བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་ནས་སྲིད་བློན་མུ་དྷི་མཆོག་ལ་རྒྱལ་ཁ་ཐེངས་གསུམ་པ་ཐོབ་པར་འཚམས་འདྲི་གནང་བ་དང་སྦྲགས་རྒྱ་གར་གྱིས་འཚེ་བ་མེད་པའི་རྩ་དོན་གཞི་རྩར་བཟུང་ནས་འཛམ་གླིང་ནང་ཞི་བདེ་དང་བརྟན་ལྷིང་ཡོང་བར་སྣེ་འཁྲིད་གནང་གལ་ཆེ་སྐོར་གསུངས་འདུག
ཁ་སང་ཕྱི་ཚེས་ ༦ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་གྱི་སྲིད་བློན་མུ་དྷི་མཆོག་དང་ཁོང་གི་སྲིད་དོན་ཚོགས་པར་བསྟུད་མར་ཐེངས་གསུམ་པའི་གཞུང་འཛིན་རྒྱལ་ཁ་ཐོབ་པར་འཚམས་འདྲི་གནང་བའི་ནང་། ཕྱི་ལོ་ ༢༠༢༤ ལོའི་རྒྱ་གར་རྒྱལ་ཡོངས་འོས་བསྡུ་ཆེན་མོའི་ཁྲོད་སྲིད་བློན་མུ་དྷི་མཆོག་དང་རྒྱལ་ཡོངས་དམངས་གཙོ་མཐུན་སྦྲེལ་ཚོགས་པར་ལོ་རྒྱུས་རང་བཞིན་ལྡན་པའི་རྒྱལ་ཁ་ཐོབ་པར། ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་འཚམས་འདྲི་ཞུ་རྒྱུ་ཡིན། འོས་བསྡུ་ཆེན་མོའི་རྒྱལ་ཁ་འདི་ནི་རྒྱ་གར་མི་མང་གིས་ཁྱེད་དང་རྒྱལ་ཡོངས་དམངས་གཙོ་མཐུན་སྦྲེལ་ཚོགས་པའི་བབ་བརླིང་བརྟན་གསུམ་གྱི་མགོ་ཁྲིད་པར་ཡིད་ཆེས་བརྟན་པོ་བྱུང་། ཐེངས་འདིའི་གོ་སྐབས་བརྒྱུད་ནས་ངས་རྒྱ་གར་གཞུང་མང་གཉིས་ཀྱིས་ལོ་ངོ་བཅུ་ཕྲག་མང་པོའི་རིང་༸གོང་ས་རྒྱལ་བ་རིན་པོ་མཆོག་དང་བོད་མིར་རྒྱབ་སྐྱོར་གང་ལེགས་གནང་བར་བཀའ་དྲིན་ཆེ་ཞུ་རྒྱུ་ཡིན་ལ། རྒྱ་གར་གྱིས་ང་ཚོར་སྐུ་མགྲོན་གྱི་ཚུལ་དུ་གཟིགས་སྐྱོང་སྣེ་ལེན་ཐོག་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་མི་ཉམས་རྒྱུད་འཛིན་བྱེད་པའི་གནས་མཆོག་ཅིག་བསྐྲུན་ཡོད། ཅེས་གསུངས་འདུག
ཡང་སྲིད་སྐྱོང་མཆོག་གིས། ༸གོང་ས་རྒྱལ་བ་རིན་པོ་ཆེ་མཆོག་ནས་མགོན་པོ་གང་ཉིད་དང་རྒྱ་གར་བར་གྱི་མཛའ་འབྲེལ་གསུང་སྐབས་ངོས་རང་རྒྱ་གར་གྱི་བུ་ཡིན་ཞེས་ཡང་ནས་བསྐྱར་དུ་བཀའ་གནང་གི་ཡོད་མ་ཟད། དཔལ་ན་ལེནྡྲའི་གནའ་བོའི་ཆོས་བརྒྱུད་དྲི་མ་མེད་པ་ཉམས་བཞེས་གནང་བཞིན་ཡོད། ༸མགོན་པོ་གང་ཉིད་མཆོག་ནས་རྒྱ་གར་གནའ་བོའི་ཤེས་རིག་ཉམས་གསོ་མཛད་རྒྱུའི་ཐུགས་འགན་བཞེས་ཡོད་ཅིང་། རྒྱ་གར་དབུས་དང་མངའ་སྡེའི་གཞུང་གཉིས་ནས་༧གོང་ས་མཆོག་གི་དགོངས་པར་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་ཡིན། རྒྱ་གར་ནི་འཛམ་གླིང་གི་དམངས་གཙོའི་རྒྱལ་ཁབ་ཆེ་ཤོས་ཤིག་ཡིན་པས། དེང་གི་རྙོག་འཛིང་ཆེ་བའི་དུས་སྐབས་འདིའི་ནང་མཐུན་ཕྱོགས་རྒྱལ་ཁབ་ཁག་དང་མཉམ་འབྲེལ་གྱིས་དམངས་གཙོའི་ལས་དོན་གོང་མཐོར་གཏོང་དགོས་པ་དང་། རྒྱ་གར་གྱི་འཚེ་བ་མེད་པའི་རྩ་དོན་གྱི་དབུ་ཁྲིད་ཐོག་འཛམ་གླིང་ནང་ཞི་བདེ་དང་བརྟན་ལྷིང་ལ་ཕྱོགས་རྒྱུ་གལ་ཆེན་པོར་གྱུར་ཡོད།
མཇུག་ཏུ་སྲིད་སྐྱོང་མཆོག་གིས། ཁྱེད་ཀྱི་ལོ་རྒྱུས་རང་བཞིན་ལྡན་པའི་ལས་ཡུན་ཐེངས་གསུམ་པ་མགོ་བཙུགས་བཞིན་པའི་སྐབས་འདིར། ང་ཚོས་མ་འོངས་པར་རྒྱ་གར་ནང་དམངས་གཙོ་དང་། རང་དབང་། འགྲོ་བ་མིའི་ཐོབ་ཐང་བཅས་ཀྱི་རིན་ཐང་མུ་མཐུད་དུ་གོང་མཐོར་སྲུང་སྐྱོབ་གནང་བའི་རེ་བ་བྱེད་བཞིན་ཡོད། ཅེས་རྒྱ་གར་ནང་ཞི་བདེ་འཆམ་མཐུན་ངང་ཡར་རྒྱས་ཡོང་བའི་སྨོན་འདུན་དང་། རྒྱ་གར་གཞུང་ནས་བཙན་བྱོལ་བོད་མི་རྣམས་ལ་རྒྱབ་སྐྱོར་མུ་མཐུད་གནང་སྐྱོང་ཡོང་བའི་རེ་སྐུལ་གནང་འདུག
ད་ལོ་ནི་སྲིད་བློན་ནཱ་རན་ཌ་མུ་དྷི་མཆོག་ནས་རྒྱ་གར་གྱི་སྲིད་བློན་གྱི་རྒྱལ་ཁ་ཐོབ་པ་ཐེངས་གསུམ་པ་དེ་ཡིན་ལ། ཁོང་ནི་གྷོ་ཇི་རཱ་ཊིའི་མེ་འཁོར་ཐབ་ཚང་ནང་ལས་ཀ་བྱེད་མཁན་ཞིག་ནས་ལྡི་ལི་མཐོ་སློབ་ནས་སྲིད་དོན་ཚན་རིག་གི་རིག་གནས་རབ་འབྱམས་པའི་ལག་འཁྱེར་བླངས་བ་དང་། གྷོ་ཇི་རཱ་ཊིའི་གཙུག་ལག་སློབ་ཆེན་ནས་སྲིད་དོན་ཚན་རིག་གི་གཙུག་ལག་རབ་འབྱམས་པའི་ལག་འཁྱེར་བླངས་ཡོད་འདུག ཕྱི་ལོ་ ༡༩༩༥ ལོར་བྷི་ཇི་པི་སྲིད་དོན་ཚོགས་པའི་དྲུང་ཆེར་བདམས་ཐོན་བྱུང་སྟེ། ཧི་མ་ཅལ་དང་ཧར་ཡ་ན་མངའ་སྡེའི་ནང་སྲིད་དོན་གྱི་ཕྱག་ལས་གནང་། ཕྱི་ལོ་ ༡༩༩༨ ལོར་གྷོ་ཇི་རཱ་ཊིའི་གྲོས་ཚོགས་འཐུས་མིར་བདམས། ཕྱི་ལོ་ ༢༠༠༡ ལོ་ནས་བཟུང་གྷོ་ཇི་རཱ་ཊི་མངའ་སྡེའི་སྤྱི་ཁྱབ་བློན་ཆེན་གྱི་ཕྱག་ལས་གནང་ཞིང་། ཕྱི་ལོ་ ༢༠༡༠ ལོར་༧གོང་ས་རྒྱལ་བ་རིན་པོ་ཆེ་མཆོག་དང་མཇལ་མོལ་གནང་ཡོད་པ་རེད། ཕྱི་ལོ་ ༢༠༡༤ ལོ་ནས་ཁོང་རྒྱ་གར་གྱི་སྲིད་བློན་དུ་འདེམས་ཐོན་བྱུང་ཡོད་པ་རེད།
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
