༧གོང་ས་མཆོག་གི་ཕྱག་དེབ་རིན་མེད་ཀྱིས་བཀྲམ་སྟེ་བཀའ་དྲིན་རྗེས་དྲན་ཞུ་ཡི་འདུག

སྦེལ་ཇམ་གྱི་ཤེས་རབ་སྣང་བྱེད་སློབ་གྲྭའི་སློབ་སྤྱི་བློ་བཟང་དབང་པོ་ལགས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དྲིན་རྗེས་དྲན་ཞུ་ཆེད་མགོན་པོ་གང་ཉིད་ཀྱི་ཕྱག་དེབ་ ༡༢༠ ལྷག་སྦེལ་ཇམ་གྱི་ཆབ་སྲིད་ཚོགས་པ་ཁག་དང་སློབ་གྲྭ་ཁག་གི་དགེ་སློབ་བཅས་ལ་རིམ་མེད་ཀྱིས་གནང་བའི་བྱ་འགུལ་ཞིག་སྤེལ་བཞིན་འདུག

མི་སྒེར་ཞིག་ནས་བྱ་འགུལ་དེ་འདྲ་ཞིག་རྩོམ་དགོས་པའི་དམིགས་ཡུལ་སྐོར་ལ་འདི་གའི་གསར་འགོད་པར་བློ་བཟང་དབང་པོ་ལགས་ཀྱིས། འདི་ལོའི་ཕྱི་ཟླ་་དྲུག་པ་ནས་བཟུང་༧གོང་ས་མཆོག་གི་ཕྱག་དེབ་བགོ་འགྲེམས་ཀྱི་ལས་གཞི་ཞིག་སྤེལ་བའི་གྲ་སྒྲིག་བྱས་པ་བཞིན། ད་ལྟ་བར་དཔེ་དེབ་ ༡༢༠ ལྷག་མཁོ་སྒྲུབ་གནང་ཐུབ་ཡོད་པ་དང་། ༧གོང་ས་མཆོག་གི་སྐུ་ཚེ་ཡུན་རིང་བརྟན་སླད་དུ་བརྟན་ཞུགས་སོགས་མི་སྒེར་ཞིག་ནས་དབུལ་མི་ཐུབ་ནའང་། གཙོ་བོ་མགོན་པོ་གང་ཉིད་ཀྱི་དགོངས་བཞེད་བཞིན་བསྒྲུབ་རྒྱུ་ནི་གལ་ཆེན་ཡིན་སྟབས། ༧མགོན་པོ་གང་ཉིད་ཀྱི་བཀའ་དྲིན་མཚོན་ཆེད་དང་། མགོན་པོ་མཆོག་གི་བཀའ་དྲིན་རྒྱུན་དུ་དྲན་ཆེད་དུ་ཡིན་ལས་གཞི་དེ་སྤེལ་བཞིན་ཡོད་སྐོར་བརྗོད་བྱུང་།

རིན་མེད་འགྲེམས་སྤེལ་གནང་བཞིན་པའི་ཕྱག་དེབ་རྣམས་ནི་བཙན་བྱོལ་ནང་གི་རང་དབང་(Freedom in Exile)དང་། (The art of Happness)།  (Toward the True Kinship of Faiths)། (Beyong Religion)བཅས་ཕྱག་དེབ་གྲགས་ཅན་མི་འདྲ་བ་བཞི་ལ་ཁྱོན་དེབ་གྲངས་ ༡༢༠ ལྷག་ཡོད་པ་དང་། ཕྱག་དེབ་དེ་དག་རྒྱ་གར་ནས་ཆེད་གཏོང་གིས་ཉིན་ཤས་གོང་སྦེལ་ཇམ་ནང་འབྱོར་ཡོད་པ་ལྟར་འགྲེམས་སྤེལ་གནང་མུས་ཡིན་འདུག་ལ།  སྦེལ་ཇམ་གྱི་ཤེས་རབ་སྣང་བྱེད་སློབ་གྲྭའི་དགེ་ལས་རྣམ་པས་ཁོང་གི་ལས་གཞིར་རྒྱབ་སྐྱོར་གྱིས་ཕྱག་དེབ་རྣམས་བླུ་བར་ཞལ་འདེབས་ཕུལ་ཡོད་འདུག

བློ་བཟང་དབང་པོ་ལགས་ལ་ད་ལྟ་བར་དུ་ཕྱག་དེབ་ག་ཚོད་ཅིག་བཀྲམ་ཚར་ཡོད་པ་དང་མ་འོངས་པར་མུ་མཐུད་ག་འདྲ་དགྲམ་འཆར་ཡོད་དྲིས་པར་ཁོང་གིས། ཕྱག་དེབ་རྣམས་འབྱོར་ནས་ཉིན་ཤས་ལས་འགོར་མེད་པས་མུ་མཐུད་འགྲེམས་སྤེལ་བྱེད་མུས་ཡིན་ལ། ད་ལྟ་བར་དུ་སྦེལ་ཇམ་གྱི་སློབ་གྲྭ་ཌི་ཌཱམ་སི་སཱ་ལབ་(De Dames Salob)དང་། ཨ་ཧྥིར་ཊི་ཛིཌ་(Afrit Zuid)ཡི་དམའ་རིམ་སློབ་གྲྭ་དང་། འབྲིང་རིམ། མཐོ་སློབ་བཅས་སློབ་གྲྭ་ཁག་བཞི་ཡི་ལས་བྱེད་ཀྱི་གསོལ་ཚིགས་ཁང་དང་དཔེ་མཛོད་ཁང་། སློབ་ཕྲུག་བཅས་ལ་བཀྲམ་ཟིན་ཡོད་པ་དང་། ཐོག་མའི་དམིགས་ཡུལ་ལྟར་ཁོམ་སྐབས་དང་བསྟུན་ནས་སྦེལ་འཇམ་ཁུལ་གྱི་ཆབ་སྲིད་ཚོགས་པ་ཆེ་ཁག་(Groen)དང་། (Christian Democratic and Flemish(CD&V), New Flemish Alliance (N-VA), Open Flemish Liberals and Democrats (Open Vld),Forward (Vooruit)སོགས་ཀྱི་གནད་ཡོད་མི་སྣར་ཐུག་འཕྲད་ཀྱིས་༧གོང་ས་མཆོག་གི་ཕྱག་དེབ་རྣམས་འབུལ་འཆར་ཡོད་སྐོར་བརྗོད་བྱུང་།

བློ་བཟང་དབང་པོ་ལགས་ནི་རྒྱ་གར་ལྷོ་ཕྱོགས་ཀྱི་གཞིས་ཆགས་ཨུ་རི་ས་ཕུན་ཚོགས་གླིང་དུ་སྐྱེས་ཤིང་། འཛིན་རིམ་ ༡༠ བར་ཨུ་རི་ས་བོད་སློབ་ནས་སློབ་སྦྱོང་གནང་རྗེས། འཛིན་རིམ་ ༡༡ དང་ ༡༢ རྡོ་རྗེ་གླིང་ནས་ཐོན། དེ་ནས་ཕྱི་ལོ་ ༡༩༩༢ དང་ ༡༩༩༣ ལོར་དྷ་རམ་ས་ལའི་བདེ་ལེགས་སྨན་ཁང་དུ་སོ་ཡི་སློབ་སྦྱོང་གནང་རྗེས། ཕྱི་ལོ་ ༡༩༩༤ ནས་ལོ་ ༥ ཙམ་རིང་ཨུ་རི་ས་སྨན་ཁང་དུ་ཕྱག་ལས་གནང་། ཕྱི་ལོ་ ༢༠༠༣ ལ་སྦེལ་ཇམ་དུ་འབྱོར་ནས་ས་གནས་སུ་ལས་དོན་མང་པོའི་ནང་མཉམ་ཞུགས་ཀྱིས་ཕྱག་ལས་གནང་ཡོད་པ་མ་ཟད། ཕྱི་ལོ་ ༢༠༡༨་ནས་སྦེལ་ཇམ་གྱི་ཤེས་རབ་སྣང་བྱེད་སློབ་གྲྭའི་སློབ་སྤྱི་གནང་མུས་ཡིན་འདུག

དཔལ་ལྡན།