ལྷོ་སོག་ལེང་ཁྲེང་རི་བོའི་རྒྱ་ནག་རྒྱལ་ཡོངས་དགུན་དུས་ལུས་རྩལ་འགྲན་ཚོགས་ཀྱི་འགྲན་བསྡུར་ཁྲོད་བོད་ཀྱི་ལུས་རྩལ་པ་དབྱངས་ཅན་ལྷ་མོ་ལགས་སུ་གསེར་གྱི་གཟེངས་རྟགས་ཐོབ་ཡོད་འདུག
ཟླ་འདིའི་ཕྱི་ཚེས་ ༡༧ ནས་ ༢༧ བར་ཉིན་གྲངས་བཅུ་གཅིག་རིང་ལྷོ་སོག་ཏུ། རྒྱ་ནག་རྒྱལ་ཡོངས་སྐབས་བཅུ་བཞི་པའི་དགུན་དུས་ལུས་རྩལ་འགྲན་ཚོགས་ཀྱི་གངས་ཤུད་འགྲན་བསྡུར་འཚོག་བཞིན་ཡོད་པ་ལྟར། ཐེངས་འདིའི་གཞོན་ནུའི་རུ་ཁག་གི་བུད་མེད་རྟིང་རྩོད་གངས་ཤུད་འགྲན་བསྡུར་ཁྲོད་བོད་ཀྱི་ལུས་རྩལ་པ་དབྱངས་ཅན་ལྷ་མོ་ལགས་སུ་གསེར་གྱི་གཟེངས་རྟགས་ཐོབ་ཡོད་པ་དང་། བུད་མེད་རུ་ཁག་གི་གངས་ཤུད་འགྲན་བསྡུར་ནང་བོད་ཀྱི་ལུས་རྩལ་པ་ཉི་མ་དབྱངས་ཅན་ལགས་ལ་ཨང་རིམ་བརྒྱད་པ་ཐོབ་ཡོད་འདུག
བོད་ཀྱི་ལུས་རྩལ་པ་དབྱངས་ཅན་ལྷ་མོ་ལགས་ཀྱིས། ད་ལྟ་ཚོར་སྣང་ཧ་ཅང་ཡག་པོ་བྱུང་། ཡུལ་དངོས་འགྲན་བསྡུར་ནང་འགག་སྒོ་གཉིས་བརྒྱུད་པའི་སྐབས་སུ། ཅུང་ཙམ་ནོར་འཁྲུལ་ཤོར་ཡང་རྗེས་སུ་བསྐྱར་གསོ་བྱས་ཐུབ་སོང་། ཐེངས་འདིའི་འགྲན་བསྡུར་ནི་དགུན་དུས་ཨོ་ལིམ་ཕིག་རྩེད་འགྲན་རྗེས་ཀྱི་སྐམ་ས་ཆེན་མོའི་ཐོག་གི་ལུས་རྩལ་འགྲན་ཚོགས་ཆེ་ཤོས་ཤིག་ཡིན། གལ་སྲིད་མུ་མཐུད་དུ་ལུས་རྩལ་འགྲན་ཚོགས་སུ་ཞུགས་ཐུབ་ཚེ། རྒྱལ་སྤྱིའི་ལུས་རྩལ་འགྲན་ཚོགས་སུ་ཞུགས་ནས་གྲུབ་འབྲས་ཡག་པོ་ལེན་ཐུབ་པའི་རེ་བ་བྱེད་བཞིན་ཡོད། ཅེས་བརྗོད་འདུག
བོད་རང་སྐྱོང་ལྗོངས་གངས་ཤུད་རུ་ཁག་ཟེར་བའི་སྣེ་འཁྲིད་པ་བདེ་ཆེན་དངོས་གྲུབ་ཀྱིས། ང་ཚོ་དགུན་དུས་ལུས་རྩལ་འགྲན་ཚོགས་སྟེང་ཐོག་དང་པོ་འཛུལ་ཞུགས་བྱས་པ་ཡིན། གྲུབ་འབྲས་ཧ་ཅང་ཡག་པོ་བླངས་བྱུང་། ང་ཚོས་མུ་མཐུད་དུ་འབད་བརྩོན་བྱས་ནས་ལུས་རྩལ་རུ་ཁག་ཡར་རྒྱས་གཏོང་རྒྱུ་ཡིན་ལ། ཕྱི་ལོ་ ༢༠༢༦ ལོའི་ཨོ་ལིམ་ཕིག་རྩེད་འགྲན་སྟེང་འཛུལ་ཞུགས་བྱས་ཏེ་གྲུབ་འབྲས་ཡག་པོ་ཞིག་ལེན་འདོད་ཡོད། ཅེས་བརྗོད་འདུག
ད་ལྟའི་ཆར་རྒྱ་ནག་རྒྱལ་ཡོངས་སྐབས་བཅུ་བཞི་པའི་དགུན་དུས་ལུས་རྩལ་འགྲན་ཚོགས་ཀྱི་གངས་ཤུད་རི་འཛེགས་ཀྱི་འགྲན་བསྡུར་ཁག་བྱས་པའི་ཁྲོད། བོད་ཀྱི་ལུས་རྩལ་པར་གསེར་གྱི་གཟེངས་རྟགས་བཞི་དང་དངུལ་གྱི་རྟགས་མ་གཅིག་ཐོབ་པའི་ནང་། ཕོ་མོ་མཉམ་བསྲེས་ཀྱི་རྟིང་རྩོད་གངས་ཤུད་འགྲན་བསྡུར་ཁྲོད་བོད་ཀྱི་ལུས་རྩལ་པ་བཀྲ་ཤིས་བསྟན་སྒྲོལ་དང་ཀུན་བཟང་རྣམ་རྒྱལ། གཡུ་སྒྲོན་ལྷ་མོ་བཅས་ལ་གསེར་གྱི་གཟེངས་རྟགས་ཐོབ་ཡོད་པ་དང་། བོད་ཀྱི་ལུས་རྩལ་པ་ཚེ་བརྟན་གཡུ་སྒྲོན་ལ་དངུལ་གྱི་གཟེངས་རྟགས་ཐོབ་འདུག གཡུ་སྒྲོན་ལྷ་མོས་ཐེངས་འདིའི་བུད་མེད་ཀྱི་རྒྱང་ཐག་ཐུང་བའི་རྟིང་རྩོད་གངས་ཤུད་འགྲན་བསྡུར་ཁྲོད་སྐར་མ་ ༣ དང་སྐར་ཆ་ ༩ ། གྲངས་ཆུང་ ༨ ཀྱི་གྲུབ་འབྲས་བླངས་ཡོད་པ་མ་ཟད། འདས་ལོའི་ཕྱི་ཟླ་ ༡༡ ནང་སི་པན་རྒྱལ་ཁབ་ཏུ་འཚོགས་པའི་འཛམ་གླིང་གངས་ཤུད་གཟེངས་རྟགས་འགྲན་བསྡུར་ཁྲོད་བུད་མེད་ཀྱི་རྒྱང་ཐག་ཐུང་བའི་གསེར་གྱི་རྟགས་མའང་བླངས་ཡོད་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
བོད་ཀྱི་ལུས་རྩལ་མ་དབྱངས་ཅན་ལྷ་མོ་ལགས་སུ་གསེར་གྱི་གཟེངས་རྟགས་ཐོབ་ཡོད་འདུག་པར་དགའ་བསུའི་བཀྲ་ཤིས་བདེ་ལེགས་དུ་མ་ཞུ།། ལུས་རྩལ་མ་ཅེས་འབྲི་དགོས་བྱུང་སོང་བའི་དབྱངས་ཅན་ལྷ་མོ་ལགས་མོ་ཡིན་པ་ངོས་འཛིན་ལས་ཞུས་པ་ལས་སྐབས་རེ་མདེ་སྨད་ཁུལ་ཕོ་ལ་དབུས་གཙང་གཙོས་པའི་མདོ་སྟོད་ཁུལ་གྱི་ལགས་སྲོལ་ལྟར་གྱི་མོའི་མིང་འབོད་སྲོལ་ཡོད་འདུག་ལགས།