༧སྐྱབས་རྗེ་ཡང་སྟེང་རིན་པོ་ཆེ་མཆོག་གིས་༧གོང་ས་རྒྱལ་བ་རིན་པོ་ཆེ་མཆོག་གི་དགོངས་དོན་བསྒྲུབ་པར་གཞན་དང་མི་འདྲ་བའི་དམིགས་བསལ་གྱི་ནུས་པ་ཞིག་ཐོན་པ་ནི་སློབ་དཔོན་ཟམ་གདོང་རིན་པོ་ཆེ་མཆོག་ཡིན་ཞེས་གསུངས།
དེ་རིང་སྔ་དྲོའི་ཆུ་ཚོད་ ༨།༣༠ ཐོག་དྷ་ས་བོད་ཀྱི་ཟློས་གར་ཚོགས་པའི་ཚོགས་ཁང་དུ། ལྷ་སྤྱི་ཚོགས་ཞབས་ཞུ་དང་ཤེས་ཡོན་བསྟི་གནས་ཁང་གི་གོ་སྒྲིག་འོག ཁྲི་ཟུར་༧སློབ་དཔོན་ཟམ་གདོང་རིན་པོ་ཆེ་མཆོག་དགུང་གྲངས་ ༨༥ བཞེས་པའི་འཁྲུངས་སྐར་སྲུང་གཙིའི་མཛད་སྒོ་ཞིག་འཚོགས་ཡོད་ཅིང་། མཛད་སྒོའི་ཐོག་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་དང་། དགའ་ལྡན་ཕོ་བྲང་གི་དྲུང་ཆེ་༧སྐྱབས་རྗེ་ཡང་སྟེང་རིན་པོ་ཆེ་མཆོག བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས། ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སློབ་དཔོན་འབུམ་རམས་པ་བསོད་ནམས་རྒྱལ་མཚན་ལགས། གཞུང་དང་གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ། དྷ་ས་ཁུལ་གྱི་སེར་སྐྱ་མི་མང་བཅས་ལྷན་འཛོམས་བྱུང་འདུག
སྐབས་དེར་དགའ་ལྡན་ཕོ་བྲང་གི་དྲུང་ཆེ་༧སྐྱབས་རྗེ་ཡང་སྟེང་རིན་པོ་ཆེ་མཆོག་ནས། ང་ཚོ་བོད་མི་རིགས་ཀྱི་སྤྱི་ཡོངས་ནས་བལྟས་ཚེ་འཐབ་རྩོད་བྱེད་མཁན་གྱི་མི་རིགས་ཤིག་རེད། ང་ཚོས་འཐབ་རྩོད་བྱས་པའི་བརྒྱུད་རིམ་ནང་དུ་བཀྲ་ཤིས་པ་དང་དོན་འགྲུབ་པའི་ཆ་རྡུལ་ཕྲན་ཡོད་པ་ཐམས་ཅད་༧གོང་ས་རྒྱལ་བ་རིན་པོོ་ཆེ་མཆོག་གི་ཐུགས་རྗེ་བཀའ་དྲིན་ཉག་ཅིག་ལ་བརྟེན་ནས་བྱུང་བ་རེད། བོད་དོན་འཐབ་རྩོད་རྒྱ་གར་དུ་རྩ་བ་ཚུགས་ཤིང་རྒྱལ་སྤྱིའི་སྡིངས་ཆའི་ཐོག་ཡན་ལག་རྒྱས་ཡོད་ལ། བོད་ཀྱི་ཆོས་དང་རིག་གཞུང་ཡང་གནའ་རབས་ཀྱི་ལམ་སྲོལ་ཙམ་མིན་པར་དོན་གནས་ལྡན་པ་དང་འཛམ་གླིང་གི་གཅེས་ནོར་ཞིག་ཏུ་བསྒྱུར་ཐུབ་ཡོད། དེ་ནི་༧གོང་ས་རྒྱལ་བ་རིན་པོ་ཆེ་མཆོག་རྒྱ་གར་དུ་ཞབས་སོར་འཁོད་པ་ནས་གཞི་རྩ་ཚུགས་པ་རེད། ཞེས་དང་། བོད་པའི་འདུ་ཤེས་དང་སེམས་ཤུགས་ནི་༧གོང་ས་མཆོག་གི་མཛད་པ་འཕྲིན་ལས་ཁོ་ན་ལས་བྱུང་བར་བརྟེན། ༧མགོན་པོ་མཆོག་གི་ཞབས་པད་བརྟན་པ་དང་དགོངས་པ་བསྒྲུབ་པ་ལས་ལྷག་པའི་དོན་ཞིག་མེད་པས། ༧གོང་ས་མཆོག་གི་དགོངས་དོན་བསྒྲུབ་པར་གཞན་དང་མི་འདྲ་བའི་དམིགས་བསལ་གྱི་ནུས་པ་ཞིག་ཐོན་པ་ནི་༧སྐྱབས་རྗེ་ཟམ་གདོང་རིན་པོ་ཆེ་མཆོག་ཡིན། རིན་པོ་ཆེ་མཆོག་གི་འཁྲུངས་སྐར་འདི་འདྲ་ཞིག་བྱུང་བའང་དོན་དང་ལྡན་པ་ཞིག་ཆགས་ཀྱི་ཡོད། ཅེས་གསུངས་སོང་།
ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སློབ་དཔོན་འབུམ་རམས་པ་བསོད་ནམས་རྒྱལ་མཚན་ལགས་ཀྱིས། ༧སྐྱབས་རྗེ་ཟམ་གདོང་རིན་པོ་ཆེ་མཆོག་འདྲ་འདྲའི་ནང་ནས་མ་འདྲ་བ་ཞིག་ཆགས་པའི་རྒྱུ་མཚན་གཙོ་བོ་ནི། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་བཞིན་བསྒྲུབ་ཐུབ་པ་དང་། ༧གོང་ས་མཆོག་གི་ཆེད་དུ་ཡོད་ཚད་བློས་གཏོང་བྱས་ཏེ་ཕྱག་ལས་གནང་ཐུབ་པ་དེ་རེད། རིན་པོ་ཆེ་མཆོག་གི་སྐུ་ཚེའི་ནང་དུ་མཛད་པ་གང་གནང་ཡོད་པ་རྣམས་༧གོང་ས་མཆོག་གི་དགོངས་པ་འགྲུབ་པའི་ཆེད་དུ་ཡིན་པ་གསལ་པོ་རེད། དེའི་ཁྲོད་ནས་༧གོང་ས་མཆོག་གིས་ནང་ཆོས་དེ་དེང་དུས་ཀྱི་ཤེས་ཡོན་ལམ་ལུགས་ནང་དུ་བསྒྱུར་འདུན་ཡོད་པ་དེར། མཁས་དབང་ཟམ་གདོང་རིན་པོ་ཆེ་མཆོག་ལས་གཞན་སུ་ཡང་བྱུང་མེད། དེ་ནི་ཧ་ཅང་གདེང་ཚོད་ལྡན་པའི་ཐོག་ནས་ཞུ་ཐུབ་པ་ཞིག་རེད། ཟམ་གདོང་རིན་པོ་ཆེ་མཆོག་གིས་སྤྱི་འཐུས་ཚོགས་གཙོ་དང་བཀའ་བློན་ཁྲི་པའི་ཕྱག་ལས་གནང་སྟེ་ལོ་ངོ་ ༢༠ རིང་བཞུགས་པའི་སྐབས། བཙན་བྱོལ་བོད་མིའི་སྒྲིག་འཛུགས་ཡང་དག་པའི་ཁྲིམས་ཀྱི་དབང་བསྒྱུར་འགྲོ་ཐུབ་པ་ཞིག་བྱུང་ཡོད་པ་མ་ཟད། དམངས་གཙོ་ཀ་བ་གསུམ་གྱི་བརྗིད་སྙོམས་སྟངས་འཛིན་ཁྲིམས་ལུགས་ཐོག་ཡོང་ཐུབ་པའི་ལམ་ལུགས་གཙང་མ་བཟོས་ཡོད། དེ་བཞིན་ཤེས་ཡོན་སྲིད་ཇུས་ཀྱི་འགྲོ་སྟངས་ཀྱང་རེད། བོད་ཀྱི་སྐད་ཡིག་དང་རིག་གཞུང་རྒྱུན་ཉར་བྱེད་དགོས་ཚེ་གཞི་རིམ་སློབ་གྲྭའི་ཤེས་ཡོན་སྲིད་ཇུས་ལས་གཞན་པའི་ཐབས་ལམ་མེད་པ་རེད། འདི་དག་ནི་རིན་པོ་ཆེ་མཆོག་གི་འཁྲུངས་སྐར་སྲུང་གཙི་བྱ་དགོས་པ་དུས་ལ་བབ་པ་དང་སྤྱི་ཚོགས་ཀྱི་དགོས་མཁོ་ཞིག་ཆགས་ཀྱི་ཡོད། ཅེས་བརྗོད་སོང་།
བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས། ༧གོང་ས་རྒྱལ་བ་རིན་པོ་མཆོག་ལ་བརྟན་བཞུགས་བསྟར་འབུལ་ཞུས་པ་དང་། ༧སྐྱབས་རྗེ་ཟམ་གདོང་རིན་པོ་ཆེ་མཆོག་གི་འཁྲུངས་སྐར་སྲུང་གཙི་སོགས་ཧ་ཅང་ཡག་པོ་རེད། ༧གོང་ས་མཆོག་དང་ཟམ་གདོང་རིན་པོ་ཆེ་མཆོག་གི་བཀའ་ལ་ཉམས་ལེན་བྱེད་དགོས་པ་ནི་གལ་ཆེ་ཤོས་རེད། དེ་བཞིན་༧གོང་ས་མཆོག་ལ་ཞབས་ཞུ་འགྲུབ་མཁན་དགའ་ལྡན་ཕོ་བྲང་གི་ལས་བྱེད་རྣམས་དང་། རིན་པོ་ཆེ་མཆོག་གི་ཞབས་ཞུ་དོན་ཡོད་སོགས་ལ་དོ་སྣང་བྱ་དགོས། ཁོང་རྣམས་ལོ་ན་གཞོན་པ་དང་ཡོན་ཏན་ཡག་པོ་ཡོད་པས་གཞན་དུ་འགྲོ་ས་ཡོད་ཀྱང་། དེ་དག་བློས་གཏོང་བྱས་ཏེ་ཞབས་ཞུ་གནང་བཞིན་ཡོད། རིན་པོ་ཆེ་མཆོག་ལ་ཞབས་ཞུ་ཞུས་པ་བརྒྱུད་བོད་མི་མང་ལ་ཞབས་ཞུ་ཞུས་ཡོད་པ་རེད། ཅེས་བརྗོད་སོང་།
བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་ནས། ༧སྐྱབས་རྗེ་ཟམ་གདོང་རིན་པོ་ཆེ་མཆོག་དགུང་ལོ་ ༢༡ ནས་བཟུང་ཆོས་དགེ་དང་། སློབ་དགེ སློབ་སྤྱི། ངེས་སྟོན་པ་སོགས་ཤེས་ཡོན་སྡེ་ཚན་ཁག་ཏུ་ཕྱག་ལས་སྣ་མང་གནང་ཡོད་པ་མ་ཟད། ༧གོང་ས་རྒྱལ་བ་རིན་པོ་ཆེ་མཆོག་ནས་གསོལ་རས་བསྩལ་བའི་དམངས་གཙོའི་ལམ་ལུགས་ལ་དངོས་སུ་སློབ་སྟོན་གནང་མཁན་སློབ་དཔོན་ཟམ་གདོང་རིན་པོ་ཆེ་མཆོག་ཆགས་ཀྱི་ཡོད། གང་ཟག་གི་དབང་བསྒྱུར་ནས་ཁྲིམས་ཀྱི་ལམ་ལུགས་སུ་བསྐྱོད་ཡོད་ལ། གྲོས་ཚོགས་ཀྱི་ལམ་ལུགས་དེ་རྒྱལ་སྤྱིའི་རང་བཞིན་ལྡན་པ་ཞིག་འགྲོ་ཐུབ་པ་བྱུང་ཡོད། བཅའ་ཁྲིམས་དང་སྒྲིག་གཞི་རྣམས་རྒྱལ་སྤྱི་དང་མཐུན་པ་བཟོ་བའི་རྐང་འགན་བཞེས་མཁན་སློབ་དཔོན་ཟམ་གདོང་རིན་པོ་ཆེ་མཆོག་ཡིན། འདི་དག་ང་ཚོས་བཀའ་དྲིན་བསམ་ཤེས་བྱ་དགོས་པ་ཆགས་ཡོད། ཅེས་གསུངས་སོང་།
ཉིན་རྒྱབ་ཏུ་བཀའ་ཟུར་བློ་བཟང་སྙན་གྲགས་དང་། ཝཱར་ཎ་མཐོ་སློབ་ཀྱི་གསོ་རིག་སློབ་དཔོན་མཁས་དབང་རག་རྡོ་རིན་པོ་ཆེ་མཆོག ཀིརྟིའི་བྱེས་པ་གྲྭ་ཚང་གི་ཆེས་མཐོའི་བོད་ཀྱི་རིག་གནས་སློབ་གཉེར་ཁང་གི་སློབ་དཔོན་རེ་མདོ་སེང་གེ་ལགས་དང་། རྒྱུད་སྟོད་དཔེ་ཁྲིད་རྒན་རྡོ་རྗེ་འཛིན་པ་ཆེན་པོ་དགེ་བཤེས་མཁས་གྲུབ་ནོར་བཟང༌ལགས། ཤེས་རབ་བཟང་པོ་ལྷན་ཚོགས་ཀྱི་ཚོགས་གཙོ་དགེ་བཤེས་ཐུབ་བསྟན་ཀུན་ཕན་ལགས། བཙན་བྱོལ་བོད་མིའི་ཤེས་ཡོན་ལྷན་ཚོགས་ཀྱི་འགན་འཛིན་བསྟན་འཛིན་པདྨ་ལགས་བཅས་ཀྱིས་སློབ་དཔོན་ཟམ་གདོང་རིན་པོ་ཆེས་གྲོས་ཚོགས་ཀྱི་ཚོགས་གཙོ་དང་བཀའ་ཁྲི་གནང་སྐབས་བཙན་བྱོལ་བོད་མིའི་དམངས་གཙོའི་འཕེལ་རིམ་དང་བོད་མིའི་སྒྲིག་འཛུགས་ལེགས་བཅོས་སྐོར་དང་། དེང་རབས་བོད་ཀྱི་སྐད་ཡིག་སྲུང་སྐྱོབ་དང་རྩོམ་རིག་འགྱུར་འགྲོས་ལ་ཤུགས་རྐྱེན་ཇི་ལྟར་ཐེབས་ཡོད་མེད་སྐོར། དེ་བཞིན་རྒྱ་གར་དང་ལྷག་པར་དུ་ཧི་མ་ལ་ཡའི་སྤྱི་ཚོགས་ལ་ཤུགས་རྐྱེན་ཇི་ལྟར་ཐེབས་ཡོད་མེད་སྐོར་དང་། གཞི་རིམ་ཤེས་ཡོན་སྲིད་ཇུས་ཀྱི་གལ་གནད་དང་སློབ་དཔོན་ཟམ་གདོང་རིན་པོ་ཆེས་བོད་པའི་ཤེས་ཡོན་ལ་ཕུལ་བའི་མཛད་རྗེས་སོགས་ཀྱི་སྐོར་ལ་གཏམ་བཤད་དང་དྲི་བ་དྲིས་ལན་གནང་སོང་། གཞན་ཡང་། ༧སྐྱབས་རྗེ་ཟམ་གདོང་རིན་པོ་མཆོག་གི་འཁྲུངས་སྐར་དང་བསྟུན་ཝཱར་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་གོ་སྒྲིག་འོག ཆོས་མངོན་པ་མཛོད་ཀྱི་རྒྱལ་ཡོངས་བགྲོ་གླེང་ཞིག་འཚོགས་བཞིན་ཡོད་ཅིང་། དབུ་འབྱེད་མཛད་སྒོའི་ཐོག་༧སྐྱབས་རྗེ་ཟམ་གདོང་རིན་པོ་ཆེ་དབུ་བཞུགས་གནང་ཡོད་འདུག
གསར་འགོད་པ། བྱམས་པ་ཚེ་རིང་།
