བོད་ཀྱི་གཞུང་འབྲེལ་མིན་པའི་ཚོགས་པ་བཞིས་རྒྱ་ནག་གཞུང་གིས་བོད་མིའི་རིགས་རྫས་བསྡུ་རུབ་མཚམས་འཇོག་དང་བོད་ཀྱི་བྱིས་པ་རྣམས་བཙན་གྱིས་བཅའ་སྡོད་སློབ་གྲྭར་འཇུག་གི་ཡོད་པ་མཚམས་འཇོག་དགོས་པའི་ངོ་རྒོལ་ལས་འགུལ་སྤེལ་སོང་།
དེ་རིང་སྔ་དྲོ་ཆུ་ཚོད་ ༡༠།༣༠ སྟེང་བཞུགས་སྒར་མེག་གྷན་སུམ་མདོ་རུ་བོད་ཀྱི་གཞོན་ནུ་ལྷན་ཚོགས་དང། བོད་ཀྱི་བུད་མེད་ཚོགས་པ། བོད་རྒྱལ་ཡོངས་མང་གཙོ་ཚོགས་པ། བོད་རང་བཙན་སློབ་ཕྲུག་ཚོགས་པའི་རྒྱ་གར་སྡེ་ཚན་བཅས་བོད་ཀྱི་གཞུང་འབྲེལ་མིན་པའི་ཚོགས་པ་བཞིས། ཚོགས་པ་བརྒྱ་དང་ཉི་ཤུ་ལྷག་གི་བདུན་གཅིག་ངོ་རྒོལ་ལས་འགུལ་ཀྱི་ཆ་ཤས་སུ། རྒྱ་ནག་གཞུང་ནས་བོད་མིའི་འགྲོ་འདུག་སྤྱོད་གསུམ་གྱི་མཚོན་པའི་རིགས་རྫས་བསྡུ་རུབ་མཚམས་འཇོག་དགོས་པ་དང་ཡུ་གུར་སོགས་གྲངས་ཉུང་མི་རིགས་གཞན་གྱི་རིགས་རྫས་བསྡུ་རུབ་མཚམས་འཇོག་དགོས་པའི་ངོ་རྒོལ་ལས་འགུལ་སྤེལ་སོང་བ་མ་ཟད། བོད་མི་རྣམས་གཙོ་བྱས་པའི་རྒྱལ་སྤྱིའི་བོད་དོན་རྒྱབ་སྐྱོར་བ་སོགས་ནས། ལས་འགུལ་གྱི་དགོས་འདུན་དག་ལ་རྒྱབ་སྐྱོར་གྱིས་ཨ་རིའི་གཞུང་ནས་ (Thermo Fisher) ཚོང་ལས་ཁང་གི་ལས་དོན་བྱེད་ཕྱོགས་ལ་རྟོག་ཞིབ་ནན་པོ་བྱེད་པར་འབོད་སྐུལ་ཞུ་དགོས་པའི་རེ་སྐུལ་ཡང་ཞུས་སོང་།
སྐབས་དེར་འདི་གའི་གསར་འགོད་པས། དབུས་བོད་ཀྱི་གཞོན་ནུ་ལྷན་ཚོགས་ཀྱི་དྲུང་ཆེ་བསོད་ནམས་ཚེ་རིང་ལགས་སུ་ལས་འགུལ་གྱི་དགོས་པ་རྒྱབ་ལྗོངས་སོགས་ཀྱི་སྐོར་ནས་དྲི་བ་དྲིས་སྐབས་ཁོང་གིས། ད་རེས་ཀྱི་ལས་འགུལ་འདི་བོད་ཀྱི་གཞུང་འབྲེལ་མིན་པའི་ཚོགས་པ་བཞིས། རྒྱལ་སྤྱིའི་སྟེང་ཚོགས་པ་བརྒྱ་དང་ཉི་ཤུས་བདུན་གཅིག་རིང་སྤེལ་བཞིན་པའི་ངོ་རྒོལ་ལས་འགུལ་དེའི་ནང་མཉམ་ཞུགས་བྱས་ཏེ། རྒྱ་ནག་གཞུང་གིས་བཙན་དབང་གི་ཐོག་ནས་བོད་མིའི་རིགས་རྫས་བསྡུ་རུབ་དང་འགྲོ་འདུག་སྤྱོད་གསུམ་ལ་དམ་དྲག་བྱེད་བཞིན་པ་མཚམས་འཇོག་དགོས། དེ་མཚུངས་བཞིན། ཨ་རིར་རྟེན་གཞི་བྱས་པའི་ (Thermo Fisher) འཕྲུལ་རིགས་བཟོ་ཚོང་ཁང་ནས་བོད་ནང་དང་རྒྱ་ནག་ལ་རིགས་རྫས་བརྟག་དཔྱད་གཏོང་བྱེད་ཀྱི་ཡོ་ཆས་འཚོང་རྒྱུ་མཚམས་འཇོག་དགོས་པའི་རེ་འབོད་ཞུ་བཞིན་ཡོད། ཅེས་བརྗོད་བྱུང་།
སྤྱིར་བོད་མིའི་རིགས་རྫས་བསྡུ་རུབ་མཚམས་འཇོག་དང་བོད་ནང་གི་བྱིས་པ་རྣམས་བཙན་གྱིས་བཅའ་སྡོད་སློབ་གྲྭར་འཇུག་གི་ཡོད་པ་སོགས་ཀྱི་ཐད། འདས་ལོ་ནས་རྒྱལ་སྤྱིའི་བོད་དོན་ལས་འགུལ་ཁང་དང་བོད་དོན་ལས་འགུལ་ལྟེ་གནས་ཁང་། དེ་བཞིན་བོད་ཀྱི་གཞུང་འབྲེལ་མིན་པའི་ཚོགས་པ་ཁག་ནས་རྒྱ་ནག་གཞུང་ལ་ངོ་རྒོལ་ལས་འགུལ་སྤེལ་དང་སྤེལ་བཞིན་ཡོད་པ་དང་། ད་རེས་ཀྱི་ལས་འགུལ་དེ་ནི་དམིགས་བསལ་འཛམ་གླིང་གི་ཚོགས་སྡེ་ཁག་ ༡༢༠ ལྷག་ནས་རྒྱ་ནག་གཞུང་གིས་བོད་དང་ཡུ་གུར་སོགས་གྲངས་ཉུང་མི་རིགས་ཁག་གི་རིགས་རྫས་བསྡུ་རུབ་མཚམས་འཇོག་དགོས་པར་དམིགས་པ་ཞིག་ཡིན་འདུག
ཚོགས་པ་བཞིའི་བསྒྲགས་གཏམ་ནང་། བོད་ཀྱི་གཞུང་འབྲེལ་མིན་པའི་ཚོགས་པ་བཞི་རྒྱལ་སྤྱིའི་ཚོགས་པ་ ༡༢༠ ལྷག་མཉམ་འབྲེལ་གྱིས་ཕྱི་ལོ་ ༢༠༢༣ ཟླ་ ༡ ཚེས་ ༣༠ ནས་བཟུང་ཟླ་ ༢ པའི་ཚེས་ ༥ བར་སྲུང་བརྩི་ཞུ་བཞིན་པའི་བདུན་ཕྲག་གཅིག་རིང་གི་རྒྱལ་སྤྱིའི་ལས་འགུལ་ནང་མཉམ་ཞུགས་ཀྱིས་རྒྱ་ནག་དམར་ཤོག་སྲིད་གཞུང་ནས་བོད་མི་ཚོའི་གཞི་རྩའི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་མུས་ཐོག་བཙན་དབང་གིས་བོད་མིའི་རིགས་རྫས་བསྡུ་རུབ་བྱེད་བཞིན་ཡོད་པར་མཐའ་གཅིག་ཏུ་ངོ་རྒོལ་སྐྱོན་བརྗོད་བྱ་རྒྱུ་ཡིན།
དེ་ཡང་རྒྱ་ནག་དམར་ཤོག་སྲིད་གཞུང་གིས་ཁྲིམས་མཐུན་མིན་པའི་ཐོག་ནས་ད་བར་བོད་མི་ས་ཡ་གཅིག་ལྷག་གི་རིགས་རྫས་མཁོ་སྒྲུབ་བྱས་ཡོད་པ་མ་ཟད། ཐ་ན་ཕྲུ་གུ་ཆུང་ཆུང་ལོ་ན་ ༥ ལས་མ་སོན་པ་རྣམས་ཀྱི་རིགས་རྫས་ཀྱང་བཙན་དབང་གིས་མཁོ་སྒྲུབ་བྱེད་མུས་ཀྱིས་བོད་མི་ཚོར་གསང་བའི་ལྟ་སྲུང་གི་ལས་གཞི་རྒྱ་སྐྱེད་དང་ཤུགས་ཆེ་རུ་གཏོང་བཞིན་ཡོད་པ་དང་། དམིགས་བསལ་རྒྱ་གཞུང་གིས་བོད་མི་ཚོའི་ངོས་ནས་ཆོག་མཆན་མེད་པར་སྒེར་གྱི་གསང་གནས་བསྡུ་ལེན་གྱིས་འགྲོ་འདུག་སྤྱོད་གསུམ་ལ་དམ་དྲག་དང་ཞིབ་བཤེར་དོ་དམ་བཙན་གནོན་བྱས་དང་བྱེད་མུས་ཡིན། ཨ་རིའི་ནང་རྟེན་གཞི་བྱས་པའི་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་པས་འདོན་སྤེལ་ཞུས་པའི་རྒྱལ་སྤྱིའི་རྒྱལ་ཁབ་ཁག་གི་འགྲོ་བ་མིའི་ཐོབ་ཐང་དང་འབྲེལ་བའི་ལོ་འཁོར་སྙན་ཐོའི་ནང་ལ་ཡང་བོད་དེ་རང་དབང་མེད་པའི་ས་ཁུལ་ཆེས་སྡུག་ཤོས་གཅིག་ཡིན་པ་ཐེར་འདོན་ཡང་གནང་ཡོད།
གཞན་ཡང་ཨ་རིའི་ (Thermo Fisher) ཚན་རྩལ་ཁང་ནས་རྒྱ་ནག་གཞུང་ལ་བོད་མིའི་རིགས་རྫས་བསྡུ་ལེན་གྱི་ཡོ་ཆས་མཁོ་ཚོང་བྱེད་མུས་ཡིན་པས་དེ་ཡང་འཕྲལ་དུ་མཚམས་འཇོག་དགོས་པའི་འབོད་སྐུལ་ཞུ་རྒྱུ་ཡིན། སྤྱིར་བཟོ་ཚོང་ཁང་འདིས་ཚོང་ལས་ཚུལ་བཞིན་གཉེར་གྱིན་ཡོད་རུང་རྒྱ་ནག་དམར་ཤོག་སྲིད་གཞུང་ལ་རིགས་རྫས་བསྡུ་ལེན་གྱི་ཡོ་ཆས་མཐུན་འགྱུར་སྦྱར་བར་བརྟེན། བོད་གཙོས་པའི་རྒྱ་ནག་དམར་ཤོག་སྲིད་གཞུང་གི་བཙན་གནོན་འོག་མྱངས་དང་མྱོང་བཞིན་པའི་རྒྱལ་ཁབ་ཁག་གི་ནང་དམ་དྲག་སྔར་ལྷག་ཇེ་ཆེར་དང་། ལྟ་སྲུང་གི་ནུས་པ་སྔར་ལྷག་རྒྱ་སྐྱེད་གཏོང་བཞིན་ཡོད། ཨ་རིའི་ཚན་རྩལ་ཁང་འདིའི་འགན་འཛིན་གཙོ་བོ་ (Mr. Marc Casper) ལ་ཞུ་གཏུགས་དང་ངོ་རྒོལ་སོགས་ཀྱི་ལས་འགུལ་སྣ་མང་སྤེལ་ཡང་ད་བར་ཡ་ལན་གང་ཡང་བྱས་མེད་པར་སོང་། བོད་དང་བོད་མིས་གཙོས་པའི་མཐུན་ཕྱོགས་ཀྱི་བོད་དོན་རྒྱབ་སྐྱོར་བ་ཚོ་དང་རང་དབང་ལ་དགའ་བའི་རྒྱལ་སྤྱིའི་སྤྱི་ཚོགས་ནས་ཀྱང་ཚོང་ལས་ཁང་གི་ད་ལྟའི་བྱས་ཉེས་དེ་བཞིན་ཐེར་འདོན་བྱེད་ངེས་ཡིན། ཞེས་བཀོད་འདུག
གསར་འགོད་པ། སྐལ་བཟང་སྦྱིན་པ།
