དེ་རིང་བཞུགས་སྒར་ཁུལ་གྱི་བོད་མི་གྲངས་བརྒྱ་ལ་ཏོག་དབྱིབས་འགོག་ཁབ་བརྒྱབ་པ་དང་བསྟུན་མགྱོགས་མྱུར་དྷ་སའི་ཉེ་འཁྲིས་ཀྱི་བོད་མི་ཡོངས་ལ་གང་མགྱོགས་ཏོག་དབྱིབས་འགོག་ཁབ་བརྒྱབ་རྒྱུ་ཡིན་འདུག
ཉེ་སྔོན་སྲིད་སྐྱོང་སྤེན་པ་ཚེ་རིང་མཆོག་ནས་བོད་མི་གང་མང་མང་ལ་ཏོག་དབྱིབས་འགོག་ཁབ་རྒྱག་དགོས་པའི་ལས་འཆར་སྒྲིག་ཡོད་པ་ལྟར། དེ་རིང་དྷ་ས་ཉིན་མོའི་སློབ་གྲྭར་བདེ་ལེགས་སྨན་ཁང་གི་མཐུན་འགྱུར་འོག བཞུགས་སྒར་ཁུལ་གྱི་བོད་མི་ལོ་ན་ ༤༥ ཡན་དང་། ཕྲུ་གུ་ཆུང་ཆུང་ཡིན་པའི་ཨ་མ་སོགས་ཁ་ཚ་དགོས་གཏུག་གི་ཏོག་དབྱིབས་འགོག་ཁབ་རྒྱག་དགོས་པའི་བོད་མི་བརྒྱ་ལ་ཏོག་དབྱིབས་འགོག་ཁབ་དང་པོ་དེ་རྒྱག་གིན་འདུག
འདི་གའི་གསར་འགོད་པས་ཁ་པར་བརྒྱུད་བདེ་ལེགས་སྨན་ཁང་གི་འགན་འཛིན་ཟླ་བ་ཕུན་སྐྱིད་ལགས་སུ་ཏོག་དབྱིབས་འགོག་ཁབ་བརྒྱབ་རྒྱུའི་ལས་གཞི་མགོ་བཙུགས་པའི་བརྒྱུད་རིམ་སྐོར་དྲིས་སྐབས། བརྒྱུད་རིམ་དམིགས་བསལ་མེད་པ་དང་རྒྱ་གར་གྱི་སྨན་ཁང་མང་པོ་ཞིག་ལ་སྔོན་འགོག་ཁབ་རྒྱག་རྒྱུ་མགོ་རྩོམ་གྱི་ཡོད་པ་རེད། ཡིན་ནའང་མི་མང་པོ་ཞིག་གིས་བདེ་ལེགས་སྨན་ཁང་དུ་ཁབ་བརྒྱབ་ན་བློ་བདེ་བ་འདུག་ཟེར་མཁན་ཡོང་གི་འདུག འོན་ཀྱང་དེང་སང་ཁབ་རག་གི་མི་འདུག དེར་བརྟེན་ང་ཚོས་ཁབ་རག་པར་འབད་བརྩོན་བྱེད་ཀྱི་ཡོད། བདེ་ལེགས་སྨན་ཁང་ངོས་ནས་ཁབ་རྒྱག་ཆེད་དུ་ཁབ་རག་གི་ཡོད་པ་ལྟར། འདིའི་གོང་ལ་རྒྱ་གར་གཞུང་ལ་འབྲེལ་བ་བྱས་ཏེ། དེ་རིང་ནས་བོད་པ་ཚོར་ལོགས་སུ་ཁབ་རྒྱག་མགོ་བཙུགས་ཏེ་མི་བརྒྱ་ལ་ཁབ་རྒྱག་གི་ཡོད་ལ་མུ་མཐུད་དེ་ཁབ་རྒྱག་གི་ཡིན། དྷ་རམ་ས་ལའི་མི་མང་ལ་སེམས་ཁྲལ་མི་ཡོང་བའི་ཆེད་དུ་བདེ་ལེགས་སྨན་ཁང་ནས་འགན་འཁྱེར་གྱི་ཡོད་ལ། ཁབ་གང་མང་རག་རྒྱུའི་ཐབས་ཤེས་བྱེད་བཞིན་ཡོད། ཅེས་བརྗོད་བྱུང།
ཡང་ད་ལྟའི་ཆར་དྷ་རམ་ས་ལར་མི་ ༨༠༠༠ ལྷག་ལ་འགོག་ཁབ་རྒྱག་དགོས་དུས་ཟླ་བ་གཅིག་ནང་ལས་འཆར་འདི་ཏག་ཏག་འགྲོ་ཐུབ་མིན་སྐོར་དྲིས་པར་ཁོང་གིས། མི་གྲངས་༨༠༠༠ ལྷག་ལ་འགོག་ཁབ་རྒྱག་ཐུབ་པའི་འབད་བརྩོན་བྱེད་ཀྱི་ཡིན། ཁབ་རག་པ་ཡིན་ན་མི་ ༨༠༠༠ ལྷག་ལ་འགོག་ཁབ་རྒྱག་མི་ཐུབ་པ་ཡོད་པ་མ་རེད། འགོག་ཁབ་མངགས་ནས་བཞག་ཡོད་པ་དང་ཉིན་གཉིས་གསུམ་ནང་ཁབ་རག་པ་ཡིན་ན་བདེ་ལེགས་སྨན་ཁང་རང་གི་ངོས་ནས་རིན་མེད་ཐོག་ནས་འགོག་ཁབ་བརྒྱག་མགོ་བཙུགས་ཀྱི་ཡིན། གལ་ཏེ་བདེ་ལེགས་སྨན་ཁང་ལ་འགོག་ཁབ་མ་རག་ན་རྒྱ་གར་གཞུང་གི་ངོས་ནས་བོད་མི་ཚོར་རིན་མེད་ཐོག་འགོག་ཁབ་རྒྱག་གི་རེད། ཅེས་བརྗོད་བྱུང་།
ཉེ་སྔོན་སྲིད་སྐྱོང་སྤེན་པ་ཚེ་རིང་མཆོག་གིས་སྣེ་ཁྲིད་པའི་འཛིན་སྐྱོང་ངོས་ནས་ཏོག་དབྱིབས་ལས་དོན་ཚོགས་ཆུང་གི་ལས་དོན་བྱེད་ཕྱོགས་ཡོངས་ལ་བསྐྱར་བཅོས་གནང་སྟེ། བོད་མིའི་སྒྲིག་འཛུགས་ངོས་ནས་འབྱུང་འགྱུར་གྱི་དུས་ཚོད་ནང་། བོད་མི་གང་མང་མང་ལ་ཏོག་དབྱིབས་གཉན་རིམས་ཀྱི་འགོག་ཁབ་བརྒྱབ་ཐུབ་པ་གནང་རྒྱུ་ཡིན་གསུངས་པ་ལྟར། ད་ལྟའི་ཆར་བོད་མི་གྲངས་ ༢༦༤༥༡ ལ་ཏོག་དབྱིབས་འགོག་ཁབ་དང་པོ་ཐོབ་ཡོད་པ་དང་མི་གྲངས་ ༡༣༤༢༩ ལ་འགོག་ཁབ་གཉིས་ཀ་ཐོབ་ཡོད་འདུག་ལ། བཞུགས་སྒར་ཁུལ་དུའང་མགྱོགས་མྱུར་ཏོག་དབྱིབས་འགོག་ཁབ་རྒྱག་རྒྱུ་ཡིན་འདུག
གསར་འགོད་པ། བསྟན་འཛིན་ཕུར་བུ།
