མཚོ་སྣ་ས་ཁུལ་གྱི་མཐའ་སྲུང་རྒྱ་དམག་གི་སྒྲིག་འཛུགས་སྐོར་གླེང་པ།

འདི་གའི་གསར་འགོད་པས་དྷ་རམ་ས་ལའི་དགུ་བཅུ་གསུམ་ལས་འགུལ་ཚོགས་པའི་རྒྱ་ནག་གི་མཐའ་མཚམས་དམག་སྒར་སྐོར་ཉམས་ཞིབ་པ་བསོད་ནམས་རྡོ་རྗེ་ལགས་སུ་གླེང་མོ་བརྒྱུད་རྒྱ་ནག་གི་དམག་སྒར་སྐོར་ལ་རྒྱུས་ལོན་བྱས།

བསོད་ནམས་རྡོ་རྗེ་ལགས་ཀྱིས་ངོ་སྤྲོད་གནང་བ་ལྟར་ན། ཁོང་གི་ཕ་ཡུལ་བོད་ཀྱི་མཐའ་མཚམས་སུ་འཁེལ་བའི་ལྷོ་ཁ་མཚོ་སྣ་རྫོང་བཀྲ་མཐོང་ཤང་ཡིན་པ་དང་། མཚོ་སྣ་རྫོང་ཁོངས་སུ་རྒྱ་ནག་གི་དམག་སྒར་ ‘རང་རྐྱ་འཕེར་བའི་དམག་སྒར’ ཞེས་པའི་རུ་ཤོག་ཨང་གཉིས་པ་ཞིག་ཡོད་པ་དང་། ཁོང་བཀྲ་མཐོང་ཤང་གི་གཞུང་བཙུགས་སློབ་གྲྭ་ནས་ཐོན་སྐབས། མཚོ་སྣ་རྫོང་སྲིད་གཞུང་གི་མངགས་བཀོད་ལྟར་ས་གནས་མི་མང་ལ་དངུལ་ཕྲན་བུ་རེ་སྤྲད་དེ་དམག་ཆས་དབོར་འདྲེན་བྱེད་ཀྱིན་ཡོད་པ་དང་། སྐབས་དེར་ཁོ་རང་ཡང་ལས་ཀ་དེར་ཞུགས་མྱོང་ཡོད་འདུག བསོད་ནམས་རྡོ་རྗེ་ལགས་ཀྱིས་བརྗོད་དོན། “ང་རང་གིས་དངོས་སུ་དམག་སྒར་ལ་ལས་ཀ་ཏོག་ཙམ་བྱས་ཏེ། མཚོ་སྣ་རྫོང་ཁོངས་ཀྱི་དམག་སྒར་ཁག་གི་གནས་ཚུལ་གང་འཚམ་ཤེས་ཀྱི་ཡོད་སྟབས། ད་ལྟ་ང་རང་གིས་ཉམས་ཞིབ་བྱེད་ཡུལ་གྱི་བརྗོད་གཞི་དེ་ང་ལ་ཐད་ཀར་འབྲེལ་བ་ཡོད་པ་ཞིག་རེད།” ཅེས་བརྗོད་སོང་།

བསོད་ནམས་རྡོ་རྗེ་ལགས་ཀྱིས་ངོ་སྤྲོད་གནང་བ་ལྟར་ན། རྒྱ་ནག་ལ་དམག་ཁུལ་ཆེན་པོ་རྒྱ་སྐད་ནང་ཅཱོན་ཟེར་བ་ ༧ ཡོད་པ་དང་། དེའི་ཁྲོད་ཀྱི་ཅཱོན་གཅིག་བོད་ཀྱི་རྒྱལ་ས་ལྷ་སར་བཙུགས་ཡོད་འདུག དམག་ཁུལ་དེའི་ཡན་ལག་རུ་ཤོག་མང་པོ་བོད་ཀྱི་མཐའ་ཚམས་མཚོ་སྣ་དང་ཀོང་པོ། ལྷུན་རྩེ། གྲོ་མོ། མངའ་རིས་སོགས་སུ་བཙུགས་ཡོད་འདུག རྒྱ་ནག་གཞུང་གིས་དམག་ཁུལ་ཅཱོན་གཅིག་གི་ནང་དུ་དམག་མི་ཁྲི་གཅིག་རེ་ཡོད་སྐོར་རྗོད་ཀྱི་ཡོད་ཀྱང་། ཕྱི་ཕྱོགས་ཀྱི་སྲིད་དོན་དབྱེ་ཞིབ་པ་ཚོས་བོད་རང་སྐྱོང་ལྗོངས་ནང་ཉུང་མཐར་དམག་མི་འབུམ་གཅིག་ལྷག་ཡོད་པར་ངོས་འཛིན་བྱེད་བཞིན་ཡོད།

མཚོ་སྣ་རྫོང་གི་དམག་སྒར་ལ་རུ་དཔོན་གཙོ་གཞོན་གཉིས་ཡོད་པ་ལས། རུ་དཔོན་གཉིས་པ་དེ་མཚོ་སྣ་རྫོང་རིམ་པ་དང་པོའི་མགོ་གཙོའང་ཡིན་འདུག རུ་ཤོག་ཨང་གཉིས་པའི་ནང་ཁྱོན་དམག་མི་ ༢༠ ༠ ༠ ལྷག་ཡོད་པ་དང་། དེ་མདའ་ཤོག་ ༡༢ ལ་བགོས་ཏེ་བོད་ཀྱི་མཐའ་མཚམས་སྲུང་གི་ཡོད་འདུག ད་ལྟ་ཀོང་པོར་ཡོད་པའི་དམག་སྡེ་ཨང་ལྔ་གཉིས་པ་དང་། ཨང་ལྔ་གསུམ་པ་དེ་གཉིས་སྔོན་ཆད་ ༡༩༦༢ ལོར་རྒྱ་གར་གྱི་མཐའ་མཚམས་སུ་དམག་རྒྱག་མཁན་དེ་ཡིན་པ་དང་། དམག་སྒར་དེའི་ཡན་ལག་མེ་སྒྱོགས་རུ་ཤོག་གཅིག་རྩེད་ཐང་དུ་བཞག་ཡོད་འདུག་ལ། ལོ་གཉིས་གསུམ་གོང་དམག་སྡེ་ཨང་ལྔ་གཉིས་པའི་ཆ་ཤས་མདའ་ཤོག་གཉིས་མོན་རྟ་དབང་གི་ས་མཚམས་ལི་པུ་ཟེར་ས་དེར་བཏང་ཡོད་འདུག

སྤྱིར་རྒྱ་ནག་གི་མཐའ་མཚམས་སུ་དམག་ཤོག་རིམ་པ་གསུམ་ཡོད་པ་དང་། རིམ་པ་དཀྱིལ་མའི་ནང་ལོ་བཅོ་བརྒྱད་ཐོག་དམག་ཁོངས་སུ་ཞུགས་པ་དང་ལོ་ཉེར་བཞིའི་ཐོག་དམག་ཁོངས་ནས་འཐོན་བཞིན་ཡོད་འདུག དམག་ཤོག་རེ་རེའི་ནང་ལོ་ལྟར་དམག་མི་དྲུག་བཅུ་བདུན་བཅུ་རེ་བསྡུ་བཞིན་ཡོད་པ་དང་། དམག་མི་གསར་པ་ཚོས་ཐོག་མ་དམག་མིའི་རླངས་འཁོར་སྐོར་བ་དང་། རླངས་འཁོར་བཟོ་བ་སོགས་ཀྱི་ལས་བྱེད་ཀྱིན་ཡོད་འདུག རིམ་པ་དཀྱིལ་མའི་ནང་གི་དམག་མི་ཁ་ཤས་ལོ་གསུམ་རིང་དམག་མིའི་སློབ་གྲྭ་ཁག་ཏུ་གཏོང་གི་ཡོད་པ་དང་། སློབ་གྲྭ་ཐོན་རྗེས་དམག་མི་ཉེར་ལྔ་ལས་གྲུབ་པའི་མདའ་ཤོག་གི་མདའ་དཔོན་དུ་བསྐོ་བཞིན་ཡོད་འདུག་ལ། ལོ་གཅིག་གི་རྗེས་སུ་རུ་དཔོན་ལ་བསྐོ་བཞིན་ཡོད་འདུག

བསོད་ནམས་རྡོ་རྗེ་ལགས་ཀྱིས་བརྗོད་དོན། “དགུ་བཅུ་གོ་གྲངས་ནང་རྒྱ་ནག་གི་དམག་མིའི་གླ་ཕོགས་ཞེ་དྲགས་དམའ་བོ་རེད། དམག་མིའི་གྱོན་ཆས་གང་འཚམས་ཡག་པོ་ཡོད་ཀྱང་། ཟླ་གཅིག་ལ་གླ་ཆ་རྒྱ་སྒོར་ ༢༠ ཙམ་རེད། དེང་སྐབས་རུ་དཔོན་ཞིག་ལ་ཟླ་ཕོགས་སྒོར་ཁྲི་གསུམ་ལྷག་ཡོད་པ་དང་། མདའ་དཔོན་ཞིག་ལའང་རྒྱ་སྒོར་སྟོང་ཕྲག་བཅུ་བདུན་བཅོ་བརྒྱད་རེད། དམག་མི་ཚོའི་ཟ་མ་ཧ་ཅང་ཡག་པོ་ཡོད་པ་རེད། ཉིན་རེར་ཕག་ཤ་དང་བྱ་ཤ གཡག་ཤ་དང་ཉ་ཤ་སོགས་ཤ་རིགས་སྣ་ཚོགས་རྒྱ་མ་གཅིག་དང་ཕྱེད་ཀ འབྲས་རྒྱ་མ་བདུན། དེའི་ཁར་ཕྱེ་དང་སྣུམ་སོགས་ཡོད་པ་རེད། རྒྱ་ནག་གི་དམག་དཔོན་ཞིག་གིས་ལོ་ ༢༠  རིང་ལས་ཀ་བྱས་ཏེ་རྒན་ཡོལ་ཞུ་དུས་རྒན་ཡོལ་དངུལ་རྒྱ་སྒོར་ཁྲི་ཉིས་བརྒྱ་སུམ་བརྒྱ་ཡོད་པ་དང་། དམག་དཔོན་རེ་ཟུང་གིས་དམག་སྒར་གཅིག་ནས་རྒན་ཡོལ་ཞུས་རྗེས། དམག་ཁུལ་གཞན་ནས་ལས་ཀ་བྱས་ཏེ་མཐའ་མར་དམག་སྒར་གཉིས་ནས་རྒན་ཡོལ་དངུལ་ལེན་མཁན་དེ་འདྲའང་ཡོད་པ་རེད།” “སྔོན་ཆད་རྒྱ་ནག་གི་མཐའ་སྲུང་དམག་མི་ཚོས་རྒྱང་མཐོང་བེད་སྤྱོད་གཏོང་གི་ཡོད་ཀྱང་། ༢༠༠༢ ལོ་ནས་བཟུང་རི་སྒང་དག་ལ་བརྙན་པར་ལེན་སྤྱད་ཀྱི་འཕྲུལ་ཆས་རིགས་བཙུགས་ཏེ། མཐའ་མཚམས་ཀྱི་གནས་སྟངས་ཚང་མ་བརྙན་པར་བླངས་ཏེ། དམག་སྒར་ཁག་ཏུ་གློག་ཀླད་ནང་ལྟ་ཞིབ་བྱེད་ཀྱིན་ཡོད་པ་རེད།” ཅེས་བརྗོད་བྱུང་།

མཚོ་སྣ་རྫོང་ས་ཁུལ་གྱི་བོད་མི་ཚོ་རྒྱ་དམག་གི་གཡོ་འོག་ཏུ་ཚུད་ཀྱི་ཡོད་སྐོར་བརྗོད་དོན། “དགུ་བཅུ་གོ་གྲངས་ལ་མཚོ་སྣ་རྫོང་དུ་རྒྱ་ནག་གི་དམག་མང་པོ་བསླེབས་སྐབས། བོད་ཀྱི་མཐའ་མཚམས་ཁག་ཏུ་རླངས་འཁོར་གྱི་ལམ་ཁ་མེད་སྟབས། ས་གནས་མི་མང་ཚོར་གླ་ཆ་སྤྲད་དེ་དམག་ཆས་དབོར་བ་དང་། དམག་གུར་ཕུབ་པ། ཟ་མ་བཟོ་བ་སོགས་ཀྱི་ལས་ཀ་བྱས་ཏེ་མི་མང་ལ་དངུལ་ཏོག་ཙམ་རག་ཡོད་པ་རེད། ལྷག་པར་དུ་ཕྱིས་སུ་རྒྱ་ནག་གཞུང་གིས་ནུབ་ཕྱོགས་ཀྱི་དམག་སྒར་ཁག་ལ་འགྲོ་གྲོན་ཤུགས་ཆེན་བཏང་སྟེ། གཞུང་ལམ་བཟོ་བ་དང་སྡོད་ཁང་རྒྱག་པ། དམག་སྒར་ཁག་ཏུ་འཕྲུལ་ལས་རིགས་འདྲ་མིན་བཙུགས་པ་བཅས་ལ་བརྟེན་ཏེ། ས་གནས་མང་ཚོགས་རྒྱ་དམག་གི་གཡོག་ལ་བརྒྱུགས་ཏེ་དངུལ་ཡག་པོ་རག་གི་ཡོད་པ་མ་ཟད། རྒྱ་གཞུང་གིས་དམག་སྒར་གྱི་འཚོ་བ་ཡར་རྒྱས་བཏང་བ་དང་བསྟུན་ཏེ་ས་གནས་བོད་མི་ཚོར་ཡང་འབྲས་དང་གྲོ་ཕྱེ། ཤ་དང་སྣུམ་སོགས་གང་འཚམས་རག་སྟེ་མི་མང་པོ་ཞིག་དེ་ལ་མགོ་འཁོར་ནས་བསྡད་ཡོད་པ་རེད།” ཅེས་བརྗོད་བྱུང་།

“ ཡིན་ནའང་ཕྱོགས་ཆེ་ས་ནས་བལྟས་ན་བོད་པ་ཚོར་གྱོང་ཆེན་པོ་ཞིག་རེག་གི་ཡོད་པ་གསལ་བོ་རེད། བོད་པའི་མཐའ་མཚམས་དམག་སྒར་ཁག་འཛུགས་སྐྲུན་རྒྱ་སྐྱེད་བྱས་པ་དང་བསྟུན་ཏེ། ས་རྐོ་རྡོ་སློག་གིས་རྩྭ་ས་མང་པོ་འཕྲོག་བརླག་ཏུ་གཏོང་གི་ཡོད་པ་དང་། མཚོན་ཆ་སྣ་ཚོགས་བེད་སྤྱོད་ཀྱིས་དམག་སྦྱོང་བྱས་ཏེ། མཁའ་དབུགས་དང་རྒྱུག་ཆུ། དེ་བཞིན་རང་བྱུང་ཁོར་ཡུག་སོགས་ལ་གཏོར་བརླག་ཚབས་ཆེན་བཏང་བ་ལ་བརྟེན་ཏེ། ས་གནས་བོད་མི་ཚོའི་ཕྱུག་ཟོག་ལ་ཤི་སྐྱོན་དང་། མིའི་འཕྲོད་བསྟེན་ལའང་གནོད་སྐྱོན་ཚབས་ཆེན་བཟོ་བཞིན་ཡོད་པ་རེད། དཔེར་ན། ལྷ་སར་འགྲོ་སའི་ཆུ་ཤུལ་སྣེ་གདོང་ལྷ་ཆེན་པོ་ཞེས་རི་བོ་ཆེན་པོ་ཞིག་ཡོད་པ་རེད། བརྒྱད་བཅུ་གྱ་གྲངས་ནས་གནས་རི་དེ་བསྐོས་པ་རེད། རྗེས་སུ་རི་དེའི་སྒང་དུ་རྩ་སྐྱེ་རྒྱུ་མེད་པ་ཆགས་སོང་། ས་གནས་མང་ཚོགས་ཀྱིས་རི་དེའི་ཁོག་པར་རྒྱ་དམག་གི་མཚོན་ཆ་འབོར་ཆེན་སྦུས་ཡོད་པའི་ཚོད་དཔག་བྱེད་ཀྱིན་ཡོད་པ་རེད།” ཅེས་བརྗོད་བྱུང་།

མཚོ་སྣ་རྫོང་གི་དམག་གི་ལས་འགན་སྐོར་ངོ་སྤྲོད་གནང་དོན་ལྟར་ན། མཚོ་སྣ་རྫོང་ལ་རྫོང་དཔོན་གཉིས་ཡོད་པ་དང་། རྫོང་དཔོན་གཞོན་པ་དེས་དམག་ཁུལ་གྱི་ཐོན་ཀྲང་གཞོན་པའི་འགན་ཡང་གཅིག་ལྕོག་འཁུར་གྱི་ཡོད་འདུག ཁོའི་འོག་ཏུ་དམག་མི་ ༢༠༠༠ ལྷག་ཡོད་ཅིང་། དེ་དག་གི་ལས་འགན་གཙོ་བོ་མཐའ་མཚམས་སྲུང་རྒྱུ་དེ་ཡིན་ཞིང་། མཐའ་སྲུང་དམག་སྒར་གྱི་འོག་ཏུ་ཡུལ་དམག་ཟེར་བ་ཞིག་ཀྱང་ཡོད་འདུག མཚོ་སྣ་ས་ཁུལ་དུ་དམག་སྒར་དང་སྤྱི་བདེ་ཉེན་རྟོག་ཁང་གི་ལས་འགན་ཕན་ཚུན་མཉམ་འབྲེལ་ཡིན་པ་དང་། མཐའ་སྲུང་དམག་སྒར་འོག་ཏུ་སྤྱི་བདེ་མངགས་གཏོང་ཁང་ཡོད་པ་དང་། སྤྱི་བདེ་མངགས་གཏོང་ཁང་གི་འོག་ཏུ་དྲག་ཆས་ཉེན་རྟོག་དཔུང་དམག་ཡོད་འདུག དྲག་ཆས་ཉེན་རྟོག་དཔུང་དམག་འོག་ཏུ་ཉེན་བརྡ་ཁང་ཟེར་བ་ཞིག་ཀྱང་ཡོད་པ་དང་། ཉེན་རྟོག་པ་ཚོས་ཉེས་ཅན་སུ་ཞིག་འཛིན་བཟུང་བྱས་ན་དྲག་ཆས་ཉེན་རྟོག་ཁང་ལ་རྩིས་སྤྲོད་བྱེད་ཀྱིན་ཡོད་འདུག

གསར་འགོད་པ། པདྨ་རྒྱལ།