བོད་སྡེ་དགེ་རྫོང་དབོན་པོ་སྟོད་ཀྱི་སེར་སྐྱ་མི་མང་གིས་རྒྱ་ནག་གཞུང་གི་བཙན་བཀའ་ཟློག་ཐབས་ཀྱི་ཞུ་འབོད་གནང་བའི་རྐྱེན་གྱིས་ས་གནས་སེར་སྐྱ་མང་པོ་འཛིན་བཟུང་བཙན་འཁྲིད་བྱས་ཡོད་པ་དང་མི་ཁག་ཅིག་ལ་རྨས་སྐྱོན་བཟོས་ཏེ་སྨན་ཁང་དུ་ཡོད་འདུག
རྒྱ་ནག་གཞུང་གིས་སྐམ་ཐོག་ཆུ་གློག་ཁང་ཟེར་བ་འཛུགས་སྐྲུན་བྱེད་པར་ཁ་གཡར་ཏེ། སྡེ་དགེ་རྫོང་དབོན་པོ་སྟོད་ཀྱི་དབོན་སྟོད་དགོན་དང་ཡེ་ན་དགོན་སོགས་དགོན་པ་དྲུག་དང་གྲོང་ཚོ་གཉིས་ལྷག་གནས་སྤོར་དགོས་པའི་བཙན་བཀའ་གཏོང་གི་ཡོད་པ་ལྟར། ས་གནས་སེར་སྐྱ་མི་མང་གིས་ཕྱི་ཚེས་ ༢༡ དང་ ༢༢ ཉིན་ཞི་བའི་ཐོག་ནས་འབྲེལ་ཡོད་ལས་བྱེད་པར་རེ་སྐུལ་ངུ་འབོད་གནང་སྟེ་བཙན་བཀའ་ཟློག་ཐབས་གནང་ཡོད་སྟབས། གློ་བུར་དུ་ཉེན་རྟོག་པ་མང་པོ་བསླེབས་ནས་གང་བྱུང་གཅར་རྡུང་བཏང་སྟེ་མི་ཁག་ཅིག་སྡེ་དགེ་རྫོང་མི་མང་སྨན་ཁང་དུ་བསྐྱལ་ཡོད་པ་མ་ཟད། སེར་སྐྱ་མི་མང་མང་པོ་འཛིན་བཟུང་བཙན་འཁྲིད་བྱས་ཏེ། ས་གནས་མི་མང་གི་འགྲོ་འདུག་ལ་དམ་དྲག་ཤུགས་ཆེན་བྱེད་བཞིན་ཡོད་འདུག
ཕྱི་ཕྱོགས་སུ་དེ་འབྲེལ་བརྙན་ཐུང་ཁག་ཅིག་འབྱོར་བའི་ནང་དུ། འབྲེལ་ཡོད་ལས་བྱེད་ཚོའི་མདུན་དུ་སེར་སྐྱ་མི་མང་གིས་མཐེ་བོང་བསྟན་ནས་པུས་མོ་སར་བཙུགས་ཏེ་ངུ་འབོད་བྱེད་བཞིན་པ་དང་། ཉེན་རྟོག་པ་མང་པོས་སེར་སྐྱ་མི་མང་ལ་གཅར་རྡུང་གཏོང་ཞོར་དུ་བཙན་འདྲིད་བྱེད་བཞིན་པ། དེ་བཞིན་དགེ་འདུན་པ་རེ་ཟུང་གིས་ངུ་འབོད་བྱེད་བཞིན་དྲན་པ་བརྒྱལ་བ་སོགས་མཐོང་རྒྱུ་འདུག
སྐམ་ཐོག་ཆུ་གློག་ཁང་ཟེར་བ་དེ་ནི་རྒྱ་ནག་ཆུ་གློག་གསར་སྤེལ་ཚོང་གཉེར་ཁང་(华电金沙江上游水电开发有限公司)ཟེར་བ་དེས་བཟོ་སྐྲུན་བྱེད་བཞིན་ཡོད་འདུག་ལ། ལས་གཞི་དེའི་ཁྲོད་འབྲི་ཆུའི་རྒྱུད་དུ་ཆགས་པའི་སྡེ་དགེ་རྫོང་ཁོངས་ཀྱི་ཡེ་ན་དགོན་པ་དང་། དབོན་སྟོད་དགོན་པ། མཁའ་མདོ་དགོན་པ། རབ་བསྟན་དགོན་པ། དགོན་སར་དགོན་པ། བཀྲ་ཤིས་དགོན་པ་བཅས་དགོན་སྡེ་དྲུག་དང་། གྲོང་ཚོ་གཉིས་ལྷག་བཅས་བཙན་གཏོར་གཏོང་གི་ཡོད་འདུག
ད་ལྟ་བཙན་གནོན་ཐེབས་བཞིན་པའི་ཡེ་ན་དགོན་དང་དབོན་སྟོད་དགོན་གཉིས་ལ་ལོ་རྒྱུས་ཡུན་རིང་ལྡན་ཞིང་། རྟེན་དང་བརྟེན་པའི་ཤུལ་བཞག་རིག་དངོས་རྩ་ཆེན་བཞུགས་ཡོད་འདུག དབོན་སྟོད་དགོན་ལྟ་བུར་མཚོན་ན། ཕྱི་ལོ་ ༢༠༡༨ ཟླ་ ༧ པའི་ནང་ནང་བསྟན་ཆོས་ལུགས་ཀྱི་ལྷ་སྐུའི་ལྡེབས་རིས་མང་པོ་ཞིག་གསར་རྙེད་བྱུང་ཡོད་པའི་ཁྲོད། དུས་རབས་བཅུ་བཞི་དང་བཅོ་ལྔ་ནང་བཞེངས་བའི་སངས་རྒྱས་ཤཱཀྱ་ཐུབ་པ་དང་། མགོན་པོ་འོད་དཔག་མེད། རྒྱལ་བ་རིགས་ལྔ་དང་རྡོ་རྗེ་འཆང་། སྒྲོལ་ལྗང་། གནས་བརྟན་བཅུ་དྲུག ཀུན་རིག་རྩ་ལྷ་སོགས་ཡོད་པ་དང་། ལྡེབས་རིས་དེ་དག་ནི་ད་ལྟའི་བར་རྙེད་སོན་བྱུང་བའི་ལྡེབས་རིས་དག་ལས་སྒྱུ་རྩལ་གྱི་ཁྱད་ཆོས་འབུར་དུ་ཐོན་པས་བོད་ཀྱི་རི་མོའི་སྒྱུ་རྩལ་ལ་ཞིབ་འཇུག་གི་རྒྱུ་ཆ་གལ་ཆེན་ཆགས་ཡོད་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
