ཨུ་རུ་སུ། ཨ་རིའི་རྒྱལ་སྲུང་ལྷན་ཁང་ལ་ཉེན་ཁ་ཆེ་ཤོས་ཡིན་ནམ།

ནེའུ་ཡོག་དུས་བབ་ཀྱི་རྩོམ་སྒྲིག་པའི་གཏམ། སོག་ཚང་བློ་བྷེས་བསྒྱུར།

ཨ་རིའི་རྒྱལ་སྲུང་ལྷན་ཁང་གིས་ཨུ་རུ་སུ་རྒྱལ་ཁབ་ནི་ཨ་རིའི་བདེ་འཇགས་ལ་ཉེན་ཁ་ཆེ་ཤོས་ཀྱི་ཐོ་གཞུང་ནང་བཅུག་པ་དང་འབྲེལ། དབུས་ཤར་ཡུ་རོབ་ཀྱི་བྱང་ཆིངས་(Nato) སྒྲིག་ཁོངས་སུ་གཏོགས་པའི་རྒྱལ་ཁབ་ཁག་གི་ནང་། དམག་འཐབ་མཚོན་ཆ་གལ་ཆེན་རིགས་དང་ཁྲབ་ལྡན་འཕྲུལ་འཁོར་སྣ་ཚོགས། དམག་དཔུང་བཅས་རེས་མོས་སུ་འགྲེམ་འཇོག་ཤུགས་ཆེ་རུ་གཏོང་འཆར་ཡོད།

བདུན་ཕྲག་འདིའི་རེས་གཟའ་མིག་དམར་ཉིན་ཨ་རིའི་རྒྱལ་སྲུང་དྲུང་ཆེ་ཨ་ཤེ་ཁྲོན་ཁཱ་དྲེར་༼Ashton་Carter༽གྱིས་གཏམ་བཤད་སྐབས། ཨ་མི་རི་ཁའི་བདེ་འཇགས་ལ་ཉེན་ཁ་ཆེ་ཤོས་རྒྱལ་ཁབ་ཁག་ཅིག་གི་མིང་གཞུང་བཏོན་པའི་ནང་། རྒྱ་ནག་དང་བྱང་ཀོ་རི་ཡ། ཨཱེ་རན་བཅས་ཚུད་ཡོད་པ་མ་ཟད། མཐའ་བསྡོམས་དུ་འཇིགས་སྐུལ་དྲག་སྤྱོད་པར་ཁ་གཏད་གཅོག་རྒྱུ་ཡང་འཁོད་ཡོད་ནའང་ཁོང་གི་དམིགས་འབེན་གཙོ་བོ་ཨུ་རུ་སུ་རེད།

ཨ་རིའི་རྒྱལ་སྲུང་དྲུང་ཆེ་ཡིས་ཨུ་རུ་སུའི་དྲག་རྒོལ་གྱི་ཉེན་ཁ་འགོག་ཕྱིར་དོན་བཟང་ཞིག་སྒྲུབ་ཀྱིན་ཡོད་མིན་ལ་མ་ལྟོས་པར། ༢༠༡༧ ལོར་ཡུ་རོབ་ནང་དམག་དོན་འགྲོ་གྲོན་དེ་ད་ལྟ་ཨ་སྒོར་ས་ཡ་ ༧༨༩ གཏོང་བཞིན་པ་ལས་ལྡབ་བཞི་འགྱུར་ཏེ། ཨ་སྒོར་ཐེར་འབུམ་ ༣།༤ ཡི་རྩིས་འཆར་སྤར་བར། འགྲོ་སོང་མང་དྲགས་པ་དང་ཁ་ཆེའི་ཆོས་ལྡན་རྒྱལ་ཁམས་ཟེར་བ་ལྟ་བུ། དྲག་སྤྱོད་པའི་སྒྲིག་འཛུགས་དང་ཉེན་ཁ་གཞན་ལའང་སྣང་ཆུང་དང་དོ་སྣང་ཆུང་སྐྱོན་གྱི་དོགས་འདྲི་ཡོང་སྲིད་པ་རེད།

རེད་དེ། ཨུ་རུ་སུའི་སྲིད་འཛིན་པུ་ཊིན་གྱི་དབང་བྱུས་འོག་གཞན་ལ་དབང་ཡོད་བྱེད་མཁན་ཞིག་ཏུ་གྱུར་པ་ཡོངས་གྲགས་དང་ངོས་ལེན་མི་བྱེད་ཐབས་མེད་རེད། ཨུ་རུ་སུས་རང་བཙན་ལྡན་པའི་རྒྱལ་མཚམས་རྩིས་མེད་ཀྱིས་ཁཱེ་རེ་མེ་ཡ་རང་ཁོངས་སུ་ཟླ་སྒྲིལ་བཏང་སྟེ། ཡོས་ཁེ་རན་རྒྱལ་ཁབ་ལ་ནང་འཁྲུག་གི་མེ་སྦར་པ། ན་ནིང་ལོར་ཕན་ཚུན་བར་མེ་འཕེན་མཚམས་འཇོག་གི་གསལ་བསྒྲགས་ཙམ་སྤེལ་ཡོད་ནའང་། ད་དུང་ཨུ་རུ་སུའི་དམག་དཔུང་ཤར་ཡོས་ཁེ་རན་དུ་གཏན་སྡོད་ཀྱིས་སྦལ་ཏིཀ་མཚོ་ཁུག་གི་རྒྱལ་ཕྲན་ཁག་ནང་རྒྱ་སྐྱེད་གཏོང་མིན་གྱི་དྲི་བ་སླེབ་ཀྱིན་ཡོད།

དེ་མིན་གྱི་བློ་འཚབ་བྱེད་དགོས་པའི་གནད་དོན་ཁག་ཅིག་ནི། ཨུ་རུ་སུས་ཡུ་རོབ་ཀྱི་མཁའ་དབྱིངས་ཆ་ཤས་སུ་འཕུར་མདེལ་འགོག་སྲུང་གི་དྲ་བ་སྣ་ཚོགས་བཟོས་ཏེ། ཕོ་ལན་ཌི་རྒྱལ་ཁབ་ཀྱི་ནམ་མཁའི་གསུམ་ཆ་གཅིག་ཚུད་པའི་མཁའ་ཐོག་ཏུ། བྱང་ཆིངས་དམག་དཔུང་གིས་མཁའ་དབྱིངས་འགུལ་སྐྱོད་ལ་ཉེན་ཁ་འཕྲད་ཀྱིན་ཡོད་པ་དང་། ཕྱོགས་མཚུངས་ཨུ་རུ་སུས་འཕུར་མདེལ་དེ་འདྲ་ཁེ་རེ་མེ་ཡ་དང་སི་རི་ཡའི་ནང་དུའང་བཟོ་བཞིན་པ་མ་ཟད། དེ་གར་ཨུ་རུ་སུ་གཞུང་གིས་ཨཱ་ས་རྡི་གཞུང་གི་ངོ་ཚབ་ཀྱིས་མཁའ་ཐོག་ནས་གཏོར་རྒོལ་རྒྱ་ཇེ་ཆེ་དང་ཇེ་བརྟན་དུ་གཏོང་གི་ཡོད།

ཡུ་རོབ་ནང་སི་རི་ཡ་དང་དེ་མིན་གྱི་སྐྱབས་བཅོལ་པ་མཚོ་རླབས་ལྟར་འཕྱུར་བཞིན་པ་དང་། གཡས་ལྷུང་ཆབ་སྲིད་ཚོགས་པ་ཁག་གིས་ཕྱི་མི་གནས་སྤོར་གྱི་ཐོབ་ཐང་ཐད་ངོ་རྒོལ་བྱེད་བཞིན་པ་སོགས་དུས་བབ་དམིགས་བསལ་གྱི་སྐབས་འདིར། ཨུ་རུ་སུའི་འགུལ་སྐྱོད་ལ་བལྟས་ཏེ་ཨ་མི་རི་ཁ་དང་བྱང་ཆིངས་སྒྲིག་འཛུགས་ཀྱིས་མཐུན་ཕྱོགས་རྒྱལ་ཁབ་ཐུན་མོང་གི་སྲུང་སྐྱོབ་ཆོད་སེམས་ཆེད། དམག་དཔུང་ཁ་སྣོན་རྒྱ་བསྐྱེད་གཏོང་རྒྱུ་ཧ་ཅང་གལ་ཆེན་དུ་གྱུར་ཡོད།

འདས་པའི་ལོ་གཉིས་རིང་ཨ་མི་རི་ཁས་ཡུ་རོབ་ནང་དམག་སྦྱོང་དང་རེས་མོས་སུ་དམག་དཔུང་བཅའ་སྡོད་སོགས་བྱས་ཟིན་ཡོད་ལ། སྐུ་ཞབས་ཁཱ་ཁྲེར་གྱི་འཆར་གཞི་གསར་པ་དེས་མཐུན་ཕྱོགས་རྒྱལ་ཁག་གི་གོ་མཚོན་ལྡན་པའི་དམག་འཐབ་རུ་ཤོག་སྟེ། རོབ་རྩིས་བྱས་ན་དམག་མི་ལྔ་སྟོང་ཙམ་སོར་གནས་གཏན་འཇགས་ངང་ཧང་གྷ་རི་དང་རོ་མ་ནེ་ཡ། སྦལ་ཏིཀ་རྒྱལ་ཁག་ཚུད་པའི་ཡུ་རོབ་ས་ཁུལ་དུ་གནས་ཐུབ་ངེས་རེད། ༡༩༩༧ ལོར་བཞག་པའི་ཆིངས་ཡིག་གི་འབྲུ་དོན་ལྟར་ན། བྱང་ཆིངས་དང་ཨུ་རུ་སུ་གཉིས་ཀས་ཕན་ཚུན་གྱི་ས་མཚམས་སུ་གཏན་འཇགས་དམག་དཔུང་དང་རྡུལ་ཕྲན་གོ་མཚོན་མི་འཇོག་པར་མོས་མཐུན་གནང་ཡོད་ནའང་། ཨ་རིའི་གཞུང་གིས་འཆར་གཞི་གསར་པའི་ཤུགས་རྐྱེན་རྒྱུན་གཏན་དུ་གནས་མིན་ལ་མ་ལྟོས་པར། དམག་དཔུང་རེས་མོས་སུ་བརྗེ་སྤོར་ཡོད་པའི་རྒྱུ་མཚན་གྱིས་ཆིངས་ཡིག་གི་འབྲུ་དོན་ལ་འགལ་འཛོལ་མི་ཡོང་ལུགས་བཤད་ཡོད་པ་རེད།

ཨ་མི་རི་ཁས་མ་འཇོག་ཇེ་ཆེར་གཏོང་བཞིན་པ་དེས་སྐུ་ཞབས་པུ་ཊིན་ལ་བརྡ་ལན་ཞིག་སྤྲད་ཡོད་པ་དང་ལྷན། བྱང་ཆིངས་ཁོངས་གཏོགས་ཀྱི་རྒྱལ་ཁབ་གཞན་ཚོས་ཀྱང་སོ་སོའི་རྒྱལ་སྲུང་སྔོན་རྩིས་ཡར་སྤར་རྒྱུའི་སྟེང་། སྔར་ལྷག་འབད་བརྩོན་སྐུལ་འདེད་ཀྱི་དགོས་འདུན་བཏོན་ཡོད། འོན་ཀྱང་། ཨ་རི་ཁེ་གཙང་གིས་འགྲོ་གྲོན་ཇེ་ཆེར་གཏོང་བཞིན་པ་ནི། ཨེ་རཀ་དང་ཨ་ཧྥི་གྷ་ནི་སི་ཐན་ནང་དམག་འཁྲུག་སྐབས་སུ་ཨ་མི་རི་ཁའི་རྒྱལ་སྲུང་ལྷན་ཁང་གིས་འགྲོ་སོང་ཕངས་མེད་གཏོང་དུས་སུ་ཕྱིར་ལོག་བྱས་པ་དང་མཚུངས།

ཨ་མི་རི་ཁས་འབྲེལ་ཡོད་རྒྱལ་ཁབ་བདུན་པོ་བསྡོམས་པ་ལས་ཀྱང་རྒྱལ་སྲུང་ཆེད་འགྲོ་སོང་རྒྱ་ཆེར་གཏོང་གི་ཡོད་རུང་། ཨ་རིའི་རྒྱལ་སྲུང་ལྷན་ཁང་གྲོན་དངུལ་འཆར་རྩིས་ཇེ་ཉུང་གིས་འཕུར་མཉེད་གཏོང་གིན་ཡོད། དོན་དངོས་སུ། ཡུ་རོབ་ཀྱི་སྲུང་སྐྱོབ་ཆེད་དངུལ་རྩིས་སྤར་ཆ་བྱུང་བ་རྣམས་ཨེ་རཀ་དང་ཨ་ཧྥི་གྷ་ནི་སི་ཐན་ནང་དམག་གྲོན་ཆ་ཤས་ལས་བྱུང་བར་ཆ་འཇོག་བྱས་ན་འཛིན་སྐྱོང་གིས་དངུལ་རྩིས་ཁ་འདུམ་ཐབས་སུ་ཕན་ཁྱད་འཐོན་པར་ངེས།

ཨུ་རུ་སུའི་དྲག་ཤུགས་དང་འཇིགས་སྐུལ་འགོག་རྒྱུ་གལ་གནད་ཆེན་པོ་ཡིན་ནའང་། ཨུ་རུ་སུ་ལྟ་བུའི་དགྲ་ལ་སྔར་ལས་རིན་གོང་ཆེས་ཆེར་མཐོ་བའི་གོ་མཚོན་གྱིས་དམག་འཐབ་གྲ་སྒྲིག་བྱེད་པ་ནི། ཨ་རིའི་རྒྱལ་སྲུང་ལྷན་ཁང་ནས་སོ་སོས་སྔོན་མ་གང་བྱས་པ་བསྐྱར་ཟློས་ཀྱི་སྲོལ་རྒྱུན་ཙམ་དུ་ཟད་ལ། ཁ་ཆེའི་རྒྱལ་ཁམས་དྲག་སྤྱོད་པ་དང་དྲག་སྤྱོད་པའི་ཚོ་ཁག་གཞན་ལས་བྱུང་བའི་ཉེན་ཁ་རྣམས་ད་ཆ་མགོ་རྙོག་ཇེ་ཆེ་དང་སྔོན་དཔག་དཀའ་བའི་གནས་སུ་གྱར་ཡོད་སྟབས། ཨ་མི་རི་ཁས་ངེས་པར་ཕྱོགས་གཉིས་ལ་གདོང་ལེན་ཐུབ་དགོས་པ་རེད། འོན་ཀྱང་། སྐུ་ཞབས་ཁཱ་ཁྲིར་གྱི་འཆར་གཞི་ཡིས་ཡོ་དྲང་ཏག་ཏག་དོ་སྙོམས་སྒྲིག་ཐུབ་མིན་བཤད་ཚོད་ཐིག་མ་སོང་།

མ་རྩོམ་འབྲེལ་ཐག http://www.nytimes.com/2016/02/03/opinion/the-pentagons-top-threat-russia.html?ref=opinion&_r=1