའི་ལས་འགུལ་འདི་ལྟ་བུ་མང་དུ་སྤེལ་ཐུབ་ན་དགེ་མཚན་ཆེ། མ་གཞི་རྒན་བཀུར་གྱི་བྱ་བ་འདི་ང་ཚོ་མི་རིགས་ལ་མཚོན་ན་བཟང་སྤྱོད་ཅིག་ཡིན་པས་ན། ཚང་མས་ཕྱར་བ་གྲུ་འདེགས་ཀྱི་དཔེ་ལྟར་རྒྱབ་སྐྱོར་རེ་བྱེད་པར་གལ་ཆེ།
དངོས་གནས་ཡིན། སུ་ཇཱ་བོད་ཁྱིམ་གྱི་སློབ་ཕྲུག་འདི་ཚོས་གུང་སེང་སྐབས་སློབ་ཕྲུག་བྱིངས་ལྟར་འཆམ་འཆམ་དང་། ལྷོད་ལྷོད། རང་སྦྱོང་བྱ་རྒྱུ་སོགས་སྒེར་གྱི་བྱ་གཞག་ཡོད་ཚད་རྒྱབ་ཏུ་བསྐྱུར་ཏེ། ངལ་བའི་ཚོགས་ལ་གདོང་ལེན་གྱིས་སེམས་འགུལ་ཐེབས་དགོས་པ་དང་། ཁ་ཚ་དགོས་གཏུགས་གྱི་སྤྱི་ཚོགས་ཞབས་ཞུ་སྒྲུབ་བཞིན་པར་སྤོབས་པ་ཆེར་བསྐྱེད། ཁྱེད་རྣམ་པའི་རྣམ་དཀར་གྱི་བྱ་བར་ལམ་འགྲོ་ཡོང་བར་སྨོན།
ཐབ་ཆུང་ཆུང་མེ་ཚ་པོ།
མི་ཆུང་ཆུང་ལས་ཆེན་པོ།
ཁ་ཉུང་ཉུང་ལག་མྱུར་པོ།
དངུལ་ཉུང་ཉུང་གྲ་འགྲིག་པོ།
ལས་འགུལ་ཆུང་ཆུང་ནུས་པ་ཆེན་པོ། ཡ་རབས་བཟང་པོའི་བྱ་སྤྱོད་འདིས་བོད་ཕྱི་ནང་གཉིས་ལ་སྐུལ་འདེད་ཅིག་ཐེབས་པའི་རེ་བ་ཡོད།
ངོ་མ་ཡིད་སེམས་རབ་ཏུ་སྒུལ་བའི་སློབ་མ་སྐོར་ཞིག་འདུག་ཨང་། ཁྱེད་ཅག་ཁ་དྲོ་བཀྲ་ཤིས།
ལས་ཀ་དཔེ་ཡག་པོ་གནང་འདུག་པས། སྙིང་དབུས་ནས་ཐུགས་རྗེ་ཆེ་ཞུ།་
སྙིང་ཉེ་བའི་སློབ་གྲོགས་ཆུང་ཆུང་རྣམ་པ། ཁྱེད་ཅག་གི་ལས་ཀ་དེ་ཇི་འདྲའི་ཡིད་འགུལ་ཐེབས་པའི་ལས་ཀ་ཞིག་རེད་ཨང་། ལྷག་དོན་དུ། ཁྱེད་ཅིག་གིས་ཕྱིའི་རང་བྱུང་ཁོར་ཡུག་ནས་མིའི་ནང་སེམས་ཀྱི་བར་དུ་གཙང་སྦྲ་བྱས་པ་དེ་མཛེས་སྡུག་ལྡན་པ་ཞིག་དང་། ལས་ཀའི་གོ་རིམ་དེ་ལྷག་ཏུ་ཡིད་དབང་འཕྲོག་པ་ཞིག་རེད་ཨང་།