ཉིན་གྲངས་བདུན་རིང་ཁེ་ན་ཌའི་ནང་བོད་དོན་རྒྱང་རྒྱུག་ལས་འགུལ་བ་དྲུག་གིས་འབོད་ཚིག་དོན་ཚན་གསུམ་གྱི་ཐོག་སྤྱི་ལེ་ ༤༥༠ རིང་བོད་དོན་ལས་འགུལ་སྤེལ་སོང་།
ཕྱི་ཟླ་ ༩ ཚེས་ ༣༠ ནས་ཟླ་འདིའི་ཕྱི་ཚེས་ ༦ བར་ཉིན་གྲངས་བདུན་རིང་ཁེ་ན་ཌའི་གྲོང་ཁྱེར་ཊོ་རོན་ཊོ་ནས་ཨོ་ཊ་ཝ་བར་དུ་ཕྱི་ལོ་ ༢༠༢༤ ལོའི་བོད་དོན་དྲིལ་བསྒྲགས་ཀྱི་ཞི་བའི་རྒྱང་རྒྱུག་ཐེངས་ལྔ་པ་དེ་ལེགས་པར་གྲུབ་སྟེ་རྒྱ་ནག་གཞུང་ཚབ་ཁང་གི་མདུན་དུ་མཇུག་བསྡུས་ཡོད་ཅིང་། མཇུག་སྡོམ་མཛད་སྒོའི་ཐོག་ས་གནས་བོད་རིགས་སྤྱི་མཐུན་ཚོགས་པའི་འབྲེལ་མཐུད་པ་རྣམ་རྒྱལ་དབང་མོ་ལགས་དང་། ས་གནས་ཚོགས་སྡེ་ཁག་གི་སྐུ་ཚབ། ས་གནས་བོད་རིགས་མི་མང་། རྒྱ་རིགས་ལས་འགུལ་བ་བཅས་མཉམ་ཞུགས་གནང་ཡོད་འདུག
སྐབས་དེར་ས་གནས་གངས་ལྗོངས་ཆོས་ལྡན་གླིང་བོད་རིགས་སྤྱི་མཐུན་ཚོགས་པའི་འབྲེལ་མཐུད་པ་རྣམ་རྒྱལ་དབང་མོ་ལགས་ཀྱིས། བོད་ཕྱི་ནང་གཉིས་ཀྱི་ཚབ་བྱས་ཏེ་ཊོ་རོན་ཊོ་པད་མ་བཀོད་ཀྱི་བོད་དོན་ལས་འགུལ་བ་དྲུག་ལ་སྙིང་ཐག་པ་ནས་ཐུགས་རྗེ་ཞུ་རྒྱུ་དང་། འདི་ནི་བོད་དོན་དྲིལ་བསྒྲགས་ཀྱི་ཞི་བའི་རྒྱང་རྒྱུག་ཐེངས་ལྔ་པ་དེ་ཆགས་ཡོད། ཞེས་དང་། མི་ཞིག་ཉིན་གཅིག་གི་ཉལ་འདུག་འགྲོ་གསུམ་ཐད་ཧ་ཅང་སྟབས་བདེ་བོ་ཡིན་ཡང་། ཞི་བའི་གོམ་བགྲོད་དང་། རྐང་འཁོར་སྐོར་སྐྱོད། ཞི་བའི་རྒྱང་རྒྱུག་བཅས་ཀྱི་བོད་དོན་དྲིལ་བསྒྲགས་ནི་ལས་འགུལ་གྱི་དཀའ་ཚེགས་ཙམ་མིན་པར་འཛམ་གླིང་ནང་དུ་བོད་དོན་གོ་རྟོགས་ཁྱབ་ཐུབ་པའི་བསམ་བློ་བཏང་སྟེ་འབད་བརྩོན་བྱས་ཡོད་པ་མ་ཟད། ཐེངས་འདིར་ལས་འགུལ་བ་རྣམས་ཀྱིས་དཀའ་ངལ་ཁྲོད་ཁེ་ན་ཌའི་གྲོས་ཚོགས་འཐུས་མི་ཁག་ཅིག་དང་གྲོང་སྡེ་སྤྱི་ཁྱབ་བཅས་ཀྱི་རྒྱབ་སྐྱོར་གནང་འདུག ཅེས་བརྗོད་སོང་།
བོད་དོན་དྲིལ་བསྒྲགས་ཀྱི་ཞི་བའི་རྒྱང་རྒྱུག་ལས་འགུལ་བ་པདྨ་ཀུན་དགའ་ལགས་ཀྱིས། དེ་རིང་འདིར་བོད་རྒྱལ་ཁབ་ལ་སེམས་ཤུགས་ཡོད་མཁན་དང་བོད་ནང་གི་ཕ་མ་རྣམས་ལ་སྙིང་རྗེ་ཡོད་མཁན་རྣམས་འཛོམས་འདུག བོད་དོན་དྲིལ་བསྒྲགས་ཀྱི་ཞི་བའི་རྒྱང་རྒྱུག་ཐེངས་ལྔ་པ་རྒྱ་ནག་གཞུང་ཚབ་ཁང་གི་མདུན་དུ་མཚམས་འཇོག་གི་ཡོད་ལ། ང་ཚོའི་ལས་འགུལ་འདི་བོད་ཀྱི་བདེན་མཐའ་མ་གསལ་བར་དུ་ལོ་ལྟར་མུ་མཐུད་ལས་འགུལ་སྤེལ་བའི་དམིགས་ཡུལ་ཡོད། ཐེངས་འདིའི་ལས་འགུལ་ཁྲོད་ང་ཚོའི་འབོད་ཚིག་ནང་གཙོ་བོ་གཅིག་ནི་རྒྱ་གཞུང་གིས་བཙུགས་པའི་གཏན་འཇགས་སློབ་གྲྭའི་སྐོར་ཡིན། རྒྱ་གཞུང་གི་དམིགས་ཡུལ་ནི་བོད་ནང་གི་བྱིས་པ་རྣམས་སློབ་སྦྱོང་སྤྲོད་པའི་དམིགས་ཡུལ་གང་ཡང་མ་རེད། དེ་ནི་བོད་མི་རིགས་ཀྱི་སྐད་ཡིག་དང་རིག་གཞུང་བཅས་རྩ་གཏོར་གཏོང་བའི་ཆེད་དུ་བཙུགས་པ་ཞིག་རེད། རྒྱ་གཞུང་གིས་བོད་ནང་ཆུུ་རགས་བརྒྱབ་དང་རྒྱག་མུས་རེད། ཆུ་རགས་འཛུགས་སྐྲུན་བྱེད་པར་བོད་ནང་གི་དགོན་པ་དང་སློབ་གྲྭ་གཏོར་བཤིག་གཏོང་བཞིན་ཡོད། བོད་ནང་དུ་བོད་མི་རྣམས་ལ་རྒྱ་གཞུང་འོག་ཏུ་ཐོབ་ཐང་རྩོད་པའི་རང་དབང་གང་ཡང་མེད། བཙན་བྱོལ་དུ་བོད་མི་རྣམས་ཀྱིས་དེའི་ཆེད་དུ་ཅི་ཞིག་བྱེད་ཐུབ་པ་ངེས་པར་དུ་བྱ་དགོས། འདི་རུ་ང་ཚོར་རང་དབང་ཡོད་པས་བོད་དོན་ཐོག་ལས་འགུལ་སྤེལ་ཐུབ་པ་ཞིག་རེད། མི་གཅིག་གི་མི་ཚེ་ཡང་གལ་ཆེན་པོ་ཡིན་ཡང་། བོད་པ་ཞིག་ཡིན་ཚེ་བོད་ནང་དུ་ཁང་པ་རྒྱག་པའི་བསམ་བློའི་སྤོབས་པ་ཡོད་དགོས། ས་ཆ་འདི་ནི་ང་ཚོའི་ལུང་པ་མ་རེད། ཅེས་བརྗོད་སོང་།
སྐོར་སྐྱོད་དང་འབྲེལ་ནས་ལས་འགུལ་བ་པདྨ་ལགས་ཀྱིས་མུ་མཐུད་དུ། ཐེངས་འདིའི་སྐོར་སྐྱོད་ཁྲོད་ཁེ་ན་ཌའི་གྲོས་ཚོགས་འཐུས་མི་བཞི་དང་གྲོང་སྡེ་སྤྱི་ཁྱབ་བཅས་ཀྱིས་བོད་དོན་རྒྱབ་སྐྱོར་གྱི་རྣམ་པ་ཤུགས་ཆེན་བསྟན་པ་མ་ཟད། གྲོས་ཚོགས་ཐོག་བོད་དོན་གླེང་སློང་བྱ་དགོས་བའི་འབོད་སྐུལ་ཞུ་ཐུབ་པར་དགའ་ཚོར་བྱུང་། ད་ལྟ་ང་ཚོའི་ཕ་ཡུལ་བོད་དེ་རྒྱ་གཞུང་གི་འོག་ཏུ་ཡོད། བདེན་མཐའ་མ་གསལ་བར་ང་ཚོ་ཚང་མར་འགན་འཁུར་དགོས། བོད་དོན་ནི་བོད་མི་རེ་ཟུང་གི་འགན་འཁུར་གང་ཡང་མ་རེད། དེ་ཚང་མས་ག་དུས་ཡིན་ཡང་བསམ་བློ་ཡག་པོ་གཏོང་དགོས་ཀྱི་འདུག ཅེས་བརྗོད་སོང་།
ཐེངས་འདིའི་ཞི་བའི་རྒྱང་རྒྱུག་ཁྲོད་ཁེ་ན་ཌའི་གྲོང་ཁྱེར་ཊོ་རོན་ཊོ་ནས་ཨོ་ཊོ་ཝ་བར་སྤྱི་ལེ་ ༤༥༠ ནང་དུ་པདྨ་ཀུན་དགའ་ལགས་དང་། སྐལ་ལྡན་དབང་ཕྱུག་ལགས། ཟླ་བ་ནོར་བུ་ལགས། ལྷུན་འགྲུབ་རྡོ་རྗེ་ལགས། འགྱུར་མེད་ཚུལ་ཁྲིམས་ལགས་བཅས་བོད་མི་དྲུག་མཉམ་ཞུགས་གནང་ཡོད་འདུག་ལ། ༢༠༢༤ ལོའི་བོད་དོན་དྲིལ་བསྒྲགས་ཀྱི་ཞི་བའི་རྒྱང་རྒྱུག་ཐེངས་ལྔ་པའི་འབོད་ཚིག་ནང་། དང་པོ། ༧གོང་ས་རྒྱལ་བ་རིན་པོ་ཆེ་མཆོག་བོད་ནང་དུ་གདན་འདྲེན་ཞུ་བར་འཛམ་གླིང་ཚོགས་སྡེ་ཁག་གི་རྒྱབ་སྐྱོར་བྱེད་དགོས། གཉིས་པ། བོད་མཐོ་སྒང་གི་ཁོར་ཡུག་གཏོར་བཤིག་གཏོང་བཞིན་ཡོད་པར་སྲུང་སྐྱོབ་བྱེད་དགོས། གསུམ་པ། བོད་ནང་གི་བྱིས་པ་རྣམས་རྒྱ་གཞུང་གི་གཏན་འཇགས་སློབ་གྲྭར་བསྐྱལ་ཏེ་བོད་ཀྱི་སྐད་ཡིག་དང་རིག་གཞུང་སོགས་རྩ་གཏོར་གཏོང་བཞིན་པར་མྱུར་དུ་མཚམས་འཇོག་དགོས། ཞེས་ཡིན་འདུག ཕྱི་ལོ་ ༢༠༢༠ ལོ་སྟེ་ཏོག་དབྱིབས་གཉན་རིམས་སྐབས་བོད་དོན་ལས་འགུལ་བ་པདྨ་ཀུན་དགའ་ལགས་ཀྱིས་རང་ཉིད་གཅིག་པོས་ཉིན་བརྒྱད་རིང་ཨོ་ཊ་ཝ་ནས་ཊོ་རོན་ཊོ་བར་བོད་དོན་དྲིལ་བསྒྲགས་ཀྱི་ཞི་བའི་རྒྱང་རྒྱུག་གནང་འདུག
གསར་འགོད་པ། བྱམས་པ་ཚེ་རིང་།
