ད་ལྟ་རྒྱ་ནག་གི་ཚེ་བཙོན་འོག་ཡོད་པའི་ལིན་ཅི་ཧྭ་ཡི་ནུ་བོ་ཧྲན་ཞི་ཞིང་ཆེན་མི་མང་སྲིད་གྲོས་ཀྱི་ཚོགས་གཞོན་ལིན་ཀྲིང་ལ་ཞིབ་བཤེར་བྱས་སྐབས་རྒྱ་སྒོར་ས་ཡ་ ༡༦ གི་ལྐོག་རྔན་བླངས་པ་ངོས་ལེན་བྱས་ཡོད་འདུག
ཧྲང་ཧེ་གྲོང་ཁྱེར་གྱི་ཉེན་རེའི་གསར་འགྱུར་ཁང་གིས་གནས་ཚུལ་སྤེལ་བ་ལྟར་ན། ཁ་སང་རྒྱ་ནག་ལྷོ་རྒྱུད་ཅང་སུ་ཞིང་ཆེན་ཁྲང་ཀྲོ་ (Changzhou) གྲོང་ཁྱེར་མི་མང་ཞིབ་བཤེར་ཁང་ (People’s Procuratorate of Changzhou) གིས་རྒྱ་ནག་བྱང་རྒྱུད་ཧྲན་ཞི་ཞིང་ཆེན་གྱི་མི་མང་སྲིད་གྲོས་ཀྱི་ཚོགས་གཞོན་ཟུར་བ་ལིན་ཀྲིང་ (Ling Zhengce) གིས་ལྐོག་རྔན་བླངས་པའི་དོགས་གཞིའི་འོག་ཞིབ་བཤེར་བྱས་སྐབས། ཁོས་དེ་སྔོན་རྒྱ་སྒོར་ས་ཡ་ ༡༦ གི་ལྐོག་རྔན་བླངས་པ་དང་། ལྐོག་རྔན་དེ་དག་ཁེ་ལས་མཉམ་འབྲེལ་དང་དཔོན་གནས་སྤོར་བ་སོགས་ཀྱི་གོ་དབང་སྤྱད་དེ་བླངས་པ་ངོས་ལེན་བྱས་རྗེས། མི་མང་ཞིབ་བཤེར་ཁང་གིས་ཁོ་རང་ཁྲང་ཀྲོ་གྲོང་ཁྱེར་འབྲིང་རིམ་མི་མང་ཁྲིམས་ཁང་ལ་རྩིས་སྤྲོད་བྱས་ཡོད་འདུག
ལིན་ཀྲིང་ལ་ནུ་བོ་ ༣ དང་སྲིང་མོ་གཅིག་བཅས་ཡོད་པའི་གྲས་ནས་ཁོ་རང་ཆེ་བ་དེ་ཡིན་ཞིང་། ཕྱི་ལོ་ ༢༠༠༨ ནས་ ༢༠༡༤ བར་ཁོས་ཧྲན་ཞི་ཞིང་ཆེན་མི་མང་སྲིད་གྲོས་ཀྱི་ཚོགས་གཙོ་གཞོན་པ་དང་འཐབ་ཕྱོགས་གཅིག་གྱུར་ཁང་གི་ཚོགས་གཞོན། དེ་བཞིན་ཧྲན་ཞི་ཞིང་ཆེན་སྤྱི་ཚོགས་འཕེལ་རྒྱས་དང་བཅོས་བསྒྱུར་ཚོགས་ཆུང་གི་ཚོགས་གཙོ་བཅས་ཀྱི་གོ་དབང་ཁུར་ཡོད་པ་དང་། ཕྱི་ལོ་ ༢༠༡༤ ལོའི་ཟླ་ ༦ ནས་ཁྲང་ཀྲོ་གྲོང་ཁྱེར་མི་མང་ཞིབ་བཤེར་ཁང་ནས་ཁོའི་ལྐོག་ཟ་རུལ་སུངས་ཀྱི་ཉེས་དོན་ཐད་ཞིབ་བཤེར་བྱེད་མགོ་བཙུགས་ཡོད་འདུག
ཐེངས་འདིར་ཞིབ་བཤེར་འོག་ཚུད་པའི་ལཱིན་ཀྲིང་ནི། དེ་སྔའི་རྒྱ་ནག་གི་སྲིད་འཛིན་ཟུར་བ་ཧུའུ་ཅིན་ཐའོ་ཡི་ཆབ་སྲིད་སློབ་སྟོན་པ་དང་རྒྱ་ནག་དམར་ཤོག་འཐབ་ཕྱོགས་གཅིག་གྱུར་ཁང་གི་གཙོ་འཛིན་ལིན་ཅི་ཧྭ་ (Ling Jihua) ཡི་ཕུ་བོ་ཡིན་འདུག ལིན་ཅི་ཧྭ་ད་ལོའི་ཕྱི་ཟླ་ ༥ ཚེས་ ༢ ཉིན་ལིན་ཇེ་ཧྭ་ཡིས་རྒྱ་སྒོར་ས་ཡ་ ༧༧ ལྐོག་ཟ་བྱས་པ་དང་། ཏང་གི་དབང་ཤུགས་རྡོག་རོལ་དང་རྒྱལ་ཁབ་ཀྱི་གསང་བ་རྐུ་འཁྱེར་བྱས་པ་སོགས་ཀྱི་ནག་ཉེས་འོག་ཚེ་བཙོན་གྱི་ཁྲིམས་ཐག་བཅད་ཡོད་པ་དང་། ཁོའི་ནུ་བོ་ལིན་ཝན་ཁྲིང་ (Ling Wancheng) ནི་ཚོང་པ་ཞིག་ཡིན་ཞིང་། ཁོ་ཡང་ལྐོག་ཟ་རུལ་སུངས་ཀྱི་ཉེས་དོན་དང་འབྲེལ་བའི་ཞིབ་བཤེར་སྐབས་སུ་ཨ་རིར་བྲོས་བྱོལ་དུ་ཕྱིན་ཡོད་འདུག
གསར་འགོད་པ། པདྨ་རྒྱལ།
