འདི་ལོའི་པེ་རི་སིའི་རྒྱལ་སྤྱིའི་ཨོ་ལིམ་ཕིག་རྩེད་འགྲན་ཁྲོད་ཨ་རིའི་རྩེད་འགྲན་པ་ཚོས་གསེར་གྱི་རྟགས་མ་ ༤༠ དང་དངུལ་གྱི་རྟགས་མ་ ༤༤ བཅས་ཁྱོན་གསེར་དངུལ་ཟངས་གསུམ་གྱི་རྟགས་མ་ ༡༢༦ བླངས་ཡོད་འདུག
Athletes make their way into Stade de France for the closing ceremony. (David Davies/PA Images via Getty Images)
འདི་ལོའི་དབྱར་དུས་ཀྱི་ཨོ་ལིམ་ཕིག་གི་རྩེད་འགྲན་དེ་ཟླ་སྔ་མའི་ཕྱི་ཚེས་ ༢༤ ནས་ཟླ་འདིའི་ཕྱི་ཚེས་ ༡༡ ཉིན་གྲངས་བཅུ་དགུའི་རིང་ཧྥ་རན་སའི་རྒྱལ་ས་པེ་རི་སིར་འཚོགས་ཡོད་པ་ལྟར། འདི་ལོའི་རྩེད་འགྲན་ཁྲོད་འཛམ་གླིང་གི་རྒྱལ་ཁབ་དང་རང་སྐྱོང་ཁུལ་ ༢༠༦ ལྷག་གི་རྩེད་འགྲན་པ་ཆིག་ཁྲི་ལྷག་གིས་མཉམ་ཞུགས་བྱས་ཡོད་པའི་ནང་། ཨ་རིར་གསེར་གྱི་རྟགས་མ་ ༤༠ ཚུད་པའི་གསེར་དངུལ་ཟངས་གསུམ་གྱི་རྟགས་མ་གྲངས་ ༡༢༦ དང་། རྒྱ་ནག་ལ་གསེར་གྱི་རྟགས་མ་ ༤༠ ཚུད་པའི་གསེར་དངུལ་ཟངས་གསུམ་གྱི་རྟགས་མ་གྲངས ༩༡། དེ་བཞིན་ཉི་ཧོང་ལ་གསེར་གྱི་རྟགས་མ་ ༢༠ ཚུད་པའི་གསེར་དངུལ་ཟངས་གསུམ་གྱི་རྟགས་མ་ ༤༥ ཐོབ་ཡོད་འདུག་ལ། གསེར་དངུལ་ཟངས་གསུམ་གྱི་རྟགས་མ་བསྡོམས་ན་དབྱིན་ཡུལ་ལ་རྟགས་མ་གྲངས་ ༦༥ དང་། ཧྥ་རན་སིར་རྟགས་མ་ ༦༤ ཐོབ་ཡོད་འདུག
སི་ཨེན་བྷི་སི་ (CNBC) གསར་ཁང་གི་གནས་ཚུལ་ལྟར་ན། འདི་ལོར་ཧྥ་རན་སིས་གོ་སྒྲིག་བྱས་པའི་དབྱར་དུས་ཨོ་རྩལ་འགྲན་ཚོགས་ཆེད་ཕྱོགས་ཡོངས་ནས་འགྲོ་གྲོན་ཨ་སྒོར་ཐེར་འབུམ་ ༡༠ ཙམ་ལས་བཏང་མེད་ཅིང་། དེ་ནི་ཐོག་མའི་སྔོན་རྩིས་ལས་བརྒྱ་ཆ་ ༢༥ ཙམ་ལས་བརྒལ་མེད་པས། ཕྱི་ལོ་ ༢༠༡༦ ལོའི་རིའི་ཡོ་དང་ ༢༠༢༠ ལོར་ཉི་ཧོང་དུ་བསྡུས་པའི་ཨོ་རྩལ་འགྲན་ཚོགས་དང་བསྡུར་ན་འགྲོ་གྲོན་ཧ་ཅང་ཉུང་ཉུང་ཡིན་པའི་ཁར། ཧྥ་རན་སིར་སྔོན་ཆད་ནས་འཛམ་གླིང་གི་རྩེད་འགྲན་ཁང་ཆེན་དགུ་བཅུ་གོ་ལྔ་ཙམ་ཡོད་པས། རྗེས་སུ་འཛམ་གླིང་གི་རྩེད་འགྲན་ཁང་ཆེན་གསུམ་ལས་འཛུགས་སྐྲུན་བྱེད་དགོས་བྱུང་མེད་པ་རེད། དེ་ནི་ཨ་སྒོར་དུང་ཕྱུར ༡༦ བཏང་བའི་ཨོ་ལིམ་ཕིག་གྲོང་ཁྱེར་དང་། ཨ་སྒོར་དུང་ཕྱུར ༡༩༠ བཏང་བའི་ཆུ་རྩེད་ལྟེ་གནས། ཨ་སྒོར་དུང་ཕྱུར ༡༥༠ བཏང་བའི་ལུས་རྩལ་ཁང་དང་བྱ་སྒྲོའི་རྩེད་ར་བཅས་ཡིན་སྐོར་གསལ་འདུག
འདི་ལོའི་ཨོ་ལིམ་ཕིག་གི་དྲ་རྒྱར་གསལ་བའི་གནས་ཚུལ་ལྟར་ན། འགྲོ་གྲོན་བརྒྱ་ཆ ༩༦ ཙམ་ནི་སྒེར་གྱི་སྡེ་ཁག་སྟེ། ཨོ་རྩལ་ཚོགས་པ། མཉམ་འབྲེལ་ཁེ་ལས་ཁང་། རྩེད་འགྲན་གྱི་འཛིན་བྱང་ཚོང་ཁང་། ལག་འཁྱེར་སྤྲོད་མཁན་བཅས་ནས་བསྡུས་ཡོད་འདུག སྤྱིར་འདི་ལོའི་དབྱར་དུས་ཨོ་རྩལ་གྱི་བདུན་གཅིག་གི་གོང་ནས་རྒྱལ་ས་པེ་རི་སིའི་ཚོང་ཁང་དང་མགྲོན་ཁང་སོགས་ཀྱི་རིན་གོང་བརྒྱ་ཆ་ ༢༥ ཙམ་ཡར་འཕར་ཏེ། ཕྱོགས་ཡོངས་ནས་དཔལ་འབྱོར་བསྡུ་རུབ་དང་ཚོང་ལས་ཡར་སྐྱེད་ཡོང་བའི་རེ་བ་ཆེན་པོ་བཅངས་ཡོད་ཀྱང་། པེ་རི་སིའི་ཡུལ་སྐོར་སྤྲོ་འཆམ་ལྷན་ཚོགས་(tourism board) ཀྱིས། ཡུལ་སྐོར་ལྟད་མོ་བ་མི་གྲངས་ས་ཡ་ ༡༡།༣ ཙམ་ཡོང་རྒྱུའི་རེ་བ་བཅངས་ཡོད་ཀྱང་། ཨོ་རྩལ་གྱི་རྣོ་ངར་ཆེ་བའི་འགྲན་ཚོགས་སྐབས་མི་གྲངས་ས་ཡ་ ༡།༥ ཙམ་ལས་བསླེབས་མེད་པའི་གནས་ཚུལ་སྤེལ་འདུག
འདི་ལོའི་ཨོ་རྩལ་འགྲན་ཚོགས་སྐབས་ཉེན་སྲུང་བ་ཚོས་ལྟ་སྲུང་ནན་མོ་བྱེད་ཀྱི་ཡོད་ལུགས་བཤད་དེ། མི་མང་ཕལ་བ་མང་པོར་དོན་མེད་འཇིགས་སྐུལ་དང་ཉེན་བརྡ་བཏང་ཡོད་པའི་སྐྱོན་འཛུགས་བྱེད་ཀྱི་ཡོད་པ་མ་ཟད། སྨད་བཙོང་མ་མང་པོ་ཆེད་དུ་རྒྱལ་སའི་ཁུལ་དུ་ཡོང་བཅུག་པ། དྲ་ལམ་ནས་རྒྱན་ཤོག་ཉོས་རྗེས་བརྡ་ལན་ཏག་ཏག་ཡོང་མེད་པའི་དཀའ་ངལ་བྱུང་བ། ལྷག་པར་དུ་རྒྱལ་ས་པེ་རི་སིའི་མཛེས་སྡུག་དང་གཙང་ཉར་ཟེར་བའི་སྲིད་ཇུས་འོག་ནས་གནས་སྤོར་བ་དང་ཁྱིམ་མེད་སྤྲང་པོ་མང་པོ་པེ་རི་སི་ནས་ཕྱིར་འབུད་བཏང་ཡོད་པས། ཨོ་རྩལ་པེ་རི་སིར་འཚོགས་ཡོད་ཀྱང་། གནས་དེར་སྡོད་མཁན་ཚོ་ཕུད་སོང་ཞེས་སྐྱོན་བརྗོད་བྱས་འདུག
ཐེངས་འདིའི་ཨོ་རྩལ་འགྲན་ཚོགས་ཆེད་གསེར་དངུལ་ཟངས་གསུམ་གྱི་རྟགས་མ་ ༡༠༦༦ ཙམ་སྤྲད་ཡོད་པའི་ཁྲོད། གསེར་གྱི་རྟགས་མ་རེ་ལ་ཨ་སྒོར་ཁྲི་བཞི་ལྷག་དང་། དངུལ་གྱི་རྟགས་མ་རེ་ལ་ཨ་སྒོར་ ༥༣༥། ཟངས་ཀྱི་རྟགས་མ་རེ་ལ་ཨ་སྒོར་༤།༦༠ བཅས་ཡིན་འདུག རྒྱལ་སྤྱིའི་ཨོ་རྩལ་འགྲན་ཚོགས་ཐེངས་དང་པོ་དེ་ཕྱི་ལོ་ ༡༨༩༦ ལོར་དེང་གི་ཨི་ཊ་ལིའི་རྒྱལ་ས་རོམ་ནས་ཚོགས་མགོ་བཙུགས་ཡོད་ཅིང་། ད་ལྟའི་བར་དབྱར་དུས་ཀྱི་ཨོ་རྩེད་འགྲན་ཚོགས་ཐེངས་ ༣༠ དང་དགུན་དུས་ཀྱི་ཨོ་རྩེད་འགྲན་ཚོགས་ཐེངས་ ༢༤ བཅས་བསྡུས་ཡོད་འདུག
གསར་འགོད་པ། དཔལ་ལྡན།
རྩོམ་སྒྲིག་བྱེད་མཁན། པདྨ་མཚོ།
