བཀའ་སྤྱི་གཉིས་ཀྱིས་རྒྱ་གར་གྱི་སྲིད་བློན་ཟུར་བ་སྐུ་ཞབས་མན་མོ་ཧན་སིང་མཆོག་འདས་གྲོངས་སུ་གྱུར་བར་མྱ་ངན་ཞུས།

དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་བོད་མི་མང་སྤྱི་འཐུས་མཁན་པོ་བསོད་ནམས་བསྟན་འཕེལ་མཆོག་རྣམ་གཉིས་ཀྱིས་རྒྱ་གར་གྱི་སྲིད་བློན་ཟུར་བ་སྐུ་ཞབས་མན་མོ་ཧན་སིང་མཆོག་འདས་གྲོངས་སུ་གྱུར་བར་ཤུལ་ལུས་ནང་མིར་སེམས་གསོ་ཞུས། 

ཟླ་འདིའི་ཕྱི་ཚེས་ ༢༦ ཉིན་རྒྱ་གར་གྱི་སྲིད་བློན་ཟུར་བ་སྐུ་ཞབས་མན་མོ་ཧན་སིང་མཆོག་དགུང་ལོ་ ༩༢ སྟེང་རྒྱ་གར་རྒྱལ་ས་ལྡི་ལི་རུ་འདས་གྲོངས་སུ་གྱུར་ཏེ། རྒྱ་གར་གཞུང་དམངས་གཉིས་ཀྱིས་སྲིད་བློན་ཟུར་བ་མཆོག་གི་ཤུལ་ལུས་ནང་མི་རྣམས་ལ་གདུང་སེམས་མཉམ་སྐྱེད་ཞུ་མུས་ཡིན་པ་ལྟར། དབུས་བོད་མིའི་སྒྲིག་འཛུགས་ཀྱི་བཀའ་སྤྱི་གཉིས་ཀྱིས་ཀྱང་འདས་པོ་ཁོང་གི་ཤུལ་ལུས་ནང་མི་རྣམས་ལ་གདུང་སེམས་མཉམ་སྐྱེད་ཞུས་ཡོད་འདུག 

ཁ་སང་ཕྱི་ཚེས་ ༢༩ ཉིན་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གི་སྐུ་སྒེར་གྱི་ཨེག་སི་(X) སྤྱི་ཚོགས་དྲ་ལམ་སྟེང་། ངས་དབུས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་བྱས་ཏེ། རྒྱ་གར་གྱི་དམངས་གཙོའི་ལམ་ལུགས་ཁོངས་སུ་ཆུད་ཅིང་ཕུགས་དམིགས་མངའ་བའི་སྐུ་ཞབས་མོ་ཧན་སིང་མཆོག་འདས་གྲོངས་སུ་གྱུར་བར། སྙིང་དབུས་ནས་མྱ་ངན་ཞུ་ཡི་ཡོད། ང་ཚོས་གུས་བརྩི་དང་ལྡན་པའི་ཐོག་ནས་ཁོང་གི་གཡོ་བ་མེད་པའི་བོད་དོན་ལ་རྒྱབ་སྐྱོར་དང་༧གོང་ས་རྒྱལ་བ་རིན་པོ་ཆེ་མཆོག་ལ་གུས་བརྩི་ཆེན་པོ་ཡོད་པ་དེ་དྲན་གྱིན་ཡོད། ཅེས་གསུངས་འདུག 

ཡང་ཟླ་འདིའི་ཕྱི་ཚེས་ ༢༧ ཉིན་བོད་མི་མང་སྤྱི་འཐུས་མཁན་པོ་བསོད་ནམས་བསྟན་འཕེལ་མཆོག་གིས། སྐུ་ཞབས་མན་མོ་ཧན་སིང་མཆོག་གི་སྐུ་ཟླ་གྷི་ཤ་རན་(Gursharan Kaur) ལགས་ཀྱི་མཚན་ཐོག་ཏུ་སེམས་གསོའི་འཕྲིན་ཞིག་གི་བསྐུར་བའི་ནང་། ཁོང་སྐུ་གཤེགས་པ་དེས་རྒྱ་གར་དང་། འཛམ་གླིང་ནང་འཚོ་བ་སྟབས་བདེར་རོལ་མཁན་དང་། མཁྱེན་རྒྱ་ཤིན་ཏུ་ཡངས་པའི་ཆབ་སྲིད་ཀྱི་དབུ་འཁྲིད་སྙན་གྲགས་ཅན་ཞིག་མེད་པར་གྱུར། ཁོང་གི་ཞུམ་པ་མེད་པའི་སྤྱོད་བཟང་དང་། རྒྱལ་ཁབ་ཆེད་གཟེངས་སུ་ཐོན་པའི་ཞབས་འདེགས་ཞུས་པ་རྣམས་ཚང་མས་རྟག་ཏུ་དྲན་ངེས་ཡིན། ངས་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ། ཁྱེད་ནང་མི་ལྷན་རྒྱས་དང་། ཁོང་གི་རྗེས་འབྲངས་པ་རྣམས་ལ་ཐུགས་གསོ་ཞུ་རྒྱུ་དང་། དམ་པ་ཁོང་ལ་མྱ་ངན་གུས་འདུད་དང་། ཁོང་གི་ཆེད་དུ་སྨོན་ལམ་འདེབས་རྒྱུ་ཡིན། དཀའ་སྡུག་ཆེ་བའི་དུས་སྐབས་འདིར་བོད་མི་ཚང་མས་སྐུ་ཉིད་ལ་གདུང་སེམས་མཉམ་སྐྱེད་ཞུ་རྒྱུ་ཡིན། ཞེས་གསུངས་ཡོད་འདུག 

ཟླ་འདིའི་ཕྱི་ཚེས་ ༢༨ ཉིན་རྒྱ་གར་གྱི་རྒྱལ་ས་ལྡི་ལི་རུ་སྲིད་བློན་ཟུར་བ་ཁོང་གི་འདས་མཆོད་སྒྲུབ་སྐབས། རྒྱ་གར་གྱི་སྲིད་བློན་མུ་དྷི་མཆོག་གིས་དབུས། འབྲུག་རྒྱལ་འཇིགས་མེད་གེ་སར་རྣམ་རྒྱལ་མཆོག་དང་ རྒྱ་གར་དབུས་གཞུང་གིས་དཔོན་རིགས་མང་ཅག་ཀུང་ཕེབས་ཡོད་འདུག རྒྱ་གར་གྱི་སྲིད་བློན་ཟུར་བ་སྐུ་ཞབས་མོ་ཧན་སིང་མཆོག་ནི་ཕྱི་ལོ་ ༡༩༣༢ ལོའི་ཟླ་ ༡༢ ཚེས་ ༢༤ ཉིན་རྒྱ་གར་པན་ཇབ་མངའ་སྡེའི་ཁོངས་སུ་སྐྱེས། ཁོང་གིས་རྒྱ་གར་པན་ཇབ་གཙུག་ལག་སློབ་གཉེར་ཁང་ནས་ཚོང་རིག་ཐོག་རིག་གནས་རབ་འབྱམས་པ་དང་གཙུག་ལག་རབ་འབྱམས་པའི་སློབ་གཉེར་གནང་རྗེས། དབྱིན་ཡུལ་གྱི་ཁེམ་བྷི་རེ་ཇུ་(University of Cambridge) གཙུག་ལག་སློབ་གཉེར་ཁང་དུ་ཚོང་རིག་ཐོག་སློབ་སྦྱོང་གནང་། དེ་ནས་རྒྱ་གར་ལ་ཕྱིར་ལོག་ཕེབས་ནས་ཕྱི་ལོ་ ༡༩༦༣ ནས་ ༡༩༦༥ བར་པན་ཇབ་གཙུག་ལག་སློབ་གཉེར་ཁང་གི་ཚོང་རིག་སློབ་དཔོན་གནང་། ཕྱི་ལོ་ ༡༩༦༦ ནས་ ༡༩༩༩ བར་མཉམ་འབྲེལ་རྒྱལ་ཚོགས་ཀྱི་ཚོང་དོན་ཡར་སྐྱེད་ཚན་པར་ཕྱག་ལས་གནང་རྗེས། རྒྱ་གར་གྱི་ཕྱི་སྲིད་ཚོང་དོན་བློན་ཆེན་ལས་ཁུངས་ཀྱི་སློབ་སྟོན་པ་དང་། རྒྱ་གར་གྱི་ཕྱི་སྲིད་བློན་ཆེན་སོགས་གནང་། ཕྱི་ལོ་ ༢༠༠༤ ལོར་འོས་བསྡུའི་ལམ་ནས་རྒྱ་གར་གྱི་སྲིད་བློན་ཐེངས་བཅུ་གསུམ་པར་འདེམས་ཏེ་ཐེངས་གཉིས་ལ་རྒྱ་གར་གྱི་སྲིད་བློན་གནང་།

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།