རྒྱ་གར་གྱི་མངའ་སྡེ་ ༢༠ ནང་སྦག་སྦག་སྐོར་སྐྱོད་གནང་རྒྱུ་རེད་འདུག

དབུས་བོད་ཀྱི་གཞོན་ནུ་ལྷན་ཚོགས་ཀྱིས་ཟླ་གཉིས་རིང་རྒྱ་གར་བྱང་ཤར་ཁུལ་གྱི་མངའ་སྡེ་ཁག་ ༢༠ ནང་སྦག་སྦག་སྐོར་བསྐྱོད་བྱས་ཏེ་བོད་དོན་དྲིལ་བསྒྲགས་གནང་རྒྱུ་ཡིན་འདུག

དབུས་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག ཟླ་འདིའི་ཕྱི་ཚེས་ ༢༢ ཉིན་འཕགས་བོད་གཉིས་ཀྱི་ས་མཚམས་མོན་རྟ་དབང་གི་འབུམ་ལ་ནས་རྒྱ་གར་བྱང་ཤར་ཁུལ་དུ་བོད་དོན་དྲིལ་བསྒྲགས་ཀྱི་སྦག་སྦག་སྐོར་སྐྱོད་ཅིག་མགོ་འཛུགས་བྱ་རྒྱུ་ཡིན་ལ། སྦག་སྦག་སྐོར་སྐྱོད་དེ་རྒྱ་གར་གྱི་མངའ་སྡེ་ཨ་རུ་ན་ཅལ་དང་། ཨ་སམ། ནཱ་གྷ་ལན་ཌི། མེ་གྷ་ལཱ་ཡཱ། ནུབ་བྷང་གྷལ། བྷི་ཧར། ཇར་ཁན་ཌི། ཨོ་ཌི་ཤ། ཆཱ་ཧ་ཌི་སི་གྷར། ཨན་རྡི་རཱ། ཏེ་ལན་གྷ་ནཱ། ཀར་ནཱ་ཌ་ཀ། གྷོ་བ། མཱ་ཧཱ་ར་ཤ་ཌི་ར། མཱ་རྡ་ཡ། གྷུ་ཇུ་ར་ཐི། རཱ་ཇཱ་ས་ཐིན། ལྡི་ལི།  ཨོ་ཌིར་པར་ཌི་ཤ་བཅས་ཀྱི་ནང་སྐོར་སྐྱོད་བྱ་རྒྱུ་ཡིན་འདུག

 འདི་གའི་གསར་འགོད་པས་དབུས་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་དྲུང་ཆེ་བསོད་ནམས་ཚེ་རིང་ལགས་སུ་སྦག་སྦག་སྐོར་སྐྱོད་དེའི་སྐོར་དྲིས་པར་ཁོང་གིས། ཟླ་འདིའི་ཕྱི་ཚེས་ ༡༩ དང་ ༢༠ གཉིས་ལ་ལོ་ལྟར་འཕགས་བོད་མཛའ་འབྲེལ་ཚོགས་པའི་གོ་སྒྲིག་འོག ཨ་སམ་མངའ་སྡེ་གྷོ་ཝ་ཧཱ་ཏི་ནས་མོན་རྟ་དབང་བར་ལས་འགུལ་ཞིག་སྤེལ་གྱི་ཡོད་པའི་མཇུག་སྡོམ་དང་བསྟུན། ཐེངས་འདིའི་རྒྱ་གར་བྱང་ཤར་ཁུལ་གྱི་སྐོར་སྐྱོད་མགོ་འཛུགས་རྒྱུ་ཡིན། ཐེངས་འདིའི་ལས་འགུལ་ནང་དྷ་རམ་ས་ལ་དང་། ལ་དྭགས། མི་ན་ལི། སྒང་ཏོག ལྡི་ལི། བདེ་སྐྱིད་གླིང་བཅས་ནས་མཉམ་ཞུགས་བྱེད་ཀྱི་ཡོད་ཅིང་། ཐེངས་འདིར་ཟླ་གཉིས་རིང་སྦག་སྦག་སྐོར་སྐྱོད་ལས་འགུལ་བ་གྲངས་ ༡༥ ཡིས་རྩིས་བརྒྱབ་ཡོད། ཐེངས་འདིའི་སྦག་སྦག་སྐོར་སྐྱོད་བྱེད་མཁན་རྣམས་ལོ་ ༢༠ ནས་ ༤༠ བར་གཞོན་སྐྱེས་ཡིན། རྒྱ་གར་བྱང་ཤར་ཁུལ་གྱི་མངའ་སྡེ་ཁག་གཙོས་རྒྱ་གར་གྱི་མངའ་སྡེ་ ༢༠ ནང་དུ་ལམ་ཐག་སྤྱི་ལེ་ ༡༥༠༠༠ ལྷག་ལ་སྦག་སྦག་སྐོར་སྐྱོད་ཀྱི་བོད་དོན་དྲིལ་བསྒྲགས་བྱ་རྒྱུ་ཡིན། ཞེས་འགྲེལ་བརྗོད་གནང་བྱུང་།

ཐེངས་འདིའི་ལས་འགུལ་གྱི་དམིགས་ཡུལ་སྐོར་ལ་ཁོང་གིས། ད་ལྟའི་བར་དུ་རྒྱ་གཞུང་གིས་ཁྲིམས་མེད་ལུགས་མེད་ཀྱི་ཐོག་ནས་བོད་ཀྱི་ཆོས་དང་རིག་གཞུང་རྩ་མེད་བཟོ་ཐབས་ཀྱི་སྲིད་ཇུས་ལག་བསྟར་བྱེད་བཞིན་ཡོད་པས།  བོད་ཕྲུག་རྣམས་རྒྱ་གཞུང་གི་གཏན་འཇགས་སློབ་གྲྭར་བཙན་གྱིས་གཏོང་བའི་གནད་དོན་སོགས་ཀྱི་ཐོག་རྒྱལ་སྤྱིའི་སྤྱི་ཚོགས་ནས་རྒྱ་གཞུང་ལ་གནོན་ཤུགས་སྤྲོད་དགོས་པའི་དགོས་འདུན་དང་། རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུ་བ་དང་མཉམ་དུ་རྒྱ་གར་གྱི་བདེ་འཇགས་ལ་དམིགས་པའི་བོད་རང་བཙན་གྱི་བདེན་པའི་ལོ་རྒྱུས་ལ་རྒྱབ་སྐྱོར་བྱས་ཏེ་གྲོས་ཆོད་གཏན་འབེབས་གནང་བའི་འབོད་སྐུལ། དེ་བཞིན་རྒྱ་གཞུང་གིས་བོད་ནང་ཆུ་མཛོད་གསར་རྒྱག་དང་། འཛུགས་སྐྲུན་ལས་གཞི། གཏེར་ཁ་སྔོག་འདོན། ཁོར་ཡུག་གཏོར་སྐྱོན་གཏོང་བཞིན་པ་མཚམས་འཇོག་དགོས་པའི་འབོད་སྐུལ་དོན་ཚན་གསུམ་གྱི་ཐོག་ནས་རྒྱ་གར་མངའ་སྡེའི་གྲོས་ཚོགས་དང་རྒྱ་གར་དབུས་གྲོས་ཚོགས་འཐུས་མི་རྣམས་ལ་འབོད་སྐུལ་ཞུ་འཆར་ཡོད། ཅེས་འགྲེལ་བརྗོད་གནང་བྱུང་།

ཡང་ཁོང་གིས། ཞི་བའི་གོམ་བགྲོད་དང་། རྐང་འཁོར་སྐོར་སྐྱོད། སྦག་སྦག་སྐོར་སྐྱོད་བཅས་ཀྱི་ལས་འགུལ་ས་གནས་ས་ཐོག་ཏུ་སྤེལ་དུས་རྒྱ་གར་མི་མང་གི་དོ་སྣང་ཤུགས་ཆེན་བྱེད་ཀྱི་འདུག ས་གནས་ཀྱི་གནད་ཡོད་མི་སྣར་ཐུག་འཕྲད་དང་། གསར་འགྱུར་བརྒྱུད་ལམ་མང་པོ་ཞིག་ནས་བོད་དོན་དྲིལ་བསྒྲགས་བྱེད་ཐུབ་ཀྱི་འདུག བོད་རིགས་ནང་ཁུལ་དུའང་བོད་ནང་དུ་དཀའ་ངལ་འཕྲད་བཞིན་པ་དང་། བོད་དོན་འཐབ་རྩོད་གསོན་པོོར་གནས་དགོས་པའི་གོ་རྟོགས་ཐད་ཕན་ཐོགས་ཡོང་གི་འདུག  བོད་ནང་གི་བོད་མིའི་གནས་སྟངས་ཛ་དྲག་ཆེ་ནས་ཆེ་རུ་འགྲོ་བཞིན་ཡོད་པས། བོད་དོན་དྲིལ་བསྒྲགས་བྱེད་དགོས་པ་གལ་ཆེན་པོ་རེད། ཅེས་བརྗོད་བྱུང་།

དབུས་གཞོན་ནུ་ལྷན་ཚོགས་ཀྱི་གོ་སྒྲིག་འོག ཕྱི་ལོ་ ༢༠༠༨ ཟླ་ ༣ ཚེས་ ༡༠ ཉིན་གསུམ་བཅུའི་དུས་དྲན་དང་བསྟུན། དྷ་ས་ཐེག་ཆེན་གཙུག་ལག་ཁང་ནས་མགོ་བཙུགས་ཏེ་ཉིན་གྲངས་ ༡༠༠ རིང་གོམ་བགྲོད་གནང་སྟེ། འཕགས་བོད་ས་མཚམས་ཤཱིབ་ཀི་ལ་(Shiv Kala)ཞེས་པ་སྟེ་བོད་ཀྱི་ས་ཁོངས་སུ་བསླེབ་རྒྱུར་སྤྱི་ལེ་ ༡༠ ཙམ་ལས་མེད་སར་འབྱོར་ཡོད་ཀྱང་། རྒྱ་གར་གྱི་དམག་མིས་འཛིན་བཟུང་བཀག་སྡོམ་བྱས་ཡོད་པ་རེད། དེ་ནི་བཙན་བྱོལ་བོད་མིའི་ལོ་རྒྱུས་ཁྲོད་ཉིན་གྲངས་ ༡༠༠ ལྷག་རིང་བོད་ལ་གོམ་བགྲོད་བྱས་པ་དུས་ཡུན་རིང་ཤོས་ཤིག་ཆགས་ཡོད་པ་རེད། དེ་བཞིན་ཕྱི་ལོ་ ༢༠༠༨ ཟླ་ ༤ ཚེས་ ༩ ཉིན་ནས་ཟླ་ ༥ ཚེས་ ༣༡ བར་ཉིན་གྲངས་ ༥༥ རིང་རྒྱ་གར་གྱི་རྒྱལ་ས་ལྡི་ལི་ཇཱན་ཏར་མན་ཏར་ནས་རྡོ་རྗེ་གདན་བར་སྤྱི་ལེ་ ༡༢༥༠ ལྷག་ལ་མི་གྲངས་ ༡༤༠ ལྷག་གིས་གོམ་བགྲོད་བྱས་ཡོད་པ་རེད།

གསར་འགོད་པ། བྱམས་པ་ཚེ་རིང་།

རྩོམ་སྒྲིག་བྱེད་མཁན། པདྨ་མཚོ།