སོ་སོའི་ཕ་མེས་ཀྱི་ཆོས་ལ་འགྱུར་བ་མ་བཏང་ན་ལེགས།

༧གོང་ས་མཆོག་གིས་ཉི་ཧོང་བ་ཚོས་ཆོ་ག་ཙམ་བཏོན་ནས་འགྲོ་བ་ལས་ཆོས་ལ་སློབ་སྦྱོང་བྱེད་གལ་ཆེ་སྐོར་དང་། རྒྱ་རིགས་ཚོར་ཡང་སོ་སོའི་ཕ་མེས་ཀྱི་ཆོས་ནང་ཆོས་ཡིན་སྟབས་ཤེས་རབ་སྙིང་པོར་སློབ་སྦྱོང་བྱ་གལ་ཆེ་སྐོར་གསུངས་འདུག

ཕྱི་ཟླ་ ༡༡ པའི་ཚེས་ ༨ ཉིན་ནས་བཟུང་༧གོང་ས་རྒྱལ་བ་རིན་པོ་ཆེ་མཆོག་ཉི་ཧོང་ནང་མཛད་འཕྲིན་སྐྱོང་བཞིན་ཡོད་ཅིང་། ཚེས་ ༩  ཉིན་ཉི་ཧོང་གི་གྲོང་ཁྱེར་ཀྱོ་ཏོའི་ Kyoto ནང་གི་ཧོན་གན་ཇི་ Honganji Temple ནང་པའི་དགོན་པར་ཕེབས་ཏེ་ནང་ཆོས་ཀྱི་སྙིང་བོ་ཞེས་པའི་ཐོག་བཀའ་སློབ་བསྩལ་ཡོད།

སྐབས་དེར་ཁོང་གིས། ཉི་ཧོང་ཆོས་གྲོགས་མང་པོ་ཞིག་གིས་ང་ཚོ་བོད་ཀྱི་དགོན་སྡེ་རིགས་མང་པོ་ཞིག་གིས་ཆོ་ག་བཏོན་ནས་འགྲོ་བཞིན་ཡོད་པ་ལྟར་བྱེད་བཞིན་ཡོད་བཟོ་འདུག ཆོ་ག་འདོན་ནས་འགྲོ་རྒྱུའི་ལམ་སྲོལ་དེ་སྔ་མོའི་ལམ་སྲོལ་ཞིག་ཆགས་ཡོད། ད་ཆ་ང་ཚོས་དུས་རབས་ ༢༡ ནང་པ་བྱེད་དགོས་པ་བརྗོད་སྐབས། སངས་རྒྱས་པའི་ཆོས་པ་རེད། ཅེས་བརྗོད་སྐབས་སངས་རྒྱས་དཀོན་མཆོག   ཆོས་དཀོན་མཆོག  དགེ་འདུན་དཀོན་མཆོག བཅས་ངོ་ཤེས་པ་བྱེད་དགོས། དཀོན་མཆོག་གསུམ་ངོ་ཤེས་པར་ཆོས་དཀོན་མཆོག་ངོ་ཤེས་དགོས། ཆོས་དཀོན་མཆོག་ངོ་ཤེས་པར་འགོག་བདེན་དང་ལམ་བདེན་གྱི་རྣམ་གཞག་ཤེས་དགོས་པ་རེད། དེར་བརྟེན་སློབ་སྦྱོང་ཕྲན་བུ་མ་བྱས་ན། འགོག་བདེན་ལམ་བདེན། ཞེས་ཚིག་ཙམ་བརྗོད་ན་ཕན་རྒྱུ་མེད། དེ་ཚོ་ཤེས་པ་དགོས། ངོ་ཤེས་དགོས། ང་ཚོ་ཚང་མས་ཤེས་རབ་སྙིང་པོ་འདོན་བཞིན་ཡོད། ཤེས་རབ་སྙིང་པོའི་སྟོང་ཉིད་སྒོམ་སྟངས་གསུང་མེད། གཙོ་བོ་ཤེས་རབ་གོང་འཕེལ་གཏོང་དགོས་སྐོར་གསུངས་ཡོད། དད་པ་བྱོས་ཞེས་གསུང་མེད། ཟབ་མོ་སྣང་བ་ཞེས་བྱ་བའི་ཏིང་ངེ་འཛིན་ལ་མཉམ་པར་ཞུགས་ནས་འཕགས་པ་སྤྱན་རས་གཟིགས་དབང་ཕྱུག་ཕུང་པོ་ལྔ་པོ་དེ་དག་ལའང་རང་བཞིན་གྱི་སྟོང་པ་གཟིགས་ནས་དེའི་ཐོག་ལ་དགོངས་པ་བཞེས།

དེའི་ཐོག་ནས་ཤ་རིའི་བུ་དང་དྲི་བ་དྲིས་ལན་གནང་སྐབས། ཕུང་པོ་ལྔ་པོ་དེ་དག་ཀྱང་རང་བཞིན་གྱིས་སྟོང་པ་རྣམ་པར་རྗེས་སུ་ལྟའོ། གཟུགས་སྟོང་པའོ། སྟོང་པ་ཉིད་གཟུགས་སོ། གཟུགས་ལས་སྟོང་པ་ཉིད་གཞན་མ་ཡིན། སྟོང་པ་ཉིད་ལས་ཀྱང་གཟུགས་གཞན་མ་ཡིན་ནོ། འདི་འདྲ་བྱས་ནས་འགོ་འཛུགས་གནང་ཡོད། ཤེས་རབ་སྙིང་པོའི་བརྗོད་བྱ་གཙོ་བོ་འདི། སྟོང་ཉིད་ཀྱི་ལྟ་བ་འཆད་བཞིན་ཡོད། སྟོང་ཉིད་ཀྱི་ལྟ་བ་འདི་བསྒོམས་ནས་དམིགས་ཡུལ་གང་ཡིན། ཞེས་པའི་དྲི་བ་དེའི་ལན་དུ། ཏདྱ་ཐཱ། ག་ཏེ་ག་ཏེ། པཱ་ར་ག་ཏེ། པཱ་ར་སཾ་ག་ཏེ་། བོ་དྷི་སྭཱ་ཧཱ། ཞེས་པ་དེས་བློ་རིམ་གྱིས་སྦྱང་ནས་ཚོགས་ལམ། སྦྱོར་ལམ། མཐོང་ལམ། སྒོམ་ལམ། མི་སློབ་ལམ། ཞེས་པ་འདི་ཡོང་བཞིན་ཡོད།

དེར་བརྟེན་ཤེས་རབ་སྙིང་པོ་འདི་ཤེར་ཕྱིན་གྱི་གཞུང་བསྡུས་པ་ཞིག་ཆགས་ཡོད། ཤེར་ཕྱིན་གྱི་གཞུང་མང་པོ་ཡོད། ཤེར་ཕྱིན་གྱི་བརྗོད་བྱ་གཙོ་བོ་འདི། དངོས་བསྟན་སྟོང་ཉིད་དང་སྦས་དོན་མངོན་རྟོགས་བཅས་གཉིས་ཡིན། དངོས་བསྟན་སྟོང་ཉིད་ཀྱི་རིམ་པ་འདི་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་རིག་ཚོགས་དྲུག ལྷག་པར་དུ་དབུ་མ་རྩ་བ་ཤེས་རབ་ནང་དུ་ཧ་ཅང་གསལ་པོ་ཡོད། སྦས་དོན་མངོན་རྟོགས་ཀྱི་རིམ་པ་དེ་དག་བྱམས་པ་མགོན་པོའི་མངོན་རྟོགས་རྒྱན་ནང་གཙོ་བོ་བྱམས་ཆོས་སྡེ་ལྔ། དེའི་ནང་ནས་མངོན་རྟོགས་རྒྱན་ཧ་ཅང་གལ་ཆེན་པོ་ཆགས་ཡོད། ཅེས་སོགས་གསུངས་འདུག

ཕྱི་ཚེས་ ༡༣ ཉིན། ཉི་ཧོང་གི་གྲོང་ཁྱེར་ཨོ་ས་ཀའི་ནང་སྤྱོད་འཇུག་ཆེན་མོའི་བཀའ་ཆོས་ཀྱི་སྔོན་དུ་རྒྱ་རིགས་ ༡༥༠ ཙམ་ལ་བཀའ་སློབ་གནང་དོན། དེ་སྔ་སྐབས་ཤིག་ཡུ་རོབ་ཆོས་ཚོགས་དེ་འདྲ་ཁ་ཤས་ཀྱིས་ངོས་རང་སྐད་བཏང་བྱུང་། སྐབས་དེར་ངོས་ནས་ཡུ་རོབ་ནི་གཙོ་བོ་ཡེ་ཤུ་དང་ཇུ་ཌོ་ཁི་རི་ཤི་ཊེན་ Judo-Christianity ཆོས་ལུགས་ཕ་མེས་ནས་ཉམས་ལེན་བྱེད་མཁན་ཞིག་ཡིན་སྟབས། རང་གི་ཆོས་ལུགས་འགྱུར་བ་སོགས་བྱས་ན་འོས་འཚམས་ཤིག་མེད་སྐོར་བརྗོད་པ་ཡིན། ཕྱོགས་མཚུངས་ཐེངས་ཤིག་ངོས་རང་སོག་ཡུལ་དུ་བསྐྱོད་སྐབས་ཁུལ་དེར་ཀོ་རི་ཡའི་ཡེ་ཤུའི་ཆོས་པ་ཁག་གཅིག་ཡི་ཤུའི་ཆོས་ཁྱབ་སྤེལ་གཏོང་ཆེད་བསླེབས་འདུག་པ་ཁོང་ཚོ་ངོས་རང་ཐུག་པར་བསླེབས་བྱུང་།  སྐབས་དེར་ངོས་ནས་ཁོང་རྣམས་ལ་སོག་ཡུལ་ནི་ནང་པའི་རྒྱལ་ཁབ་གཅིག་ཡིན་པར་བརྟེན་ཁུལ་དེར་ཡེ་ཤུའི་ཆོས་ལུགས་སྤེལ་ཐབས་བྱེད་ན་དགེ་མཚན་མེད་སྐོར་དང་།  དེ་ལས་སོག་པོའི་མི་མང་གི་ཤེས་ཡོན་དང་འཕྲོད་བསྟེན་ཐོག་རོགས་རམ་གནང་ཐུབ་ན་ཕན་ཐོགས་ཆེ་བ་ཡོད་པ་དང་།  ངོས་རང་ཉིད་ལ་མཚོན་ནའང་ཆོས་ལུགས་བརྗེ་འགྱུར་གྱི་བྱ་སྤྱོད་དེ་རིགས་རྩ་བ་ནས་སྤེལ་གྱི་མེད་སྐོར་བརྗོད་པ་ཡིན།

ཡང་སྐབས་ཤིག་ཕ་རན་སི་ཡུལ་དུ་འཇར་མན་ཕྱུག་བདག་གཅིག་གིས་ཕ་རན་སིའི་ཡུལ་དུ་ནང་པའི་དགོན་པ་ཧ་ཅང་ཆེན་པོ་ཞིག་བརྒྱབ་རྒྱུའི་འཆར་གཞི་ཡོད་སྐོར་བརྗོད་བྱུང་། སྐབས་དེར་ངོས་ཀྱིས་ཁོང་ལ་ཕ་རན་སི་ཡུལ་ལ་མཚོན་ན་ནང་པའི་རྒྱལ་ཁབ་ཅིག་མིན་པར་བརྟེན་ནང་པའི་དགོན་པ་ཧ་ཅང་ཆེན་པོ་དེ་འདྲ་བརྒྱབ་པ་ཡིན་ན་རན་པོ་ཞིག་མེད་པ་དང་། ཅི་སྟེ་ཡིན་གཅིག་གིས་ནང་པའི་དགོན་པ་དེ་འདྲ་བརྒྱབ་དགོས་ན་ནང་པའི་རྒྱལ་ཁབ་ཐེ་ལེན་ཌི་དང་ཤྲི་ལངྐཱ། རྒྱ་གར་ལྟ་བུའི་ནང་བརྒྱབ་ཐུབ་ཚེ་དགེ་མཚན་ཆེ་སྐོར་བརྗོད་པ་ཡིན། རྒྱ་རིགས་ཆོས་གྲོགས་ཕོ་མོ་ཁྱེད་རང་ཚོར་མཚོན་ན་ཕ་མེས་ཀྱི་ཆོས་དེ་ནང་པ་རེད། ཤེས་རབ་སྙིང་པོ་འདོན་མཁན་རེད།  དེར་བརྟེན་ནང་ཆོས་ལ་སློབ་གཉེར་བྱེད་དགོས། ཤེས་རབ་སྙིང་པོའི་དོན་དག་གང་ཡིན་པ་དེ་དག་ཤེས་ཐབས་བྱེད་དགོས།

མཛད་རིམ་ལྟར་ན། ༧གོང་ས་རྒྱལ་བ་རིན་པོ་ཆེ་མཆོག་ཟླ་འདིའི་ཚེས་ ༢༨ ཉིན་ཕྱིར་རྒྱ་གར་རྒྱལ་ས་ལྡི་ལི་བརྒྱུད་བཞུགས་སྒར་དྷ་རམ་ས་ལར་ཞབས་སོར་འགོད་རྒྱུ་ཡིན་འདུག

ཐེངས་འདིའི་ཉི་ཧོང་ནང་གི་༧གོང་ས་མཆོག་གི་མཛད་འཕྲིན་དང་འབྲེལ་བའི་པར་རྣམས་བོད་མིའི་སྒྲིག་འཛུགས་དྲ་བ་ལས་བཤུས།