ཁ་སང་ཕྱི་ཚེས་ ༨ ཉིན་གྱི་ཉིན་རྒྱབ་ཏུ་བོད་མཚོ་སྔོན་ཞིང་ཆེན་སྐྱེ་རྒུ་མདོའི་རོལ་རྩེད་ཐང་ཆེན་ནས་བོད་མི་སྐྱེས་པ་གསུམ་འཛིན་བཟུང་བྱས་རྗེས་གནས་སྟངས་ཅི་བྱུང་ཤེས་རྟོགས་མི་འདུག
ཟླ་འདིའི་ཕྱི་ཚེས་ ༤ ཉིན་རྒྱ་ནག་གཞུང་གིས་བོད་སྐྱེ་རྒུ་མདོ་རུ། རྒྱ་ནག་དམར་ཤོག་ཚོགས་པ་བཙུགས་ནས་ལོ་ངོ་ ༡༠༠ འཁོར་བའི་མཛད་སྒོ་རྒྱ་ཆེན་པོ་ཚོགས་ཏུ་བཅུག་ཡོད་པ་དང་བསྟུན། ས་གནས་སུ་དམག་མི་མང་པོ་འགྲེམས་འཇོག་བྱས་ཏེ་དམ་དྲག་ཆེན་པོ་བྱས་ཡོད་པ་མ་ཟད། ས་གནས་བོད་མི་ཚོར་གང་འདོད་སྔོག་བཤེར་བྱས་ཏེ་བོད་མི་གསུམ་འཛིན་བཟུང་བྱས་ཡོད་འདུག ད་ལྟའི་ཆར་བོད་མི་དེ་གསུམ་གྱི་གནས་སྟངས་གང་ཡང་ཤེས་རྟོགས་ཐུབ་ཀྱི་མི་འདུག
བོད་མི་གསུམ་འཛིན་བཟུང་བྱེད་སྐབས་དངོས་སུ་མཐོང་མཁན་བོད་མི་ཞིག་གིས་འདི་གའི་གསར་འགོད་པར། ཁ་སང་ཉིན་རྒྱབ་ཁོང་རོལ་རྩེད་ཐང་ཆེན་དུ་ཕྱིན་སྐབས། སྔར་དང་མི་འདྲ་བར་ཞིབ་བཤེར་ས་ཚིགས་ཤིག་གསར་དུ་བཙུགས་ཡོད་པ་མ་ཟད། གསང་བའི་བརྙན་ཆས་ཀྱང་མང་པོ་ཞིག་བཙུགས་འདུག དེ་བཞིན་ཉེན་རྟོག་པའང་མང་པོ་བསླེབས་ཏེ་ཡར་འགྲོ་མར་འགྲོ་བྱེད་མཁན་མི་མང་ལ་ལྟ་བཤེར་ནན་པོ་བྱེད་ཀྱི་འདུག སྐབས་དེར་བོད་མི་གསུམ་ལ་སྔོག་བཤེར་བྱས་རྗེས་ཕྱི་ལོག་ཏུ་ཁྲིད་ཕྱིན་སོང་། རྒྱུ་མཚན་གང་ཡིན་ཤེས་མ་སོང་། མར་ཕྱི་ལོག་ཏུ་བསླེབས་པ་དང་ཐད་ཀར་ལག་ལྕགས་བརྒྱབས་ནས་ཉེན་རྟོག་པ་བཞི་ཡིས། ཕར་ཕྱོགས་སུ་སྔར་ནས་གྲ་སྒྲིག་བྱས་ཏེ་བཞག་ཡོད་པའི་ཉེན་རྟོག་པའི་རླང་འཁོར་ནང་བཅུག་སྟེ་ཁྲིད་ཕྱིན་སོང་། ཞེས་བརྗོད་བྱུང་།
ཡང་ཁོང་གིས། བོད་མི་དེ་གསུམ་གྱིས་མཐུན་སྒྲིལ་གླིང་ཞེས་པའི་ཕྱི་ཕྱོགས་ཀྱི་ཚོགས་པ་ཚོགས་མི་ ༢༠༠ ལྷག་ཡོད་པ་ཞིག་གི་ནང་རོལ་རྩེད་ཐང་གི་པར་རིས་བཏང་བར་རྐྱེན་བྱས་ནས་འཛིན་བཟུང་བྱས་པ་ཡིན་ལུགས་བརྗོད་ཀྱི་འདུག་ཀྱང་། རྒྱུ་རྐྱེན་གཙོ་བོ་གང་ཡིན་གསལ་པོ་ཤེས་རྟོགས་ཐུབ་ཀྱི་མི་འདུག
ཁ་སང་འཛིན་བཟུང་བྱས་པའི་བོད་མི་གསུམ་ནི། རིན་ཆེན་རྡོ་རྗེ་དང་། སྐལ་བཟང་ཉི་མ། ལྷུན་འགྲུབ་བཅས་ཡིན་འདུག་ལ། རིན་ཆེན་རྡོ་རྗེ་ནི་སྡོམ་མདའ་ཡུལ་ཚོ་ནས་ཡིན་ཞིང་གླ་འཁོར་གཏོང་མཁན་ཞིག་ཡིན་འདུག སྐལ་བཟང་ཉི་མ་ནི་རིན་ཆེན་རྡོ་རྗེ་ཡི་གྲོགས་པོ་ཡིན་ལ། ཁོང་སེར་ཤུལ་ནས་ཡིན་འདུག
ཡང་ས་གནས་བོད་མི་ཞིག་གིས། འདི་ལོའི་ཕྱི་ཟླ་ ༧ པའི་ནང་བོད་སྐྱེ་རྒུ་མདོ་ས་ཁུལ་དུ་དམག་མི་དང་ཉེན་རྟོག་པ་མང་པོ་འགྲེམས་འཇོག་བྱས་ཏེ་ལྟ་ཞིབ་དང་སྔོག་བཤེར་འདྲི་རྩད་རིགས་སྔར་ལྷག་བྱས་པར་བརྟེན། ས་གནས་བོད་མི་ཚོར་རང་བཞིན་གྱིས་འཇིགས་སྣང་དང་འགྲོ་འོང་བྱེད་པར་འཛེམས་དོགས་བྱེད་དགོས་པའི་གནས་སྟངས་བཟོས་ཡོད་སྐོར་བརྗོད་བརྗོད་བྱུང་ལ། འདི་ལོར་རྒྱ་ནག་གཞུང་དམར་ཤོག་ཚོགས་པ་བཙུགས་ནས་ལོ་ ༡༠༠ འཁོར་བ་ཟེར་བ་དེར་བོད་ཁུལ་གྱི་ས་ཆ་གང་སར་མཛད་སྒོ་རྒྱ་ཆེན་པོ་བསྡུ་རུ་བཅུག་སྟེ། དམར་ཤོག་ཚོགས་པར་བསྟོད་བསྔགས་དང་བཀའ་དྲིན་ཞུ་བ་སོགས་ཀྱི་བྱ་འགུལ་རིགས་སྣ་ཚོགས་སྤེལ་དུ་བཅུག་ཡོད་པ་རེད།
རྒྱ་གར་ལྷོ་ཕྱོགས་ཀྱི་གསར་འགོད་པ་དོན་འགྲུབ་བཀྲ་ཤིས།
