ཁ་སང་སྤྱི་འཐུས་གྲོས་ཚོགས་ནང་བོད་མིའི་སྒྲིག་འཛུགས་ཀྱི་སྔོན་རྩིས་ཐོག་བགྲོ་གླེང་སྐབས་སྤྱི་འཐུས་ཁག་ཅིག་གིས་སྔོན་རྩིས་དང་འབྲེལ་བའི་དོགས་འདྲི་ཁག་ཅིག་གནང་བར། དེ་རིང་ཕྱི་དྲོར་དཔའ་འབྱོར་བཀའ་བློན་ཚེ་རིང་དོན་གྲུབ་མཆོག་གིས་ལན་འདེབས་གནང་སོང་།
སྤྱི་འཐུས་ཟླ་བ་ཕུན་སྐྱིད་ལགས་ཀྱིས་རྩིས་ལོ་ ༢༠༡༦ དང་ ༢༠༡༧ ལོའི་སྔོན་རྩིས་བཀའ་འཁྲོལ་གཞི་ནས་ཞུ་དགོས་པ་དང་ཕྱི་ཟླ་ ༤ པ་ནས་ཕྱག་ལས་མགོ་འཛུགས་གནང་དགོས་པ་ཞིག་ཡིན་ཡང་། འཕྲོད་བསྟེན་ལས་ཁུངས་ཀྱི་སྨན་བཅོས་ལྟ་སྐྱོང་ཐོག་ས་གནས་ཁག་གི་གཞུང་འབྲེལ་མིན་པའི་ཚོགས་པ་ཁག་གི་ལས་མི་ཚོར་ད་ལྟ་ནས་བརྒྱ་ཆ་ ༥༠ རེ་ཆག་ཡང་གནང་ཚར་ཏེ་དངུལ་བསྡུ་རྒྱུ་མགོ་བཙུགས་ཟིན་ཡོད་པ་དེ། བོད་མིའི་སྒྲིག་འཛུགས་ཀྱི་སྔོན་རྩིས་སྟངས་འཛིན་གྱི་སྒྲིག་གཞིའི་ནང་འགྲོ་སོང་སྔོན་བཏང་དང་བཀའ་འཁྲོལ་རྗེས་ཞུ་ཆགས་འགྲོ་བཞིན་ཡོད་སྐོར་བརྗོད་ཡོད་པ་དེར། དེ་རིང་ཕྱི་དྲོར་དཔལ་འབྱོར་བཀའ་བློན་ཚེ་རིང་དོན་གྲུབ་མཆོག་ནས་གསལ་བཤད་བཀའ་ལན་གནང་དོན།
བཀུར་འོས་སྤྱི་འཐུས་མཆོག་ལ་ཏན་ཏན་ཐུགས་ཁག་མེད་པ་ཞིག་རེད་འདུག སྨན་བཅོས་ལྟ་སྐྱོང་ལས་གཞིའི་འགྲོ་སྟངས་དེ་སྤྱིར་བཏང་ད་ལྟའི་ཆར་གྲོས་ཚོགས་ནང་ཏོག་ཙམ་གསལ་པོ་ཆགས་དགོས་པ་འདྲ་པོ་ཞིག་ཡོད་ཀྱང་ད་དུང་གསལ་པོ་མ་ཆགས་པ་འདྲ་པོ་ཞིག་འདུག སྨན་བཅོས་ལྟ་སྐྱོང་ལ་འཕྲོད་བསྟེན་ལས་ཁུངས་ཀྱི་ལས་གཞིའི་འོག་ནས་འགྲོ་སོང་གཏོང་བ་དེ། ལོ་རང་ག་སོ་སོའི་ཕྱི་ཟླ་ ༤ ཚེས་ ༡ ནས་འབྱུང་འགྱུར་ཕྱི་ཟླ་ ༣ ཚེས་ ༣༡ བར་དུ་འགྲོ་སོང་གཏོང་དགོས་ཀྱི་ཡོད་པ་རེད། གལ་སྲིད་སྨན་བཅོས་ཀྱི་ཐོག་ནས་མཐུན་འགྱུར་སྦྱོར་དགོས་པའི་གནས་བབ་ཅིག་བྱུང་བ་ཡིན་ན། མཐུན་འགྱུར་སྤྱོར་ས་དེ་ཚོ་ཚོགས་དངུལ་དེབ་སྐྱེལ་ཡོད་པ་ཞིག་དགོས་ཀྱི་ཡོད་པ་དང་། ཚོགས་དངུལ་དེབ་སྐྱེལ་ཡོང་དགོས་པ་དེ་ཕྱི་ཟླ་ ༤ ཚེས་ ༡ གི་གོང་ལ་དེབ་སྐྱེལ་ཟིན་པ་ཞིག་དགོས་པ་རེད་མ་གཏོགས་ཕྱི་ཟླ་ ༤ ཚེས་ ༡ ལ་དེབ་སྐྱེལ་བྱས་ཏེ། ཕྱི་ཟླ་ ༥ པའི་ནང་སྨན་བཅོས་ཀྱི་ཐོབ་ཐང་ཞུས་པ་ཡིན་ན་འགྲིག་གི་མེད་པ་ཞིག་འཕྲོད་བསྟེན་ལས་ཁུངས་ཀྱི་སྨན་བཅོས་ལྟ་སྐྱོང་གི་ལམ་སྲོལ་ནང་གསལ་འདུག་ལ། དངོས་ཡོད་གནས་སྟངས་ཀྱི་ཆ་ནས་ཀྱང་དེ་གནད་འགག་ཅིག་རེད་འདུག དེ་འདྲའི་ཆ་ནས་ཕྱི་ཟླ་ ༡ ནང་ནས་གསལ་བསྒྲགས་དང་སྦྲགས་ཚོགས་དངུལ་བསྡུ་བའི་ལས་རིམ་ཞིག་མགོ་བརྩམས་འདུག་པ་དེ་དངོས་ཡོད་ཡིན་པ་གསལ་པོ་བྱས་ནས་ཞུ་དགོས་པ་རེད། དེ་སྒྲིག་གཞི་དང་ཐད་ཀར་འགལ་བ་ཆེན་པོ་ཞིག་རེད་དམ་ཞེ་ན་མ་རེད་ཞུ་རྒྱུ་ཡིན། གང་ཡིན་ཟེར་ན། སྔོན་རྩིས་ཀྱི་སྒྲིག་གཞིའི་ནང་ཡོང་འབབ་བསྡུ་རུབ་དེ་ཟླ་བ་གསུམ་གྱི་ནང་སྔོན་རྩིས་ནང་སླེབ་པ་ཞིག་གནང་དགོས་པ་རེད། ཕྱི་ཟླ་དང་པོའི་ནང་བསྡུ་རུབ་བྱས་པ་དེ་ཟླ་བ་གསུམ་པའི་གྲོས་ཚོགས་ནང་ཕུལ་བའི་སྔོན་རྩིས་ནང་གསལ་ཡོད་ན། དེ་འགལ་བ་ཞེ་དྲགས་མེད་པ་ཞིག་རེད་ཅེས་སྙན་གསེང་ཞུ་བ་ཡིན། འདི་ཚོགས་དངུལ་བསྡུ་རུབ་དང་འབྲེལ་བའི་གནད་དོན་ཞིག་རེད། ད་སྨན་བཅོས་ལྟ་སྐྱོང་གི་ཐོག་ནས་འགྲོ་སོང་ཕྱིན་པ་ཞིག་རེད་དམ་ཟེར་ན་ད་ལྟ་བཏང་ཡོད་པ་མ་རེད། དེ་འདྲའི་ཆ་ནས་འགྲོ་སོང་སྔོན་བཏང་དང་བཀའ་འཁྲོལ་རྗེས་ཞུས་ཀྱི་གནས་བབ་ཅིག་ད་ལྟ་ཆགས་མི་འདུག ཅེས་གསུངས་སོང་།
ཡང་སྤྱི་འཐུས་ཟླ་བ་ཕུན་སྐྱིད་ལགས་ཀྱིས་སྔོན་རྩིས་ནང་རྩེད་ཐང་འཛུགས་སྐྲུན་ཆེད་སྒོར་ས་ཡ་ ༩།༨༩ ཞུས་ཡོད་པ་དང་། གོ་ཐོས་ལྟར་ན་མོན་གྷོ་ས་གནས་ཀྱི་རྩེད་ཐང་ལ་འབུམ་དྲུག་བཀའ་འཁྲོལ་གནང་ཡོད་པ་མ་ཟད། ལས་ཀ་མགོ་བཙུགས་ཚར་ཡོད་ཀྱང་སྤྱི་འཐུས་ནས་བཀའ་འཁྲོལ་གཞི་ནས་གནང་རྒྱུ་ཡིན་པས་འགྲོ་སོང་སྔོན་བཏང་དང་བཀའ་འཁྲོལ་རྗེས་ཞུས་ཆགས་ཀྱི་ཡོད་སྐོར་ཞུས་པ་དེར་དཔལ་འབྱོར་བཀའ་བློན་མཆོག་གིས། དངོས་ཡོད་གནས་སྟངས་ཀྱི་ཆ་ནས་དེ་འདྲ་པོ་ཞིག་ཆགས་འདུག ཡིན་ནའང་། ཞིབ་ཀྱིས་ལྟ་ཡོང་དུས་དེ་འདྲ་རང་རེད་མི་འདུག མོན་གྷོ་ལ་རྐང་རྩེད་སྤོ་ལོའི་རྩེད་ཐང་གཅིག་དང་སིལ་སྤོལ་རྩེད་ཐང་གཅིག་བཅས་རྩེད་ཐང་ཁག་གཉིས་ཡོད་པ་དང་། རྐང་རྩེད་སྤོ་ལོའི་རྩེད་ཐང་དེ་ས་གནས་རང་ནས་དངུལ་ཐབས་ཤེས་བཏང་སྟེ་ཚ་ཚ་འུར་འུར་གྱི་ཐོག་ནས་ལས་འགུལ་སྤེལ་བ་ཞིག་རེད་འདུག རྒྱལ་ཡུམ་ཆེན་མོའི་རྐང་རྩེད་སྤོ་ལོའི་འགྲན་སྡུར་དེ་ཡོང་ལ་ཉེ་བས་མགྱོགས་པོར་ཚར་དགོས་ཀྱི་ཡོད་པ་ཞིག་འགྲེལ་བཤད་གནང་གི་འདུག རོགས་དངུལ་དེའང་ཁོ་རང་ཚོ་ས་གནས་ནས་ཐབས་ཤེས་གནང་བ་ཞིག་རེད་འདུག བཀའ་ཤག་ནས་མར་གསོལ་སྩལ་གནང་རྒྱུའི་སྔོན་རྩིས་རྒྱབ་གཉེར་ཞུས་པ་དེ་སིལ་སྤོལ་རྩེད་ཐང་དེ་རེད། དེའི་ཐོག་ལ་ད་ལྟའི་ཆར་ས་གཤོང་སོགས་གང་ལྟར་ཏོག་ཙམ་ཕྱག་ལས་གནང་འདུག ཕྱག་ལས་གནང་བ་དེ་ས་གནས་རང་ནས་དགོས་དངུལ་སྒོར་འབུམ་ ༣ ཞུས་ཡོད་པ་དེ་འགྲོ་སོང་བཏང་བ་ཞིག་རེད་འདུག ད་ལྟའི་ཆར་སིལ་སྤོལ་གྱི་རྩེད་ཐང་གི་ལས་ཀ་མཚམས་འཇོག་བྱས་ཏེ། དགོས་དངུལ་མ་ཐོན་བར་དུ་ལས་གཞི་མགོ་བཙུགས་མ་ཐུབ་པའི་གནས་བབ་ཅིག་ཆགས་འདུག དེ་འདྲའི་ཆ་ནས་འགྲོ་སོང་སྔོན་བཏང་དང་བཀའ་འཁྲོལ་རྗེས་ཞུས་ཀྱི་གནས་བབ་ཅིག་བྱུང་མི་འདུག ཅེས་གསུངས་སོང་།
སྤྱི་འཐུས་ཟླ་བ་ཕུན་སྐྱིད་ལགས་ཀྱིས་སྔོན་མ་ཕོགས་རིམ་བསྐྱར་ཞིབ་ཚོགས་ཆུང་གི་སྙན་ཐོ་ཕུལ་བ་འཛིན་སྐྱོང་བཀའ་ཤག་གིས་རྩིས་མེད་བཏང་བ་རེད། ལས་བྱེད་ཀྱི་གསོལ་ཕོགས་དེ་བར་བརྒལ་ངལ་སེལ་བརྒྱ་ཆ་ ༣༢ གནང་ཡོད་པ་དང་། མཛད་གཙོ་རྣམ་གྱི་དེ་ཆ་ཚང་རྩ་ཕོགས་ལ་བསྣན་ཏེ་གསོལ་ཕོགས་སྤར་བ་རེད། ལས་བྱེད་ལ་སྤར་མེད་པས་སྤར་དགོས་ཀྱི་འདུག་ཟེར་ནས་མང་པོས་གསུང་སྐད་བསྐྱོན་ཡོད་ཀྱང་ད་ལྟའི་བར་དུ་བྱུང་མེད་ལ། སྐབས་དེར་འཛིན་སྐྱོང་བཀའ་ཤག་ནས་ ༢༠༡༨ བར་དུ་ཕོགས་རིམ་བསྐྱར་ཞིབ་ཚོགས་ཆུང་འཛུགས་རྒྱུ་མིན་ལ་གསོལ་ཕོགས་སྤར་གྱི་མིན་གསུངས་ཡོད་ཀྱང་། ཉེ་སྔོན་འོས་བསྡུའི་ལས་རིམ་གྱི་སྐབས་སུ་ཨ་རི་ལ་སྲིད་སྐྱོང་མཆོག་ནས་ལས་བྱེད་ལ་བརྒྱ་ཆ་ ༥༠ སྤར་རྒྱུ་དང་། འཕྲོད་བསྟེན་ལས་ཁུངས་ཀྱི་ལས་བྱེད་ལ་བརྒྱ་ཆ་ ༧༠ སྤར་རྒྱུ་ཡིན་སྐོར་གསུངས་ཡོད་པ་དེ་སྔོན་རྩིས་ཀྱི་འགྲོ་སྟངས་ཐོག་ནས་འགྲིག་མེད་སྐོར་བརྗོད་པ་དེར་དཔལ་འབྱོར་བཀའ་བློན་མཆོག་གིས་གསུངས་དོན། གནད་དོན་དེའི་སྐོར་ལ་ཚོགས་དུས་ ༦ པའི་ཐོག་གླེང་སློང་ཤུགས་ཆེན་པོ་བྱུང་བ་རེད། དེ་དང་མཉམ་དུ་བཀའ་ཤག་གིས་གསལ་པོ་བྱས་ཏེ་ཞུས་པ་ཞིག་ལ། བོད་མིའི་སྒྲིག་འཛུགས་ཀྱི་དཔལ་འབྱོར་གནས་བབ་ཀྱི་ཆ་ནས་ཡིན་ནའང་ལམ་སང་ཡོང་ཐབས་མེད་པ་ཞིག་ཡིན་པ་ཞུས་ཡོད་ལ། བཀུར་འོས་སྤྱི་འཐུས་མཆོག་གིས་གསུངས་བའི་ཕྱི་ལོ་ ༢༠༡༨ ལོའི་བར་དུ་སྤར་རྒྱུ་མིན་ཟེར་བ་དེ་གསུངས་ཡོད་པ་རེད། དེ་དང་མཉམ་དུ་བོད་མིའི་སྒྲིག་འཛུགས་ཀྱི་དཔལ་འབྱོར་གནས་བབ་ཀྱི་ཆ་ནས་ལམ་སང་ཕོགས་རིམ་བསྐྱར་ཞིབ་ཚོགས་ཆུང་འཛུགས་པའི་གནས་བབ་ཡོང་གི་མི་འདུག་ཅེས་ཀྱང་ཞུས་ཡོད་པ་རེད། གང་ལེགས་ཞེ་ན། བར་བརྒལ་ངལ་སེལ་དེ་ཕོགས་རིམ་བསྐྱར་ཞིབ་ཚོགས་ཆུང་བཙུགས་ཏེ་རྩ་ཕོགས་ཏུ་བསྒྱུར་བ་ཡིན་ན་རང་བཞིན་གྱིས་ཟླ་བ་ ༦ རེར་ཡུལ་ཐང་གུན་གསབ་འབུལ་རྒྱུ་དེ་ཤུགས་ཆེན་པོ་འཕར་གྱི་ཡོད་པ་རེད། དེ་འདྲའི་ཆ་ནས་ཡོང་གི་མི་འདུག་ཅེས་སྙན་གསེང་ཞུས་ཡོད་པ་རེད།
ད་ལྟའི་ཆར་ཚོད་དཔག་འཆར་རྩིས་ཚོགས་ཆུང་གི་སྙན་ཐོའི་ནང་ཡོད་པ་དང་། བཀུར་འོས་སྤྱི་འཐུས་གཅིག་གཉིས་ཤིག་གིས་གྲོས་ཚོགས་ནང་དུ་གསལ་བཤད་གནང་བ། དེ་ཚོར་བཀའ་ཤག་གིས་དགོངས་བཞེས་གནང་བ་བཅས་ཕྱོགས་བསྡོམས་ཀྱི་གནས་སྟངས་ཐོག་ནས་བཀའ་ཤག་ལ་ད་ལྟའི་ཆར་ཕོགས་རིམ་བསྐྱར་ཞིབ་ཚོགས་ཆུང་ཞིག་བཙུགས་པ་ཡིན་ནའང་། དབུ་འཛུགས་གཏམ་བཤད་ནང་གསལ་པོ་བྱས་ཏེ་བཀོད་པ་ལྟར་ཚོགས་ཆུང་གི་རྒྱབ་གཉེར་ལ་འོས་འཚམ་གྱིས་བཀའ་ཤག་ལ་དགོངས་བཞེས་གནང་བའི་དཔལ་འབྱོར་གྱི་གནས་བབ་ཅིག་དང་། བར་བརྒལ་ངལ་སེལ་དེ་ཕོགས་རིམ་བསྐྱར་ཞིབ་ཚོགས་ཆུང་གིས་རྩ་ཕོགས་ལ་བསྒྱུར་བའི་རྒྱབ་གཉེར་གནང་གི་ཡོད་ན། དེ་གནང་བ་ལ་རྐྱེན་བྱས་ཏེ་རྩ་ཕོགས་གསར་པའི་དབང་དུ་བཏང་སྟེ་ཡུལ་ཐང་གུན་གསབ་ཟླ་བ་ ༦ རེར་འཕར་འབབ་ག་ཚོད་ཡོད་ནའང་དེ་རྒྱག་ཐུབ་པའི་དཔལ་འབྱོར་གྱི་གནས་བབ་ཡོད་པ་ཅིག་བཀའ་ཤག་གིས་གཟིགས་ཀྱི་ཡོད་པ་རེད། དེ་འདྲའི་ཆ་ནས་ད་རེས་ཕོགས་རིམ་བསྐྱར་ཞིབ་ཚོགས་ཆུང་བཙུགས་ཏེ་ཕོགས་རིམ་བསྐྱར་ཞིབ་གནང་གི་ཡིན་ཟེར་བའི་རྒྱབ་ལྗོངས་ཡོང་སྟངས་དེ་འདྲ་ཞིག་རེད། ཅེས་གསུངས་སོང་།
སྤྱི་འཐུས་གསེར་རྟ་ཚུལ་ཁྲིམས་ལགས་ཀྱིས་རྩིས་ལོ་ ༢༠༡༦ དང་ ༢༠༡༧ ལོའི་སྔོན་རྩིས་ནང་དབུ་མའི་ལམ་གྱི་ཐབས་ལམ་སྐོར་ཕྱི་ནང་མང་ཚོགས་ལ་ངོ་སྤྲོད་ལས་འགུལ་མུ་མཐུད་སྤེལ་ཆེད་སྒོར་༤༠༣༨༠༠༠༠༠ བཀའ་ཁྲོལ་ཞུས་ཡོད་པ་དང་། ས་ཡ་བཞི་བརྒྱ་གསུམ་ཟེར་བ་དེ་ཧ་ཅང་མང་པོ་རེད་ལ། ལྷག་པར་དུ་བོད་མིའི་སྒྲིག་འཛུགས་ཀྱི་གནས་བབ་ཐོག་ནས་དེ་ལས་ཀྱང་མང་པོ་ཡིན་པས། ལས་དོན་དེ་གཙོ་བོ་ག་རེ་ག་རེ་ཡིན་པ་དང་། བོད་རྒྱ་འབྲེལ་མོལ་དང་བོད་ཀྱི་གནད་དོན་ཐག་གཅོད་བྱེད་མ་ཐུབ་པའི་དཀའ་གནད་ཆེ་ཤོས་དེ་བོད་པས་དབུ་མའི་ལམ་མ་ཤེས་པའི་དཀའ་ངལ་གྱིས་བྱུང་བ་རེད་དམ། ཡང་ན་རྒྱ་གཞུང་ལ་གོ་བརྡ་མ་འཕྲོད་པས་བྱུང་བ་རེད། ད་ལྟའི་གནང་སྟངས་གནང་ལུགས་མང་པོ་ཞིག་ལ་བལྟས་ཡོང་ན་ཕལ་ཆེར་བོད་པས་དབུ་མའི་ལམ་མ་ཤེས་པའི་རྒྱུ་མཚན་ལ་བརྟེན་ནས་བྱུང་བ་མིན་འགྲོ་བསམ་པའི་ཚོར་སྣང་ཡོང་གི་ཡོད་སྟབས། དོན་ངོ་མར་དཀའ་ངལ་དེ་གང་ལ་ཐུག་ཡོད། ཅེས་དྲིས་པའི་ལན་དུ་དཔལ་འབྱོར་བཀའ་བློན་མཆོག་གིས། དེ་བོད་དོན་ཆབ་སྲིད་ཀྱི་ལས་དོན་ཐོག་ལ་འགྲོ་སོང་གཏོང་བའི་ཕྱོགས་བསྡོམས་མ་དངུལ་ཁྱོན་ས་ཡ་ ༤༠༣༨༠༠༠༠༠ རེད། དེའི་ནང་ནས་དབུ་མའི་ལམ་གྱི་ལས་དོན་ཁྱབ་སྤེལ་བྱེད་པ་དེར་ས་ཡ་གཅིག་དང་བཞི་འབུམ་ ༡༤༠༠༠༠༠ རྒྱབ་གཉེར་ཞུས་ཡོད། དེ་དང་མཉམ་དུ་བཀའ་འདྲི་གཅིག་དེ་དབུ་མའི་ལམ་གྱི་ཐོག་ང་རང་ཚོ་བོད་རིགས་ནང་ལོགས་ལ་ད་དུང་གོ་རྟོགས་མ་ཐུབ་པའི་གནས་བབ་ཅིག་ཡོད་པ་རེད་དམ་ཞེས་བཀའ་འདྲི་གནང་སོང་། དེ་ཡོད་པ་ཡིན་ས་རེད། སྔོན་མ་གྲོས་ཚོགས་ནང་ལའང་དེའི་སྐོར་ནས་གྲོས་བསྡུར་རིམ་པར་བྱུང་བ་རེད་ལ། ཕྱག་རོགས་ལས་ཁུངས་མཉམ་ཞུགས་བྱེད་པའི་སྐབས་སུའང་མང་པོས་གོ་རྟོགས་ཡག་པོ་མི་འདུག་ཅེས་གསུངས་ཚུལ་ཐོན་པའི་སྐབས་ལའང་གྲོས་ཚོགས་ནང་ནས་གླེང་སློང་བྱུང་བ་རེད། དྲན་པ་ཏག་ཏག་ཡོད་པ་ཡིན་ན། ལྷག་པར་དུ་ཕྱི་དྲིལ་ལས་ཁུངས་ཀྱི་ངོས་ནས་དབུ་མའི་ལམ་གྱི་གོ་རྟོགས་སྤེལ་ས་དེ་མཐོ་རིམ་སློབ་གྲྭ་ཁག་ནང་འགྲིམ་པའི་ན་གཞོན་ཚོ་རེད་འདུག ད་ལྟ་སློབ་གྲྭ་མང་པོ་ཡོད་པ་དེ་ཚོའི་ནང་ལ་ཕྱི་དྲིལ་ལས་ཁུངས་ད་ལྟ་ཕེབས་ནས་སྐོར་བ་འཁོར་གྱི་ཡོད་ས་མ་རེད། དེར་བརྟེན་སློབ་མ་དེའི་རིགས་སློབ་གྲྭ་ཐོན་ནས་ནར་སོན་ཏེ་མཐོ་རིམ་སློབ་གྲྭའི་ནང་ལ་སློབ་སྦྱོང་བྱེད་པའི་སྐབས་དེར། མཐོ་རིམ་སློབ་གྲྭ་སོ་སོར་ཕེབས་ཏེ་དབུ་མའི་ལམ་གྱི་གོ་རྟོགས་སྤེལ་བ་དེ་གལ་ཆེན་པོ་ཞིག་ཏུ་གཟིགས་ནས་སྤེལ་བཞིན་པ་ཞིག་རེད་འདུག ཅེས་གསུངས་སོང་།
གསར་འགོད་པ། པདྨ་མཚོ།
བཙན་བྱོལ་བོད་མའི་སྤྱི་ཚོགས་ཁྲོད་གོ་རྟོག་དམན་པའི་དཔེ་མཚོན་འདྲ་བོ་ཞིག་ཞུས་ན་ད་ལྟའི་སྲིད་སྐྱོང་གི་མིང་དེ་ཡང་ཤེས་ཀྱི་མི་འདུག་དོ་བདག་གི་མིང་དངོས་སློབ་བཟང་སངས་རྒྱས་ལས་༼བློ་བཟང་སེང་གེ་རེད་མི་འདུག
སྐར་རྟགས་ཅན་གྱི་དྲི་བ་ཚ་པོ་ཚ་པོ།
༸སྐྱབས་མགོན་༸རྒྱལ་བའི་ཅི་ཙམ་གསུངས་ཀྱང་འདྲ། །
བོད་མི་ཉེན་ཚབས་ཅི་ཙམ་ཆེ་ཡང་འདྲ། །
གཟི་བརྗིད་ཁོག་སྟོང་སྲིད་སྐྱོང་བློ་སེང་སོགས། །
སྤྱི་ཚོགས་ཡར་རྒྱས་གཏང་བའི་འཇོན་ཐང་མེད། །